[b]Раисиҷумҳури Тоҷикистон гуфт, моддаҳои «тӯҳмат» ва «таҳқир» аз Кодекси ҷиноӣ бардошта шавад.[/b]

Эмомалӣ Раҳмон афзуд, масъалаҳои марбут ба тӯҳмату таҳқир дар оянда на бар асоси Кодекси ҷиноӣ, балки бар асоси Кодекси шаҳрвандӣ баррасӣ карда хоҳанд шуд. «Мубоҳисаҳо дар атрофи моддаҳои 135 ва 136-и Кодекси ҷиноии Тоҷикистон, ки тибқи онҳо рӯзноманигорон барои таҳқиру тӯҳмат ба ҷавобгарии ҷиноятӣ кашида мешаванд, кайҳо ба ҳама маълуманд… Пешниҳод менамоям, ки моддаҳои вобаста ба таҳқиру тӯҳмат аз қонунгузории ҷиноятӣ ба қонунгузории гражданӣ гузаронида шаванд»,-таъкид кард раисиҷумҳур.

Вай ба Вазорати адлияи Тоҷикистон супориш дод, санади «кӯч» додани моддаҳои тӯҳмату таҳқир аз Кодекси ҷиноӣ ба Кодекси шаҳрвандиро таҳия карда ва ба ҳукумат пешниҳод намояд.

Президент Раҳмон дар робита ба Интернет ва амнияти иттилоотии кишвар ҳам изҳори назар кард. Ӯ гуфт, “солҳои охир дар сомонаҳои гуногуни интернетӣ бар зидди кишварҳои Иттиҳоди Давлатҳои Мустақил, аз ҷумла Тоҷикистон як маъракаи огоҳона ва муғризона идома дорад. Дар чунин шароит масъалаи таъмини амнияти иттилоотӣ на танҳо барои Тоҷикистон, балки барои тамоми кишварҳои сайёра аҳамияти аввалиндараҷа касб намудааст.»

Ба қавли президент, «вақти он расидааст, ки мақомоти қонунгузор, ҳуқуқшиносону рӯзноманигорон ва ҷомеаи шаҳрвандии Тоҷикистон низ дар ин бобат ба таври ҷиддӣ мулоҳиза кунанд.»

Иштироки раисиҷумҳур дар ҷаласаи бахшида ба садсолагии чопи нахустин рӯзномаи тоҷикӣ — «Бухорои шариф» дар пайи даъвати расонаҳо ва Вазорати фарҳанги кишвар сурат гирифтааст.

Гуфта мешавад, ба ин ҷаласа бештар сардабирону кормандони нашрияҳои маҳаллӣ ва устодони факултаи рӯзноманигорӣ роҳ ёфта, намояндагони расонаҳои хориҷӣ даъват нашудаанд. Агарчӣ бино ба баъзе хабарҳо, намояндагони расонаҳои Русия дар ин маҳфил иштирок доштаанд.

Ба ин монанд мулоқотро Эмомалӣ Раҳмон рӯзи 8-уми декабри соли 2009 бо як гурӯҳи рӯзноманигорон доир карда буд. Гуфта мешавад, пас аз «фирор»-и як қатор иттилоот, аз ҷумла дар бораи Самарқанду Бухоро, ки дар матбуоти Русия ба нашр расид, эътимоди раисҷумҳур ба рӯзноманигорон коста шудааст.

Дар Тоҷикистон пас аз даврони истиқлолият 11-уми март ҳамчун рӯзи матбуоти миллӣ ҷашн мешавад. Соли 1912 дар ин рӯз аввалин нашрияи тоҷикии «Бухорои шариф» дар Бухоро ба нашр расид, ки моҳи январи соли 1913 бо фармони Амир Олимхон баста шуд. Аммо аз замони таҷлили ин ҷашн дар Тоҷикистон, боре ҳам раисҷумҳур дар он ширкат накардааст.

Аммо ин мулоқоти раисиҷумҳури Тоҷикистон бо хабарнигорони кишвар дар ҳоле баргузор мешавад, ки расонаҳо аз андози зиёд ва созмонҳои хабарнигорӣ аз фишору маҳдудиятҳо дар кори рӯзноманигорон шикоят доранд.

