Вазорати корҳои дохилии Тоҷикистон барои таҳияи барномаҳои криминалӣ студияи телевизионӣ таъсис дод.
Бино ба иттилои дафтари матбуоти ВКД, 21-уми апрел студияи телевизионии ВКД бо иштироки Рамазон Раҳимзода, вазири корҳои дохилии Тоҷикистон ва Лутфулло Давлатзода, директори “Телевизиони Сафина” расман ифтитоҳ шуд.
Рамазон Раҳимзода гуфтааст, ки студияи мазкур барои таҳия ва сабт намудани барномаҳо дар сатҳи зарурӣ ва бо сифати баланд барои пешгирии содиршавии ҷиноятҳо, баланд бардоштани маърифати ҳуқуқии шаҳрвандон, расонидани маълумоти дақиқ оид ба ҳодисаю воқеаҳо ва кирдорҳои ҷинояткорона ба сокинони мамлакат мусоидат менамояд.
Вазорати корҳои дохилии Тоҷикистон се барномаи криминалӣ дорад, ки ба воситаи телевизионҳои давлатӣ пахш мешавад. Барномаи криминалити “Сипар” дар Шабакаи якум, “Набз” ба воситаи “Телевизиони Сафина” ва “Дидбон” бо ТВ “Ҷаҳоннамо” ҳар ҳафта як маротиба намоиш дода мешавад.
Масъулини ВКД мегӯянд, ки “барномаву намоишҳои пешниҳоднамудаи кормандони мақомоти корҳои дохилӣ миёни тамошобинон маҳбубияти хоса пайдо намуда, ҳар ҳафта, ҳазорон нафар сокинони кишвар ин барномаҳоро бесаброна интизорӣ мекашанд”.