(Конфронси маҷозӣ)

Рӯзи 5 сентябри соли равон дар фазои Facebook – саҳифаи «Тоҷикисони навин» бо ибтикори гурӯҳи рӯшанфикрони тоҷик конфронси маҷозӣ дар мавзӯи «Оё рӯзноманигорони Тоҷикистон метавонанд ҳамраъйю муттаҳид шаванд?» баргузор гардид, ки фишурдаи онро ба самъи Шумо пешкаш менамоем.

[b]Матни пурраи конфронси маҷозиро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=127]http://www.taj.nansmit.tj/analysis/?id=127[/url]

Источник:

[b](Конфронси маҷозӣ)

Рӯзи 5 сентябри соли равон дар фазои Facebook – саҳифаи «Тоҷикисони навин» бо ибтикори гурӯҳи рӯшанфикрони тоҷик конфронси маҷозӣ дар мавзӯи «Оё рӯзноманигорони Тоҷикистон метавонанд ҳамраъйю муттаҳид шаванд?» баргузор гардид, ки фишурдаи онро ба самъи Шумо пешкаш менамоем.[/b]

[i]Дар конфронси маҷозӣ шахсони зерин ширкат доштанд:

Гардонанда Нуриддин Қаршибоев, Раиси Анҷумани миллии воситаҳои ахбори оммаи мустақили Тоҷикистон (АМВАОМТ)

Сайидюнуси Истаравшанӣ, коршиноси фалсафа ва ҳикмати исломӣ, устоди маркази омӯзишҳои кӯтоҳмуддат ва фурсатҳои мутолиотӣ дар Эрон

Дориюши Раҷабиён, рӯзноманигори мустақил ва рӯшанфикр

Додоҷон Атовуллоев, рӯзноманигор

Ҳумайрои Бахтиёр, рӯзноманигори ҷавон

Бобои Наврузи Сурӣ, рӯшанфикр аз деҳаи Сурхи ноҳияи Исфара.[/i]

[b]Нуриддин Қаршибоев:[/b] Дӯстони гиромӣ, мамнунам, ки мо ба мувофиқа расидем, то конфронси маҷозиро дар мавзӯи «Оё рӯзноманигорони Тоҷикистон метавонанд ҳарраъйю муттаҳид шаванд?» дар ҳамин саҳифаи «Тоҷикистони навин» баъди чанд дақиқа оғоз намоем. Хуб мебуд, ки ҳар яки мо назари худро мӯъҷаз ва мухтасар нависем. Суолҳо барои андеша: Ҳамраъйӣ дар чӣ зуҳур меёбад? Кадом мисолҳои онро медонед ё шоҳиду иштирокчии он будед? Чӣ сабабҳо метавонанд бар зарари ҳамраъйии рӯзноманигорон дар Тоҷикистон бошад? Хуб, лутфан оғоз мекунем!?

[b]Дориюш Раҷабиён:[/b] Дуруд бар ҳамагӣ. Ба назари ман, ҳамбастагии ҳирфаии рӯзноманигорон зарурати ҳифзи ҳайсият, эътибор ва амнияти якояки рӯзноманигорон аст. Журнолистҳо метавонанд дорои дидгоҳҳои гуногуни сиёсию иҷтимоъӣ бошанд, аммо дар заминаи ҳирфаӣ метавонанд ва бояд муттаҳид бошанд, то ҳам имкони азияту озорашон аз сӯи мақомот аз байн биравад ва ҳам чун як нерӯи мунсаҷими бузург ба пешбурди ҷомеъа мусоъидат кунанд.

[b]Нуриддин Қаршибоев:[/b] Ҳумайро, Шумо чи назар доред?

[b]Ҳумайро Бахтиёр:[/b] Дуруд бар дӯстони хабарнигорам! Ба назари ман, дар сурати ҳамраъйӣ мушкилот барои худи хабарнигорон хеле камтар хоҳад шуд. Ёдам ҳаст, дар як нишасти матбуотии вазорати умури хориҷа дар сурати посух нагирифтан масъули вазорат хабарнигорро як каме танбеҳ дод (ҳол он, ки хабарнигор ҳақ буд). Пас аз ин аз миён як рӯзноманигори дигар гуфт, ки ҳампешааш дуруст мегӯяд. Дар натиҷа он масъул воқеан ҷавоби носаҳеҳ доданашро тасдиқ кард. Бубинед, ки дар сурати муттаҳид шудан мо барои фаъолияти худ фазои мусоидеро фароҳам меоварем.

[b]Бобои Сурӣ:[/b] Дуруд бар дӯстон. Мо гарчанд рӯзноманигор нестем, вале ҳамчу як равшанфикри миллат ҳамбастагии рӯзноманигоронро дастгирӣ мекунем. Ва албатта умед дорем, ва боварии комил дорем, бо ёрии дӯстони рӯзноманигоронамон фикру ақоиди худро бо миллатамон баррасӣ кунем.

[b]Дориюш Раҷабиён:[/b] Барои мисол, мавзеъи ягона ё ғолиби рӯзноманигорон дар мавриди масоили сарнавиштсозе чун ҳузури низомии Русия дар Тоҷикистон метавонад ҷилави як иштибоҳи бузурги нимқарниро бигирад.

[b]Сайидюнуси Истаравшанӣ:[/b] Дар остонаи ҷашни Истиқлоли кишвар, ин тасмим аз сӯи давлатмардони мо, мухолифи истиқлол аст. Ҳузури нерӯҳои низомии як кишвари бегона дар хоки мо, он ҳам барои 49 сол, ки ним қарн аст, нақзи сареҳи истиқлолият ва тамомияти арзии мост. Ҳоло ки ҳанӯз ин тавофуқ ба тасвиби порлумон нарасида, бояд ба гӯши марокизи тасмим дар кишвар бирасад, ки аз як чунин тасмиме даст бардоранд, бо сарнавишти кишвар бозӣ накунанд. Фаразан агар ин корро ба маслиҳати кишвар медонанд, чун як тасмими сарнавиштсоз аст, бояд референдум баргузор шавад.

[b]Нуриддин Қаршибоев:[/b] Бидуни гуфтаҳои боло, чи бояд кард, ки дар Тоҷикистон ҳамраъйии воқеии рӯзноманигорон таҳким ёбад? Қабл аз ҳама, оё худи ин ҳамраъйӣ ҳаст?

[b]Додоҷон Атовуллоев:[/b] Ҳамраъйи чун панибратство суде надорад. Рақобати солим ба суди кор аст. Вақте чанд рӯзнома аз ҳисоби пули бедардимиён (аз буҷа) дармеояд, аллакай ин имтиёз ба ҳунарвар не, ба лаббайкзан аст.

[b]Сайидюнуси Истаравшанӣ:[/b] Ва аммо, дар робита бо авомиле, ки мунҷар ба адами ҳамраъйӣ миёни рӯзноманигорон мешавад, бояд арз кунам, ки муҳимтарин омил, дастгоҳҳои давлатӣ аст. Яъне давлат метавонад ба роҳатӣ миёни рӯзноманигорон ихтилоф бипошад. Роҳи пешгирӣ ҳам ба назари ман, ҳамон рӯ кардан аст. Яъне дар мавориде рӯзноманигори мустақил ва ҳақҷӯ чорае надорад ҷуз он ки масоилро рӯ кунад ва расонаиш намояд. Омили дигар ҳам, пул аст, ки дигар баҳсаш ҷудост.

[b]Дориюш Раҷабиён:[/b] Дигар ин ки фазои хасмона миёни рӯзноманигорони дарборӣ ва мустақилро бояд аз байн бурд. Мақомотро аз роҳҳои қонунӣ бояд водошт, ки ҳамаи рӯзноманигоронро бо як чашм бибинад ва хабарнигорони мустақилро ҳам ба сафарҳову гуфтугӯҳои расмӣ даъват кунад. Ин табъизи шуғлӣ бояд решакан шавад ва дар ин замина Анҷумани миллии расонаҳои мустақилли Тоҷикистон бояд ҷидду ҷаҳди бештар ба харҷ диҳад. Дар мавриди амнияти шуғлӣ ҳодисаҳои латукӯби Раҷаб Мирзо, Сайфуллоҳзода ва ахиран Хуршеди Атоуллоҳро метавон намуна овард. Намедонам ниҳодҳои хабарнигории Тоҷикистон дар ин замина чиҳо кардаанд, ки ҳанӯз ҳам шоҳиди ин рӯйдодҳои нанговар мешавем.

[b]Нуриддин Қаршибоев:[/b] Дар мавриди латукуби Сойфулозода ва Хуршеди Атовулло, ки имсол рух дод, иқдомҳо аз ҷониби ниҳодҳои рӯзноманигорӣ ба назар расиданд, вале вокуниш аз сӯи моқомоти ҳифзи ҳуқуқ рӯшан ба назар намерасад. Дар масъалаи Сайфуллозода, мутассифона, натиҷае нест.

[b]Дориюш Раҷабиён:[/b] Пӯзиш аз пурҳарфӣ. Ба иллати тангии фурсат маҷбурам гуфтаниҳоямро пушти сари ҳам бирезам.

[b]Нуриддин Қаршибоев:[/b] Ба назари Шумо, феълан чомеаи рӯзноманигории Тоҷикистон ҳамраъй аст?

[b]Сайидюнуси Истаравшанӣ:[/b] Аввалан, ҳамин ниҳод, ки ҷаноби шумо (Қаршибоев) сарпарастии онро ба ӯҳда доред, тақвият шавад, дар мавқеъҳои лозим, иқдомҳои шуҷоона бардорад, ба унвони мисол, дар ҳамин ду рухдод (латукӯби ду рӯзноманигор) мебоист корро сахт пайгирӣ мекард, ки ба назарам иҷломе ҷиддӣ бардошта нашуд. Баъд, ба ҳеҷ сурат вобаста ба давлат набошад ва ҳар гоҳ рӯзноманигоре таҳти фишор қарор бигирад, ҳамин ниҳод бошад, ки аз ӯ дифоъ ба амал оварад, ба ҳамон сурат, ки ахиран иқдоме дар қазияи хабарнигори ВВС анҷом гирифт.

[b]Нуриддин Қаршибоев:[/b] Ташаккур барои маслиҳат, шояд иқдоми ниҳоди мо муассир набуд, ба сабаби бетафовут будани дигар ниҳодҳо?

[b]Сайидюнуси Истаравшанӣ:[/b] Ин худ ҳамраъйӣ миёни рӯзноманигоронро ба вуҷуд меоварад, яъне вақте пушти худро муҳкам мебинанд, дар он сурат, бо шуҷоат ба кори худ идома медиҳанд.

[b]Нуриддин Қаршибоев:[/b] Дӯстон, ба андешаи Шумо чӣ халал мерасонад, ки рӯзноманигорони Тоҷикистон ҳамраъй бошанд? Хусумат, ҷудоиандозӣ, рақобати носолим ё чизи дигар?

[b]Дориюш Раҷабиён:[/b] Ҳамаи он унсурҳое. ки гуфтед, ҳаст, ба назари ман. Аммо муҳимтар аз ҳама, ноогоҳии рӯзноманигорон аз рисолати худ аст, ки монеъ аз иттиҳодашон мешавад. Бархе рӯзноманигориро навъе кори косибӣ медонанд ва вориди рақобатҳои бозорӣ шудаанд, ки бо ахлоқи рӯзноманигорӣ созгор нест.

[b]Бобои Сурӣ:[/b] Ва бояд камтар ҷуръатмандтар ҳам шаванд, вақте як ҳамкасбашон аз тарафи кормандони давлатӣ (бидуни ягон асос) ба ҷавобгарӣ кашида мешавад, эшон бояд ҳуқуқи ӯро талаб кунанд.

[b]Додоҷон Атовуллоев:[/b] Масъалаи усулӣ ва калидӣ дар сохтори давлату давлатдорист. Дар кишвари ноозод имкони рушди мабуоти озод нест ва нахоҳад буд.

[b]Сайидюнуси Истаравшанӣ:[/b] Масъалаи дигар он, ки шунида мешавад, дастгоҳҳои давлатӣ дар расонаҳои Тоҷикистон ҳатто мустақиллаш нуфуз дорад ва расонаҳо ба навъе вобаста ҳастанд. Агар ин воқеият дошта бошад, чаро худи ҳамин масъала дар расона матраҳ намешавад? Бояд шуҷоатмандона инро матраҳ кард.

[b]Додоҷон Атовуллоев:[/b] Ҳатто тоҷирон меҳаросанд, ки ба рӯзномаҳое, ки ҳукуматро танқид мекунанд, реклом диҳанд.

[b]Нуриддин Қаршибоев:[/b] То кадом андоза даъвои Додоҷон асос дорад? Магар дар Тоҷикистон матбуот озод нест? Баҳои созмонҳои рӯзноманигории ҷаҳони чӣ гуна аст?

[b]Сайидюнуси Истаравшанӣ:[/b] Ахиран ҳатто шунидам расонаҳои хориҷӣ ҳам ба навъе вобаста ба давлат ҳастанд. Агар ин ҳақиқат дошта бошад, ин мусибат аст, бояд бо расонаӣ кардан, пеши роҳи чунин падидаҳо гирифта шавад.

[b]Додоҷон Атовуллоев:[/b] ‎»Полуправда — хуже лжи» мегӯянд. Он чи дар матбуоти имрӯз мебинем, ана ҳамин полуправда аст.

[b]Сайидюнуси Истаравшанӣ:[/b] Бо назари оқои Атовуллоев ҳамнавоям, фикр мекунам далели кофӣ дар ин замина вуҷуд дорад.

[b]Нуриддин Қаршибоев:[/b] Мехостам дар робита ба гуфтаҳои боло, назари шуморо нисбати рисолати рӯзноманигорӣ ва расонаҳо дар ҷомеаи муосир бифаҳмам. Мо боз 15 дақиқа вақт дорем.

[b]Дориюш Раҷабиён:[/b] Мусалламан, матбуъоти ба ростӣ озод дар Тоҷикистон орзуе беш нест. Маъмулан, дар муқоиса бо ӯзбакҳо матбуъоти моро озод медонанд. Аммо як пурсиши содда: Оё касе аз рӯзноманигорони тоҷик метавонад даромадҳои худи Раҳмон ва хонаводаашро таҳқиқ кунад ва бо далелҳо риштаматлабҳое мунташир кунад ва ҳеҷ балое ба сараш наояд?

[b]Сайидюнуси Истаравшанӣ:[/b] Ҳатто расонаҳои хориҷии фаъол дар дохили Тоҷикистон дар заминаи масоили марбут ба Раҳмон ҷуръати ҳарф задан надоранд, то чи расад ба расонаҳои дохилӣ.

[b]Дориюш Раҷабиён:[/b] Худи шумо, оқои Қаршибоев, ин мавзӯъро беҳтар медонед, чун дар дохили кишвар ҳастед. Оё ба назари шумо матбуъоти Тоҷикистонро метавон озод номид?

[b]Додоҷон Атовуллоев:[/b] Сад дар сад бо Дориюш розиям.

[b]Бобои Сурӣ:[/b] Дустон мо набояд ба рӯзноманигорон фишор биёрем, барои ин ки ҳар яки мо аз демократияи давлатиамон огоҳем.

[b]Додоҷон Атовуллоев:[/b] Бадбахтона, журналистка ҳам дар ин кишвари мариз бемор аст. Рӯзномаҳоро мехонию шармат меояд. Хат ғалат, маънӣ ғалат, имло ғалат… Примитив….

[b]Дориюш Раҷабиён:[/b] Дар матбуъоти Тоҷикистон хатҳои сурхи бисёр захим ва маргборе вуҷуд доранд, ки метавон онҳоро нодида гирифт ва матлабе мунташир кард, аммо дар паи он бояд омода бошед, ки балое бароятон дасту по кунанд: ё тӯҳматномае алайҳи шумо дар матбуъоти дарборию нимадарборӣ мунташир мешавад ё калтак мехӯред ё зиндонӣ мешавед ё мегурезонанд, ё ба он дунё табъид мешавед. Магар ғайр аз ин аст?

[b]Сайидюнуси Истаравшанӣ:[/b] Ошкортар бигӯем, назари дӯстонро мехостам бидонам, оё расонаҳое чун Озодӣ ва ВВС дар ин замина «озоданд»? Агар на, чаро?

[b]Нуриддин Қаршибоев:[/b] Бахои ман ба матбуоти Точикистон: ВАО дар Тоҷикистон нисбатан озод аст. Мо наметавонем дар бораи озодии мутлақи расонаҳо дар кишвар сухан ронем. Барои ислоҳи вазъият ҳар кас метавонад саҳме дошта бошад, на дар сухан, балки дар амал!

[b]Бобои Сурӣ:[/b] Оқои Қаршибоеви азиз, аз шумо хоҳиш доштам ҳамин мақолаи Дориюши гиромӣ навиштаро, агар имконият бошад, ба чоп диҳетон бисьёр сипосгузорӣ мекардам. То дар ватан ҳам бидонанд ба кадом ботлоқе ғӯтида истодаанд.

[b]Нуриддин Қаршибоев:[/b] Хоҳиш мекунам, бештар сари таъмини ҳамраъйӣ назаратонро бигӯед. Назари шумо ба оодии матбуот дар Тоҷикистон боиси қадрдонист, вале аз мавзӯи конфронси маҷозӣ дур наравед. Сипос!

[b]Додоҷон Атовуллоев:[/b] Замоне радиои Озодӣ машҳур буд. Чун Соҷидаи Мирзо раҳбари бахши точикӣ шуд, аз Озодӣ номаш монд… пеши роҳи пайдоиши мақолаву таҳлилҳои танқидиро мегирад. Басо мекӯшад, ки ба ҳарифони сиёсии Раҳмонов минбар надиҳад. Зеро ӯ ба Зарифӣ ваъда кардааст, ки » имиҷи президентро мебардорад».

[b]Сайидюнуси Истаравшанӣ:[/b] Пас Худо ҳамаи моро раҳмат кунад!

[b]Нуриддин Қаршибоев:[/b] Хоҳиш мекунам, ба иззати нафси ҳамкасбон нарасем. Зеро ин мавод мавриди истифода дар расонаҳо қарор мегирад.

[b]Дориюш Раҷабиён:[/b] Ҳамраъйӣ дар миёни рӯзноманигорон нест. Аҷиб ҳам нест. Дар миёни миллати тикка пора рӯзноманигоронаш ҳам тикка пора мешаванд. Роҳи эҷоди иттиҳоду инсиҷом боло бурдани огоҳиҳои рӯзноманигорон аз рисолаташон аст. Чун бо ҷуръату азхудгузаштагии рӯзноманигорон аст, ки ҷомеъа ба озодиҳои бештар даст меёбад. Ҳеҷ давлате ба ихтиёри худаш ба матбуъот озодӣ надодааст. Барои ин ганҷ бояд ранҷҳои фаровон кашид.

[b]Бобои Сурӣ:[/b] На ҳоло роёна дар даст дорем, дӯстони бомаърифат дорем, орзуҳоро ба хок супоридан барвақт аст.

[b]Сайидюнуси Истаравшанӣ:[/b] Оқои Қаршибоеви гиромӣ, хулосаи ман ин аст, ки мо ба ҷои эҷоди ҳамраъйӣ, беҳтар аст ба ҳалли ин масоил, ки ин ҷо матраҳ шуд, бипардозем. Оё чунин нест?

[b]Дориюш Раҷабиён:[/b] Иттиҳод рамзи пирӯзист ва чун иттиҳод надорем, бозандаем дар ҳар сатҳе. На танҳо миёни рӯзноманигорон.

[b]Нуриддин Қаршибоев:[/b] Ташаккур, Дориюш! Ман мехостам дар ҳамин ҷо ба сӯҳбатамон нуқтаи таммат гузорам. Боз 3 дақиқа вақт ҳаст. Касе моҳиятан боз назари худро иброз медорад?

[b]Сайидюнуси Истаравшанӣ:[/b] Ба ҷои андешаи эҷоди ҳамраъйӣ, ба назар мерасад муҳим ҳалли масоиле аст, ки ин ҷо матраҳ шуданд ва бигузор расонаӣ шаванд.

[b]Додоҷон Атовуллоев:[/b] Озодӣ бозичае нест, ки осон бихарӣ, самбуса нест, ки дили роҳбареро биёбӣ. Барои ОЗОДӢ ҷонбозӣ мебояд!!! Дар Тоҷикистон озодие ба ҷуз мурдан вуҷуд надорад!!!! Ва озодии матбуот ҳамчунин!!!!

[b]Нуриддин Қаршибоев:[/b] Ман наметавонам ба ин фикр розӣ бошам. Албатта мушкилоте, ки шумоён иброз доштед, дар фазои итттилоотии Тоҷикистон вуҷуд дорад, мо ҳатталимкон барои ҳалли онҳо кӯшиш хоҳем кард ва аз Шумо низ даъват мекунем, ки мушоҳид ё нозир не, балки саҳмгир дар ҳалли қазияҳо бошед. Аз ҳамаи Шумо барои ширкататон дар ин сӯҳбати маҷозӣ миннатдорам. Як чизро бароятон ваъда медиҳам: мазмуну мундариҷаи ин конфронсро ба самъи ҳамкасбон дар Тоҷикистон мерасонам. Ташаккур!

АМВАОМТ (НАНСМИТ)

Источник: http://www.facebook.com/groups/132266500197220/?view=permalink&id=147263362030867#!/groups/132266500

[b]Дар пойтахти Русия аз шаби 5-ум ба 6-уми сентябр шабакаи ҷадиди телевизионӣ ба фаъолият оғоз намуд, ки «Москва-24» ном дорад. Ин шабака иттилоотӣ буда, 24 соат дар шабонарӯз ба таври зинда хабару гузоришҳоро аз шаҳри Маскав ва атрофи он манзури бинанда хоҳад кард.[/b]

Вақте ин хабарро мехондам аз пойтахти кишварамон ёд кардам. Воқеан, пойтахти Тоҷикистон ҳам шабакаи телевизионии худро дорад, ки шояд дар ҳеч пойтахти дигари дунё намунаи онро ёфтан амри маҳол бошад.

«Пойтахт» шабакаи телевизиони ҷамъиятист, ки ҳукумати шаҳри Душанбе муассиси он маҳсуб мегардад. Ин телевизионро мешавад якбора аз рӯи чанд номгӯй ба китоби рекордҳои Гиннес пешниҳод кард. 1. Барои тими эҷодӣ; 2. Кӯҳнатарин телевизиони асри 21; 3. Филм-плагиат;

Барномаҳое, ки ҳайати эҷодии ин шабака таҳия мекунанд, ба меъёрҳои журналистикаи имрӯз мутобиқ нестанд. Қолаби барномасозияшон низ шабакаҳои шӯравиро ба хотир меорад. Гузашта аз ин эҳсос мешавад, ки на ҳамаи кормандони ин шабака идеяву диди тозаи барномасозӣ доранд. Шояд сифати пасти барномаҳо ба дастгоҳхои кӯҳнаи сохти шӯравӣ тааллуқ бигирад? Зимнан, «Пойтахт» шояд ягона шабакаи телевизионӣ дар миқёси кишварҳои пасошӯравӣ (ё ягона ТВ дар тамоми пойтахтҳо) бошад, ки бо дастгоҳхои кӯҳна фаъолият мекунад. Шояд дастгоҳҳои рақамӣ низ дошта бошанд, аммо вақте ин шабакаро тамошо мекунӣ аз микрофонҳову наворҳо ва кадрҳои он эҳсос мешавад, ки бӯи дастгоҳи ҷадид барнамеояд. Дар ин шабака дилхоҳ филмро мешавад тамошо кард. Ҳатто филмҳое, ки ҳанӯз дар кинотеатрҳои кишвари истеҳсолкунанда намоиш дода нашудаанд. Ба гумони ғолиб ба мазмуни ин филмҳо қабл аз ба эфир гузоштан касе таваҷҷӯҳ намекунад, зеро онҷо лаҳзаҳои фаҳшу таҳқирро низ баъзан вохӯрдан мумкин аст. Гузашта аз ин сифати бархе аз ин филмҳо ба ҳаде пастанд, ки дар як дақиқа чанд бор ист мекунанд. Пушти қутии ин филмҳо аслан «барои намоиши хонаводагӣ» (для домашнего прасмотра) навишта шудааст. «Пойтахт» барномаҳои мустақим низ дорад. «Занги телефон» яке аз чунин барномаҳост, ки ман онро муваффақнашуда меҳисобам. Микрофонҳо дар ин барнома ҳамеша мушкил доранд. Тарзи пешниҳоди он низ хоси як телевизион нест. Гузашта аз ин шаби 5-уми сентябр ин барнома гӯё рӯҳияи ҷашнӣ дошт. Онҷо якбора чанд сарояндаро даъват намуда буданд. Ва ровии барнома ҳар навбат бо ишораи даст якеро ба назди худ мехонд ва сипас мегуфт, ки «ҷои худро дар маркази саҳна бигиред». Гӯё агар он сароянда дар марказ неву дар лаби саҳна истад, фонограмма садо намедиҳад.

Воқеан, дар мавриди фонограмма. Зимни ба «маркази саҳна» баромадани чанд сароянда коргардон сурудҳоро иваз намуд, ки дар натиҷа ба ҷои фонограммаи суруди овозхоне, ки дар саҳна аст, оҳанги нафари дар навбатбуда баланд шуд…
Дар пешниҳоди иттилоъ низ ин шабака бо ду по мелангад. Барномаи «Пайём» ҳисоботро ба ёд меорад. Дар он фаврият, сареҳият ва муҳимият-се меъёри аслии барномаи иттилоотӣ дида намешавад. Дар мавриди сайти интернетӣ бошад, ҳоҷати гап нест.

Ман иддаои бар пояи ТВ «Москва-24» расидани ТВ «Пойтахт»-ро надорам, зеро дар шароити имрӯз ин чиз имконнопазир аст. Аммо ҳамчун як нафаре, ки дар пойтахти Тоҷикистон кору фаъолият дорам, намехоҳам, ки бо чунин шабакаи телевизионӣ назди хориҷиҳо хандахариш шавем. Бо умеди то маросимҳои навбатии ҷашнгирии истиқлолият симои пойтахт шудани ТВ «Пойтахт» ҳамаи кормандони ин шабакаро бо истиқлолият табрик мегӯям!

Ozodagon.com

Источник: http://ozodagon.com/sabznoz/89-2011-04-13-07-24-36/2106—lr

[b]Дар рӯзи байнулмилалии Ҳамраъйии журналистон созмонҳои хабарнигорӣ ба раисиҷумҳур муроҷиат карданд.[/b]

Ҳамоиши рӯзноманигорони тоҷик бахшида ба рӯзи байнулмилалии ҳамраъйии журналистон бо нашри як муроҷиатнома ба унвони раисиҷумҳури Тоҷикистон ва порлумони кишвар кори худро анҷом дод.

Дар ин муроҷиатномаи иттиҳодияҳои рӯзноманигории Тоҷикистон аз раисиҷумҳур ба унвони кафили таъмини озодии баён ва ба порлумони кишвар ба унвони ниҳоди олии қонунгузории кишвар дархост мешавад, ки аз афзоиши мавориди фишор болои матбуот ҷилавгирӣ кунанд.

Дар ин муроҷиатномаи иттиҳодияҳои рӯзноманигории Тоҷикистон аз раисиҷумҳур ба унвони кафили таъмини озодии баён ва ба порлумони кишвар ба унвони ниҳоди олии қонунгузории кишвар дархост мешавад, ки аз афзоиши мавориди фишор болои матбуот ҷилавгирӣ кунанд.

Даъвои пардохти зарар ба маблағи як миллион сомонӣ аз сӯи Вазорати кишоварзӣ алайҳи нашрияи мустақили «Миллат», панҷ миллион сомонии даъво аз тарафи додрасҳои Додгоҳи олии Тоҷикистон аз нашрияҳои «Азия-Плюс», «Фараж» ва «Озодагон», қатъи муваққати чопи бархе аз ин нашрияҳо дар пайи инъикоси нооромиҳои ахири водии Рашт бо шумули «Нигоҳ» ва ахиран боздошту нигаҳдории рӯзноманигорон Муҳаммадюсуф Исмоилов ва Урунбой Усмонов гувоҳи он аст, ки хабарнигорон ҳамоно як бахши осебпазири ҷомеаи тоҷик боқӣ монда ва ниёз ба таваҷҷӯҳи хос доранд.

Зеро талоши ин расонаҳо ва хабарнигорон танҳо барои анҷоми рисолати касбиашон сурат гирифтааст, вале мақомоти алоҳида бо ҳар роҳу васила болои онҳо фишор меоваранд. Бо ишора ба ин маврид, дар муроҷиати созмонҳои мустақили хабарӣ ба раисиҷумҳур ва порлумони Тоҷикистон ҳамзамон аз татбиқи нодуруст ва ғайримунсифонаи меъёрҳои қонун дар нисбати хабарнигорон ва расонаҳои мустақили кишвар дар ду соли ахир изҳори нигаронӣ шуда ва даъват мешавад, ки ба ҳайси кафили озодии баён ва таъмини ҳуқуқи инсон аз фишорҳои фазоянда дар нисбати матбуот ҷилавгирӣ шавад.

НУРИДДИН ҚАРШИБОЕВ, раиси Анҷумани миллии расонаҳои мустақили Тоҷикистон ё НАНСМИТ ва яке аз мубтакирони баргузории ин нишаст гуфт, иттифоқоти номатлуби рухдода дар ду соли ахир созмонҳои рӯзноманигории тоҷикро водор кардааст, ки ба раисиҷумҳур ва порлумон муроҷиат кунанд: «Мо аз раисиҷумҳур ҳамчун кафили ҳуқуқҳои конститутсионии Тоҷикистон барои ҷилавгирӣ аз фишорҳо ба васоити ахбори омма ва рӯзноманигорон дархост кардем, то ҳамаи он қазияҳои судӣ, ки дар истеҳсолот ҳаст, мунсифона мавриди баррасӣ қарор гирад ва ба нақзи ҳуқуқи рӯзноманигорон ва васоити ахбори омма дар иҷрои рисолати аслиашон монеа эҷод накунад.»

Зимнан, дархости рӯзноманигорон аз раисиҷумҳур дар ҳоле садо медиҳад, ки рӯзноманигорони тоҷик масъалаи ҳамараъйии худ дар баробари чунин мушкилотро дар ин нишаст мавриди арзёбӣ қарор доданд.

ХУРШЕДИ АТОВУЛЛО, раиси созмони «Медиа-Алянси Тоҷикистон» гуфт, ки ба фарқ аз солҳои пешина дар миёни рӯзноманигорони тоҷик як навъ тафоҳум ва ваҳдати назар дар баробари таҳдидҳои гуногун ба вуҷуд омадааст.

Ӯ гуфт дуруст аст, ки ҳанӯз ҳам рӯзноманигорони тоҷик ба ду бахш — давлатӣ ва мустақил тақсим шудаанд, вале таҳаввули мусбат дар ин самт ин аст, ки расонаҳо ва созмонҳои мустақили хабарӣ ба фарқ аз чанд соли пеш дар рафъи мушкилоти болояшономада дар канори ҳам қарор гирифтанд: «Қадам ба сӯи ҳамраъйӣ миёни журналистони Тоҷикистон дар соли гузашта аз мусибати умумии онҳо оғоз шуд. Вақте ки чопи се рӯзномаи маъруф аз нашр бозмонду дастрасӣ ба чанде аз сайтҳои интернетӣ маҳдуд шуд, онҳоро водор кард, ки новобаста аз мавқеашон ва аз манфиатҳояшон дар як кумита ҷамъ оянд. Ин кумита бо номи «29-сентябр» хеле фаъолона амал кард ва тақрибан ҳамаи сардабирон ва масъулони созмонҳои рӯзноманигорӣ узви ин кумита шуданд ва ин кумита дар ниҳоят муваффақ шуд, ки мушкилии пешомадаро бартараф кунад.»

ҚИРОНШОҲ ШАРИФОЗОДА, яке дигар аз нотиқони ин нишаст пешниҳод кард, ки ба хотири дастгирии рӯзноманигорони бо мушкил дучоршуда як Хазинаи кӯмак ба рӯзноманигорон таъсис дода шавад: «Дар ин рӯзҳое, ки ҳамкасбони мо ба чунин мушкилӣ дучор меоянд ва чун рӯзноманигорон ҳам аз қишри камбизоати кишвар ҳастанд, ба ин фикр расидем, ки агар Хазинае таъсис дода шавад ва ширкатҳои иттиллоотӣ ва идораи нашрияҳо ба миқдори муайян ва ба ин хазина маблағ пардозанд ва пас аз ҷамъшавии ин маблағҳо мо тавонем, ки хонаводаҳои рӯзноманигоронро аз ҷиҳати моддӣ дастгирӣ кунем.»

Нуриддин Қаршибоев, раиси НАНСМИТ ё Анҷумани миллии расонаҳои мустақили Тоҷикистон гуфт, созмонҳои хабарии Тоҷикистон, аз ҷумла Иттифоқи рӯзноманигорон, созмони «Медиа-Алянси Тоҷикистон, созмони иҷтимоии «Хома», Шӯрои васоити ахбори омма ва Хазинаи гиромидошти рӯзноманигорони Тоҷикистон умед бар ин доранд, ки дархости онҳоро раисиҷумҳур ва порлумони кишвар бидуни вокуниш нахоҳад гузошт.

ҲАМЧУНИН дар рӯзи байнулмилалии Ҳамраъйии журналистон бархе аз хабарнигорон ва созмонҳои журналистӣ ҷоизаи Медиа-Алянси Тоҷикистон ва Созмони Амнияту Ҳамкорӣ дар Аврупо (САҲА)-ро соҳиб гардиданд. Аз ҷумла, ин ҷоиза ба Радиои Озодӣ ва Радиои Имрӯз барои инъикоси воқеӣ ва ҳамаҷонибаи мушкилоти журналистика ва журналистони тоҷик дода шуд.

Урунбой Усмонов, хабарнигори Би-би-сӣ ва Муҳаммадюсуф Исмоилов, хабарнигори пешини «Нури зиндагӣ», ки ҳоло дар боздоштгоҳ қарор дорад, барои мавқеи устувор дар журналистика ҷоизаи МАТ ва САҲА-ро гирифтанд.

Урунбой Усмонов, хабарнигори Би-би-сӣ дар моҳи июни соли ҷорӣ аз сӯи нерӯҳои интизомии вилояти Суғд ба иттиҳоми ҳамкорӣ бо аъзои ҳизби мамнӯъи Таҳрир боздошт шуд, вале пас аз як моҳ ва он ҳам бо дахолати шахсии раисиҷумҳур аз боздоштгоҳ раҳо гардид. Созмонҳои байнулмилалии дифоъ аз ҳуқуқи хабарнигорон ва шабакаи ҷаҳонии Би-би-сӣ сӯҳбати Урунбой Усмонов бо аъзои ҳизби Таҳрирро як бахши кори хабарнигории ӯ медонанд ва борҳо аз мақомоти Тоҷикистон хостаанд, ки ӯро табраа кунанд.

Аммо Муҳаммадюсуф Исмоилов, хабарнигори маҳаллии «Нури зиндагӣ», бештар аз нӯҳ моҳ аст, ки дар боздоштгоҳе дар Хуҷанд нигаҳдорӣ мешавад. Ҳарчанд вакили мудофеи ӯ гуфтааст, ки иттиҳомоти ворида алайҳи Исмоилов исботи худро наёфт, вале то ҳанӯз додгоҳ дар баробари вай ҳукми худро содир накардааст.

Мақомот ӯро дар нашри матолиби тӯҳматангез ва маҳалгароёна муттаҳам мешуморанд. Вале созмонҳои хабарнигорӣ мутмаинанд, ки ӯ барои чопи силсиламақолаҳояш дар бораи вазъи зиндагии сокинони ноҳияи Ашти вилояти Суғд мавриди боздошт қарор гирифтааст.

НАНСМИТ ё Анҷумани миллии расонаҳои мустақили Тоҷикистон низ барои мусоидат дар ҳамраъйии журналистон дар ҳолатҳои фавқулода (изтирорӣ) соҳиби ҷоиза шуд.

Абдуқаюми Қаюмзод

Источник: http://www.ozodi.org/content/article/24321918.html

[b]Дар рӯзи байнулмилалии Ҳамраъйии журналистон созмонҳои хабарнигорӣ ба раисиҷумҳур муроҷиат карданд.[/b]

Ҳамоиши рӯзноманигорони тоҷик бахшида ба рӯзи байнулмилалии ҳамраъйии журналистон бо нашри як муроҷиатнома ба унвони раисиҷумҳури Тоҷикистон ва порлумони кишвар кори худро анҷом дод.

Дар ин муроҷиатномаи иттиҳодияҳои рӯзноманигории Тоҷикистон аз раисиҷумҳур ба унвони кафили таъмини озодии баён ва ба порлумони кишвар ба унвони ниҳоди олии қонунгузории кишвар дархост мешавад, ки аз афзоиши мавориди фишор болои матбуот ҷилавгирӣ кунанд.

Дар ин муроҷиатномаи иттиҳодияҳои рӯзноманигории Тоҷикистон аз раисиҷумҳур ба унвони кафили таъмини озодии баён ва ба порлумони кишвар ба унвони ниҳоди олии қонунгузории кишвар дархост мешавад, ки аз афзоиши мавориди фишор болои матбуот ҷилавгирӣ кунанд.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=125]http://www.taj.nansmit.tj/analysis/?id=125[/url]

Абдуқаюми Қаюмзод

Источник:

[b]иштироккунандагони «мизи мудаввар» дар мавзўи «Ҳамраъйии журналистон – ба тақдири ҳамкасбонамон бетафовут набошем» ба Президент ва парлумони Ҷумҳурии Тоҷикистон[/b]

Мо, иштироккунандагони сўҳбати «мизи мудаввар» — журналистон ва намояндагони созмонҳои журналистӣ ва байналмилалӣ дар мавзўи «Ҳамраъйии журналистон – ба тақдири ҳамкасбонамон бетафовут набошем» бо назардошти вазъи саломатӣ ва ифодаи иродаи нек аз Шумо хоҳиш дорем нисбат ба журналист Маҳмадюсуф Исмоилов чораи пешакии дар маҳбас нигоҳ доштан ба чораи дур нарафтан аз маҳалли зист иваз карда шавад.

Мо итминони комил дорем, ки М. Исмоилов — хабарнигори нашрияи «Нури зиндагӣ», маҳз бо сабаби дар рӯзнома чоп кардани мақолаҳои танқидӣ, фош кардани иллатҳои ҷомеа мавриди таъқиботи судӣ қарор гирифтааст ва як гурўҳ одамони мансабдор бо нияти тарсондан чашми журналистони дигар ва махдуд кардани озодии баён дар кишвар ўро беш аз 9 моҳ инҷониб дар маҳбас нигоҳ медоранд.

Қазияи журналист Маҳмадюсуф Исмоилов аз ҷумлаи онҳоест, ки ба имиҷи байналмилалии Ҷумҳурии Тоҷикистон рабт дорад. Бинобар ин иваз кардани чораи пешгирии дар ҳабс нигоҳ доштани журналист ва мунсифона баррасӣ намудани парвандаи ҷиноятӣ нисбати ӯ бори дигар иродаи неки роҳбарияти давлат ба арзишҳои демократӣ ва волоияти конунро дар мамлакат баръало намоиш медихад.

Иштироккунандагони «мизи мудаввар» дар мавзўи «Ҳамраъйии журналистон – ба тақдири ҳамкасбонамон бетафовут набошем».

ш. Хуҷанд, 8 сентябри соли 2011

Источник:

[b]Бахшида ба Рӯзи байналмилалии ҳамрайъии журналистон рўзи 8 август дар шаҳри Хуҷанд бо иштироки журналистон, намояндагони созмонҳои журналистӣ ва байналмилалӣ дар мавзўи «Ҳамраъйии журналистон – ба тақдири ҳамкасбонамон бетафовут набошем» «мизи мудаввар» барпо гашт.[/b]

Дар ифтитоҳи «мизи мудаввар» раиси созмони вилоятии журналистони Тоҷикистон Илҳоми Ҷамолиён ва роҳбари хадамоти мониторинги Анҷумани миллии воситаҳои ахбори оммаи мустақили Тоҷикистон (АМВАОМТ) Абдуфаттоҳ Воҳидов иштироккунандагонро ба муносибати Рўзи ҳамраъйии журналистон табрик гуфтанд.

Сипас роҳбари хадамоти мониторинги АМВАОМТ Абдуфаттоҳ ВОҲИДОВ дар мавзўи «Чорабиниҳои ҳамраъйии журналистон: сабақҳои бадастомада», директори ШТВ «Осиё», ш.Хуҷанд Аъзамхон Акбаров дар мавзўи “Ҳамраъйӣ ва меъёрҳои ахлоқии фаъолияти журналистон”, Маҳмудҷон Дадобоев, директори ШТР «Ҷаҳоноро», ш.Ғафуров дар мавзўи «Ҳамраъйии журналистон дар чӣ ифода меёбад?» суханронӣ карданд.
Дар атрофи мавзўъҳои мазкур байни иштироккунандагони «мизи мудаввар» мубоҳисаи тўлонӣ ба амал омад.

Иштироккунандагони чорабинӣ бо нияти минбаъд устувор кардани ҳамраъйии журналистони вилоят тавсияҳои зеринро қабул карданд:

[i]- Таъсис додани Хазинаи изтирорӣ барои кўмак ба журналистоне, ки мавриди таъқиботи судӣ қарор мегиранд;

— Созмон додани маҳфили журналистон барои баррасии масоили мухими хаёти журналистони минтака;

— Бетафовут набудан ва вокуниш нишон додан ба зухуроти накзи хухуки журналистон ва таъмини дастрасии ВАО бо маводе, ки боиси бахси хирфаи ё суди гаштаанд;

— Тахкими меъёрхои ахлоки ва баланд бардоштани эътибори журналисон дар чомеа;

— Баланд бардоштани маърифати ҳуқуқии журналистон тавассути барномахои омузиши.[/i]

Иштироккунандагони ҳамоиш инчунин бо мақсади аз маҳбас озод намудани журналист Маҳмадюсуф Исмоилов ба унвони роҳбарияти давлат муроҷиатнома қабул карданд.

Источник: Хадамоти мониторинги АМВАОМТ.

[b]Теъдоде аз рӯзноманигорон ва созмонҳои рӯзноманигории Тоҷикистон бо судури баёнияе аз раиси ҷумҳур ва порлумони ин кишвар хостаанд, ки аз мавориди фишор бар хабарнигорон ва матбуъот ҷилавгирӣ кунанд.[/b]

Ин баёния рӯзи панҷшанбеи 8 сентябр дар ҷараёни ҳамоиши вижае, ки ба муносибати «Рўзи байналмиллалии ҳамбастагии рӯзноманигорон» доир шуд, ба тасвиб расид.

Ин ҳамоиш ба ибтикори созмони рӯзноманигории Медия-Алянси Тоҷикистон ва бо ҳимояти молии Созмони Амният ва Ҳамкории Урупо дар бинои Маркази мутолеъоти истротежики Тоҷикистон доир шуд ва дар он рӯзноманигорон аз тамоми манотиқи кишвар ширкат доштанд.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=126]http://www.taj.nansmit.tj/analysis/?id=126[/url]

Источник:

[b]Теъдоде аз рӯзноманигорон ва созмонҳои рӯзноманигории Тоҷикистон бо судури баёнияе аз раиси ҷумҳур ва порлумони ин кишвар хостаанд, ки аз мавориди фишор бар хабарнигорон ва матбуъот ҷилавгирӣ кунанд.[/b]

Ин баёния рӯзи панҷшанбеи 8 сентябр дар ҷараёни ҳамоиши вижае, ки ба муносибати «Рўзи байналмиллалии ҳамбастагии рӯзноманигорон» доир шуд, ба тасвиб расид.

Ин ҳамоиш ба ибтикори созмони рӯзноманигории Медия-Алянси Тоҷикистон ва бо ҳимояти молии Созмони Амният ва Ҳамкории Урупо дар бинои Маркази мутолеъоти истротежики Тоҷикистон доир шуд ва дар он рӯзноманигорон аз тамоми манотиқи кишвар ширкат доштанд.

Дар ин баёния аз мавориди эҷоди мавонеъ дар роҳи фаъолияти қонунии расонаҳо ва рӯзноманигорон аз ҷониби масъулини давлатӣ изҳори нигаронт мешавад.

Мавзӯъҳои дигари меҳварие, ки дар ин ҳамоиш баррасӣ шуд, аз ҳамбастагии рӯзноманигорони кишвар, мушкилот ва мавонеъи мавҷуд дар ин замина ва омилҳои таъсиргузор бар он иборат буд.

[b]»Ҳампешагон дар ду сангар»[/b]

Аз ҷумлаи мушкилоти марбут ба ҳамбастагии рӯзноманигорон, ки дар ибтидои ин мизи гирд матраҳ гардид, ба гурӯҳҳо ва маҳалҳо қисмат шудани рӯзноманигорон дар Тоҷикистон буд.

Пулод Нуров, дабири вижаи Иттиҳодияи рӯзноманигорони Тоҷикистон, ҳамбастагии ҳирфаии рӯзноманигорон дар ин кишварро «афсона» хонд ва далели онро ҷудо кардани расонаҳо ба ҳукуматӣ ва ғайриҳукуматӣ номид.

Вай афзуд: «Рӯзноманигорон низ ба ду гурӯҳи калони ҳукуматӣ ва мустақил тақсим гаштаанд. Онҳо на танҳо ҳамдигарро эътироф намекунанд, балки дар тадобире мисли «Рӯзи байналмилалии ҳамбастагии рӯзноманигорон»-ро ба таври ҷудогона ҷашн мегиранд.»

Оқои Нуров як сабаби ин «азҳамрезии иттиҳодро» таъсири сохти шӯравӣ донист ва сабаби дигарашро таъсири созмонҳои хориҷӣ бар ин раванд унвон кард. Ӯ таъсири созмонҳои хориҷиро чунин шарҳ дод, ки онҳо аз тарҳҳои нашрияҳои мустақил бештар ҳимоят намуда, аз ҷумла, эълону рекломҳои худро низ бештар дар нашрияҳои мустақил интишор медиҳанд.

Аммо Нуриддин Қаршибоев, раиси Анҷумани миллии расонаҳои мустақилли Тоҷикистон, омили дигари парокандагии рӯзноманигоронро «маҳаллчигӣ ва майдамаҳалчигӣ» донист.

Ба гуфтаи оқои Қаршибоев, даст бардоштан аз маҳаллгароӣ ба хотири ваҳдати касбӣ ё пешавариро аз қадамҳои ҷиддӣ барои даст ёфтан ба ҳамбастагии комил миёни рӯзноманигорон хоҳад буд.

[b]»Милюнҳо сомонӣ ҷарима»[/b]

Аз мушкилоти дигар дар ҷомеъаи рӯзноманигории Тоҷикистон, ки дар нишасти рӯзи панҷшанбе мавриди баҳсу баррасӣ қарор гирифт, боздошти Ӯрунбой Усмонов, хабарнигори Би-би-сӣ ва Маҳмадюсуф Исмоилов, хабарнигори нашрияи «Нури зиндагӣ», дар вилояти Суғд ва қазияҳои додгоҳии нашрияҳои “ASIA-Plus” ва «Миллат» буд, ки тайи як соли ахир идома доранд.

Иноятулло Иноятов, ҳуқуқдони мустақил, сабаби аслии аз ҳад зиёд ба дарозо кашидани мурофиъаҳои додгоҳӣ ва сардаргумиҳо дар ин заминаро иттилоъ ва дониши кам доштани қозиён перомуни қавонини марбут ба рӯзноманигорӣ ва расонаҳо унвон кард.

Аммо оқои Иноятов аз он изҳори нигаронӣ кард, ки пайиҳам ба додгоҳ кашида шудани рӯзноманигорон ва нашрияҳо, ҳамчунин маблағҳои ҳангуфт талаб кардани даъвогарон барои “ҷуброни зарари маънавӣ” ба манзури маҳдуд сохтани фаъолияти расонаҳои мустақил дар кишвар сурат мегирад.

[b]Хазинаи дифоъ аз рӯзноманигорон[/b]

Аз ҷумлаи пешниҳодҳое, ки дар ҷараёни нишасти имрӯз муҳим шумурда шуд, таъсиси як хазинаи вижа барои кумаки изтирорӣ ба рӯзноманигорон ва расонаҳое буд, ки мавриди таҳдиду фишор ва ё таъқиб ҳастанд ва ё баҳсҳои додгоҳие доранд.

Қироншоҳ Шарифзора, раиси созмони ғайридавлатии “Журналист”, ки аз мубтакирони ин пешниҳод буд, таъсиси чунин як ниҳодро барои таҳкими ҳамбастагии ҳирфаии рӯзноманигорон бисёр муфид хонд.

Оқои Шарифзода афзуд: «Бигзор агар хазина бо як маблағи ночиз ҳам боз шавад ва пули кам ҳам дошта бошад, аммо муҳим он аст, ки маблағхо дар як ҷо ҷамъ гашта, такиягоҳ ва воситаи кумаки воқеъии рӯзноманигороне мегардад, ки бо мушкил мувоҷеҳ шудаанд.»

Аммо пруфессур Иброҳим Усмонов, рӯзноманигор ва сиёсатмадори маъруф, ҳар гуна кумаки молиро барои рӯзноманигорони ниёзманд чандон муҳим намедонад.

Ба андешаи ӯ, ҳарчанд кумакҳои молӣ тасмимҳои хайрхоҳона ва хубанд, аммо бештар лозим аст ҳамкасбон таваҷҷӯҳи худро ба кумакҳои маънавӣ мутамаркиз кунанд.

Зимнан, дар поёни ҳамоиши имрӯз созмони Медия-Алянси Тоҷикистон ва намояндагии Созмони Амният ва Ҳамкории Урупо дар Тоҷикистон бо эътои диплумҳо ба теъдоде аз рӯзноманигорон ва расонаҳои мустақил аз фаъолияти онҳо қадрдонӣ карданд.

Аз ҷумла, онҳо ба Ӯрунбой Усмонов, хабарнигори бахши узбекии родиюи Би-би-сӣ, ки дар моҳи июн боздошт шуда ва моҳеро дар боздошт сипарӣ кард, ва Маҳмадюсуф Исмоъилов, хабарнигори нашрияи «Нури зиндагӣ», ки тайи ҳуҳуди як сол боз дар боздошт ба сар мебарад, диплумҳои “Барои мавқеъи устувор дар журналистика (рӯзноманигорӣ)”-ро эъто карданд.

Родиюҳои «Озодӣ» ва «Имрӯз» низ барои «инъикоси воқеъӣ ва ҳамаҷонибаи мушкилоти журналистика (рӯзноманигорӣ) ва журналистони (рӯзноманигорони) тоҷик» ба ин гуна ҷавоиз ноил шуданд.

Источник: http://www.bbc.co.uk/tajik/institutional/2011/09/110908_ea_ah_media_solidarity.shtml

[b]Ду созмони дифоъ аз ҳуқуқи журналистон аз раисиҷумҳури Тоҷикистон озодии Маҳмадюсуф Исмоиловро дархост карданд.[/b]

Созмони байнулмилалии “Хабарнигорони бидуни марз” (Reporters Sans Frontieres — RSF) ва Анҷумани миллии расонаҳои мустақили Тоҷикистон ё НАНСМИТ аз раисиҷумҳури Тоҷикистон Эмомалӣ Раҳмон хостанд, ба сарнавишти журналисти тоҷик Маҳмадюсуф Исмоилов, ки аз 23-юми ноябри соли 2010 дар зиндон ба сар мебарад, таваҷҷӯҳ кунад.

Дар изҳороти муштараки ду созмони дифоъ аз ҳуқуқи журналистон, ки дар арафаи Рӯзи байнулмилалии ҳамрайъии журналистон мунташир шуд, гуфта мешавад, хабарнигорон, расонаҳо ва созмонҳои журналистӣ аз озод шудани хабарнигри Би-би-сӣ дар вилояти Суғд, Урунбой Усмонов хушҳоланд ва инро натиҷаи таваҷҷӯҳи раисиҷумҳури Тоҷикистон шумурда, аз ҷаноби Раҳмон дархост мекунанд, ба мурооти қонун дар нисбати журналисти тоҷик Маҳмадюсуф Исмоилов мусоадат намояд.

Ин созмонҳо мегӯянд, парвандаи Исмоилов низ ҳамсони парвандаи Усмонов аст. Вай низ ҳадафи иттиҳомоте қарор ёфтааст, ки далели кофӣ барои тасбит надоранд. Исмоиловро ба ангехтани хусуматҳои динӣ, нажодӣ ва маҳалгароёна, тӯҳмат ва тавҳин айбдор мекунанд. Вале то ҳол дар муҳокимаи парванда ҳеҷ яке аз ин иттиҳомот исбот нашудааст.

Созмони байнулмилалии “Хабарнигорони бидуни марз” ва Анҷумани миллии расонаҳои мустақили Тоҷикистон хостаанд, муҳокимаи Маҳмадюсуф Исмоилов на дар Хуҷанд, балки дар шаҳри Душанбе ҷараён гирад ва имкони таъсири мақомоти маҳаллӣ ба додгоҳ аз байн равад.

Раиси созмони байнулмилалии “Хабарнигорони бидуни марз” Жан-Франсуа Ҷуллиард ва раҳбари Анҷумани миллии расонаҳои мустақили Тоҷикистон Нуриддин Қаршибоев аз раисиҷумҳури Тоҷикистон Эмомалӣ Раҳмон хостаанд, ба тағйири чораи пешгирӣ аз журналисти солманду бемор, ки зиёда аз меъёр шумурда шудааст, мусоадат кунад. Онҳо изҳори умедворӣ кардаанд, ки раисиҷумҳур ҳамчун кафили ҳуқуқи конститутсионии шаҳрвандони Тоҷикистон ба он мусоадат хоҳад кард, ки бархӯрд ба Исмоилов аз рӯи адолат ва беғаразона сурат гирад.

Радио Озоди

Источник: http://www.ozodi.org/content/article/24321098.html