Источник: http://www.ozodi.org/content/article/24510884.html

[b]Эмомалӣ Раҳмон, раиси ҷумҳури Тоҷикистон, пешниҳод кард, ки моддаи марбут ба таҳқир ва туҳмат аз қонуни кайфарӣ лағв шуда ва шомили қонуни шаҳрвандӣ карда шавад.[/b]

Вай ин матлабро дар суханронии худ дар робита бо таҷлил аз «Рӯзи матбӯъоти тоҷик» дар ҳузури рӯзноманигорон матраҳ кард.

Оқои Раҳмон зимни тавсиф аз нақши хабарнигорон дар ҷомеъаи муъосири тоҷик, гуфт, ки «100 — солагии матбӯъоти тоҷик на танҳо ҷашни аҳли матбӯъот, балки ҷашни умумимиллӣ низ мебошад.»

Нахуст раиси ҷумҳури Тоҷикистон ба таърихи матбӯъоти тоҷик рӯй оварда ва онро ба се марҳила тақсимбандӣ кард. «Таҷрибаи Тоҷикистони соҳибистиқлол нишон медиҳад, ки рӯзномаву маҷаллаҳо ва телевизиюну родию ҳамчун яке аз воситаҳои асосии таъсиррасонӣ ба афкори ҷомеъа метавонанд ба ҳалли мушкилоти мавҷуда фаъъолона мусоъидат намоянд.»

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=182]http://www.taj.nansmit.tj/analysis/?id=182[/url]

Источник:

[b]Адолати Мирзо, сардабири нашрияи «Миллат», мегӯяд, ки аксари мардуми Тоҷикистон дар панҷ моҳи зимистон ва пойиз аз дарёфти иттилоъ, ки ғизои маънавии мардум аст, маҳруманд.[/b]

Ба гуфтаи хонуми Мирзо, яке аз сабабҳои аслии дар инзивои хабарӣ қарор доштани мардуми ин кишвар дастрасии нокофӣ ба нерӯи барқ дар мавсими сармо будааст.

Ҳамчунин, ба гуфтаи хонуми Мирзо, имкони таъсиси рӯзномаҳо дар ин кишвар замоне фароҳам мешавад, ки аксари муҳоҷирони кории тоҷик ба ватан бозгарданд.

[b]Матни пурраи мусоҳибаро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=181]http://www.taj.nansmit.tj/analysis/?id=181[/url]

Источник:

[b]Дар теотри уперо ва боллеи ба номи Садриддин Айнӣ маҳфиле ба муносибати ба 100-солагии матбӯъоти тоҷик оғоз шуд.[/b]

Барои бори нахуст дар солҳои истиқлол дар ин ҳамоиш раиси ҷумҳурии Тоҷикистон ширкат ва суханронӣ мекунад.

Ҳануз мушаххас нест, ки оё дар чорчӯби ин дидор миёни Президент Раҳмон ва хабарнигорон гуфтугӯе сурат хоҳад гирифт ё хайр.

Тӯли ду ҳафтаи ахир дафтари раёсати ҷумҳурии Тоҷикистон аз ироаи иттилоъ дар ин бора худдорӣ карда ва ҳатто асомии даъватшудагон ба ин маҳфил махфӣ нигаҳ дошта мешуд.

Ба гуфтаи Акбари Саттор, раиси Иттиҳодияи рӯзноманигорони Тоҷикистон, ин ниҳод ба дафтари раёсати ҷумҳурии кишвар феҳрасти хабарнигороне, ки бояд дар ин дидор ҳузур дошта бошанд, ироа кардааст.

Вале манобеъи огоҳ мегӯянд, ки масъулони дафтари раёсати ҷумҳурии Тоҷикистон ин феҳрастро бознигарӣ карда ва бештари хабарнигорони саршинос ба ин маҳфил даъват нашудаанд.

Аз ҷумла, хабарнигорони расонаҳои хориҷӣ дар Тоҷикистон ва рӯзноманигороне, ки аз онҳо умдатан ба унвони «мухолиф» ё «мунтақид» ном бурда мешавад, ба ин дидор даъват нашудаанд. Ҳарчанд, тибқи иттилоъи расида, бархе аз хабарнигорони расонаҳои Русия дар Тоҷикистон дар ин ҳамоиш ҳузур доранд.

Чунин шоеъоте низ вуҷуд дорад, ки имсол ба бархе аз хабарнигорони саршинос ҷоизаи Абулқосими Лоҳутӣ эъто шуда ва қарор буд, ки маросими эътои ин ҷоизаҳо дар чорчӯби дидори Президент Раҳмон бо хабарнигорон баргузор мешавад. Вале дар охирин лаҳазот тасмими мақомот тағйир ёфта ва иддае аз «соҳибони» ҷоиза низ ба ин маҳфил даъват нашуданд.

Дар ҳамин ҳол, бархе аз хабарнигорон ба нишони эътироз аз ширкат дар ин маҳфил худдорӣ кардаанд. Яке аз онҳо, ки нахост номаш ифшо шавад, гуфт, ки намехоҳад шоҳиди «тамаллуқ ва мадҳу санохонӣ нисбат ба раҳбари кишвар аз сӯйи иддае аз хабарнигорон» бошад.

Зимнан, рӯзи матбӯъоти тоҷик 11 март дониста мешавад. Яксад сол қабл дар ин рӯз нахустин шумораи рӯзномаи «Бухорои шариф» мунташир шудааст. Дар соли ҷорӣ аз ин рӯз дар Тоҷикистон барои бори нахуст ба сурати густарда таҷлил мешавад.

Бештари мақомоти тоҷик бо ирсоли номаҳои шодбошӣ хабарнигоронро бо ин рӯз табрик гуфтаанд.

Мирзошоҳрух Асрорӣ, вазири фарҳанги Тоҷикистон, дар номаи шодбошии худ таъкид кардааст: «Матбӯъоти тоҷик ба ҷузъе аз давлатдории тоҷикон табдил шуда ва ба тақвияти арзишҳои демукросӣ дар ин кившар мусоъидат мекунад.»

Ҳатто, Гул Шералӣ, вазири энержӣ ва саноеъи Тоҷикистон, ки пайваста мавриди интиқоди рӯзноманигорон қарор мегирад, низ дар номаи шодбошии худ «нақши хабарнигорон дар рушди кишвар, аз ҷумла дар бахши энержӣ»-ро тавсиф кардааст.

Тибқи иттилоъи манобеъи дафтари раёсати ҷумҳурии Тоҷикистон, баъд аз поёни дидори Президент Раҳмон бо хабарнигорон, барои рӯзноманигорон барномаи кунсертие баргузор хоҳад шуд.

Источник: http://www.bbc.co.uk/tajik/institutional/2012/03/120310_if_tajik_press.shtml

[b]Иттиҳодияи журналистони Тоҷикистон ҳамроҳ бо Анҷумани миллии расонаҳои хабарии мустақил, созмони Медиа Алянс ва Бунёди ёдбуд ва пуштибонӣ аз ҳуқуқҳои хабарнигорони Тоҷикистон аз ҳукумат хостори таъмини дастрасӣ ба шабакаи иҷтимоии Facebook ва дигар торнамоҳои интернетӣ шуданд.[/b]

Дар изҳороти муштараки онҳо, эҷоди монеъа дар дастрасӣ ба ин торнамоҳо чун поймолсозии ҳуқуқҳои шаҳрвандони Тоҷикистон барои дарёфти иттилоъ арзёбӣ шудааст.

Аз ҳафтаи гузашта бо амри хадамоти алоқаи назди ҳукумати Тоҷикистон бархе аз провайдерҳо дастрасӣ ба чанд торнамо, аз ҷумла, ба Facebook-ро қатъ карданд.

Ахиран Созмони амният ва ҳамкорӣ дар Аврупо низ аз мақомоти Тоҷикистон хост, то қарори манъи дастрасӣ ба ин торнамоҳоро лағв кунад.

Источник: http://www.ozodi.org/archive/news/20120309/538/538.html?id=24510177

ш. Душанбе, 9 марти соли 2012

Иттифоқи журналистони Тоҷикистон (ИЖТ), Анҷумани миллии воситаҳои ахбори оммаи мустақили Тоҷикистон (АМВАОМТ), Медиа Алянси Тоҷикистон (МАТ), Шўрои ВАО Тоҷикистон ва Бунёди гиромидошт ва ҳифзи ҳуқуқҳои журналистони Тоҷикистон иқдоми Хадамоти алоқаи назди Ҳукумати Ҷумҳурии Тоҷикистонро оид ба маҳдуд кардани дастрасӣ ба шабакаи иҷтимоии Facebook ва иддае аз манбаъҳои Интернетиеро, ки масоили ҳаёти ҷамъиятию сиёсиро инъикос менамоянд, шадидан маҳкум мекунанд.

Аллакай як ҳафта инҷониб шаҳрвандони Тоҷикистон ба шабакаи иҷтимоии Facebook ва иддае аз манбаъҳои Интернетӣ дастрасӣ надоранд, ки ин ҳолат нақзи ҳуқуқҳои конститутсионии онҳо ба дастрас кардани иттилоот мебошад. Тибқи иттилои Интернет-провайдерони Тоҷикистон, рўзи 2 март онҳо аз Хадамоти алоқа дар бораи қатъ кардани дастрасӣ ба Facebook ва чор сомонаи дигар: www.tjknews.com, www.maxala.org, www.centrasia.ru и www.zvezda.ru (Интернет портали «Полярная звезда») супориш гирифтаанд. Сабаби қатъ намуданро танзимкунанда ба «корҳои техникию-профилактикӣ» марбут медонад, ки ондар назари ҷомеа баҳонаи беэътимоб дониста мешавад.

Ба андешаи коршиносони соҳаи технологияҳои иттилоотию коммуникатсионӣ, қатъ намудани шабакаҳои иҷтимоӣ ва сомонаҳои Интернетӣ иқдоми бесамар ва беандеша мебошад. Дар фаъолияти мақомоти ваколатдори давлатӣ пештар ҳам чунин норасоиҳо мушоҳида мешуданд. Чунин иқдоми бо санадҳои ҳуқуқӣ асоснокнашуда ба амнияти иттилоотии Ҷумҳурии Тоҷикистон бевосита таҳдид мекунад. Тавре Консептсияи амнияти иттилоотии Ҷумҳурии Тоҷикистон муқаррар намудааст, кўшишҳои рақибони имконпазир барои поймол кардани манфиатҳои Ҷумҳурии Тоҷикистон дар муҳити иттилоотии ҷаҳон, танг карда баровардани он аз бозори берунӣ ва дохилӣ, пуршиддат шудани рақобати байналмилалӣ барои соҳибӣ кардан ба манбаъҳои иттилоотию техникӣ сарчашмаҳои асосии таҳдид ба амнияти иттилоотӣ мебошанд.

Мо бо эътимоди қавӣ гуфта метавонем, ки нафаре Хадамоти алоқаи назди Ҳукумати Ҷумҳурии Тоҷикистонро барои вайрон кардани ҳуқуқи конститутсионии шаҳрвандон ба иттилоот ваколатдор накардааст, аз ин рў талаб дорем, ки дастрасӣ ба Facebook ва дигар сомонаҳои интернетӣ ҳарчӣ зудтар барқарор карда шавад.

[b]Акбаралӣ Сатторов, Раиси ИЖТ
Нуриддин Қаршибоев, Раиси АМВАОМТ
Зинатулло Исмоилов, Раиси Шўрои ВАО ҶТ
Хуршед Ниёзов, Директори генералии МАТ
Мухтор Бокизода, Раиси ФГҲҲЖТ[/b]

Источник:

[b]Бо чопи шумораи аввали нашрияи «Растохез» дар моҳи майи соли 1990 дари матбуъоти озод дар Тоҷикистон барои аввалин бор дар беш аз 70 соли ҳукумати Шӯравӣ боз шуд.[/b]

Дар оғози соли 1990 нашрияи «Растохез» танҳо нашрияи ғайриҳукуматие буд, ки ба сурати пинҳонӣ дар хориҷ аз Тоҷикистон ба нашр мерасид ва дар Осиёи Марказӣ пахш мешуд.

Чопи ин нашрия бар асари зарурати созмони мардумии «Растохез» дар пайи воқеъоти баҳманмоҳ (феврали соли 1990) сурат гирифт. «Растохез» хеле аз фитнаҳои ҳукумати вақти шӯравӣ ва давлати Тоҷикистонро дар шумораи нахустинаш фош кард.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=180]http://www.taj.nansmit.tj/analysis/?id=180[/url]

Источник:

[b]Таҷаддудхоҳиву равшангароии Осиёи Миёна марбут аст ба кору пайкори Аҳмади Дониш, ки тавонист дар давраи тору зулмот ва қафомонии кишвараш аз пешравию дигаргунӣ, раҳоиву озодӣ, илму маъориф сухан ба миён оварад.[/b]

Бо ҷуръату ҷасорати беҳамтояш номаш вирди забонҳо шуд. Гурӯҳе, ки дар сари қудрат ва ҷонибдорони онҳо буданд, бо нафрату ғазаб аз ӯ ном мебурданд, гурӯҳи дигар, ки роҳи ислоҳи ҷомеъаву пешравии миллату меҳанро мехостанд, бо ифтихору самимият.

Аҳмади Дониш ва пайравонаш дар охири садаи 19 ба назарияи маъорифпарварӣ бо нигоштаҳояшон пояи қавие гузоштанд ва маъорифпарварону таҷаддудхоҳони оғози садаи 20, ки дар таърих бо номи ҷадидон шинохта шудаанд, ба фаъъолияти амалӣ пардохтанд.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=179]http://www.taj.nansmit.tj/analysis/?id=179[/url]

Источник:

[b]Рӯзи 11 марти соли 2012 ба нашри нахустрӯзномаи форсии тоҷикӣ дар Вароруд — «Бухорои Шариф», ки ба рӯзноманигории тоҷик асос гузошт, 100 сол пур мешавад.[/b]

Дар сод соли фаъъолияташ матбуъоти форсии тоҷикӣ мушкилоти зиёдеро аз сар гузаронд: дар даврони аморати Бухоро аҳли дарбор ва рӯҳониёни муҳофизакор бо ҳар восита мардумро аз рӯзномахонӣ дур нигоҳ доштан мехостанд.

Бино ба таъкиди устод Айнӣ, «ҷавонони Бухоро кайҳо боз дар фикри нашри рӯзномае буданд, лекин чораи инро намеёфтанд. Зеро ҳукумати Бухоро, ки ба ягон кори оддии маданӣ роҳ намедод, ба нашри рӯзномае, ки дар пеши назараш чун муфаттише шуданаш мумкин буд, чи гуна роҳ дода метавонист.»

[b]Матни пурраи гузоришро по пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=178]http://www.taj.nansmit.tj/analysis/?id=178[/url]

Источник:

[b]Раиси Хадамоти алоқаи назди ҳукумати Тоҷикистон маҳдудияти дастрасӣ ба «Фейсбук»-ро мушкили фаннӣ хонд.[/b]

Бек Зуҳуров, раиси Хадамоти алоқаи назди ҳукумати Тоҷикистон «фармоишӣ» будани маҳдудияти дастрасӣ ба «Фейсбук»-ро дар ҳоле рад мекунад, ки номаи расмии ӯ ба ширкатҳои интернетии Тоҷикистон дар мавриди боздоштани фаъолияти чанд сомона дар Тоҷикистон дастраси матбуот шуд.

Дар ин нома бо имзои расмии Бек Зуҳуров навишта шудааст, ки «Хадамоти давлатии алоқаи Тоҷикистон хоҳиш менамояд, ки бинобар гузаронидани корҳои профилактикӣ техникӣ, дастрасиро ба сомонаҳои maxala.org, Звезда.ру,ТҶК нюс, ва Сентразия қатъ намоед. Таърихи 2 марти соли 2012.»

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=173]http://www.taj.nansmit.tj/analysis/?id=173[/url]

Радио Озоди

Источник: