[b]Сохтор, мизони маблағгузорӣ ва тарзи ироаи хабар дар шабакаҳои телевизиюни давлатии Тоҷикистон шабеҳи даврони шӯравии пешин аст.[/b]

Дар маҳфили «Ҳамкории иҷтимоъӣ»-и Шӯрои ҷамъиятии Тоҷикистон дар рӯзи панҷшанбеи 27 сентябр, дар бораи сатҳи фаъъолият ва вазъи шабакаҳои телевизиюни давлатии Тоҷикистон чунин натиҷагирӣ шуд.

Саймуддин Дӯстов, раиси Сандуқи «ИНДЭМ» ва муассиси нашрияи «Нигоҳ», гуфт, ки шабакаҳои расмии телевизиюни Тоҷикистон рақиб надоранд, аз сӯйи давлат идора мешаванд ва дар пахши хабарҳо мустақил нестанд.

Ба гуфтаи оқои Дӯстов, додани муҷаввиз ба шабакаҳои телевизиюнӣ низ дар инҳисори давлати Тоҷикистон буда ва дарёфти муҷаввизи фаъъолият барои шабакаҳои мустақил душвор аст.

Зимнан, бо вуҷуди муҷаҳҳаз будан бо таҷҳизоти мудерни фаннӣ шабакаи мустақилли телевизиюнии «Asia-Plus» дар муддати чанд сол натавонистааст муҷаввизи фаъъолият дарёфт кунад.

Аз сӯйи дигар, Иззатманд Саломов, раиси созмони «Интернюз-нетворк», аз наҳваи хабаррасонии шабакаҳои телевизиюни давлатии Тоҷикистон интиқод карда ва гуфт, ки ин шабакаҳо аз пахши хабарҳои доғи кишвар имтиноъ меҷӯянд. Дар натиҷа, сокинони Тоҷикистон ин гуна ахборро аз шабакаҳои телевизиюнии кишварҳои хориҷӣ дарёфт мекунанд.

Гуфта мешавад, хабарҳо дар мавриди ҳаводиси табиъӣ, назири обхезӣ, сел ё оташсӯзӣ, ки талафоти ҷонӣ ба дунбол доранд, аз тариқи телевизиюнҳои расмии Тоҷикистон пахш намешаванд.

Масалан, оташсӯзии бузург дар бахши умдафурӯшии бозори «Корвон» дар шаҳри Душанбе дар аволии моҳи ҷорӣ, ки боъиси талафоти ҷонӣ ва хисороти зиёди молӣ шуда ва эътирозоти тоҷиронро дар пай дошт, дар барномаҳои хабарии шабакаҳои телевизиюни расмии Тоҷикистон пӯшиш наёфтааст.

Ба эътиқоди ширкаткунандагони ҳамоиш, пойин будани сатҳи барномаҳо ва рақобатпазир набудани барномаҳои телевизиюнҳои давлатии Тоҷикистон аз далоили коҳиши теъдоди бинандагони шабакаҳои миллӣ дар соли ҷорӣ будааст.

Асомиддин Атоев, раиси Фарҳангистони маҷозии «ICT 4D» (текнулуҷии иттилоъотию иртибототӣ) гуфт, ки дар шароити кунунӣ бинанда дар интихоби шабака озод асту танҳо шабакаи телевизиюни беҳтаринро тамошо хоҳад кард.

Оқои Атоев гуфт, ки дар бештари маворид сокинони манотиқи марзии Тоҷикистон бо Афғонистон, Узбакистон ва Қирғизистон барномаҳои телевизиюнии кишварҳои ҳамсояро тамошо мекунанд.

Аз ҷумла, ба гуфтаи ӯ, сокинони ноҳияи Мастчоҳи вилояти Суғд, дар шимоли Тоҷикистон, барномаҳои телевизиюни Узбакистонро бар телевизиюнҳои миллӣ тарҷеҳ медиҳанд. Дар ин минтақа 5-6 шабакаи телевизиюнии Узбакистон пахш шуда ва аз лиҳози ҳунари таҳияи барнома ва ҷаззобияти мавзӯъоти онҳо аз барномаҳои телевизиюни Тоҷикистон пешӣ доранд.

Дар ҳамин ҳол, дуктур Муллозуҳур Тоҳирӣ, пажӯҳишгари тибби мардумии Тоҷикистон, далели дигари коҳиши теъдоди бинандагонро ба системи пахши рақамӣ гузаштани чаҳор шабакаи давлатии телевизиюни Тоҷикистон дар авоили соли ҷорӣ марбут хонд.

Ба гуфтаи оқои Тоҳирӣ, худи ӯ шоҳид будааст, ки дар навоҳии Айнию Панҷакент ва шаҳри Турсунзода сокинон имкони харидории телевизори мудели ҷадид ва таҷҳизоти фаннӣ барои дарёфти амвоҷи пахши рақамии чаҳор шабакаи давлатии Тоҷикистонро надоштаанд.

Вале гуфта мешавад, то ҳол дар Тоҷикистон ниҳоди мустақилле барои арзёбии фаъъолияти шабакаҳои телевизиюн ва теъдоди бинандагони онҳо вуҷуд надошта ва бештари арқом дар ин замина тахминӣ аст.

Ивар Виккӣ, раҳбари дафтари Созмони Амният ва Ҳамкории Урупо дар Тоҷикистон, гуфт тибқи як пажӯҳиш, ки ду сол қабл ин ниҳод дар Тоҷикистон анҷом додааст, 77 дар сади ҷамъияти ин кишвар аз тариқи амвоҷи қиёсӣ (аналог) барномаҳои телевизиюнро тамошо карда ва 22 дар сад дорои онтенҳои моҳвораӣ будаанд.

Мизони корбарони телевизиюни кобелӣ дар Тоҷикистон ба 1 дар сад баробар будааст.

Дар ҳамин ҳол, Шаҳло Акобирова, раиси созмони «Хома», гуфт, бар асоси таъаҳҳудоти худ дар ҳамоиши байналмилалии «Женева-2006» Тоҷикистон муваззаф шудааст, ки то моҳи июни соли 2015 пахши рақамии куллияи шабакаҳои телевизиюнии кишварро таъмин кунад.

Ин ҳамоиш дар моҳи майи соли 2006 ба ибтикори Созмони Ҷаҳонии Иртиботи Электрунӣ, як ниҳоди вобаста ба СММ, ва бо ширкати намояндагон аз 104 кишвари ҷаҳон дар Женев баргузор шуда, масоили марбут ба гузариш ба пахши рақамии барномаҳои телевизиюнро матраҳ карда буд.

Хонуми Акобирова гуфт, дар ҳоле ки барномаҳои шабакаҳои телевизиюни давлатии Тоҷикистон аз ба навҳи рақамӣ (диҷитол) ва бо кайфияти олӣ пахш мешавад, аммо «маҳсулоти телевизиюнҳои Тоҷикистон дар сатҳи минтақа рақобатпазир нест.»

Ӯ гуфт, ки ба ин далел мизони пахши таблиғоти бозаргонӣ (реклом) низ дар шабакаҳои телевизиюни Тоҷикистон дар муқоиса бо кишварҳои ҳамсоя ночиз буда ва дар соли гузашта пуле, ки тавассути пахши таблиғот ба даст омада, ҳамагӣ се милюн дулор будааст. Ин рақам дар Қирғизистон 7 милюн дулор ва дар Қазоқистон 850 милюн дулорро ташкил додааст.

Дар ҳамин ҳол, Саидмурод Фаттоев, мушовири раиси ҷумҳурии Тоҷикистон, аз хатароти ношӣ аз истифода аз фанновариҳои ҷадиди интернетӣ тавассути гурӯҳҳои теруристӣ ва бунёдгаро ҳушдор дода ва гуфт, ки расонаҳои Тоҷикистон бояд барои «муборизаи иттилоъотӣ барои ҳифзи манофеъи миллӣ», бахусус, амнияти давлатӣ ва ҷомеъа хидмат кунанд.

Источник: http://www.bbc.co.uk/tajik/news/2012/09/120927_mm_digital_tv.shtml

[b]Мумкин аст, ба зудӣ 80 дарсади сокинони Тоҷикистон аз тамошои телевизионҳои маҳаллӣ маҳрум шаванд.[/b]

Гузариш ба пахши рақамии намоишҳои телевизионӣ сокинони Тоҷикистонро маҷбур хоҳад кард, аз баҳри телевизорҳои оддии хеш бароянд ё ҳадди ақал дастгоҳи махсуси қабули мавҷ харидорӣ кунанд. Ин харҷест байни 70 то 500 доллари амрикоӣ, ки барои аксари хонаводаҳо гаронӣ хоҳад кард.

Ивар Вики, сафири САҲА (ОБСЕ) дар Тоҷикистон гуфт, пажӯҳише дар ин замина нишон дода, ки 97 дарсади хонаводаҳои тоҷик телевизор доранд ва 80 дарсади аҳолӣ тамошобини фаъоли барномаҳои телевизиониянд. Аммо 67 дарсади сокинон ба ғайр аз тамошои 6 шабакаи маҳаллӣ дигар интихоб надоштаанд. Сафири САҲА мегӯяд, баъд аз соли 2015-ум, вақте ки Тоҷикистон чун ҳама кишварҳои дунё пурра ба пахши рақамӣ мегузарад, ин рақамҳо метавонанд ба таври назаррас тағйир ёбанд.

Гузариш ба пахши рақамӣ ба ҳар як сокини кишвар дахл хоҳад кард ва аз ин рӯ барои ин давраи гузариш бояд ҳама омода бошанд»,-гуфт сафири САҲА. Вай илова кард, «агар фанноварии нав нодуруст роҳандозӣ шавад, бисёре аз экранҳои телевизорҳои сокинони Тоҷикистон торик гардида, шумори аъзами онҳоро аз тамошои барномаҳои телевизион дар шакли нав маҳрум мекунад. Аз ин рӯ, миллион тамошобини тоҷик бояд огоҳ ва онҳо бовар карда шаванд, ки каме маблағ сарф карда телевизори нав ё мавҷқабулкунандаи рақамӣ харидорӣ кунанд.»

Бисёре аз созмонҳои ҷамъиятӣ мегӯянд, барои омодагӣ ба телевизиони рақамӣ, бояд қабл аз дигарон бозор ва бозоргонҳо омода шаванд ва маҳсулотеро ворид намоянд, ки боиси фиреб ва саргардонии мардум нашавад. Шаҳло Акобирова, раҳбари созмони ҷамъиятии «Хома», мегӯяд, «масъалаи муҳим он аст, ки кадом намуди чунин асбобҳои мавҷқабулкунанда ворид мешавад. Дар Чин беш аз 40 коргоҳест, ки ба истеҳсоли ин дастгоҳ машғуланд. Муҳим аст, ки онҳо ба стандартҳои фаннии ширкати дастраскунандаи мавҷи рақамии Тоҷикистон мувофиқат кунанд.»

Ин баҳсу баррасиҳо ва таъкидҳову пешбиниҳо дар ҳоле садо медиҳанд, ки бахши умдаи тамошобини тоҷик мегӯянд, ҳоло ки шабакаҳои телевизиони Тоҷикистон на дар ҳама кунҷу канори кишвар пахш мешаванд, пас гуфтан душвор нест, ки баъд аз ҷорӣ шудани телевизиони рақамӣ вазъият чигуна хоҳад шуд. Бархе ҳам чандон нигарон нестанд ва мегӯянд, барои тамошои чаҳор шабакаи телевизиони маҳаллӣ, ки барномаҳои ҷолиб надоранд, маблағи иловагӣ сарф нахоҳанд кард. Онҳо бовар доранд, ки барномаҳои дилгиркунанда якҷоя бо ин таҳаввулоти техникӣ мардумро умуман аз телевизион дур хоҳад кард.

«Бе ин ҳам барномаҳои телевизион такрори барномаҳои телевизионҳои дигар ва якранганд. Боз ҳамеша консерт нишон медиҳанд. Консертро ман аз DVD ҳам тамошо мекунам»,-мегӯяд як хонуми ҷавон, ки худро Мунира муаррифӣ кард.

Коршиносон мегӯянд, дар сурати нодуруст амалӣ шудани стратегияи гузариш ба пахши рақамӣ хатари дар халои иттилотӣ қарор гирифтани аҳолӣ ба вуҷуд меояд ва ин дар навбати худ ба амнияти иттилоотӣ таъсири ҷиддӣ мерасонад. Коршинос Асомиддин Атоев гуфт, сокинон бо истифода аз имконоти телевизорҳои нав ва ё қаблукунакҳои мавҷи рақамӣ, метавонанд зиндагиашонро роҳаттар намоянд: «Онҳо метавонанд, интихоб кунанд шабакаҳоеро ки мехоҳанд тамошо кунанд. Яъне шумори шабакаҳо зиёд мешавад. Баъдан вобаста ба вақт, агар Шумо серкор бошед, метавонед дар мавҷқабулкунак барномаи дилхоҳатонро сабт кунед ва бегоҳ онро баҳузур тамошо кунед. Телевизор ба як компютер табдил меёбад.»
Дар давраи аввали гузариш ба пахши рақамӣ ҷамъияти саҳомии кушодаи «Телерадиоком» барои пахши барномаҳои «Шабакаи аввал», «Сафина», «Баҳористон», «Ҷаҳоннамо» фиристандаи пахши рақамиро дар саросари навоҳии кишвар насб мекунад. Хуршед Ҳабибов, муовини аввали директори генералии «Телерадиоком», гуфт, дар шакли рақамӣ барномаҳои телевизион тавассути дастгоҳи вижа, ки «Мултиплекс» ном дорад ва аз имкони ғунҷоиши 16 шабакаи телевизионӣ бархӯрдор аст, пахш мешаванд. Феълан ба ин асбоб 4 шабакаи телевизиони давлатӣ ва 6 шабакаи хориҷӣ ба таври санҷишӣ ворид шудааст. Ба гуфти Хуршед Ҳабибов телевизионҳо ба ин асбоб дар асоси шартнома ва бо пардохти маблағи муайян, ки нагуфт чӣ қадар аст, пайваст мешаванд.

Дар Тоҷикистон 57 канали телевизион ва радио амал мекунад, ки аз он 18-тояш давлатӣ аст. Фаъолони ҷомеаи Тоҷикистон мегӯянд, аз байн бардоштани муҷаввиз барои истеҳсоли маводи аудио ва визуалӣ метавонад, рақобатро дар бозор гармтар ва зиндагии сокинонро рангинтар созад. Вале он ҳам дар ҳоле ки мардум битавонад харҷи гарони табдили телевизионҳои худ ё хариди дастгоҳи махсусро бардорад.

Источник: http://www.ozodi.org/content/article/24721895.html

[b]Асомиддин Атоев, раиси Академияи технологияҳои иттилоотӣ ва мухобиротии Тоҷикистон натиҷаи гузориши СММ доир ба дастарасии аҳолии Тоҷикистон ба интернетро нодуруст арзёбӣ кард.[/b]

Асомиддин Атоев рӯзи сешанбеи 25-уми сентябр ба радиои Озодӣ гуфт, ки Созмони Милали Мутаҳҳид гузориши худро бар асоси рақамҳои Иттиҳодиия байналмилии алоқа (МСЭ) таҳия кардааст, ки ба ҳақиқат дуруст намеояд.

Асомиддин Атоев мегӯяд, ки дар таърихи 27-уми июли солди 2012 Хадамоти алоқаи Тоҷикистон маълумоти расмӣ пешниҳод карда буд, ки мувофиқ ба он, корбарони интернет ва афроде, ки ақалан як маротиба дар рӯз вориди интернет мешаванд, беш аз ду миллион нафар нишон дода буд. Яъне ба қавли Асомиддин Атоев, феълан ҳудуди 30 дарсади аҳолии Тоҷикистон ба интернет дастрасӣ дорад.

Ҷаноби Атоев меафзояд, ки соли 2010 дар Душанбе дар ин замина як таҳқиқоте сурат гирифта буд, ки мувофиқ ба он ҳудуди 2 миллион аҳолии Тоҷикистон ба интернет сару кор доранд.

Созмони Милали Мутаҳид дар як гузориши таҳқиқотии худ, ки 24-уми сентябр ба нашр расонидааст, мизони корбарони интернет дар кишварҳои ҷаҳонро нишон додааст.

Миёни кишварҳои Осиёи Миёна дар Узбакистон 30, 2 дарсади аҳолӣ ба интернет дастрасӣ доштаанд ва корбарони интернет дар Қирғизистон ба 20 дарсад баробар мебошад. Дар Тоҷикистон 13 дарсад ва дар Туркманистон 5 дарсад ба интернет сару кор доштаанд.

Исландия бо 95 дарсади фарогирии корбарони интернет дар ҷаҳон дар ҷои аввал буда, Олмон бо 83 дарсад дар ҷои дуввум ва Иёлоти Мутаҳидаи Амрико бо 77,9 дарсад дар мақоми севвум қарор доранд.

Источник: http://www.ozodi.org/content/article/24719398.html

[b]Freedom House ё Хонаи Озодӣ поёнтарин баҳои озодии баён дар Интернетро ба Эрону Куба ва Чину Сурия додааст.[/b]

Ҳамла ба озодиии Интернет дар саросари ҷаҳон дар ҳоли афзоиш буда, давлатҳои таъқибгар дар ин амр рӯз то рӯз аз васоили мураккабтар истифода мебаранд. Чунин аст хулосаи асосии гузориши солонаи “Озодӣ дар Интернет 2012”, ки созмони амрикоии Хонаи Озодӣ ё Freedom House рӯзи 24-уми сентябр нашр кард.

Санҷа Келлӣ, раҳбари таҳқиқоти нави Хонаи Озодӣ мегӯяд, давлатҳои таъқибгар акнун бар иловаи шеваҳои “суннатӣ”-е, чун филтр ё масдуд кардани матолиби нохушоянд ё ба зиндон кашондани фаъолони маъруфи Интернет, ба шеваҳои навтари таъқибу фишор даст мезананд. Хонум Келлӣ аз ҷумла афзоиши мавридҳои “дасткории фаъолонаи мӯҳтавои матолиби Интернет ва назорати ғайриқонунӣ”-ро таъкид мекунад. Аз 47 кишвари таҳқиқшуда чаҳорякаш блогнависони маошхӯрро барои беобрӯ кардани мухолифин, нашри иттилооти дурӯғ ва ҳимоят аз хатти машши давлатҳо истифода мебурдаанд. Хонаи Озодӣ мегӯяд, Русияву Чин дар ин авохир истифода аз чунин шеваро кам карданд, вале Беларусу Украинаву Эрон ва кишварҳои дигар -баръакс.

Гузориш мегӯяд, ҳамлаҳои сайберӣ ба мунтақидони давлатҳо ва масхараву беобрӯ кардани фаъолони Интернет хеле фарогиртар шуда, аз Бирма то Баҳрайн, аз Қазоқистон то Сурия ва аз Зимбабве то Узбакистон — ҳама давлатҳо аз ин роҳу шева кор мегиранд. “Озодӣ дар Интернет 2012” аз нақшаи эҳтимолии ҳизби ҳокими Русияи воҳиди раиси ин ҷумҳурӣ Владимир Путин ҳам ёдовар шуда, ки бино ба гузоришҳои матбуоти Русия, барои хунсо кардани блогнависи мухолиф Алексей Навалний гӯиё 300 000 доллар ҷудо кардааст.

Санҷа Келлӣ мегӯяд, ҳарчанд Интернет дар Русия як муҳити нисбатан озодтар шинохта мешуд, мақомоти ин кишвар дар посух ба мавҷи ахири эътирозҳо, ки аксараш тавассути Интернет даъват мешуд, ҳамлаҳо ба ин шабакаро афзоиш дода, фаъолонро аз паёмадҳои нашри матлабҳои интиқодӣ дар Интернет тарс медиҳанд. Хонаи Озодӣ маҳдудиятҳои эъмолшуда дар роҳи ҳифзи сирри ҳуввият дар Қазоқистону Сурия ва Арабистони Саудиро аз шеваҳои дигари тақвияти назорат бар Интернет ном бурда, меафзояд, аз 47 кишвари мавриди таҳқиқ қариб нисфаш дар ин муддат қонунҳое тасвиб кардаанд, ки озодии баён дар Интернетро маҳдудтар мекунад.

Гузориш ҳамчунин аз афзоиши мавридҳои ҳамлаҳои ҷисмонӣ ва ҳатто ҳалокати блогнависону журналистони интернетӣ сар карда аз Осиёи Марказӣ то ба Ховари Миёна изҳори нигаронӣ кардааст. Ба сурати умум, Хонаи Озодӣ поёнтарин баҳои озодии баён дар Интернетро ба Эрону Куба ва Чину Сурия дода, кишварҳое, чун Узбакистону Беларус ва Покистон дар радифи давлатҳои “ноозод” ҷо гирифтаанд. Озарбойҷону Русия дар байни кишварҳоеянд, ки вазъи озодиашон дар Интернет шояд дар моҳҳои наздик бадтар шавад. Бо ин ҳол, Freedom House Эстония ва Амрикову Олмонро кишварҳои дар Интернет озодтарин ном бурдааст.

Тоҷикистон дар гузориши солонаи Freedom House арзёбӣ нашудааст, вале ба бовари таҳлилгарон, бо он силсилаи “сайтбандон”-е, ки дар соли 2011-ум ва соли ҷорӣ аз сӯи Хадамоти алоқа ва раисаш Бег Зуҳуров алайҳи торнамоҳо мушоҳида шуд, Душанбе ба эҳтимоли ғолиб дар шумори давлатҳои таъқибгар қарор мегирифт.

Хадамоти алоқа танҳо баъд аз оғози нооромиҳои Бадахшон барои қариб ду моҳ сайти “Азия-Плюс”-ро масдуд кард. Дар он рӯзҳо дастрасӣ ба сомонаҳои “Озодагон” ва Би-Би-Сӣ низ дар Тоҷикистон маҳдуд шуда буд. Дар моҳи сентябр “Тоҷнюс” низ аз маҳдуд шудани дастрасӣ ба сомонааш дар сегменти Тоҷнет изҳори нигаронӣ кард. Бег Зуҳуров ҳамин тавр, ду моҳ пеш аз азмаш барои таъсиси як гурӯҳи вижа хабар дода буд, ки мебоист дар Интернет шарҳнависони беимзо ва мунтақидро “шикор” мекарданд.

Источник: http://www.ozodi.org/content/article/24718012.html

[b]Масъулони торнамои «Тоҷнюс» мегӯянд, Хадамоти алоқаи Тоҷикистон бидуни кадом огоҳӣ саҳфаи онҳоро бастааст.[/b]

Раёсати созмони ҷамъиятии «ИНДЕМ», ки муассиси торнамои «Тоҷнюс» аст, рӯзи 20-уми сентябр бо пахши як баёния аз маҳдуд шудани дастрасӣ ба ин саҳфа нигаронӣ карда, онро хилофи Қонуни асосии кишвар донист. Масъулони ин торнамо мегӯянд, Хадамоти алоқаи Тоҷикистон бидуни кадом огоҳӣ саҳфаи интернетии онҳоро бастааст.

Саймиддин Дӯстов, раиси созмони «ИНДЕМ», ба Радиои Озодӣ гуфт, шурӯъ аз 8-уми сетнябри соли ҷорӣ бо дастури Хадамоти алоқаи Тоҷикистон дастрасӣ ба торнамои «Тоҷнюс» дар бахши тоҷикии Интернет ё Тоҷнет маҳдуд гардидааст. Ҷаноби Дӯстов мегӯяд, бо иттилое, ки дастрас кардааст, ин дастур аввал тариқи «СМС» ё паёмак ва баъд дар як номаи расмӣ аз тарафи Бег Зуҳуров, раиси Хадамоти алоқа, ба ширкатҳои фароҳамкунандаи интернет расидааст.

Масъули «ИНДЕМ» дар сӯҳбат бо мо аз он изҳори таассуф кард, ки ширкатҳои фароҳамкунандаи Интернет, ба гуфтаи ӯ, «ин дастури ғайриконститутсионии Хадамоти алоқаро» пуштибонӣ карда, домени «Тоҷнюс»-ро масдуд сохтаанд.

«Мо иқдоми мазкурро хилофи талаботи Сарқонуни Ҷумҳурии Тоҷикистон ва қонунҳои соҳавӣ дониста, онро поймол намудани ҳуқуқи шаҳрвандони Тоҷикистон барои дастрасӣ ба иттилооти мустақил, озодии баён ва гуногунандешӣ, эҷоди монеа барои амалӣ намудани фаъолиятҳои касбии журналистӣ ва дар кул хатар ба амнияти иттилоотии кишвар арзёбӣ менамоем»,-таъкид шудааст дар баёния.

Раҳбари созмони ҷамъиятии «ИНДЕМ» дар баёнияи худ ин амали Хадамоти алоқаро ҳадафмандона медонад, ки ба бовари ӯ расонаи онҳоро ба оғӯши мухолифони ҳукумати феълӣ дар арафаи интихоботи президенти Тоҷикистон тела медиҳад.

Дар поёни ин баёния зикр шудааст, ки созмони «ИНДЕМ» мунтазири шарҳи вазъи ба амаломада аз тарафи Хадамоти алоқа ва ширкатҳои дастракунандаи интернет дар Тоҷикистон мебошад.

Тайи ду моҳи ахир бо дастури Хадамоти алоқаи Тоҷикистон чанде аз торнамоҳои дохиливу хориҷи кишвар, аз ҷумла «Азия-Плюс», Би-би-сӣ, РИА Новости, Ютюб, дастнорас шуда, бархеи онҳо дубора фаъол шуданд. Ин иқдом пас аз шурӯи амалиёти низомии нерӯҳои давлатӣ дар шаҳри Хоруғ рӯи даст гирифта шуд.

Масъулони торнамои «Азия-Плюс», ҳоло дастрасӣ ба он барқарор шудааст, мегӯянд, дар тӯли ин муддат онҳо як гурӯҳ аз хонандагон ва ҳамчунин рекламадиҳандагони худро аз даст додаанд.

Источник: http://www.ozodi.org/content/article/24714308.html

[b]Созмони иҷтимоъии «ИНДЕМ» аз мақомоти Тоҷикистон хостааст, ки ба мардуми ин кишвар иллати масдудияти сойти хабаргузории «Тоҷнюз»-ро тавзеҳ бидиҳанд.[/b]

Ин созмон рӯзи панҷшанбеи 20 сентябр бо интишори баёнияе Идораи умури иртиботот ва ширкатҳои фароҳамгари интернет дар Тоҷикистонро ба нақзи қонуни асосӣ ва ҳуқуқу озодиҳои шаҳрвандон, аз ҷумла ҳаққи мардум ба дарёфти иттилоъот ва озодии баён, муттаҳам кард.

Тибқи ин баёния, талошҳои масъулони «ИНДЕМ» барои мушаххас кардани иллати масдудияти сойти хабаргузории «Тоҷнюз», вобаста ба ин созмон, бенатиҷа будааст.

Дар баёния омадааст, ки сойти «Тоҷнюз» дар чорчӯби қавонини Тоҷикистону ва ахлоқи рӯзноманигорӣ ва ба хотири ҳифзи манофеъи миллӣ фаъъолият мекунад.

Масъулони созмони «ИНДЕМ» аз мақомоти Тоҷикистон хостори тавзеҳоти расмӣ ва арзёбии ҳуқуқии ин иқдом шуда ва гуфтаанд, ки мақомоти Идораи иртиботот, фароҳамгарони интернет ва ширкатҳои телефуни ҳамроҳ бояд расман далели ин амалро шарҳ бидиҳанд.

Дар пайи нооромӣ дар Бадахшон дастрасӣ ба шуморе аз сойтҳои хабарӣ, аз ҷумла сойтҳои хабаргузориҳои «Тоҷнюз», «Аsia-plus», «Сентразия», дар Тоҷикистон масдуд шудааст.

Источник: http://www.bbc.co.uk/tajik/institutional/2012/09/120920_mm_website_tojnews.shtml

[b]Созмонҳои журналистии Тоҷикистон ба Додситонии кул дар мавриди нақзи ҳуқуқи рӯзноманигорон дар рӯзи тазоҳуроти осебдидагони сӯхтори бозори «Корвон» дар Душанбе муроҷиат кардаанд. Нуриддин Қаршибоев, раиси Анҷумани миллии расонаҳои мустақили Тоҷикистон, ба Радиои Озодӣ гуфт, тарҳи муроҷиат ба додситонӣ омода аст ва бо дарёфти имзои созмонҳои дигари рӯзноманигорӣ ва имзои журналистоне, ки ҳангоми эътирози тоҷирони «Корвон» таъқиб шудаанд, барои баррасӣ ба Додситонӣ пешниҳод карда хоҳад шуд.[/b]

Ба қавли ҷаноби Қаршибоев, қабл аз тасмими муроҷиат ба Додситонӣ, дар як нишаст намояндагони созмонҳо ва доираҳои журналистии Тоҷикистон ҷамъ омада ва ба хотири ин ки минбаъд кормандони интизомӣ дар ҳодисаҳои назири сӯхтори «Корвон» ба хабарнигорон маҳдудият эҷод нашавад, ба ҷазо кашида шаванд. Дар рӯзи эътирози тоҷирон ва фурӯшандаҳои бозори «Корвон» дар хиёбони Саъдии Шерозӣ Саймиддин Дӯстов, раиси созмони «ИНДЕМ» ва муассиси ҳафтаномаи «Нигоҳ» беш аз се соат аз тарафи кормандони милиса боздошт ва бо журналистони дигар бархӯрди хашин шудааст.

Хабарнигорони Би-би-сӣ низ гуфтанд, ки дар назди корхонаи нассоҷии шаҳри Душанбе бархе аз кормандони амниятӣ ва пулис бо онҳо низ бадрафторӣ кардаанд.

Источник: http://www.ozodi.org/archive/tajik_domestic_news/20120920/538/16058.html?id=24714034

[b]Пас аз ду моҳи маҳдудияти дастрасӣ, торнамои «Азия-Плюс» дубора бо нишонии News.TJ боз шуд. Бег Зуҳуров, раиси Хадамоти алоқаи Тоҷикистон, ба Радиои Озодӣ гуфт, бо дастури ӯ торнамои «Азия-Плюс» фаъол шудааст.[/b]

Аммо ҷаноби Зуҳуров афзуд, «акнун вақти он аст, ки ин торнамо бамаънӣ бошад ва аз пайи ҳаргуна танқидҳои ноҷо наравад.» Дар ҳамин ҳол, Зебо Тоҷибоева, мудири иҷроияи Оҷонси хабарии «Азия-Плюс» гуфт, аз тариқи провайдери Телеком Технолоҷӣ боз шудани ин сомона имконпазир шудааст, вале ҳанӯз аз Хадамоти алоқаи Тоҷикистон номаи расмӣ аз ифтитоҳи сомона ба онҳо нарасидааст.

Аз шоми 23-юми июли соли ҷорӣ дар Тоҷикистон дастрасӣ ба сомонаи “Азия-Плюс” масдуд карда шуд. Дар ин замина раиси Хадамоти алоқаи кишвар ба расонаҳо гуфта буд, масдуд шудани сомонаи мазкур мушкили фаннист, на чизе дигар.

Источник: http://www.ozodi.org/archive/tajik_domestic_news/20120920/538/16058.html?id=24714419

Раёсати Созмони ҷамъиятии “ИНДЕМ” бо камоли таассуф изҳор медорад, ки шурӯъ аз 8-уми сентябр бо супориши Хадамоти алоқаи назди Ҳукумати Тоҷикистон дастрасӣ ба пойгоҳи интернетии оҷонси иттилоотии TojNews дар бахши тоҷикии Интернет ё Тоҷнет маҳдуд гардид. Бинобар, иттилоъи ба мо расида, ин супориш, аввал тариқи СМС-паём ва сипас бо мактуби расмии роҳбари Хадамоти алоқа, тадриҷан, ба ширкатҳои дастраскунандаи Интернет ва алоқаи мобилӣ расонида шудааст.

Мутаасифона, Интернет-провайдерҳо ва ширкатҳои алоқаи мобилӣ, бархилофи талаботи қонунгузории ҷории миллию байналмилалӣ, инчунин, фарҳанги муомилоти корӣ, ки хоси ширкатҳои баобрӯ ва оммавӣ мебошад, аз ин амал ғайриқонунӣ дастгирӣ намуда, домени tojnews.org-ро бастанд. Талошҳои даҳрӯзаи мо барои дастрас кардани шарҳи расмии ин амал натиҷа надоданд.

Мо, иқдоми мазкурро хилофи талаботи Сарқонуни Ҷумҳурии Тоҷикистон ва қонунҳои соҳавӣ дониста, онро поймол намудани ҳуқуқи шаҳрвандони Тоҷикистон барои дастрасӣ ба иттилооти мустақил, озодии баён ва гуногунандешӣ, эҷоди монеа барои амалӣ намудани фаъолиятҳои касбии журналистӣ ва дар кулл хатар ба амнияти иттилотии кишвар арзёбӣ менамоем.

Дар ҳоле, ки ба эътирофи умум, TojNews дар фаъолиятҳои худ, меъёрҳои мустақилият аз ҳукумат, аҳзобу шахсиятҳои сиёсӣ, гурӯҳҳои моливу саноатӣ, рекломдиҳандагони бузург ва донорҳои хориҷиву байналмиллалиро риоя намуда, дар Тоҷнет ё бахши тоҷикии Интернет бо расонаҳои қавии хориҷӣ ва ғайримиллӣ рақобат мекунад, мо, ин амали ҳадафмандонаро кӯшиши тела додани расонаҳои мо ба оғӯши мухолифони ҳукумати феълӣ дар арафаи интихоботи президенти Тоҷикистон медонем.

Мо мутмаинем, ки фаъолиятҳои мо дар доираи қонунгузорӣ ва ахлоқи касбӣ пиёда шуда, ба ҳифзи манфиатҳои умумимиллӣ дар муҳити иттилоотӣ равона шудаанд.

Дар баробари иттилоърасонӣ, мо, рушди ҷомеаи шаҳрвандӣ ва вусъати равандҳои демократӣ дар кишварро аз арзишҳои худ дониста, дар соли ҷорӣ, рисолати худро ба ҳайси як ниҳоди ҷомеаи шаҳрвандии Тоҷикистон, дар ташаккули фарҳанги нави муносибати мақомот бо ҷомеаи шаҳрвандӣ ва шаклдиҳии фарҳанги муошират дар форумҳои интернетӣ ва шабакаҳои иҷтимоӣ мебинем.

Маҳз ин арзишҳо моро водор месозанд, ки аз мақомоти зирабти ҷумҳурӣ шарҳи расмӣ ва баҳои ҳуқуқии ин иқдомро талаб намоем. Мо мутманем, ки чизе болотар аз волоияти қонун буда наметавонад.

Мо интизор дорем, ки роҳбарияти Хадомати алоқа, интернет-провайдерҳо ва ширкатҳои мобилӣ ин амали бешарафонаашонро барои ҷомеаи шаҳрвандии Тоҷикистон расман шарҳ хоҳанд дод.

Ҳамчунин, мо изҳор медорем, ки ба дастгирии маънавӣ ва ҳуқуқии ниҳодҳои ҳукуматӣ ва ҷомеаи шаҳрвандии Тоҷикистон ниёз дорем.

Источник: Индем.

[b]Эмомалӣ Раҳмон дастур додааст, ки мақомоти гумрук ба таври оҷил ба мушкили барои таҷҳизоти телевизиони муштараки форсӣ пешомада, расидагӣ кунанд.[/b]

Алиасғари Шеърдӯст, сафири Эрон дар Тоҷикистон рӯзи чаҳоршанбе дар сӯҳбат ба «Озодӣ» гуфт, аз се моҳ ба ин сӯ таҷҳизоти телевизиони муштараки форсӣ аз расмиёти Хадамоти гумруки Тоҷикистон нагузаштааст ва аз ин хотир, кишвараш мусоидати раисҷумҳурро зарур шуморид.

Телевизиони муштараки форсӣ, ки аз тавофуқоти умдаи миёни се кишвари форсзабон – Афғонистон, Тоҷикистон, Эрон аз соли 2006 аст, то ба имрӯз бо мушкилоти сиёсиву забонӣ ва инак, молиявӣ мувоҷеҳ мешавад.

Сафорати Эрон дар Душанбе эълом дошт, ки Хадамоти гумруки Тоҷикистон тақрибан 400 ҳазор доллар аз 2 миллион евро, қимати умумии таҷҳизот барои телевизион, боҷ талаб кардааст. Ин хадамот мегӯяд, ин таҷҳизот танҳо дар ҳоле аз боҷ озод мешавад, ки барои истифодаи корпуси дипломатӣ, яъне сафорати Эрон бошад, аммо дар ин маврид он моли сафорат нест.

Сафири Эрон дар Тоҷикистон мегӯяд, барои фаъолияти телевизиони муштараки форсӣ тамоми шароит фароҳам омадаанд, аз ҷумла як бинои думанзила дар шафати телевизиони «Баҳористон» бо студияву толорҳои зарурӣ барои телевизион омода шудаанд.

Расонаҳои Эрон хабар медиҳанд, ки ин телевизион «Наврӯз» унвон шудаву рӯзона 8 соат барнома пахш хоҳад кард. Ба қавли Алиасғари Шеърдӯст, мӯҳтавои барномаҳои ин телевизиони муштарак сирф фарҳангӣ ва барои низоми сиёсии тамоми кишварҳои форсизабон мувофиқ хоҳад буд. Вай афзуд, ҳайати эҷодии ин телевизион низ бо мувофиқаи кишварҳо ташкил мешавад.

Источник: http://www.ozodi.org/content/article/24713360.html