[b]Пас аз ҳашт рӯзи боздошти Ӯрунбой Усмонов, хабарнигори Би-би-сӣ дар шимоли Тоҷикистон, маъмурони амниятӣ барои мулоқоти вай бо аъзои хонаводааш иҷоза додаанд.[/b]

Малоҳат Абдуазимова, ҳамсари оқои Усмонов, мегӯяд, ки рӯзи сешанбеи 21 июн вай бо ҳамроҳии писару духтараш ва як хоҳари Ӯрунбой Усмонов дар бинои идораи маҳаллии амният дар шаҳри Хуҷанд бо шавҳараш дидор ва гуфтугӯ кардааст.

[b]Матни пурраи гузоришро бо пахш кардани суроғаи зерин дар торномаи мо мутолиа кунед:[/b] [url=http://www.taj.nansmit.tj/analysis/?id=80]http://www.taj.nansmit.tj/analysis/?id=80[/url]

Источник:

[b]Ин ҳафта қарор буд матлабе сабук дар бораи Роял Аскот бинависам, аммо зиндагии хабарнигор ғайри қобили пешгӯӣ аст.[/b]

Субҳи рӯзи 14-уми июн ман аз ҳамкорам дар Душанбе, Тоҷикистон имейле дарёфт кардам, ки мегуфт гузоришгари мо дар Хучанд, шимоли Тоҷикистон — Ӯрунбой Усмонов пас аз соъоти кории рӯзи гузашта нопадид шудааст.

Пайвандони ӯ дар ҷустуҷӯйи ӯ бемористонҳо ва мурдахонаҳоро тамос гирифтанд, вале хабаре нашуд.

Мо Ӯрунбойро дар бахши Осиёи Миёнаи Би-би-сӣ хеле хуб мешиносем.

Вай 59 сол дорад. Ӯ шоъир ва нависандаест, ки барои даҳ соли ахир бо мо кор кардааст. Гузоришҳои мухталифе дар бораи сиёсат, минтақа, масоили иҷтимоъӣ ва фарҳангӣ навиштааст.

Вай инсони қобили эътимод ва ҷиддӣ аст, на аз он афрод, ки моҷароҷӯӣ мекунанд.

Барои ҳамин, мо нигарон шудем ва шурӯъ кардем ба занг задан ба афроди мухталифи маҳаллӣ.

То нимрӯзӣ мо паёмаке аз Ойбек, писари Ӯрунбой, ки дарёфт кардем, ки мегуфт Ӯрунбой бо чандин нафар ба хона баргаштааст.

Он лаҳза мо хушҳол шудем – фикр кардем, билохира маълум шуд, ки ӯ бардаму солим будааст.

То замоне, ки ман ва ҳамкоронам ҳадс мезадем, ки бо ки хона баргаштааст, паёмаки дигаре дарёфт шуд, ки хабар медод маъмурони амниятӣ манзили Ӯрунбойро такурӯ мекунанд.

Ман ба Ойбек занг задам ва аз ӯ пурсидам, ки гӯширо ба амниятиҳо бидиҳад, то ман сӯҳбат кунам, аммо аз гӯшии телефон садое омад, ки мегуфт, ҳеҷ кас бо ҳеҷ кас сӯҳбат намекунад.

Ойбек гуфт, ки маъмурон бадрафторӣ мекарданд ва дар манзил шабномаҳо ва китобҳои Ҳизби Таҳрирро меҷустанд.

Вай ҳамчунин гуфт, ки рӯйи падараш харошида буд.

Пас аз чанде маъмурон Ӯрунбойро ба идораи маҳалии бахши кумитаи давлатии амнияти миллӣ бурданд.

Вақте вай манзилашро тарк мекард, ба пайвандонаш нимғурма гуфтааст: “Агар ончи шаби гузашта бо ман карданд, такрор шавад, шояд дер напоям.”

Акнун вазъ барои мо равшан шуд.

Бале, мо дархост мекардем, гузоришҳое дар иртибот бо Ҳизби Таҳрир дар шимоли Тоҷикистон дошта бошем ва аҷаб нест, ки Ӯрунбой, ҳамчун хабарнигор, ба ҳангоми пӯшиши хабарӣ аз раванди додгоҳҳои аъзои Ҳизби Таҳрир тамосҳои рӯзноманигорӣ бо бархе аз аъзои ин гурӯҳро дошта бошад.

Аммо ин чунин маъно надорад, ки аз андешаҳои онҳоро тарафдорӣ мекард ва ё узви ин созмон буд.

Ман ба Фарзонаи Хуҷандӣ, шоъираи машҳур, ки Ӯрунбойро хеле хуб мешиносад, чун ҳамроҳ кор мекарданд, занг задам.

Ӯ бо таъаҷҷуб гуфт: “Не! Ӯ демукроти ашаддӣ аст!”

Бо ҳар касе ман он рӯз сӯҳбат мекардам, ҳатто дар Вазорати хориҷаи Тоҷикистон, аз ин хабар ба таъаҷҷуб меомаданд.

Аммо чунин ба назар мерасад, ки дасти ниҳодҳои амниятӣ ҳамчунон муҳкам аст, ки ҳатто мақомоти баландпоя вазъият дар маҳаллро бахубӣ намедонистанд, чи расад ба тавони онҳо дар кумак барои раҳо кардани Ӯрунбой.

Рӯзе баъд Би-би-сӣ баёнияе пахш кард ва дар он тақозо кард, ки хабарнигораш Ӯрунбой Усмонов фавран озод карда шавад.

Сафорати Бритониё дар Тоҷикистон низ нигаронии худро аз боздошти Ӯрунбой расман иброз дошт.

Чандин созмони байналмилалӣ изҳорот ва баёнияҳои худро дар ин робита интишор дода ва интишор медиҳанд. Аммо то ҳоло ҳеҷ вокунише дар ин замина аз сӯйи мақомоти Тоҷикистон нашудааст.

Нигаронии аслии мо ин аст, ки Ӯрунбой мушкили қалб дорад ва аз муроқибати пизишкӣ маҳрум аст.

Вай аз дидор бо вакили мудофеъ ва пайвандонаш маҳрум будааст. Ман як дӯстам – хабарнигори Би-би-сӣ дар Тоҷикистонро, гум кардаам. Вай дар соли 1995 кушта шуда буд.

Ман як дӯсти дигарам – Алишер Соиповро низ гум кардаам, вай ҳам барои Би-би-сӣ дар Қирғизистон кор мекард ва дар соли 2007 ба қатл расид.

Ҳамкорони ман аз Ӯзбакистон, пас аз фоҷеъа дар Андиҷон маҷбур шуданд, кишварро тарк кунанд ва дӯст ва ҳамкори дигарам Моника Витлок, хабарнигори Би-би-сӣ дар Осиёи Миёна, барои фаъолияти хабарнигориаш аз ин кишвар ихроҷ шуда буд.

Огулсапар Муродова, хабарнигоре дар Туркманистон, ки ба хабарнигорони Би-би-сӣ кумак мекард, зиндонӣ шуд ва дар соли 2006 дар зиндон ҷон дод.

Метавонам қиссаҳои зиёде дар бораи баҳои хабарнигор будан дар Осиёи Марказӣ нақл кунам ва хеле нигаронам, ки мабодо қазияи Ӯрунбой Усмонов ҳам фасли дигаре аз ин қиссаҳои фаҷеъабор бишавад.

(Ин матлаби Ҳамид Исмоилов дар веблоги сардабирони Би-би-сӣ рӯзи 16 июн мунташир шудааст.)

Источник: http://www.bbc.co.uk/tajik/institutional/2011/06/110621_sq_urunboy_blog.shtml

[b]Пас аз ҳашт рӯзи боздошти Ӯрунбой Усмонов, хабарнигори Би-би-сӣ дар шимоли Тоҷикистон, маъмурони амниятӣ барои мулоқоти вай бо аъзои хонаводааш иҷоза додаанд.[/b]

Малоҳат Абдуазимова, ҳамсари оқои Усмонов, мегӯяд, ки рӯзи сешанбеи 21 июн вай бо ҳамроҳии писару духтараш ва як хоҳари Ӯрунбой Усмонов дар бинои идораи маҳаллии амният дар шаҳри Хуҷанд бо шавҳараш дидор ва гуфтугӯ кардааст.

Хонуми Абдуазимова афзуд, ки ин дидор дар ҳузури ду маъмури амниятӣ сурат гирифта ва нахуст яке аз онҳо аз оқои Усмонов пурсидааст, ки «оё ман шуморо задам?»

Ӯрунбой Усмонов гуфтааст, ки «на, шумо маро намезанед.» Хонуми Абдуазимова мегӯяд, ки ба манзури таъмини амнияти шавҳараш намехоҳад дигар дар ин бора изҳори назар кунад.

Ба гуфтаи вай, қарор аст фардо маъмурон оқои Усмоновро аз сохтмони идораи амният ба боздоштгоҳи шаҳри Хуҷанд мунтақил кунанд.

Ба эътиқоди хонуми Абдуазимова, дар ин сурат шароит фароҳам мешавад, ки ин хабарнигори Би-би-сӣ аз хадамоти пизишкӣ бархӯрдор шавад, зеро ба гуфтаи вай, вазъи саломатии оқои Усмонов бисёр нигаронкунанда аст.

Вай афзуд: “Ранги шавҳарам зард аст, вай хеле маъюс буд ва пайваста гиря мекард ва мегуфт, ки маро аз бо тӯҳмат шарманда карданд. Агар фавт кардам, писарам тӯҳмат будани ин ҳама иттиҳомот алайҳи маро собит хоҳад кард.”

Хонуми Абдуазимова мегӯяд, ки ҳоло шавҳараш аз фишори хун ва дарди сар шадидан азият мекашад. Далели дарди сари оқои Усмонов ба қазияи чанд соли пеш рабт доштааст, ки шабона ду фарди ношинос ба ӯ ҳамла карда ва ӯро лату кӯб карда буданд.

Гузашта аз ин, ба гуфтаи Малоҳат Абдуазимова, ду моҳ қабл Ӯрунбой Усмонов ба “микруинфаркт” ё сактаи кӯчаки қалбӣ мувоҷеҳ шуда буд, ки ба эътиқоди пизишкон, дар шароити душвор метавонад паёмадҳои сангине дошта бошад.

Хонуми Абдуазимова хабар дод, ки ҳамарӯза барои Ӯрунбой Усмонов ду маротиба хӯрок ва дору мефиристанд ва шавҳараш таъйид кардааст, ки онҳоро дарёфт мекунад.

Дар ҳамин ҳол, Файзинисо Воҳидова, вакили мудофеъи оқои Усмонов, хабар дод, ки баъд аз интиқоли ин хабарнигори Би-би-сӣ ба боздоштгоҳи шаҳри Хуҷанд, вай дархости мулоқоти якбаяк бо муваккилашро хоҳад кард.

Хонуми Воҳидова, ки рӯзи гузашта бо Ӯрунбой Усмонов дар ҳузури бозраси амниятӣ дидор ва гуфтугӯ дошт, мегӯяд, ки муваккилаш наметавонист ошкоро бо вай сӯҳбат кунад.

Вакили мудофеъи оқои Усмонов хабар дод, ки то шоми рӯзи сешанбе шикояти худ алайҳи матолиби ду хабарнигори маҳаллиро ба додситонии кул ва додгоҳ ироа хоҳад кард.

Дар матолиби ин ду хабарнигор аз қавли Ӯрунбой Усмонов гуфта шудааст, ки вай аз истифода аз вакили мудофеъ даст кашида ва таъйид кардааст, ки бо амри Ҳизби Таҳрир дар Тоҷикистон мулоқот доштааст.

Малоҳат Абдуазимова мегӯяд, ки дар дидори имрӯз бо шавҳараш оқои Усмонов гуфтааст, ки ин “ду нафар на барои дилбардории ман, балки барои сир гирифтан омадаанд. Вале дар сӯҳбат бо онҳо ман ҳарфҳоеро, ки сипас, онҳо дар матолибашон ҷо додаанд, нагуфтаам.”

Зимнан, хонаводаи Ӯрунбой Усмонов дар ҳафтаи гузашта дар муроҷиъатномае ба раиси ҷумҳурии ин кишвар хостори озодии ӯ шуда буданд.

Дар матни ин муроҷиъатнома аз ҷумла омадааст: “Мо мутаассифем, ки дар ҷомеъае, ки Шумо мехоҳед бисозед ва мо, ҷавононро бо даъвати худ ба сӯйи ояндаи равшан илҳом мебахшед, як марди бегуноҳ, рӯзноманигор ва нависандаи шинохташуда ва солмандро боздошт ва латукӯб мекунанд ва иҷоза намедиҳанд, ки наздиконаш ӯро бибинанд.»

«Хонаводаи мо ҳаргиз ҳаводори ҳеч гурӯҳи динию мазҳабӣ набудааст. Ин ҳақиқатест, ки имрӯза ҳамаи равшанфикрон ва ҳамсоягон, ки падарамон ва моро мешиносанд, сари забонҳо доранд.»

Ин дар ҳолест, ки дар як ҳафтаи ахир фишорҳои байналмилалӣ дар робита бо боздошти хабарнигори Би-би-сӣ дар Тоҷикистон дар ҳоли афзоиш аст. Рӯзи душанбеи 20 июн гурӯҳе аз хабарнигорон ва ҳаводорони Урунбой Усмонов бо баргузории таҷаммӯъе эътирозӣ дар баробари сафорати ин кишвар дар Ландан хостори озодии ӯ аз боздошт шудаанд.

Аз ин пеш Бунгоҳи Суханпарокании Бритониё (Би-би-сӣ), сафоратхонаҳои Бритониё ва Омрико, Иттиҳодияи Урупо, САҲУ, созмонҳои Гузоришгарони Бидуни Марз ва Кумитаи Дифоъ аз Рӯзноманигорон, Хонаи Озодӣ ва Афви Байналмилалӣ бо пахши баёнияҳое аз давлати Тоҷикистон хостаанд Ӯрунбой Усмоновро бедиранг озод кунад.

Вале рӯзи шанбеи гузашта Кумитаи давлатии амнияти миллии Тоҷикистон бо пахши баёнияе ин хабарнигори Би-би-си-ро узви Ҳизби Таҳрир хондааст, ҳарчанд тибқи қонун танҳо додгоҳ метавонад ҷурми касеро собит бисозад ва то замони баргузории додгоҳ касеро наметавон узви ин ё он гурӯҳи мамнӯъ хонд.

Источник: http://www.bbc.co.uk/tajik/institutional/2011/06/110621_if_usmanov.shtml

Барои нахустин бор вакили мудофеъи Ӯрунбой Усмонов бо хабарнигори боздоштшуда мулоқот доштааст. Файзинисо Воҳидова, адвокати журналист пас аз боздидаш бо ӯ гуфтааст, вазъи саломатии Усмонов нигаронкунанда аст. Гуфта мешавад, дар ҳоли ҳозир асноди лозим барои озодии таҳти кафолати хабарнигори дастгиршудаи Бӣ-Бӣ-Сӣ омода гардида ва дар наздиктарин фурсат ба додгоҳ пешниҳод хоҳад шуд.Бино ба қавли Файзинисо Воҳидова масъулини амниятӣ аснои кофтукоби манзили зисти хабарнигор ду китоб кашф ва мусодира кардаанд. Яке аз ин китобҳо, ки ба забони ӯзбекӣ навишта шудааст, асари бадеӣ буда ва муаллифи он худи Усмонов будааст ва ин асар ба қазияи ҷиноии зерҳимояаам иртибот надорад, афзудааст хонум Воҳидова.

Китоби дуввуме, ки мусодира шудааст, «Ҳизби Таҳрир — душмани Ислом» ном дорад ва мӯҳтавои он интиқод аз фаъолияти ин созмони мамнӯъ дар Тоҷикистон иборат аст. Ӯрунбой Усмонов дар нахустин мулоқоташ бо вакили мудофеъи худ, аз бону Воҳидова чунин дархост кардааст: «Ба ҳамагон, дӯстон, расонаҳо, хабарнигорон, ҳамкорон, сафоратхонаҳои кишварҳои хориҷӣ расонед, ки ман гунаҳкор нестам.»

Источник: http://ozodagon.com/khabarho/tojikiston/981-2011-06-21-02-51-29.html

Бунгоҳи Суханпарокании Бритониё (Би-би-сӣ) бо интишори баёнияе ҷадиде дар робита ба боздошти Урунбой Усмонов, хабарнигори худ дар вилояти Суғди Тоҷикистон маҳрумияти ӯ аз тамос бо вакили мудофеъ ва хонаводаашро нақзи қавонини Тоҷикистон ва мавозини ҳуқуқии байналмиллалӣ хондааст.Дар ин баёния, ки имрӯз душанбеи 20 июн мунташир шуд, омадааст: «Як ҳафта аз боздошти Урунбой Усмонов,ҳамкори мо тавассути хадамоти амниятии Тоҷикистон мегузарад. Дар пайи он Би-би-сӣ бо интишори баёнияе ба таърихи 14 июн ин иқдомро маҳкум кард ва тақозо кард ӯ фавран озод шавад.»

Ин созмон мегӯяд бо вуҷуди интишори баёнияҳои мушобеҳе тавассути Сафоратҳои Бритониё ва Омрико дар Тоҷикистон ва созмонҳои дигари муътабари байналмиллалӣ мақомоти Тоҷикистон на танҳо ба онҳо посух надодаанд, балки тайи як ҳафтаи гузашта ӯ аз тамоси муназзам ва сиррӣ бо вакили мудофеъ ва иҷозаи мулоқот бо хонаводаи худ ва ҳамкоронаш маҳрум будааст, ки ин амр муғоийири мафоди қонунҳои Тоҷикистон ва меъёрҳои ҳуқуқии байналмиллалӣ аст.

Би-би-сӣ менависад мусоҳибаи ахире, ки ниҳодҳои амниятӣ бо ӯ созмон додаанд ва нашри мақола ба дунболи ин мусоҳиба дар Пресс.тҷ ба таърихи 18 июн , ки хабарнигори Би-би-сиро муттаҳам ба узвият дар Ҳизбуттаҳрир мекунад, намунаи нақзи қавонини тафтишу таҳқиқ ва асли бароат (презумпция невиновности) аст.

Бунгоҳи Суханпарокании Бритониё дар ин баёния афзудааст: «Мо қотеъона таъкид мекунем, ки ин иддаъоҳо беасосанд ва Би-би-сӣ онҳоро таҳдиде ба рӯзноманигории ҳирфаӣ ва озодии баён дар Тоҷикистон медонад.»

Би-би-сӣ мегӯяд Урунбой Усмонов ба унвони рӯзноманигори Би-би-сӣ бояд тамоми ҷавониби ҳар мавзуъро пӯшиш бидиҳад ва банобар хусусиёти пешаи худ табиъӣ аст, ки ӯ бо афроди дорои тамоми ашколи дидгоҳҳо мулоқот кунад ва бо онҳо мусоҳиба анҷом бидиҳад ва ин як амри муҳим аст, ки рӯзноманигорон битавонанд озодона ва бидуни бим аз эҳтимоли ҳарос ва озор дар бораи ҳар ниҳоде гузориш бидиҳанд.

Дар баёнияи худ ин расонаи байналмилалӣ аз эмании оқои Усмонов изҳори нигаронӣ кардааст ва навиштааст ӯ аз мушкилоти қалбӣ ранҷ мебарад ва ниёз ба дармон дорад ва хонаводаи ӯ аз вазъи саломати ӯ ва эҳтимоли рафтори су бо ӯ дар боздоштгоҳ шадидан нигарон ҳастанд.

Дар ин баёния аз ҳамаи афроду созмонҳое ки тавони таъсир ба вазъ дар робита ба боздошти оқои Усмоновро доранд хоста шуда бар талошҳои худ биафзоянд то муваффақ шаванд мақомоти Тоҷикистон ин хабарнигорро озод кунанд.

Ин дар ҳоле аст, ки пеш аз интишори ин баёния гурӯҳе аз хабарнигорон ва ҳаводорони Урунбой Усмонов, хабарнигори Би-би-сӣ да вилояти Суғди Тоҷикистон бо баргузории таҷаммуъи эътирозӣ дар баробари сафорати ин кишвар дар Ландан хостори озодии ӯ аз боздошт шудаанд.

Онҳо рӯзи душанбеи, 20 июн дар муқобили сохтмони сафорат дар ҳоле ки дар даст тасовири оқои Усмоновро доштанд шиъор медоданд «Урунбойро озод кунед.»

Муътаризин дар муқобили сохтмони сафорати Тоҷикистон дар Ландан мегуфтанд боздошт кардани хабарнигори Би-би-сӣ дар Тоҷикистон нишонаи дигаре дар ҷиҳати маҳдуд сохтани озодии баён дар ин кишвар аст ва шиъор медоданд «Аз ҳамла ба расонаҳои мустақил даст бардоред».

Онҳо дархости катбии худро барои озодии Урунбой Усмонов ба сафорати Тоҷикистон ироа карданд.

Таҷаммуъ дар муқобили сафорати Тоҷикистон дар Ландан дар пайи афзоиши фишорҳои байналмиллалӣ ба давлати Тоҷикистон дар робита ба боздошти оқои Усмонов сурат мегирад.

Созмони Афви Байналмиллал, аз созмонҳои умдаи дифоъ аз ҳуқуқи башар низ имрӯз гуфтааст ба чанд далел аз боздошти оқои Усмонов нигарон аст.

Анна Сандер Пассман намояндаи ин созмон, ки масоили Тоқикистонро дунбол мекунад, ба Би-би-сӣ гуфт яке аз ин далоил иддаъои бадрафторӣ бо оқои Усмонов ба ҳангоми боздошт аст. Далели дигари нигаронии ин созмон маҳрумияти оқои Усмонов аз хадамоти ҳуқуқии муносиби фаврӣ унвон шудааст ва далели дигар ҳам иттиҳомоти ворида хонда шудааст.

Ин созмон мегӯяд иддаъоҳои мунташир шуда, ки ин иттиҳомот сохтагӣ аст ва агар ин игуна иддаъо собит шавад созмони Афви Байналмиллал уро зиндонии сиёсӣ хоҳад донист.

Ин созмон афзудааст шуморе аз аснодро дар ихтиёр дорад, ки тибқи онҳо боздоштшудгон дар Тоҷикистон аз дастрасӣ ба вакили мудофеъ маҳрум будаанд. Дар ҳоле ки қавонини Тоҷикистон чунин ҳақро ба атбоъи ин кишвар додаанд, аммо дар амал дастрасии афрод ба вукалои мудофеъ ба лутфи бозрасон марбут аст.

Ба гуфтаи ин созмон айни ҳолат дар робита ба боздошти оқои Усмонов мушоҳида мешавад.

Созмони Афви Байналмилал ҳамчунин таҳқиқотеро анҷом додааст, ки бар мабнои он шиканҷа ва бадрафторӣ бо боздоштшудагон дар Тоҷикистон дар мароҳили ибтидоии боздошт сурат мегирад ва шавоҳид аз афроди таҳти бозрасӣ бо истифода аз бархурди хашин ба даст оварда мешавад.

Ин созмон мегӯяд ба ҳамин далел ҳам аз иддаъоҳо дар бораи вуҷуди зарбу шатм ба ҳангоми боздошти ин хабарнигори Би-би-сӣ нигарон аст ба ҳамон андозае ки дар мавриди иддаъоҳои сохтагии иттиҳомот алайҳи ӯ нигарон аст.

Ин дар ҳоле аст ки Файзинисо Воҳидова, вакили мудофеъи оқои Усмонов низ аз вазъи сломати муваккилаш низ изҳори нигаронӣ карда ва гуфтааст аз хонаводааш хостааст аснодеро дар робита ба вазъи саломати ӯ дарёфт ва таҳия кунанд то бар мабнои онҳо аз додситон бихоҳад ӯро бо қайди васиқа озод кунанд.

Ҳамчунин хонуми Воҳидова ишораҳое ба эҳтимоли мавриди бархурди хашин қарор гирифтани муваккилаш кардааст.

Пештар аз ин сафоратхонаҳои кишварҳои Иттиҳодияи Урупо дар Тоҷикистон низ аз мақомоти Тоҷикистон хостанд дар робита ба боздошти оқои Усмонов мавозини ҳуқуқии байналмилаллиро риоят кунанд.

Иттиҳодияи Урупо, ки муташакил аз 27 кишвари узв аст, бузургтарин кумакрасони байналмиллӣ аст. Аз соли 1992 бад-ин сӯ Иттиҳодияи Урупо ба Тоҷикистон ба маблағи беш аз 500 миллюн юру кумак ворид кардааст

Фишорҳои байналмилалӣ дар робита ба боздошти хабарнигори Би-би-сӣ дар Тоҷикистон дар ҳоле афзоиш меёбад, ки давлати ин кишвари фақиртарин дар Осиёи Миёна барои иҷрои тарҳҳои рушди иқтисодӣ ба кумаки сармоягузорони хориҷӣ шадидан инёз дорад ва талош мекунад равобити худ бо кишварҳои Урупоиро тақвияти бештар диҳад.

Урунбой Усмонов ба таърихи 13 июн пас аз поёни кор нопадид шуд ва як рӯз баъд дар ҳамроҳӣ бо маъмурони амниятӣ дар манзили худ зоҳир шуд. Пас аз бозҷӯии манзилаш маъмурони амниятӣ ӯро бо худ бурданд ва маълум буд, ки ӯро боздошт кардаанд.

Масъулини амниятии Тоҷикистон ӯро ба ширкат дар созмони ифротии мамнуъ муттаҳам кардаанд, чизеро ки ӯ пас аз шаш рӯзи боздошт дар нахустин мулоқот бо вакили мудофеъ комилан рад кардааст.

Источник: http://www.bbc.co.uk/tajik/institutional/2011/06/110620_l16_urinboy_tajikistan_embassy.shtml

Ассоссиатсияи журналистии «Медиа-Алянси Тоҷикистон» ба даъвати НАНСМИТ (АМВАОМТ) барои кӯмаки моддӣ ба аъзои оилаи журналисти боздоштшуда дар ноҳияи Ашти вилояти Суғд, хабарнигори минтақавии ҳафтаномаи «Нури зиндагӣ» Маҳмадюсуф Исмоилов ҳамраҳ гардида, ҷамъулҷамъ ба оилаи вай 1050 сомонӣ кӯмак намуд. Дар ин маврид, дабири кулли МАТ Хуршед Ниёзов иттилоъ дод:

«Субҳи имрӯз 600 сомонии дигар барои интиқол ба оилаи Исмоилов аз ҳисоби аъзои МАТ ҷамъоварӣ гардид. Пештар аз ин ҳафтаномаи «Фараж», ки аз аъзои фаъоли МАТ аст, 250 сомонӣ ба ҳамсари журналист расонид ва 200 сомонии дигар хабарнигори он Раҳима Аъзамзода дар ин маърака саҳмгузорӣ намуд. Маблағи умумии ҷамъовардашуда 1050 сомониро ташкил медиҳад», — зикр намуд Хуршед Ниёзов.

Бояд гуфт, ки МАТ аз созмонҳои фаъоли журналистии кишвар буда, воситахои ахбори оммаи маъруферо мисоли ТВ «Симои мустақили Тоҷикистон (СМТ)», родиёи «Ватан», хабаргузории «Авасто», ТҶ «Даст ба даст», нашрияҳои «Фараж», «Бизнес и политика», «Факты и коментарии», «Вечёрка», «Курьер Таджикистана», «Ману ту» ва журналистони алоҳидаро дарбар мегирад.

Ёдрас менамоем, ки Маҳмадюсуф Исмоилов хабарнигори нашрияи «Нури Зиндагӣ» дар вилояти Суғд ба таҳқиру тавҳин ва барангехтани адовати маҳаллӣ муттаҳам шудааст. Номбурда ҳанӯз моҳи ноябри соли 2010 баъди нашри маводи танқидидаш нисбати мансабдорони ноҳия боздошт гардида, то ин замон дар боздоштгоҳи муваққатии вилояти Суғд мебошад.

Источник: Хадамоти мониторинги АМВАОМТ.

[b]Урунбой Усмонов гуфтааст, рабти ӯ бо гурӯҳи мамнӯъ танҳо дар доираи фаъолияти ҳирфаияш ҷой доштааст.[/b]

Баъд аз як ҳафтаи боздошти Урунбой Усмонов, хабарнигори бахши Осиёи Марказии Би-Би-Сӣ дар Хуҷанд, билохира вакили дифоъ Файзиниссо Воҳидова бо ӯ мулоқот кард.

Аммо ба гуфтаи хонум Воҳидова, мулоқоти ӯ бо Усмонов на як ба як, балки таҳти назари муфаттиши парванда сурат гирифтааст. Баъд аз анҷоми мулоқот хонум Воҳидова ҳозир шуд ба саволҳои Радиои Озодӣ посух гӯяд.

[b]Матни пурраи гузоришро бо пахш кардани суроғаи зерин дар торномаи мо мутолиа кунед:[/b] [url=http://www.taj.nansmit.tj/analysis/?id=79]http://www.taj.nansmit.tj/analysis/?id=79[/url]

М.Муҳаммадраҷаб, Х.Ҳамдам

Источник:

[b]Урунбой Усмонов гуфтааст, рабти ӯ бо гурӯҳи мамнӯъ танҳо дар доираи фаъолияти ҳирфаияш ҷой доштааст.

Баъд аз як ҳафтаи боздошти Урунбой Усмонов, хабарнигори бахши Осиёи Марказии Би-Би-Сӣ дар Хуҷанд, билохира вакили дифоъ Файзиниссо Воҳидова бо ӯ мулоқот кард.

Аммо ба гуфтаи хонум Воҳидова, мулоқоти ӯ бо Усмонов на як ба як, балки таҳти назари муфаттиши парванда сурат гирифтааст. Баъд аз анҷоми мулоқот хонум Воҳидова ҳозир шуд ба саволҳои Радиои Озодӣ посух гӯяд.[/b]

[b]Савол: Мулоқот бо зерҳимояатон – Усмонов чӣ гуна сурат гирифт?[/b]

[b]Файзиниссо Воҳидова:[/b] «Имрӯз, санаи 20 – уми июн дар ҳузури ман ба Урунбой Усмонов аз ҷониби тафтишоти пешакӣ расман айб эълон карда шуд. Бо моддаи 307, прим. 3, қисми 2, яъне «иштирок дар фаъолияти ҳизбҳои сиёсӣ, иттиҳодияҳои ҷамъиятӣ, динӣ ё дигар ташкилоте, ки нисбати он аз ҷониби суд қарори эътибори қонунӣ пайдокарда дар бораи барҳам додан ё манъи фаъолияташ бинобар сабаби ба амал баровардани фаъолияти экстремистӣ қабул шудааст.»

[b]Савол: Яъне, бо парвандаи Усмонов низ шинос шудед?[/b]

[b]Файзиниссо Воҳидова:[/b] «Бале, бо он маводе, ки бо иштироки зерҳимояам амалҳои тафтишотӣ баргузор шудааст.»

[b]Савол: Аммо мақомоти интизомӣ қаблан эълон карда буданд, ки алайҳи Усмонов ду банди асноди ҷиноӣ пешниҳод шудааст.[/b]

[b]Файзиниссо Воҳидова:[/b] «Тартиби тафтишоти аввалия тибқи қонун чунин аст, ки баъд аз 10 рӯзи татбиқи чораи нигаҳ доштан дар ҳабс аз ҷониби додгоҳ, бояд мақомот айб пешниҳод кунад. Барои риояти қонун онҳо имрӯз аз рӯи як банд айб эълон карданд, аммо ин маънии онро надорад, ки онҳо танҳо ҳамин як айб пешинҳод карда истодаанд. Тафтишот ҳоло ду моҳ дар пеш дорад барои роҳандозии амалиёти тафтишотӣ, ҷамъоварии далелҳо ва эълони айби ниҳоӣ.»

[b]Савол: Аммо худи хабарнигори боздоштшудаи Би-Би-Сӣ чӣ мегӯяд? Чӣ ҳодиса рух додааст?[/b]

[b]Файзинисо Воҳидова:[/b] «Усмонов дар ҳузури ман бо қарори муфаттиш шинос шуда, доир ба он нишондод дода, ваҷҳу далелҳои худро баён намуд. Аммо чунонки гуфтам, вохӯрӣ ва мулоқоти як ба як бо зерҳимояам баргузор нагардид. Имрӯз вохӯрӣ дар доираи амалиёти тафтишотӣ буд. Ман низ чун ҳимоягари ӯ дар ин бора талаб накардам.

[b]Савол: Чаро?[/b]

[b]Файзиниссо Воҳидова[/b]: «Зеро бо назардошти шароити воқеии мавҷуда, маҳалли ҷойгирии мақомоти тафтишотӣ, шароиту хусусиятҳои раёсати амният чун вохӯрӣ дар утоқи кории мутфаттиш, таҳти назорати мақомот ва дастгоҳи назоратӣ анҷом мегирад. Ва имкони дар чунин шароит расонидани ёрии ҳуқуқӣ ва гуфтугӯи як ба як ниҳоят маҳдуд аст, ман шахсан лозим нашуморидам чунин гуфтугӯ (як ба як) ҳоло барпо гардад. Ҳол он ки тибқи Асноди ҷиноӣ вакили дифоъ ҳуқуқ дорад бо нафари зерҳимояаш як ба як, бе маҳдудияти вақт сӯҳбат кунад. Умед дорам, аз ин ҳуқуқи худ танҳо баъди ба маҳкамаи тафтишотӣ гузаронидани Усмонов истифода кунам.»

[b]Савол: Ба ҳар ҳол, худи Усмонов ҳам сӯҳбат кард, дар бораи боздошт ва иттиҳоме, ки алайҳаш пешниҳод шудааст?[/b]

[b]Файзиниссо Воҳидова:[/b] «Бале, дар ҳоли ҳозир Усмонов бо айби пешниҳодкардаи тафтишоти пешакӣ розӣ нест. Худро гунаҳкор намеҳисобад. Ваҷҳҳои тафтишотро ба пуррагӣ инкор намуда, изҳор намуд, ки он барномаҳое, ки дар бораи фаъолияти ҳизби мамнӯъгаштаи Таҳрир омода кардааст ва дар зимн ду – се маротиба бо аъзои ин ҳизб вохӯриҳое анҷом додааст, он вақт ӯ аниқ инро намедонист. Ва ин аз пайи анҷоми фаъолияти касбиаш буда, ба бевосита ба фаъолияти хабарнигориаш рабт дорад. Ҳамчунин, вай гуфт, чун қонуни Тоҷикистон дар бораи васоити ахбори омма ба журналист барои ифшо насохтани манбаъҳои иттилоъи худ кафолат медиҳад, дар ин бора ба мақомоти ҳифзи ҳуқуқ хабар надодааст. Дар ҳузури ман бевосита айби эълоншударо, фаъолият дар Ҳизб- ут-таҳрирро инкор намуда, баръакс ҳисси бадбинӣ ва нафрати худро алайҳи ин ҳаракат баён дошт.»

[b]Савол: Ҳоли ӯ чӣ тавр аст?[/b]

[b]Файзиниссо Воҳидова:[/b] «Боздоштшуда – Усмонов ягона шинояте, ки кард, аз вазъи сиҳатиаш буд. Акаи Урунбой гуфт, ки дар ҳақиқат он дорувор ва хӯроку чизҳое, ки пайвандонаш ба вай меоранд, дастрас мекунад. Аммо вай гуфт, ки эҳтиёҷ ба табобати тиббии касбӣ дар беморхона дорад.»

[b]Савол: Иқдоми минбаъдаи шумо дар ҳимояти ӯ чӣ хоҳад буд? [/b]

[b]Файзиниссо Воҳидова:[/b] «Чун имрӯз ман бо парванда ошно шудам ва дарёфтам, ки Урунбой Усмонов шомили Ҳизб-ут-таҳрир нест ва тамоми он корҳое, ки анҷом додааст, ба фаъолияти касбиаш рабт дорад, ман тасмим гирифтам ба Додситонии кулли Тоҷикистон ва додситонии Суғд муроҷиат хоҳам кард. Умед дорам тамоми мақомоти назораткунанда тарафдори тафтиши пурраву объективона ва барқарор кардани адолат ҳастанд ва тафтиши парвандаи Усмонов бо риояти қонуни мурофиавӣ анҷом меёбад.»

Хонуми Воҳидова ҳамчунин гуфт, талош хоҳад кард, нисбати ду журналисте, ки ғайриқонунӣ ба мулоқоти зерҳимояаш рафтаанд, парвандаи ҷиноӣ боз шавад: «Ин ду журналист аз тариқи фош кардани сирри тафтишот тариқи воситаҳои хабори омма, амнияти зерҳимояашро зери суол бурдаанд.»

Ба ин далел хонум Воҳидова, гуфт, ки ба манзури фароҳам овардани шароити нигаҳдорӣ ва табобат, ба ниҳодҳои зиддахл, ба хусус прокуротура муроҷиат хоҳад кард.

Ҳамзамон Файзинисо Воҳидова эълом кард, ки нисбати ду тан журналисте, ки ғайриқонунӣ ба мулоқоти зерҳимояаш рафта ва сирри тафтишотро тариқи васоити ахбори омма фош кардаанд, ба Додситони кулл муроҷиат хоҳад кард.

М.Муҳаммадраҷаб, Х. Ҳамдам.

Источник: http://www.ozodi.org/content/article/24240755.html

[b]Нашрияи «Фараж» ба даъвати НАНСМИТ барои кӯмаки моддӣ ба аъзои оилаи журналисти боздоштшуда — хабарнигори «Нури зиндагӣ» Маҳмадюсуф Исмоилов ҳамроҳ гардида, ба аҳли оилаи журналист ба маблағи 250 сомонӣ кӯмак расонид. Дар ин бора ба TojNews сардабири ҳафтаномаи «Фараж» Хуршеди Атовулло иттилоъ дод.[/b]

Ба изҳори ӯ, маблағро намояндаи нашрия дар вилояти Суғд ба ҳамсари Маҳмадюсуф Исмоилов — Гулсуной Маҳкамова супорид. Ҳамчунин, хабарнигори нашрия Раҳима Аъзамзода (Бобоева) аз ҳисоби шахсиаш ба маблағи 200 сомонӣ ба ин маърака ҳиссагузорӣ кард, ки ин маблағ тавассути намояндаи НАНСМИТ ба аҳли хонаводаи журналист расонида мешавад.

Таври маълум, журналисти тоҷик Маҳмадюсуф Исмоилов барои маводи танқидиаш нисбат ба кормандони ҳукумати ноҳияи Ашт айни замон дар боздоштгоҳи муваққатии ин ноҳия аст ва мурофиаи судӣ тибқи даъвои мансабдорон алайҳи журналист идома дорад.

Ташкилотчии аксияи кӯмак ба хонаводаи рӯзноманигор — раиси НАНСМИТ Нуриддин Қаршибоев мегӯяд, ки мақсад аз ин иқдом пеш аз ҳама ҷонибдорӣ аз ҳуқуқи конститутсионии шаҳрвандон ба иттилоот ва истифода аз ахбори омма буда, ҳамрайъӣ ба ҳамкасби худ аст, ки имрӯз дар маҳбас асту барои навиштаҳояш таҳти таъқиби мақомот қарор гирифтааст.

— Мо муроҷиат кардем ба ҳамаи онҳое, ки барояшон ҳуқуқу озодиҳои инсон арзиши боло дорад. Гуфтем, барои касоне, ки озодии баёну журналистикаи шаҳрвандӣ як арзише дорад, метавонанд дар ин иқдом ишгтирок кунанд. Лек аксари маблағҳо аз номи рӯзноманигорон ва коллективҳои эҷодӣ ворид шудаанд,- мегӯяд ӯ.

Ба изҳори Нуриддин Қаршибоев, аз оғози эълони ин аксияи ҳамдастӣ барои кӯмаки хонаводаи журналист 2 ҳазору 757 сомониву 50 дирам пул ҷамъ шудааст.

Нуриддин Қаршибоев мегӯяд: «Аз рӯзи 10-уми ҳамин моҳ аксия давом дорад. Азбаски намояндаи «Фараж» дар минтақа буд, мо маслиҳат кардему ӯ бевосита бурда, маблағи кӯмакро ба оилаи Исмоилов супурд. Мо ин ҳафта ҳам агар маблағ ҷамъ кунем, баъд ҳамашро якҷо карда, бо рӯйхати номи нафарони кӯмакрасон як ҳайат бурда ба оилаи Маҳмадюсуф месупорем».

Ногуфта намонад, ки ин иқдом аз ҷониби ҳамқаламони бурунмарзӣ низ ҷонибдорӣ пайдо кардааст. Аз ҷумла муассиси медиахолдинги «ТаджИНФО» дар шаҳри Маскав Муҳаммади Эгамзод аз аввалин нафароне будааст, ки ба оилаи Маҳмадюсуф Исмоилов дар ҳаҷми 100 доллар маблағ кӯмак ирсол кардааст.

Тавре Хуршеди Атовулло изҳор медорад, Ассотсиатсияи журналистии Медиа-Алянси Тоҷикистон ҳам барои саҳмгузорӣ дар ин кор айни замон дар садади ҷамъоварии маблағ аз аъзоёни созмон аст.

Мушкинисо АСОЗОД

Источник: http://tojnews.org/taj/index.php?option=com_content&task=view&id=15348&Itemid=30

[b]Нашрияи «Фараж» ба хонаводаи журналист Маҳмадюсуф Исмоилов 250 сомонӣ кӯмаки моддӣ ирсол кард.[/b]

Тавре ба «Озодагон» сардабири ин ҳафтанома Хуршеди Атовулло иттилоъ дод, «Фараж» ба даъвати НАНСМИТ барои кўмаки моддӣ ба аъзои оилаи журналисти боздоштшуда ҳамроҳ гардида, ба хонаводаи ӯ кӯмак расонид. Маблағро намояндаи нашрия дар вилояти Суғд ба ҳамсари Исмоилов- Гулсуной Маҳкамова супорид. Ҷаноби Атовулло афзуд, хабарнигори минтақавии «Фараж» Раҳима Аъзамзода (Бобоева) низ аз ҳисоби шахсиаш ба маблағи 200 сомонӣ ба ин маърака ҳиссагузорӣ кард, ки ин маблағ тавассути намояндаи НАНСМИТ ба оилаи журналист расонида мешавад.

Гуфта мешавад, Ассотсиатсияи журналистии Медиа-Алянси Тоҷикистон (МАТ) ҳам барои саҳмгузорӣ дар ин кор айни замон дар садади ҷамъоварии маблағ аз аъзоёни созмон аст.

Ёдрас менамоем, Муҳаммадюсуф Исмоилов хабарнигори нашрияи «Нури Зиндагӣ» дар вилояти Суғд ба таҳқиру тавҳин ва барангехтани низоъи миллию мазҳабӣ дар ноҳияи Ашт муттаҳам шудааст. Номбурда ҳанӯз моҳи ноябри соли 2010 боздошт гардида, то ин замон дар боздоштгоҳи муваққатии вилояти Суғд ба сар мебарад.

Источник: http://ozodagon.com/khabarho/tojikiston/967-450-lr-.html