Абдуқодири Абдуқаҳҳор, мудири китобхонаи ба номи Абулқосими Лоҳутӣ ва корманди пешини Кумитаи телевизион ва радио мегӯяд, ба хотири ӯ 2 сол мешавад, ки сабти чорабиниҳои китобхонаи Лоҳутӣ дар телевизиони “Тоҷикистон”-у “Сафина” мамнӯъ аст. Ба гуфтаи ӯ, далели аслии “рақиб” шуданаш директори ТВ “Пойтахт” таъин гардидану дар қаламрави шаҳр рақобати эҷодиро тоб наовардани ин шабакаҳо аст.
Ҷаноби Абдуқаҳҳор ин нуктаро дар як посух ба Маҳмадсаид Шоҳиён, раиси Кумитаи телевизион ва радиои Тоҷикистон таъкид намудааст. Авохири моҳи июни соли равон ӯ дар саҳфаи фейсбукаш навишт, ки “раиси Кумитаи ТВ ва Радио садову симоямро баставу дар «рӯйхати сиёҳ» шомилам намудааст, ростӣ сабабашро худам ҳам намедонам”.
А.АБДУҚАҲҲОР: РАИСИ КУМИТА МАРО БА “РӮЙХАТИ СИЁҲ” ШОМИЛ НАМУДААСТ
Иддаое, ки Маҳмадсаид Шоҳиён, раиси Кумитаи телевизион ва радиои Тоҷикистон 14 июл дар нишасти хабарие дар Душанбе рад кард. Шоҳиён таъкид кард, Абдуқодири Абдуқаҳҳор дастпарвардаи худи Кумитаи телевизион ва радио аст ва “дар сурати пешниҳоди лоиҳаҳои нав мо омодаем, ҳамкорӣ кунем”.
САДО: ШОҲИЁН ДАР БОРАИ “РӮЙХАТИ СИЁҲ” ВА ДАЪВОИ А.АБДУҚАҲҲОР: МУШК ОН АСТ, КИ ХУД БИБӮЯД
Абдуқодири Абдуқаҳҳор посухи худро унвонии “Озодагон” фиристодааст ва он бидуни таҳрир айнан пешниҳоди хонандаҳо мегардад. Дар сурати вокуниши ҷониби дигар ба ин навишта, хабаргузорӣ онро низ ба нашр хоҳад расонд.
“Аввалан, ҷанобашон агар “Фарҳанг” дошта бошанд,(манзурам фарҳанги тафсири андарзу мақолҳо) бори дигар “Мушк он аст…”-ро хонанд, зеро ноҷо истифода шудааст. Ба ҳар сурат ба олим – роҳбари қаламкаш-журналистони давлатӣ дарк накардани маънии мақоли мардумӣ шоиста нест, инчунин бо мантиқи ғалат суҳбат кардан. Не, не хато накардам, чанде қабл домулло дар мавзуи “реклама ва тиҷорат” номзадӣ ҳимоя карданд, яъне тайи ду соли Раиси Кумита — бузургтарин ниҳоди идеологӣ будунашон умуман дар фикри идеологияи миллӣ набудаанд. Баъдан, соли дуввум аст, ки дархости ҳамкориям болои мизи кории Маҳмадсаид Шоҳиён хоб асту на камтар аз 3 маротибагӣ муовин – куратори Радиои Тоҷикистон Назира Амирбекзода ва Директори радио шогирди азизам Фаррух Зиёев дар боби ҳамкории ман ҷавоби рад шунидаанд. Солисан, эшон дар чанд суҳбате бо мақомоти роҳбарии Кумита арз доштаанд, ки мамнуъ намудани сурату овози ман дар расонаҳои давлатӣ супоришу дархости “боло” аст. Тазаккур ба маврид аст, ки “рақиб” шудани ман омилаш Директори ТВ “Пойтахт” таъин гардидану дар қаламрави шаҳр рақобати эҷодиро тоб наовардани шабакаҳои ин ниҳод аст. Ва боз дарднокаш он аст, ки ба хотири ман шуда 2 сол аст аз чорабиниҳои яке аз куҳантарин маъбади фарҳангии шаҳри Душанбе Китобхонаи ба номи А.Лоҳутӣ дар “Шабакаи аввал”-у “Сафина”навор гирифтан мамнуъ аст. Даҳҳо нафар ҳамкорони собиқам борҳо бахшиш пурсидаанд, ки наметавонанд мусоҳиб шудану чорабиниҳои китобхонаро иникос намудан, зеро “дастур” гирифтаанд. Ману ман баринҳо, ки кам нестему рӯзноманигорӣ ё журналисти радиотелевизион касбамон, зиндагиямон ҳаст, бояд чи кор кунем? Ба расонаҳои хориҷӣ баъди 20–30 соли содиқона ба давлат хидмат намудан даъват намекунанду виҷдон ҳам намебардорад, ба хориҷа равӣ дигар хел мефаҳманд…
Баъди раисии ҷаноби Шоҳиён тақрибан тамошобин надоштани шабакаҳои давлатӣ мавзӯи суҳбати алоҳида.
http://www.ozodagon.tj/index.php?newsid=30608