Созмонҳои рӯзноманигорӣ ва расонаҳои Тоҷикистон сабти ном тариқи «равзанаи ягона» ва муқаррар шудани ҳадди ақалли музди меҳнат барои муассиаҳои ғайридавлатиро хатароти нав ба озодии баён унвон карданд.Нигарониҳои рӯзноманигорон зимни ҳамоиши вижае таҳти унвони «Таҳдидҳои нав ба васоити ахбори умуми Тоҷикистон ва роҳҳои ҷилавгирии онҳо» баён шуд.

Хатароти «зериобиву тагисангӣ»

Ин ҳамоиш бо ибтикори Эътилофи расонаҳо ё Медиа Алянси Тоҷикистон ва Бунёди Сорос ва ширкати созмонҳои дохиливу хориҷии расонаӣ ва рӯзноманигорон аз саросари кишвар сурат гирифт. Масъулини расонаҳо бар инанд, ки муқаррароти нав мушкилоти молӣ эҷод ва дар дарозмуддат ба муфлисшавии матбуоти озод хоҳад овард.
Акбари Саттор, раиси Иттиҳоди рӯзноманигорони Тоҷикистон ва муассиси ҷамъияти масъулияташ маҳдуди «Чархи гардун», ки 8 ҳафтаномаро муттаҳид мекунад гуфт, дар пайи маҳдудиятҳо ва ба додгоҳ кашиданҳои моҳҳои ахир, боз хатароти «зериобиву тагисангӣ» дар шакли сабти ном дар мақомоти андоз барои нашрияҳои мустақил халқ шудааст:

«Мушкил дар ин аст, ки қонуни кунунии матбуот мегӯяд, бояд ҳар як воситаи ахбори умум ҳамчун шахси ҳуқуқӣ ба қайд гирифта шавад, яъне талаби мақомоти андоз дар ин маврид дуруст, қонунӣ аст. Аммо амалан дуруст нест. Чӣ тавр? Ҳоло талаботи нав ин аст, ки агар дар ҶДММ 6 нашрия бошад, бояд ҳар яки онҳо муҳосибот (бухгалтерия) дошта, комилан соҳибихтиёр бошанд. Ин мантиқан ҳам дуруст нест».

Тибқи муқаррароти ҷадиди андоз, ки аз 1 январи соли равон дар Тоҷикистон ҷорӣ шудааст, тамоми корхонаву муассисаҳои кишвар бояд тариқи «равзанаи ягона» сабти ном шаванд. Расонаҳои Тоҷикистон низ ҳамчун шахсони ҳуқуқӣ бояд аз ин сабти ном гузаранд, аммо Ҷунайд Ибодов, коршинос дар умури ҳуқуқ мегӯяд, мақомоти андоз чорумин ниҳоде хоҳад буд, ки фаъолияти расонаҳоро танзим хоҳад кард.

Вай афзуд, тибқи қонуни ҷории матбуот, аз соли 1990 расонаҳоро бояд хадамоти нотариалӣ сабти ном кунанд, аммо соли 2003 ин масъулият ғайриқонунӣ ба вазорати адлия гузашт ва соли 2007 вазорати фарҳанг низ ҳаққи сабти номи онҳоро гирифт. Вай афзуд, ҳоло ҳамаи ин ниҳодҳо ҳуқуқ доранд, ки сабти ном кунанд:

«Ду даҳсола боз киҳое нестанд, ки ба ин машғул мешаванд. Як соҳиб даркор, соҳиб на ба маъное, ки ҳар кас масъулиятро гираду қонунҳои худро сари расонаҳо бор кунаду фишор ораду расонаҳои озодро маҷақ кунад. Танзим кунад, ки ҳамин бесарусомонӣ барҳам хӯрад. Ягон оҷонсӣ ё ниҳоди давлатие бошад, ки лоақал як навъ фаҳмидани қонунҳоро таъмин кунад»

Нигаронии дигари рӯзноманигорон аз 1-уми январи соли равон 562 сомонӣ муайян шудани ҳаққи ақалли музди меҳнат барои корхонаву муассисаҳои ғайридавлатӣ дар шаҳри Душанбе аст, ки аксари кулли расонаҳо дар ин шаҳр фаъолият мекунанд.

Масъулини нашрияҳо нигаронанд

Хуршеди Атовулло, раиси Эътилофи расонаҳои Тоҷикистон ва сардабири нашрияи «Фараж» мегӯяд, баъд аз манъи семоҳаи фаъолият, ҳоло ҳафтаномааш аз чопхонаву дигар хадамот 55 ҳазор сомонӣ қарздор шудааст ва роҳандозии ҳатмии ҳадди ақалли маош бар мушкилоти молиявии ҳафтаномааш хоҳад афзуд.

Оқои Атоуллоев афзуд: «Тамоми сардабирони нашрияҳову созмонҳои ғайридавлатие, ки ман сӯҳбат доштам, мегӯянд, ки роҳи ҳал, коҳиш додани теъдоди кормандон ва ба боқимондаҳо бор кардани масъулияти бештар аст»

Шарифи Ҳамдампур, раҳбари ҷамъияти масъулияташ маҳдуди «Оила», муассиси 8 нашрия роҳандозии ҳатмии ҳадди ақалли маош барои корхонаву муассисаҳои ғайридавлатиро ғайривоқеӣ унвон кард.
Вай афзуд: «Корхонаҳо маҷбуранд ба иқдоми дигар даст зананд, яъне теъдоди кормандонашонро коҳиш диҳанд ва ҳадди ақали маошро боло баранд. Аммо ин ба чӣ меорад? Сафи бекорон меафзояд ва норизоиятиҳои мардумро дар Тоҷикистон меафзояд, ки паёмадҳои нохуби амниятӣ хоҳад дошт»

Акбари Саттор мегӯяд, мушкилоти ҷадиди нашрияҳо бояд дар лоиҳаи нави қонуни матбуот аз миён бурда шаванд.

Хавфи басташавии нашрияҳои «номақбул»

Лоиҳаи қонуни нави Тоҷикистон дар бораи васоити ахбори умум ҳоло дар баррасии парлумони Тоҷикистон қарор дорад. Аммо Нуриддин Қаршибоев, раиси Анҷумани миллии расонаҳои мустақили Тоҷикистон ё НАНСМИТ, узви комиссиюни омодасозии ин қонун мегӯяд, хатари аввалин ба озодии баён худи рӯзноманигоронанд, ки дар кори таҳияи қонуни барои онҳо сарнавиштсоз фаъолона ширкат намекунанд.

Вай афзуд, то ба ҳол дар бораи мушкилоти андоз ба масъулини ин қонун, ки дар як ду моҳи оянда бояд аз сӯи парлумон ба тасвиб расад, пешниҳоде нарасидааст: «Он пешниҳодҳое, ки имрӯз рӯзноманигорон мекунанд, агар баррасӣ нашавад, зарурати аз дигар сабти ном шудани васоити ахбори умум лозим меояд, ки дар он сурат бархе нашрияҳои барои мақомот номақбул баста хоҳанд шуд»

Нигарониҳо аз сабти ном тариқи «равзанаи ягона» ва муқаррар шудани ҳадди ақалли музди меҳнат дар ҳолест, ки мақомот тайи моҳҳои ахир иддае аз расонаҳои чопиву сомонаҳои мустақили Тоҷикистонро муваққатан манъ карда буданд. Як соли расо ба ин сӯ дар кишвар равандҳои додгоҳии нашрияҳои мустақил идома доранд ва шикоятҳои нави мақомот низ аз расонаҳо ба додгоҳҳо расидаанд.

Иддае аз коршиносон мегӯянд, ин фишорҳоро метавон тариқи қонуни нави матбуот ҷилавгирӣ кард, аммо иддае ҳам бар инанд, ки он маҳдудиятҳои навро барои расонаҳо «ҳадя» хоҳад овард.

Источник: http://www.ozodi.org/content/article/2306502.html

Ниҳоят, баъди фишорҳои пайдарпайи мардуми Миср президенти 82-солаи ин кишвар Ҳуснӣ Муборак, ки 30 сол ҳокимиятро дар даст дошт, истеъфо дод. Истеъфои ӯ баъди тариқи телевизион баромад кардани ноибаш Умар Сулаймон ва хабар додан дар бораи ба даст гирифтани идораи давлат аз ҷониби Маҷлиси олии нерӯҳои мусаллаҳи Миср мардуми эътирозиро ба шавқ овард.Ин дар ҳолест, ки «баромади президенти Миср Ҳуснӣ Муборак бо нутқи рад кардани қарори ба истеъфо рафтанаш хавфи дар кишвар сар задани таркишҳои навро дорад»,- изҳор дошта буданд коршиносон тариқи расонаҳои байналмилалӣ.

Тибқи хабарҳои охирин, баъди ин тасмим бетартибиҳо дар Қоҳира бештар гардида буд. Тӯдаи тазоҳургарон ба қасри президент наздик мешуданд ва дар кишвар овозаҳо паҳн гардида буд, ки роҳбари давлат аллакай ба хориҷ гурехтааст.

Президенти Миср Ҳуснӣ Муборак бо муроҷиати телевизионии худ ваъдаи пешинаашро, ки дар даъвати навбатии интихоботии сентябрӣ номзадияшро нахоҳад гузошт, тасдиқ кард, вале тавре интизор мерафт, дарзамон ба истеъфо рафтанашро эълон надошт. Мухолифони башӯромада баъди намози пешини ҷумъа ҳамоиши бузург карданд, бо дархости он, ки президент билохира бояд талаботҳои онҳоро иҷро намояд. Дар Интернет даъватҳои ташкили ҳамоиш дар назди қасри президент, моҳиятан дар ноҳияи марказӣ садо медод.

Дар баробари ин, қариб 2000 одам ҳатто шаб ба бошишгоҳи «Эл-Уруб», ки дар онҷо сарвари давлат зиндагӣ мекунад, роҳпаймоӣ карданд. «Чандин ҳазор тазоҳургарон зери девори қасри перезидент мустақаранд»,- гузориш дода буд шабакаи телевизионии эронӣ — Press-TV. Тақрибан 10 ҳазор мухолиф дар назди бинои телевизиони давлатӣ баршумурда шуда буданд. Дар назди қасри президент намоишҳои нав ба нав рӯ мезад.

Мувофиқи маълумотҳои ғайрирасмӣ, Муборак аллакай кишварро тарк карда буд. «Муроҷиаташ ба мардум, ки дар он эълон дошт, ки то интихоботи навбатӣ ба истеъфо намеравад, вале вазифаҳояшро ба муовинаш Умар Сулаймон, ки баргузидаи ӯст, қисман вогузор кардааст, пештар сабт шудаанд,- менигоштанд хабаргузориҳо.

Тибқи маълумотҳои дигар, Муборак пойтахти кишвар — Қоҳираро тарк карда, бо роҳбаладии рабари штаби генералии армияи Миср ба Шарм-ул-Шайх рафта буд.

Ёдовар мешавем, ки чанде пеш Муборак бархе аз ӯҳдадориҳояшро ба сарвазир Умар Сулаймон дод. Тавре Lenta.ru менависад, ӯ ҳамчунин эълон дошта буд, ки ба панҷ моддаи Сарқонуни кишвар тағйирот омода кардааст.
Источник: http://tojnews.org/taj/index.php?option=com_content&task=view&id=11514&Itemid=28

Мақомоти тафтишотӣ мегӯянд, танҳо пас аз эълони натоиҷи ташхиси тиббӣ-судӣ, дар робита ба қазияи Ҳикматулло Сайфуллозода парванда боз мешавад.Мустафо Каримов, муфаттиши шӯъбаи корҳои дохилии ноҳияи Сино, ки таҳқиқи ин ҳодиса ба ӯҳдаи вай вогузор шудааст, рӯзи панҷшанбеи 10-уми феврал ба «Озодӣ»гуфт, бар асоси натиҷаҳои ташхиси тиббӣ-судӣ, ки қарор аст имрӯз эълом шаванд, парвандаи ҷиноӣ дар робита ба латукӯби Ҳикматулло Сайфуллозода боз хоҳад шуд.

Ба гуфтаи ҷаноби Каримов, айни ҳол санҷиш ва бозрасиҳо нисбат ба латукӯби сардабири ҳафтаномаи «Наҷот» ва узви раёсати олии ҲНИТ аз сӯи мутахассисон ҷараён дорад.

Ин дар ҳолест, ки аз ҳодисаи латукӯби ҷаноби Сайфуллозода се рӯз сипарӣ мешавад ва мақомоти ҲНИТ ин ҳамларо «сӯиқасд ба ҷони ӯ» ва «амали тарҳрезишуда алайҳи ин ҳизби динӣ» арзёбӣ кардаанд.

Аммо Мустафо Каримов, муфатишши шӯъбаи корҳои дохилии ноҳияи Сино, ки ба гуфтаи худаш ду-се маротиба дар аёдати Ҳикматулло Сайфуллозода будааст, асоси боз кардани парвандаро ба натиҷаи ташхиси тиббӣ-судӣ ва мушаххас кардани дараҷаи ҷароҳатҳое, ки дар бадани ҷабрдида будааст, марбут медонад.

Бо ин ҳама, ҷаноби Каримов содир шудани ҷиноят, латукӯб, ҷароҳат бардоштан ва бистарӣ шудани Ҳикматулло Сайфуллозодаро тасдик мекунад, аммо мегӯяд, то замоне ки мушаххасот маълум нашавад, дар мавриди намуди ҷиноят гуфтан барвақт аст.

Ба гуфтаи худи Ҳикматулло Сайфуллозода, қабл аз Мустафо Каримов ду нафари дигар аз маъмурони пулис омада буданд, аммо он ҳангом гуфта мешуд, ки танҳо бо аризаи шикоятии вай намешавад, парвандаи ҷиноӣ боз кард.

Ҳикматулло Сайфуллозода субҳи рӯзи 7-уми феврал дар назди манзили худ аз сӯи афроди номаълум мавриди ҳамла қарор гирифт ва ҳоло дар беморхонаи “Қарияи Боло”-и шаҳри Душанбе бистарӣ аст.

Источник: http://www.ozodi.org/content/article/2304503.html

«Системи нокомили ҳимоят аз матбуъот ба афзоиши фишорҳо бар рӯзноманигорон дар Тоҷикистон мунҷар шудааст.»Ин матлаб дар баёнияи «Media Group & Mercy», як созмони ғайридавлатии рӯзноманигорон дар вилояти Суғд, ки рӯзи душанбеи 7 феврал мунташир шуд, зикр шудааст.

Ин созмон боло бурдани сатҳи тахассусии марокизи матбуъотии ниҳодҳои давлатиро аз роҳҳои ҳалли ин мушкил хонда ва гуфтааст, ки дар сурати вокуниши сареъи марокизи матбуъотӣ ба матолиби интиқодӣ мумкин аст аз ихтилофоти эҳтимолӣ ва даъвоҳои додгоҳӣ ҷилавгирӣ шавад.

Созмони «Media Group & Mercy» дар соли 2002 дар вилояти Суғд дар шимоли Тоҷикистон таъсис шуда ва дар миёни созмонҳои рӯзноманигории ин кишвар то кунун чандон шинохташуда набудааст.

Зимнан, интизор мерафт рӯзи душанбеи 7 феврал дар додгоҳи ноҳияи Фирдавсии шаҳри Душанбе баррасии муқаддамотии қазияи нашрияи “ASIA-Plus” баргузор шавад. Аммо ба далели ҳозир нашудани намояндагони ҷониби муддаъӣ ин ҷаласа то ба як ҳафтаи дигар ба таъвиқ афтодааст.

Дар пайи чопи матлаби Рамзия Мирзобекова, хабарнигори “ASIA-Plus” таҳти унвони “Бозрасӣ ё истинтоқ?” дар 21 декабри соли гузашта дар мавриди истифодаи шиканҷа дар ниҳодҳои интизомӣ Анвар Тағоймуродов, раиси Идораи мубориза бо ҷароими созмонёфтаи Вазорати умури дохилаи Тоҷикистон ин нашрияро ба «таҳвину бӯҳтон» муттаҳам кардааст.

Ӯ нашрияи “ASIA-Plus”-ро ба яке аз додгоҳҳои шаҳри Душанбе кашида ва тақозои пардохти ғаромат ба миқдори 1 милюн сомонӣ ё муъодили 165.625 юруро кардааст.

Иттиҳодияи рӯзноманигорон ва Анҷумани расонаҳои мустақилли Тоҷикистон пештар зимни интиқод аз ин иқдоми оқои Тағоймуродов аз Додситонии кул ва ниҳодҳои дигари интизомӣ даъват карда буданд, ки ин ҳодисаро мавриди баррасӣ қарор дода ва аз мавориди нақзи қавонин дар заминаи дастрасии мардум ба иттилоъот ва озодии баён ҷилавгирӣ кунанд.

Созмони байналмилалии Гузоришгарони Бидуни Марз низ пайгарди қазоии ин ҳафтаномаро аз ҷониби раиси Идораи мубориза бо ҷароими созмонёфтаи Вазорати умури дохилаи Тоҷикистон маҳкум карда ва ин амалро нақзи муқаррароти байналмилалӣ ва қавонини кишвар дар бораи озодии баён талаққӣ кардааст.

Источник: http://www.bbc.co.uk/tajik/news/2011/02/110207_mm_media.shtml

[b]Сафири Эрон дар Тоҷикистон мегӯяд, ки кишвараш таҷҳизоти зарурӣ барои роҳандозии телевизиюни муштараки кишварҳои форсизабонро дар Олмон харидорӣ кардааст.[/b]

Ба гуфтаи Алиасғари Шеърдӯст, мақомоти эронӣ мунтазири тасмими ҷониби Тоҷикистон дар бораи роҳандозии ин телевизиюн ҳастанд ва дар сурати иттихози ин тасмим имкон дорад «телевизиюни муштараки се кишвар ба забони форсӣ» дар остонаи Наврӯз фаъол шавад.

Идомаи мавод дар саҳифаи таҳлилии сомонаи мо: [url=http://www.taj.nansmit.tj/analysis/?id=20]http://www.taj.nansmit.tj/analysis/?id=20[/url]

Источник:

[b]Вазорати адлияи Тоҷикистон аз додгоҳ хостори қатъи фаъолияти созмони молики ҳафтаномаи “Пайкон” шуд.[/b]

Ин вазорат мегӯяд, созмони Бюрои маслиҳатдиҳӣ, сухансанҷӣ ва тадқиқоти журналистӣ, ки муассиси ҳафтаномаи «Пайкон» аст, суроға ё нишонии идораро тағйир дода, вале дар ин бора ба мақомот хабар надодааст.

Қурбоналӣ Бобоев, намояндаи Вазорати адлияи Тоҷикистон, ҳангоми муаррифии шикояти ин вазорат дар додгоҳи ноҳияи Фирдавсӣ гуфт, БМСТЖ бо ин амали худ муқаррароти қонунро нақз кардааст.

Аммо Шӯҳрат Қудратов, вакили дифои Бюрои маслиҳатдиҳӣ, сухансанҷӣ ва тадқиқоти журналистӣ мегӯяд, ин ниҳоди рӯзноманигорӣ тағйири суроға накарда, балки аз ошёнаи якуми бинои «Шарқи озод» ба ошёнаи дигари он «кӯчидааст».

Дар ҳамин ҳол, Ҷумъаи Толиб, раиси ин Бюро ва сардабири нашрияи «Пайкон» мегӯяд, чоп шудани матолиби интиқодӣ нисбат ба вазорати адлия бо номҳои «Истеъфо» ва «Бузкашӣ дар атрофи ЦУМ» дар шумораҳои моҳи октябри соли гузашта ва январи соли ҷорӣ дар ин ҳафтанома, боис ба додгоҳ кашонда шудани созмонаш шудааст.

Вай гуфт, ҳадаф аз ин баҳси додгоҳӣ эҷоди мушкил барои чопи ҳафтаномаи «Пайкон» аст.

Ин дар ҳолест, ки охири моҳи январи соли гузашта додгоҳи шаҳри Душанбе дар баҳсе миёни нашрияи «Пайкон» бо Агентии «Тоҷикстандарт» ҳафтаномаро барои нашри матлаби тӯҳматомез мутаҳҳам донист ва пардохти маблағи 300 ҳазор сомонӣ товонро тақозо кард.

Ҳамакнун рӯшан аст, ки дар сурати ҳал шудани баҳс ба нафъи Вазорати адлия дар додгоҳи Фирдавсӣ, на танҳо фаъолияти Бюрои маслиҳатдиҳӣ, сухансанҷӣ ва тадқиқоти журналистӣ мутаваққиф хоҳад шуд, балки ҳафтаномаи «Пайкон» низ аз чоп хоҳад монд.

Источник: http://www.ozodi.org/content/article/2304615.html

[b]Сафири Эрон дар Тоҷикистон мегӯяд, ки кишвараш таҷҳизоти зарурӣ барои роҳандозии телевизиюни муштараки кишварҳои форсизабонро дар Олмон харидорӣ кардааст.[/b]

Ба гуфтаи Алиасғари Шеърдӯст, мақомоти эронӣ мунтазири тасмими ҷониби Тоҷикистон дар бораи роҳандозии ин телевизиюн ҳастанд ва дар сурати иттихози ин тасмим имкон дорад «телевизиюни муштараки се кишвар ба забони форсӣ» дар остонаи Наврӯз фаъол шавад.

Оқои Шеърдӯст, ки дар як нишасти матбуъотӣ бо хабарнигорон сӯҳбат мекард, ҳамчунин гуфт, ки дар оянда барои ҳалли бархе масоили марбут ба тасмимгирии ҷониби Афғонистон дар мавриди ин телевизиюн ба Кобул сафар хоҳад кард, то бо вазири фарҳанг ва иттилоъоти он кишвар музокира кунад.

Қаблан як масъули сафорати Эрон дар Душанбе дар сӯҳбат бо Би-би-сӣ иддаъои ахири Асадулло Раҳмонов, раиси Кумитаи родию ва телевизиюни Тоҷикистон, дар бораи омода набудани ҷониби Эрон ба оғози кори телевизиюни муштаракро рад карда буд.

Ба гуфтаи ин манбаъ, Эрон аз Олмон куллияи таҷҳизоти зарурӣ барои оғози кори ин телевизиюнро харидорӣ кардааст. Вай афзуд: «Як ширкати олмонӣ омода аст дар тӯли бист рӯз ин таҷҳизотро насб ва ба кормандон наҳваи истифода аз онҳоро омӯзиш бидиҳад.»

Вале ба гуфтаи ин масъули сафорати Эрон, сохтмоне, ки ҷониби Тоҷикистон барои таъсиси дафтари ин телевизиюн дар шаҳри Душанбе ихтисос додааст, ба сурати комил бозсозӣ ва такмил нашудааст.

Аз ҷумла, ба гуфтаи ин манбаъ, шароити окустикии истудиюҳо ҳанӯз фароҳам нашуда ва ба ин далел мутахассисини олмонӣ наметавонанд ба насби таҷҳизот шурӯъ кунанд.

Бо ин вуҷуд, ба гуфтаи оқои Шеърдӯст, ҷониби Эрон барои оғози кори ин телевизиюни муштарак чандсад соъат барномаҳои тавлидӣ ва муқаддамотӣ таҳия карда ва теъдоде гӯяндаву наттоқу нависанда ҳам интихоб шудаанд. Ҷониби Тоҷикистон низ миқдоре аз барномаҳо барои ин телевизиюнро омода мекунад.

Оқои Шеърдӯст афзуд: «Мо мунтазири эъломи назари расмии давлати Тоҷикистон ҳастем барои таърихи шурӯъ. Он ширкате, ки ин таҷҳизот аз он харидорӣ шуда, 20 рӯз аз мо вақт хоста, ки дар ин муддат дастгоҳҳоро насб кунад, таҳвил диҳад, озмоиш кунад, як муддат ҳам бар сари мутахассисин биистад, ки онҳо ин дастгоҳҳро омӯзиш бубинанд, шаш моҳ горонти (замонат) ҳам кардааст.»

Сафири Эрон афзуд, ки агар мақомоти тоҷик назари расмии худро то охири баҳманмоҳ (то 20 феврал) эълом кунанд, ҷониби Эрон барои Наврӯз омодагии ифтитоҳи ин шабакаро дорад.

Дар гузашта ин мавзӯъ матраҳ буд, ки ҷонибҳои Тоҷикистону Эрон бо Афғонистон дар мавриди роҳандозии телевизиюни муштараки кишварҳои форсизабон ихтилофи назар доранд.

Бархе манобеъ гуфта буданд, ки ҷониби Афғонистон мехоҳад ин телевизиюн ба забони пашту низ барномаҳое пахш кунад, зеро «бахши умдаи ҷамъияти ин кишварро паштуҳо ташкил медиҳанд.»

Бо ишора ба ин нукта сафири Эрон дар Душанбе хабар дод, ки қарор аст дар ояндаи наздик сафаре ба Афғонистон анҷом диҳад ва бо мақомоти фарҳангии ин кишвар дар мавриди роҳандозии телевизиюни муштарак музокира кунад.

Вай гуфт дар Афғонистон бархе мақомот масоили қавмиро пеш меоранд ва мехоҳанд ки ба забонҳои дигар низ ин телевизиюн барнома пахш кунад, вале ин амр бо аҳдофи телевизиюни муштарак созгор нест.

Оқои Шеърдӯст афзуд: «Мо мехоҳем бо забони муштараки байни кишварҳо ва мардумони минтақа, яъне дарию форсию тоҷикӣ, суҳбат кунем. Инҳо масоили қавмиро матраҳ мекунанд, ки мо ақвоми дигаре дорем, ки бояд ба забони онҳо низ аз ин телевизиюн барнома пахш шавад. Хуб, агар ин тур бошад, мо дар Эрон даҳто забон дорем, ки ҳар кадом ҷамъияти касисри чандмилюнӣ доранд. Масалан, арабу турку курду луру туркман ва ғайра дар Эрон вуҷуд доранд.»

Зимнан, тасмими таъсиси чунин як шабакаи телевизиюнӣ дар дидори руасои ҷумҳурии се кишвари форсизабон, яъне Афғонистон, Тоҷикистон ва Эрон дар соли 2006 иттихоз шуда буд.

Тибқи тавофуқоти се ҷониб, таъмини молии фаъолияти ин телевизиюн аз ҷониби Эрон сурат мегирад. Тоҷикистон барои фаъолияти ин шабака бино ва шароити фаннӣ фароҳам мекунад. Вале ба далоили мухталиф роҳандозии ин шабакаи телевизиюнӣ тӯли чанд соли ахир ба таъвиқ дароварда мешавад.

Соле қабл мақомоти Кумитаи родию ва телевизиюни Тоҷикистон аз он изҳори нигаронӣ карда буданд, ки қарор буд дар остонаи Наврӯзи соли гузашта ин телевизиюн ба кор оғоз кунад, аммо ин иттифоқ рух надод.

Дар ҳамин ҳол, соҳибназарон аз эҳтимоли бурузи ихтилофоти дигаре бар сари наҳваи фаъолияти ин телевизиюни муштарак ҳушдор медиҳанд. Ба гуфтаи онҳо, Афғонистон ва Эрон кишварҳои дорои низоми исломӣ ҳастанд, вале Тоҷикистон кишвари дунявӣ маҳсуб мешавад.

Ба ин тартиб, имкон дорад мавзӯъи мушкили пӯшиши либос, барномаҳои тафреҳӣ ва таблиғи арзишҳои исломӣ метавонад боъиси бурузи ихтилофот миёни дастандаркорони се кишвар гардад.

Источник: http://www.bbc.co.uk/tajik/news/2011/02/110208_if_iran_tv.shtml

Бо мақсади сари вақт бархӯрдор намудани сокинони шаҳри Душанбе аз маълумоту иттилоот оид ба амалигардонии барномаҳои рушди иҷтимоӣ-иқтисодӣ, чорабиниҳои оммавию сиёсӣ, фарҳангию иҷтимоӣ, назарсанҷии афкори омма ва пешниҳоди хизматҳои давлатӣ ба шахсони воқеиву ҳуқуқӣ вобаста ба фаъолияти мақомоти иҷроияи маҳаллии ҳокимияти давлатӣ дар шаҳри Душанбе ва ташкили тарзи нави ҳамкорӣ бо шахсони воқеиву ҳуқуқӣ дар асоси истифодаи фаъоли технологияҳои иттилоотӣ-коммуникатсионӣ ва дар ин замина баланд бардоштани самаранокии пешниҳоди хизматҳои давлатӣ ба шаҳрвандон, иҷрои Қарори Ҳукумати Ҷумҳурии Тоҷикистон №318, аз 1-уми июли соли 2010 «Дар бораи ҳисоботи вазири нақлиёт ва коммуникатсияи Ҷумҳурии Тоҷикистон оид ба рафти иҷрои Фармони Президенти Ҷумҳурии Тоҷикистон аз 5-уми ноябри соли 2003 №1174 «Дар бораи Стратегияи давлатии «Технологияҳои иттилотию коммуникатсионӣ барои рушди Ҷумҳурии Тоҷикистон», мутобиқ ба талаботи моддаҳои 19 ва 20-и Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», моддаҳои 4, 8, 9, 11-и Қонуни Ҷумҳурии Тоҷикистон «Дар бораи ҳуқуқи дастрасӣ ба иттилоот» ва моддаи 9-и Қонуни Ҷумҳурии Тоҷикистон «Дар бораи ҳифзи иттилоот», қарори Раиси шаҳри Душанбе ба тасвиб расид, ки дар асоси он роҳбарони мақомоту сохторҳои марбутаи шаҳрӣ ва раисони ноҳияҳои шаҳри Душанбе тибқи замимаи 1 вазифадор карда шудаанд, ки бо истифода аз технологияҳои иттилоотию коммуникатсионӣ на дертар аз 31-уми марти соли 2011 дар шабакаи Интернетӣ сомонаи расмии худро таъсис диҳанд. Дар ин бора ба TojNews сухангӯи Раиси шаҳри Душанбе Шавкат Саидов хабар дод.Тибқи иттилои манбаъ, дар робита ба муқаррароти банди 1-и Қарори мазкур, раисони ноҳияҳои шаҳри Душанбе ва роҳбарони мақомоту сохторҳои шаҳрӣ ҷиҳати бо сифати баланд таъмин намудани дастрасии шаҳрвандон ва ташкилотҳо ба ахборот ва хизматрасониҳои давлатӣ оид ба натиҷаҳои фаъолият, амалигардонии Барномаҳои рушди иҷтимоӣ-иқтисодӣ, сомонаи худро бо хабар, маълумот ва санадҳои дахлдор таъмин ва бо мақсади фаъолияти мунтазам сомонаро бо инфраструктураи зарурии муосир муҷаҳҳаз гардонанд.

Ҳамчунин, мақомоту сохторҳои марбутаи шаҳрии зерин муваззаф шуданд, ки дар шабакаи Интернет сомонаи расмии худро таъсис диҳанд:

1. Мақомоти иҷроияи маҳаллии ҳокимияти давлатӣ дар ноҳияи Шоҳмансур.

2. Мақомоти иҷроияи маҳаллии ҳокимияти давлатӣ дар ноҳияи Сино.

3. Раёсати маорифи шаҳри Душанбе.

4. Раёсати ҷавонон, варзиш ва сайёҳии шаҳри Душанбе.

5. Корхонаи воҳиди давлатии «Обу корези Душанбе».

6. Муассисаи давлатии «Рекламаи берунӣ ва ороиши шаҳри Душанбе».

7. Муассисаи давлатии телевизиони «Пойтахт».

8. Нашрияи Мақомоти иҷроияи маҳаллии ҳокимияти давлатӣ дар шаҳри Душанбе — рӯзномаи «Паёми Душанбе».

9. Корхонаи воҳиди давлатии «Меҳмонсарои Пойтахт».

10. Корхонаи воҳиди давлатии «Меҳмонхонаи «Вахш».

11. Корхонаи воҳиди давлатии «Маркази равобити Пойтахт».

12. Корхонаи воҳиди давлатии «Маркази Дустӣ-Интернет кафе».

13. Раёсати дастгирии давлатии соҳибкорӣ, сармоягузорӣ ва идораи амволи давлатӣ дар шаҳри Душанбе.

14. Сарраёсати Агентии омори назди Президенти Ҷумҳурии Тоҷикистон дар шаҳри Душанбе.

15. Раёсати сохтмони асосии шаҳри Душанбе.

Ёдовар мешавем, ки ҳанӯз аз 19-уми ноябри соли 2004 сомонаи расмии Мақомоти иҷроияи маҳаллии ҳокимияти давлатӣ дар шаҳри Душанбе www.dushanbe.tj ва аз 13-уми октябри соли 2005 почтаи электронии Раиси шаҳри Душанбе dushanbe80@yahoo.com, аз 27-уми феврали соли 2010 сомонаи расмии Мақомоти иҷроияи маҳаллии ҳокимияти давлатӣ дар ноҳияи И. Сомонӣ www.i-somoni.tj ва почтаи электронии Раиси ноҳияи И. Сомонӣ i-somoni.tj@mail.ru ва аз 25-уми декабри соли 2010 сомонаи расмии Мақомоти иҷроияи маҳаллии ҳокимияти давлатӣ дар ноҳияи Фирдавсӣ www.n-firdavsi.tj ва почтаи электронии раиси ноҳияи Фирдавсӣ n.firdavsi@mail.ru ташкил карда шуда, то ба имрӯз фаъол мебошанд.

Источник: http://tojnews.org/taj/index.php?option=com_content&task=view&id=11466&Itemid=30

Сафорати Иёлоти Муттаҳидаи Амрико ҳамла ба Ҳикматулло Сайфуллозода — сардабири нашрияи «Наҷот»-ро, ки санаи 7-уми феврал рух дод, маҳкум менамояд. Дар ин бора ба TojNews аз сафорати мазкур иттилоъ доданд.

— Ин ҳамлаи ногаҳон ба амал омада ба аъзои ҳизби қонунӣ ҳамла ба ибрози сиёсӣ дар Тоҷикистон буд. Аз ҳамин лиҳоз мо аз Ҳукумати Тоҷикистон даъват ба амал меоварем, то тафтиши дақиқи ин ҳамла гузаронида шавад ва гунаҳкорон бо тамоми ҷиддияти қонун ба ҷавобгарӣ кашида шаванд. Одамон набояд аз зӯроварӣ ё таъқиб гаштан аз сабаби назари сиёсӣ, эътиқоди динӣ, ё худ аъзои ҳизби сиёсӣ буданашон ҳаросанд,- афзуд манбаъ.

Сафорати Иёлоти Муттаҳидаи Амрико ба Ҳикматулло Сайфуллозода беҳшавии ҳарчи зудтар ва бозгаштан ба фаъолияти хешро орзу намудааст.

Ёдовар мешавем, ки Ҳикматулло Сайфуллозода дар баробари кор карданаш дар маркази таҳлилии «Диалог», соли гузашта сардабирии ҳафтаномаи «Наҷот» — нашрияи расмии ҲНИТ-ро бар ӯҳда гирифт.

Нилуфари КАРИМ, TojNews

Источник: http://tojnews.org/taj/index.php?option=com_content&task=view&id=11432&Itemid=28

Як масъули вазорати умури хориҷаи Тоҷикистон гуфт, нашри номаҳои «Викиликс» ва доман задани онҳо тавассути расонаҳои Ғарб дар ҳеҷ сурат ба таври ҷиддӣ пазируфта намешавад ва ин номаҳо ба равобити Тоҷикистон бо сойири кишварҳои дунё таъсир надорад.Ин манбаъ афзуд, муносибат ва ҳамкории Тоҷикистон бо Русия ва Амрико дар чаҳорчӯби қарордодҳо сурат мегирад ва давлат талош хоҳад кард то ин ҳамкориҳо густариши бештар пайдо кунанд.

Ҳарфҳое, ки сари забонҳо буд

Дар матлаби ба нашррасида дар рӯзномаи бритониёии «Гардиан» бо истинод ба маводи Викиликс фаъолияти давлати Тоҷикистон таҳти раҳбарии раисиҷумҳури он мавриди арзёбӣ қарор гирифтааст.

Аммо доираҳои сиёсӣ ва рӯзноманигорони тоҷик мегӯянд «Викиликс» дар ошкоргӯиҳои худ ҳеҷ иттилоъи фавқулодда махфӣ ва муҳимро пешниҳод накардаст. Ба эътиқоди хабарнигорони тоҷик, мӯҳтавои ин мақола аз хабарҳое таркиб ёфтааст, ки қаблан низ сари забонҳо буданд.

Зафари Сӯфӣ, сардабири нашрияи «Озодагон», мегӯяд, бархе аз навиштаҳои сомонаи Викиликс қаблан низ дар маҳфилҳои таҳлилгарон матраҳ шудаанд, вале барои нашри онҳо далели қотеъ вуҷуд надорад.

Таъсири фошкориҳои Викиликс ба сиёсати ИМА

Аммо коршиносон ва таҳлилгарони тоҷик мегӯянд, ки нашри ин номаҳо дар равобити кишварҳо ва аз ҷумлаи робитаи Амрико бо кишварҳои дигар бетаъсир нахоҳад буд. Рашид Ғанӣ, коршиноси тоҷик, мегӯяд, таъсири нашри ин матлаб дар он зоҳир мешавад, ки масъулини давлатӣ дар сӯҳбат бо дипломатҳо аз эҳтиёти шадид кор мегиранд.

Вале аз сӯи дигар, мегӯяд оқои Ғанӣ, кишварҳо ҳамеша дар тарозуи сиёсат манофеи худро мегузоранд ва муносибат ва ҳамкориҳо низ бо назардошти ин манфиатҳо сард ва ё гарм мешавад.

Клинтон: WikiLeaks амниятро аз байн мебарад

Ҳилларӣ Клинтон, вазири корҳои хориҷаи Амрико дар бораи номаҳои ифшошудаи электронӣ аз сӯи сомонаи интернетии WikiLeaks изҳори назар кард ва онро «ҳамла ба ҷомеаи байналмилалӣ» хонд. Хонум Клинтон гуфт, Амрико аз ифшои санадҳо амиқан ибрози таассуф мекунад.

Ӯ афзуд: «Амрико ба таври ҷиддӣ ифшои ғайриқонунии асноди касбиро маҳкум мекунад. Ин ҳаёти одамонро дар хатар мегузорад, ба амнияти мо таҳдид мекунад ва талошҳои моро барои ҳамкорӣ бо кишварҳои дигар ҷиҳати ҳали мушкилоти муштарак аз байн мебарад».

Хонум Клинтон изҳор дошт, ки чунин кор вазифаҳоро дар бахши амнияти байналмиллалӣ ва ташкили эътилофҳо бо муттаҳидини хориҷӣ душвортар хоҳад кард.

Вокуниши сафорати Амрико

Сафорати Амрико дар Тоҷикистон зимни ироаи посухи катбӣ ба радиои «Озодӣ» маводи чопшуда дар нашрияи «Гардиан»-ро шубҳаовар хонд ва таъкид кард, «дар робита ба маълумоте, ки даъвои махфӣ буданро дорад, ибрози назар нахоҳад кард».

Дар номаи сафорат таъкид шудааст, ки Амрико «яке аз якумин кишварҳои ҷаҳон мебошад, ки истиқлолияти Тоҷикистонро эътироф намуда ва ҳеҷ гоҳ ба корҳои дохилии Тоҷикистон дахолат накардааст. Ҳамчунин ҳукумати Иёлоти Муттаҳида ҳеҷ вақт барои ивази ҳукумати Тоҷикистон талош наварзидааст.»

Бо ин ҳама маводи нашршуда дар торнамои Викиликс дар ҳоли ҳозир аз пурсарусадотарин матолиб ва гузоришҳо ба ҳисоб мераванд. Чопи матолиби марбут ба Тоҷикистон дуввумин мавриде аз маводҳои ин торнамо аст, ки дар ду ҳафтаи ахир мунташир мешавад.

Источник: http://www.ozodi.org/content/article/2247032.html