Департаменти давлатии ИМА гузориши ҳамасола доир ба вазъи риояи ҳуқуқи инсонро рӯзи 13 апрел дар Вашингтон муаррифӣ намуд.
Бино ба иттилои Голос Америки, дар гузориш Вазорати корҳои хориҷии ИМА ҳукуматҳои худкома (авторитарӣ) дар саросари ҷаҳонро барои корбурди «нерӯи афзоянда ва барқасдона» дар амалисозии нақзи ҳуқуқи башар бо мақсади роҳандозии назорат аз болои ҳама гуна амали дорои хатари имконпазир барои ҳокимияти онҳо мавриди интиқод қарор додааст.
Котиби давлатии ИМА Ҷон Керри дар пешгуфтори ин санад аз ҷумла қайд кардааст, ки дар Гузориши вазъи ҳуқуқи башар дар соли 2015 буҳрони сартосарӣ дар бахши идоракунии давлатӣ зикр шуда, «дар ҳамаи минтақаҳои дунё тамоили афзоянда ба маҳдуд кардани паҳно барои ҷомеаи шаҳрвандӣ, фишор болои озодии ВАО ва Интернет, таъқиби мухолифон ва дар ҳолатҳои ноилоҷӣ куштори одамон ё бесарпаноҳ мондани онҳо аз ҷониби ҳам сохторҳои давлатӣ ва ҳам ғайридавлатӣ ба мушоҳида мерасад.
«Бархе ба ин рӯйдодҳо назар карда, нигаронӣ мекунанд, ки демократия мавқеъашро аз даст медиҳад. Дар асл бошад, ин аксуламал ба пешбурди идеалҳои демократӣ, дархостҳои афзояндаи одамони тамоми навъи фарҳангу ҳама гуна минтақаҳост, ки хоҳишманди наздашон масъулият доштани ҳукуматҳо мебошанд», — гуфтааст Ҷ.Керри.
Дар гузориш ба масъалаҳои дағалона риоя нашудани ҳуқуқҳои инсон ва ҳуқуқҳои байнулмилалӣ, заъифшавии ниҳодҳои ҳомии ҳуқуқу озодиҳо, таъсири харобиовари коррупсия ба рушди демократия, фишори давлатҳои худкома болои ҷомеаи шаҳрвандӣ таваