[b]Кумитаи Дифоъ аз Рӯзноманигорон ҳамла ба Додоҷони Атовуллоҳ, хабарнигори табъидии тоҷики муқими Русия ва сардабири нашрияи «Чароғи рӯз»-ро маҳкум кардааст.[/b]

Ин созмони мудофеъи ҳуқуқи рӯзноманигорон, ки мақарраш дар Ню-Йурк аст, аз мақомоти Русия хостааст, ки амнияти оқои Атовуллоҳро дар замони муъолиҷа таъмин кунанд.

Дар изҳороти ин созмони байналмилалӣ, ки рӯзи ҷумъаи 13 январ мунташир шуд, омадааст: «Нашрияи «Чароғи рӯз» бо интиқодоти тундаш аз давлати кунунии Тоҷикистон, бахусус Эмомалӣ Раҳмон, раиси ҷумҳури ин кишвар, шинохта шудааст. Вақте ки чопи ин рӯзнома дар Тоҷикистон мамнӯъ шуд, Додоҷони Атовуллоҳ ба интишори он дар табъид идома дод.»

Додоҷони Атовуллоҳ, рӯзноманигори 56-солаи мухолифи давлати Тоҷикистон, шоми рӯзи 12 январ дар маркази шаҳри Маскав ҳадафи ҳамлаи фарде номаълум қарор гирифт ва шадидан захмӣ шуд.

Кумитаи Дифоъ аз Рӯзноманигорон дар баёнияи худ гуфтааст: «Мо аз бозрасони ин қазия дар Русия дархост мекунем, ки ҳамла ба Додоҷони Атовуллоҳро ҷиддан таҳқиқ, амнияташро то замони шифо ёфтанаш таъмин ва ҳамлагаронро муҷозот кунанд.»

Баъд аз зуҳри рӯзи ҷумъа Вазорати умури дохилии Русия хабар дод, ки як шаҳрванди 23-солаи Тоҷикистон, ки дар робита бо ин ҳамла боздошт шуда буд, «ба далели даст надоштан дар ин қазия» аз боздошт раҳо шудааст.

Қабл аз ин, расонаҳои Русия гузориш карда буданд, ки Бахтиёр Раҳимбердиев ба занни даст доштан дар ҳамла ба Додоҷони Атовуллоҳ дар рестуроне дар Маскав тавассути нерӯҳои интизомӣ боздошт шудааст.

Клик ГБМ аз ҳамла ба Додоҷони Атовуллоҳ «ваҳшатзада аст»

Клик Cозмонҳои рӯзноманигорӣ ҳамла ба Атовуллоҳро маҳкум карданд

Клик Сӯиқасд ба ҷони Додоҷони Атовуллоҳ

Нина Огнианова, ҳамоҳангсози барномаи Урупо ва Осиёи Миёнаи Кумитаи Дифоъ аз Рӯзноманигорон, мегӯяд: «Додоҷони Атовуллоҳ як хабарнигори пуровоза ва душмандор аст, ки равобиташ бо давлати Тоҷикистон ба хотири фаъъолиятҳои ҳирфаияш носозгор аст. Фаъъолияти рӯзноманигории ӯ бояд дар ҷараёни бозрасӣ ба унвони яке аз ангезаҳои эҳтимолии ин ҳодиса дар назар гирифта шавад.»

Пештар бархе аз соҳибназарон эҳтимоли даст доштани мақомоти тоҷик дар ин ҳодисаро матраҳ кардаанд. Бархе аз дӯстон ва ҳамкорони оқои Атовуллоҳ ба ин назаранд, ки сӯиқасд ба ҷони вай як амали тарҳрезишуда аст.

Аркадий Дубнов, хабарнигори нашрияи «Московские новости»-и чопи Маскав, дар мусоҳиба бо хабаргузории «ASIA-Plus» иддаъо кардааст, ки ҳамла ба оқои Атовуллоҳ суфоришӣ аст ва «сарнахи онро бояд дар Душанбе ҷустуҷӯ кард.»

Аммо рӯзи шанбеи 14-январ Давлат Назрӣ, сухангӯйи Вазорати умури хориҷаи Тоҷикистон, дар сӯҳбат бо Би-би-сӣ дар вокуниш ба ин иттиҳомот гуфт: «Чунин иттиҳомот, бахусус ҳарфҳои Аркадий Дубнов, бояд бигӯям, ки чунин ибрози назарҳо фаъъолияти худи мақомоти Русияро метавонад зери шубҳа гузорад.»

Вай афзуд, ки давлати Тоҷикистон ҳама гуна зӯроварӣ ё аъмоли хушунатомезро маҳкум мекунад ва умедвор аст, ки мақомоти зидахли Русия «вазифаи худро бахубӣ анҷом медиҳанд» ва фарде, ки дар ин ҳамла даст дорад, ба ҷавобгарӣ кашида (муҷозот) мешавад.

Дар баёнияи Кумитаи Дифоъ аз Рӯзноманигорон ишора шудааст, ки дар моҳи апрели соли 2011 мақомоти Тоҷикистон Додоҷони Атовуллоҳро ба «таҳқири Президент Раҳмон», «тарафдорӣ аз сарнагунии низоми конститутсионӣ аз роҳи зӯр» ва «ангехтани низоъи қавмию нажодӣ ва мазҳабӣ» муттаҳам карда буданд.

Қаблан созмони байналмилалии Гузоришгарони Бидуни Марз (ГБМ) ва чанд созмони ғайридавлатии Тоҷикистон низ бо интишори баёнияҳое ҳамла ба ин рӯзноманигори мухолифи давлатро маҳкум карда буданд. ГБМ гуфт, ки аз ҳамла ба Додоҷони Атовуллоҳ дар Маскав «башиддат ваҳшатзада» аст.

Ин созмон низ аз пулиси Русия хост, ки ҳамаи тадобири мумкинро барои шиносоии фарди муҳоҷим ва афроди дигаре, ки пушти ин қазия ҳастанд, анҷом бидиҳанд.

Ин созмон низ ба монанди Кумитаи дифоъ аз хабарнигорон таъкид кард, ки «бо таваҷҷуҳ ба фаъъолиятҳои ҳирфаии ин хабарнигори саршиноси мухолифи давлат ҳамаи фарзияҳо бояд таҳқиқ шаванд.»

Источник: http://www.bbc.co.uk/tajik/institutional/2012/01/120114_sq_cpj_atavollah.shtml

[b]Вазорати хориҷаи Тоҷикистон ҳамла ба хабарнигори тоҷик Додоҷони Атовулло дар Маскавро маҳкум кард ва умедвори ҳарчӣ зудтар ошкор шудани омилони ин сӯъиқасд шуд. [/b]

Сухангӯи ин вазорат Давлат Назриев ба ИТАР-ТАСС гуфт, дар Душанбе шеваҳои муҷозоти худсаронаро қатъиян қабул надоранд. Муассиси нашрияи «Чароғи рӯз» ва раҳбари ҷунбиши «Ватандор» шаби панҷшанбе ду зарби корд хӯрд ва ӯро дар Пажӯҳишгоҳи «Ёрии таъҷилӣ»-и Маскав ҷарроҳӣ карданд.

Бо ин ҳол, пулиси Маскав мегӯяд, нафареро, ки бо гумони даст доштан дар ин сӯъиқасд боздошт шуда буд, баъди собит шудани бегуноҳиаш раҳо кардааст. Қаблан аз боздошти Бахтиёр Раҳимбердиев, як шаҳрванди 23-солаи Тоҷикистон гузориш шуда буд.

«Хабарнигорони бидуни марз» ва 4 созмони журналистии Тоҷикистон – Иттиҳодияи журналистон, НАНСМИТ, Медиа-Алянс ва АФРӮЗ ҳамла ба Додоҷони Атовуллоро шадидан маҳкум ва ба таҳқиқи мӯшикофонаи қазия даъват карданд. Додоҷони Атовуллои 56- сола аз мунтақидони тунди давлати Эмомалӣ Раҳмон дониста мешавад.

Источник: http://www.ozodi.org/archive/news/20120113/538/538.html?id=24451001

[b]Пулиси Маскав ба таҳқиқи ҳамла ба хабарнигори маъруфи тоҷик Додоҷони Атовулло шурӯъ кардааст. Пулис мегӯяд, Бахтиёр Раҳимбердиев, як шаҳрванди 23-солаи Тоҷикистонро бо гумони даст доштан дар ин сӯъиқасд дастгир карда, имрӯз дар бемористон худи хабарнигорро низ бозпурсӣ хоҳад кард.[/b]

Муассиси нашрияи «Чароғи рӯз» ва раҳбари ҷунбиши «Ватандор» шаби панҷшанбе бо ду зарби корд, ки якеаш ба ҷигари ӯ асобат кардааст, ба Пажӯҳишгоҳи «Ёрии таъҷилӣ»-и Маскав ба номи Склифосовский оварда шуд. Баъди ҷарроҳӣ, гуфтаи табибон, хатаре ба ҳаётаи ӯ таҳдид намекунад. Созмони «Хабарнигорони бидуни марз» ва 4созмони журналистии Тоҷикистон – Иттиҳодияи журналистон, НАНСМИТ, Медиа-Алянс ва АФРӮЗ ин ҳамларо шадидан маҳкум карданд. Додоҷони Атовуллои 56- сола аз мунтақидони тунди давлати Эмомалӣ Раҳмон дониста мешавад.

Источник: http://www.ozodi.org/archive/news/20120113/538/538.html?id=24450669

[b]Журналистон ва ҳомиёни ҳуқуқи башар ҳамла ба Додоҷони Атовуллоро шадидан маҳкум мекунанд.[/b]

Иттиҳоди журналистони Тоҷикистон, Анҷумани миллии расонаҳои мустақили Тоҷикистон (НАНСМИТ), Медия Алянси Тоҷикистон (МАТ), Анҷумани байналмилалии рӯзноманигорони форсизабон (АФРӮЗ) ҳамла ба журналисти тоҷик Додоҷони Атовуллоро қатъиян маҳкум карданд ва аз ниҳодҳои ҳифзи ҳуқуқи Русия хостаанд, воқеа ба таври дақиқ пажӯҳиш шавад.

Анҷумани байналмилалии рӯзноманигорони форсизабон дар изҳороти худ ҳамла ба Додоҷони Атовуллоро «сӯиқасд ба озодии баён ва ҳуқуқи инсон» номида, аз мақомоти марбутаи Русия хостори «таҳқиқи сареи ин қазия, ошкор кардани иҷрокунанда ва фармоишгари ин сӯиқасд» хостааст.

Дар ин баёния гуфта мешавад: «интизор дорем, ки мақомоти Тоҷикистон низ дар амри ҳимоят аз шаҳрванди худ, ошкор кардани омилони ин ҷиноят аз тамоми имконоти ихтиёрашон кор хоҳанд гирифт. Зеро ин сӯиқасд ба ҷони як журналисти маъруф ва шинохта ба обрӯ ва эътибори ҳар ду кишвар соя меафканад.»

Созмонҳои журналистии Тоҷикистон дар изҳороти муштараки худ гуфтаанд, солҳои охир Додоҷони Атовулло худро ҳамчун сиёсатмадори мухолиф муаррифӣ мекард. «Ҳанӯз рӯшан нест, ки ҳамла ба ӯ ба фаъолияти ҳирфаияш ҳамчун журналист бастагӣ дорад ё не, бо вуҷуди ин тасфияи ҳисоб бо мухолифон ба чунин шева амали ҷиноист ва бояд тибқи тамоми сахтии қонун муҷозот шавад.»

Ҳомиёни ҳуқуқи башар ва корбарони шабакаи Фейсбук низ ин ҳамларо бо лаҳни шадид маҳкум кардаанд.

Источник: http://www.ozodi.org/content/article/24450483.html

[b]«Афрўз» — Анҷумани байналмилалии рӯзноманигорони форсизабон ҳамлаи ваҳшиёна ба Додоҷони Атовулло, муассис ва сардабири нашрияи «Чароғи рӯз»-ро қатъан маҳкум мекунад. Бар асари ин ҳамла, ки тавассути як фарди ношинохта дар шаҳри Маскав сурат гирифтааст, Додоҷони Атовулло ба шиддат маҷрўҳ гашта ва баъди анҷоми амали ҷарроҳӣ дар ҳоли бехудист.[/b]

«Афрӯз» ҳамла ба Додоҷони Атовуллоро сӯйиқасд ба озодии баён ва ҳуқуқи инсон медонад. Ва аз мақомоти марбутаи Русия хостори таҳқииқи сареъи ин қазия, ошкор кардани иҷрокунанда ва фармоишгари ин сӯйиқасд мебошад.

Ҳамчунин интизор дорем, ки мақомоти Тоҷикистон низ дар амри ҳимоят аз шаҳрванди худ, ошкор кардани омилони ин ҷиноят аз тамоми имконоти ихтиёрашон кор хоҳанд гирифт. Зеро ин сӯйиқасд ба ҷони як журналисти маъруф ва шинохта ба обрӯ ва эътибори ҳарду кишвар соя меафканад.

[b]Анҷумани байналмилалии рӯзноманигорони форсизабон – «АФРӮЗ»

13.01.2012, Душанбе[/b]

Источник:

[b]Дар ин бора Амонбой, дӯсти хабарнигори шинохтаи тоҷик, дар сӯҳбат бо Радиои Озодӣ иттилоъ дод. Ӯ бо такя ба гуфтаҳои табибон изҳор намуд, ки амалиёти ҷарроҳӣ хуб гузаштааст ва аммо афзуд, аз вазъи хабарнигор пайвандонашро фақат баъд аз соати даҳ ба вақти Маскав огаҳ хоҳанд кард.[/b]

Сӯиқасд ба ҷони Додҷони Атовулло шоми рӯзи панҷшанбе дар дохили тарабхонаи итолёвии “Виадҷио” рӯх дод. Ба иттилои пайвандони Додоҷони Атовулло, ки Радиои Озодӣ бо онҳо дар тамос шуд, як фарди зоҳиран осиёӣ ба қафаси синаи ӯ ду корд задааст.

Хабарнигорро дар мошини «Ёрии таъҷилӣ» ба бемористони ба номи Склифосовскийи Маскав интиқол додаанд. Табибон гуфтаанд, ки корд ба дили Атовуллои 56-сола нарасидааст, аз ин рӯ ба ҳаёти ӯ хатаре таҳдид намекунад, аммо то интиқол ёфтанаш ба бемористон, вай хуни бисёр бохтааст.

Ба гуфтаи Амонбой, гурӯҳи хабарнигорони маскавӣ барои аёдати Додоҷон ва пайдо кардани иттилоъ дар бораи вазъи сиҳати ӯ ба бемористон омадаанд.

Ҳамсӯҳбати мо афзуд, дар бораи ҳодисаи дар тарабхона рӯйдода ба ӯ табибону дӯстони Додоҷон хабар додаанд – қабл аз ин ҳодиса ронанда Додоҷонро то манзилаш расонд ва онҳо бо ҳам хайрухуш карда буданд.

Амонбой мегӯяд, “кадом одаме бо ӯ мулоқот таъин карда будааст. Дар дохили ресторан Додоҷон хеста бо ӯ салом мекунад ва аммо ӯ ба Додоҷон ду бор корд зада фирор кардааст. Ин ҳодиса тахминан соатҳои нӯҳ то нӯҳу ним рӯй додаст. Аз ин пештар мо ҳамроҳ бозорӣ кардем ва ман ӯро бо мошин то хонааш бурда будам.”

Ӯ ҳадс мезанад, шояд одаме, ки мулоқот таъин карда буд, Додоҷонро аз дур нишон додааст ва каси дигар ба хабарнигор корд задааст.

Додоҷони Атовулло, хабарнигори 56-солаи тоҷик, дар соли 1990 ҳафтаномаи мустақили «Чароғи рӯз»-ро таъсис дода, охири соли 1992 Тоҷикистонро тарк кард ва дар Русияву Олмон ба сар мебарад. Ӯ раҳбари ҷунбиши мухолифи «Ватандор» низ ҳаст ва бо мақолаҳои танқидияш зидди ҳукумати раисиҷумҳури Тоҷикистон Эмомалӣ Раҳмон шӯҳрат дорад.

Додситонии кулли Тоҷикистон алайҳи Додоҷони Атовулло бо иттиҳоми тӯҳмату таҳқир ба шахси раҳбарони аввали кишвар ва даъват ба сарнагун кардани низоми феълӣ, парвандаи ҷиноӣ боз кардааст.

Бори охир моҳи апрели соли гузашта мақомоти додситонии Тоҷикистон аз мақомоти Русия таслими ӯро ба Душанбе талаб карданд. Чанд сол пеш хабарнигори шинохта бо тақозои мақомоти Тоҷикистон дар фурудгоҳи Шереметевои Маскав боздошт шуда буд ва аммо Русия, баъд аз эътирозҳои ҳомиёни ҳуқуқи башар ва созмонҳои хабарнигорӣ, аз истирдоди ӯ ба Тоҷикистон худдорӣ намуд.

Бори ахир Додоҷони Атовулло мақомоти Тоҷикистонро барои ба додгоҳ кашидани халабонҳои руси ширкати «Ролкан» ҳадафи танқиди шадид қарор дода буд ва ба гуфтаи баъзе манобеъ, интиқоди ӯ боиси хашму ғазаби мансабдорони тоҷик шуда буд.

Источник: http://www.ozodi.org/content/article/24450277.html

[b]Журналисти шинохтаи тоҷик ва мухолифи ҳукумати Тоҷикистон Додоҷони Атовулло дар маркази Маскав мавриди ҳамла қарор гирифта, шадидан захмӣ шудааст. Ӯро дар мошини «Ёрии таъҷилӣ» ба бемористони ба номи Склифосовскийи Маскав интиқол додаанд. Бино бар хабарҳо марди ба зоҳир осиёӣ ба сари синаи Атовулло ду бор корд задааст. [/b]

Нашрияҳои интернетӣ, аз ҷумла торнамоҳои “Фергана.Ру” ва “Livenews.ru” мегӯянд, ҳамла ба Додоҷони Атовулло дар назди ресторани итолиёии “Viaggio” дар хиёбони Комсомолский байни соатҳои 9 ва 10-и шаб рӯй додааст. Ин манобеъ гуфтаанд, ҷаноби Атовулло барои мулоқот бо шахсе ба ин ҷо омадааст. Аммо ронандаи ӯ ба Радиои Озодӣ гуфт, Додоҷонро дар соати 7-и бегоҳ ба манзилаш расонд ва нақша ё қарори мулоқоте дар миён набудааст.

Вале дар ҳамин ҳол хабаргузории «Интерфакс» ба нақл аз манобеи худ дар ниҳодҳои ҳифзи ҳуқуқ хабар дод, ки Додоҷони Атовуллоро касе ба мулоқот даъват кардаст. Хабаргузорӣ ба нақл аз ин манбаъ меафзояд, «вақте ки Атовуллоев ба ин ҷо омад ва паси мизе интизор менишаст, шахсе, ки симои осиёӣ дошт, ба сӯи давид ва ду бор ба ӯ корд зад.»

Пизишкон гуфтаанд, корд ба дили Атовуллои 56-сола нарасидааст, биноан хатаре ба ҳаёти ӯ таҳдид намекунад, аммо то интиқол ёфтанаш ба бемористон вай хуни бисёр бохтааст ва ҷарроҳон дар талоши наҷоти ӯянд. Гуфта мешавад, корд ба шуш ва ҷигари Додоҷони Атовулло расидааст. Гурӯҳе аз журналистони маскавӣ, дӯстон ва тарафдорони Атовулло ба бемористон омаданд ва қисме аз онҳо дар шабакаи иҷтимоии Фейсбук лаҳза ба лаҳза аз вазъи ӯ иттилоъ медиҳанд. Аз ҷумла гуфта шуд, ки ҷарроҳии аввал бо муваффақият гузаштааст. Фейсбукиён пешниҳод кардаанд, ки гурӯҳи кӯмак ба Атовулло таъсис ёбад. Чанд нафар изҳори омодагӣ ба донории хун кардаанд.

Додоҷони Атовулло, ки 56 сол дорад, дар соли 1990 ҳафтаномаи мустақили «Чароғи рӯз»-ро таъсис дода, охири соли 1992 Тоҷикистонро тарк кард ва дар Русия ва Олмон ба сар мебарад. Вай ба ҳайси раҳбари ҷунбиши мухолифи «Ватандор» бо мақолаҳои танқидияш зидди ҳукумати раисиҷумҳури Тоҷикистон Эмомалӣ Раҳмон шӯҳрат дорад. Вай борҳо гуфтааст, дар Тоҷикистон тарафдорони зиёд дорад, аммо ягон бор феҳрасти аъзои ҷунбиши «Ватандор»-ро эълон накардааст.

Додситонии кулли Тоҷикистон бори охир дар моҳи апрели соли 2011 зидди Додоҷони Атовулло парвандаи ҷиноӣ боз ва аз мақомоти Русия истирдоди ӯро талаб кард. Вале тарафи Русия ин ҳар дафъа ин талабро рад намудааст. Мақомоти Тоҷикистон Додоҷони Атовуллоро ба тӯҳмату таҳқир ба шахси раҳбарони аввали кишвар ва даъват ба сарнагун кардани низом айбдор мекунанд.Як дафъа дар тобистони соли 2001 ҷаноби Атовулло бо дархости ҷониби Тоҷикистон дар Маскав боздошт шуд, вале баъди якуним рӯзи ҳабс раҳо гашт. Созмонҳои журналистӣ ва ҳомии ҳуқуқи инсон ин парвандаҳо ва боздошти ӯро шадидан танқид кардаанд.

Источник: http://www.ozodi.org/content/article/24450213.html

Мусоҳибаи Абдуқаюми Қаюмзод бо Рустами Ҷонӣ- мудири ширкати Ориёно-медиа ва бунёдгузори нашрияи “Имрӯзнюс”.

[b]Озодӣ: Дар авохири соли гузашта ва оғози соли ҷорӣ чанд рӯз “ Имрӯзнюс” ба нашр нарасид, ки сару садоҳои мухталифро ба бор овард. Хонандаҳо нашрияи шуморо дастрас накарданд. Сабаби аз нашр бозмондани нашрия чӣ буд?[/b]

Рустами Ҷонӣ: Боиси хурсандии мост, ки хонандаҳо рӯзномаи “Имрӯзнюс”-ро суроғ мекунанд. Вале ин чанд рӯзе, ки нашрия ба дасти хонандаҳо нарасид, кадом мушкилие ҷо надошт, танҳо як давраи истироҳат буд. Барои ҳамаи коргарон аз 25 декабр то 4-уми январ таътил эълон кардем. Мо тасмим гирифтем, ки ҳар сол дар ҳамин давра ба коргарон рӯзҳои истироҳат бидиҳем. Ин кор аз як тараф як навъ додани сабукиҳо барои кормандон бошад, то инки бештар дам бигиранд ва бо нерӯи тоза ба кор баргарданд, аз тарафи дигар сарфаи харҷи беҳуда аст, чун дар ин рӯзҳо хонандаҳо камтар ба суроғи рӯзнома меоянд.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=157]http://www.taj.nansmit.tj/analysis/?id=157[/url]

Источник:

Мусоҳибаи Абдуқаюми Қаюмзод бо Рустами Ҷонӣ- мудири ширкати Ориёно-медиа ва бунёдгузори нашрияи “Имрӯзнюс”.

[b]Озодӣ: Дар авохири соли гузашта ва оғози соли ҷорӣ чанд рӯз “ Имрӯзнюс” ба нашр нарасид, ки сару садоҳои мухталифро ба бор овард. Хонандаҳо нашрияи шуморо дастрас накарданд. Сабаби аз нашр бозмондани нашрия чӣ буд?[/b]

[b]Рустами Ҷонӣ:[/b] Боиси хурсандии мост, ки хонандаҳо рӯзномаи “Имрӯзнюс”-ро суроғ мекунанд. Вале ин чанд рӯзе, ки нашрия ба дасти хонандаҳо нарасид, кадом мушкилие ҷо надошт, танҳо як давраи истироҳат буд. Барои ҳамаи коргарон аз 25 декабр то 4-уми январ таътил эълон кардем. Мо тасмим гирифтем, ки ҳар сол дар ҳамин давра ба коргарон рӯзҳои истироҳат бидиҳем. Ин кор аз як тараф як навъ додани сабукиҳо барои кормандон бошад, то инки бештар дам бигиранд ва бо нерӯи тоза ба кор баргарданд, аз тарафи дигар сарфаи харҷи беҳуда аст, чун дар ин рӯзҳо хонандаҳо камтар ба суроғи рӯзнома меоянд.

[b]Озодӣ: Дар давоми ҳамин якуним сол оё рӯзнома худкифо шуд ва ё ҳанӯз ҳам аз дастгирии сарпарастон вобастагӣ дорад?[/b]

[b]Рустами Ҷонӣ:[/b] Дар Аврупову Русия низ ду сол лозим мешавад, ки нашрияҳо худкифо шаванд. Аммо дар шароити имрӯзаи Тоҷикистон ва бо назардошти тамоми хусусиятҳои бозоре, ки мо дорем, ин вақт барои мо то панҷ сол тӯл мекашад. Бозори мо хусусиятҳои худро дорад. Ба гуфти русҳо “непредсказумий” (пешбининашаванда) аст. Вале ман бояд хидмати шумо арз намоям, ки “Имрӯзнюс” имрӯз тамоми хароҷоташро аз ҳисоби худаш мепӯшонад. Баъзан қарздор мешавем, бо реклама онро мепӯшонем. Яъне мо баланси (тавозун) худкифоиямонро аз ҳисоби рекламаву фурӯши рӯзнома таъмин мекунем.

[b]Озодӣ: Метавонед бигӯед, ки сарпарастҳои Шумо киҳо ҳастанд?[/b]

[b]Рустами Ҷонӣ:[/b] Мо сарпараст надорем. Рӯзномаи “Имрӯзнюс” агар дастгирии молӣ, яъне сарпараст дошта бошад, ӯ Рустами Ҷонӣ аст. Рустами Ҷонӣ ба ғайр аз рӯзнома боз дигар роҳҳои дигари ҷалб кардани сармояро дорад, яъне худаш сармоя дорад. Ман давоми даҳ сол фаъолияти тиҷорӣ доштам. Ман бисёр мехостам, ки “Имрӯзнюс” танҳо мутааллиқ ба Рустами Ҷонӣ набошад, балки як шакли чамъияти саҳҳомиро бигирад, ки он моли умумӣ шавад. Аммо ҳанӯз ин кор имкон надорад, чунки дар мо бозор аксия- саҳмия вуҷуд надорад, ки масалан саҳмияро ба фурӯш бигзориву сармоя ҷалб созӣ. Даромадҳои мо аз фурӯш, реклама ва аз хидматгузории пиарӣ-иттилоотӣ ва низ аз ширкат барои гузаронидани чорабиниҳои ҳукуматӣ аст, ки мо инро пинҳон намекунем.

[b]Озодӣ: Кадом чаробиниҳои ҳукуматиро дар назар доред?[/b]

[b]Рустами Ҷонӣ:[/b] Масалан дар ҷашнвораи 20- солагии Истиқлолияти давлатӣ он саҳнаи ҷамъомаде, ки дар Кохи Борбад баргузор шуда буд, бо ширкати “Имрӯзнюс” сурат гирифт. Мо дар ҳайати худ коргардонҳову рассомҳо низ дорем, ки онҳо дар чунин мавридҳо ба кор ҷалб ҷалб мешаванд.

[b]Озодӣ: Дар рӯзномаи шумо мавзӯъҳои табу ҷой доранд. Ҳастанд мавзӯъҳое, ки ба хотири эҷод кардани мушкилӣ аз нашри он парҳез мекунед?[/b]

[b]Рустами Ҷонӣ:[/b] Бале, мавзӯъҳои табу дар мо ҷой доранд. Мавзӯъҳое, ки эҳтимолан ба муноқишаҳои маҳалӣ, миллӣ ва мазҳабӣ мерасонад, мо аз нашри онҳо парҳез мекунем. Мо дар ин маврид чӣ кор мекунем? Аввал мегузорем то мардум ҳодисаро ҳазм кунанд, каме орому аз эҳсос берун шаванд, баъд мо онро таҳлилу баррасӣ карда ва чоп менамоем. Ман аслан зидди он ҳастам, ки дар пеши журналист ҳадаф гузошта шавад, ки дидаву дониста ҳар он чизеро, ки мебинад онро инъикос кунад. Воқеан рисолати журналист ҳамин чизро мехоҳад, аммо мо имрӯз як ҷомеаи мо хеле ҳассос дорем. Яъне дар мо куллан мавзӯъи табу вуҷуд надорад, аммо эҳтиёт ҳаст.

[b]Озодӣ: Барои мисол матлаб дар бораи ширкати Талко, дар бораи Ҳасан Асадуллозода-раиси “Ориёнбонк”, Шералӣ Кабиров- муовини раиси Талко бошад, манзурам маводҳои интиқодӣ дар рӯзнома чоп мешаванд?[/b]

[b]Рустами Ҷонӣ:[/b] Таърифу танқид рисолати рӯзоманигори “Имрӯзнюс” нест, балки мо баёни воқеиятро маҳаки кори худ қарор додаем. Аз ин рӯ мо воқеиятро баён мекунем, новобаста ба онки дар маркази он воқеа Ҳасан Саъдуллоев қарор дорад ё Шералӣ Кабиров. Мо фаъолияти “Ориёнбонк”-ро танқид кардаем ва низ кори ширкатҳоеро танқид кардаем, ки сарпарастҳояшон ҳамин номбаршудаҳо ҳастанд. Ва хушбахтона таҷриба нишон дод, ки онҳо ҳам ин чизҳоро қабул доранд. Мо аз онҳо ҳеҷ вобастагие надорем. Мо вобастагии касбӣ надорем ва ман пеши онҳо рафта ҳеҷ ваъда ҳам додагӣ нестам. Ман рисолати рӯзноманигории худро зери суол намебарам. Ҳар касе дар ин боб шакку шубҳа дорад масалан метавонад фаъолияти радиои мо-“Имрӯз”-ро аз соли 2007 то имрӯз таҳлилу баррасӣ кунад. Оё дар ҳақиқат ин радио аз дигарҳо камтар ҳаводисро инъикос кард? Мо аз касе яъне дигар расонаҳои ҳамсон қафо намондаем. Мо рисолати хешро анҷом дода истодаем.

[b]Озодӣ: Ин суолро ба он хотир додам, ки мегӯянд муассисаҳои эҷодии зери раҳбарии шумо аз тарафи Ҳ.Асадуллозода ва Ш. Кабиров дастгирии молӣ мебинад.[/b]

[b]Рустами Ҷонӣ:[/b] Шумо бовар кунед ҳар яке рӯзноманигорон бисёр мехост, ки мисли ҳамин гуна шахсиятҳо барои мо кӯмак кунанд. Агар касе, ки мехоҳад ҳақиқатро бифаҳмад, пас биравад ба ҳамон чопхонаҳое, ки мо рӯзномаро онҷо нашр мекунем. Аз якеаш қарз ва барои дигарӣ гардан каҷ мекунем. Агар аз паси мо чунин гигантҳои молӣ мебуданд ман умуман дар бораи коғазу чопхона ва касеро илтимос кардану гардан каҷ кардан фикр намекардам. Бале “Ориёнмедиа” ба онҳо тааллуқ дорад, аммо “Имрӯзнюс” ҳеҷ муносибат ба “Ориёнбонк”-у “Талко” ва аслан ба ҳеҷ касе вобастагӣ надорад. Агар баъзан муносибатҳои иттилоотӣ миёни мо бишавад, пас метавон “Азияплюс”-ро ҳам муттаҳам кард вақте ки хабарҳо ё мақолаҳои сафорати Амрикоро нашр мекунад, пас он низ аз Амрикост. Бале, ман дар ҳамон доираҳо дӯстҳо дорам, ҳамсӯҳбатҳо дорам, ки инро касби ман талаб мекунад. Барои мисол, вақте Шумо ба Давлат Назрӣ дӯст бошед, ин маънои онро нахоҳад дошт, ки одами вазорати корҳои хориҷаед. Рӯзноманигор вақте мехоҳад, ки кор худро анҷом диҳад, ӯ кӯшиш мекунад, ки бо қишрҳои гуногуни ҷомеа муносибат дошта бошад. Ман инро пинҳон ҳам намекунам, аммо дастгирии молиявӣ аз тарафи онҳо ба мо, ин ҳарфи муболиғае беш нест. Мутаассифона ҳама дар бораи он фикр мекунанд, ки кӣ ба мо пул медиҳад, аммо камтар фикр мекунад, ки мо рисолати худро ҳамчун намояндаи ВАО иҷро карда истодаем ё хайр.

[b]Озодӣ: Дуруст аст, ки маоши кормандони “Имрӯзнюс” нисбат ба моҳҳои аввали ташкили он камтар шудааст?[/b]

[b]Рустами Ҷонӣ:[/b] Мо дар аввал ҳамаи коргаронро бо маош таъмин кардем вале ба хулоса омадем, ки нисбати баъзе коргарон ноҳаққӣ мешавад. Кормандоне буданд, ки аз ибтидо ҳаррӯз кор мекарданд, мавзӯъ пешниҳод мекарданд, менавиштанд. Боз буданд коргароне, ки мегуфтанд, хайр, имрӯз натавонистам. Мо ин ҳамаро ба назар гирифта сиёсати молиро тағйир додем. Яъне моҳонаро мутобиқи рӯзи корӣ ташкил кардем. Кор мекунӣ, пул мегирӣ. Агар пеш 600-800 сомонӣ моҳона мегирифтанд ҳозир имконият доранд, ки то 2000-2500 сомонӣ бигиранд. Дар аввал коргарҳо аз ин кори мо норозӣ шуданд. Вале вақте моҳ ҷамъбаст шуд ва нафароне, ки бештар ва беҳтар заҳмат кашиданд музди хуб ба даст оварданд норозигӣ аз байн рафт.

[b]Озодӣ: Аз онки дар мавриди рисолати рӯзноманигорӣ низ инҷо сухан рафт, ҳоло фикр мекунед кадоме аз ҳафтаномаҳои мо рисолати хешро анҷом дода истодаанд?[/b]

[b]Рустами Ҷонӣ:[/b] Албатта расонаҳо гоҳо дар инъикосу бозтоби ҳодиса ва таҳаввулот тавонистаанд, ки рисолати худро ба таври аҳсан анҷом диҳанд ва гоҳо шояд комёб нашуданд. Вале ба ҳар ҳол ба назари ман “Азияплюс” имсол талошҳои хеле ҷиддӣ ба харҷ дод, “Озодагон”, ки доираи фарогирии мавзӯъҳояш хеле васеъ шудааст. Ҳамчунин “Нигоҳ” ва “Фараж” дар самти худ ҳар кадоме кореро анҷом доданд ва ҳар кадоме хонандаҳои худро доранд. Агар барои мисол нашрияи “Рекламная газета”-ро ҳам бигирем он ҳам рисолати худро ҳамчун расонандаи иттилоот анҷом дода истодааст. Яъне ҳар яки ин нашрияҳо барои аудиторияи худ хизмат мекунанд.

Источник: http://www.ozodi.org/content/article/24448059.html

[b]Анҷумани миллии расонаҳои мустақили Тоҷикистон шуморе аз нашрияҳоро дар равнақи маҳалгароӣ муқассир хондааст.[/b]

Бар пояи тадқиқот ва пажӯҳиши коршиносони ин созмон, ки тайи як соли ахир идома доштааст, мавориди зиёде дар навиштаҳои нашрияҳо ошкор шудааст, ки дар масоили ёдшуда, яъне маҳалгароӣ ва равобити миллатҳо назокати сухан риоят нашудааст.

Чопи матолиб ва навиштаҳо бо руҳияи маҳаллӣ ва миллатгароӣ дар расонаҳои гурӯҳии Тоҷикистон, дар ниҳояти кор ба ваҳдат ва иттиҳоди милии ин кишвар зарбаи сахт хоҳад зад.

[b]Матни пурраи маводро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=156]http://www.taj.nansmit.tj/analysis/?id=156[/url]

Абдуқаюми Қаюмзод

Источник: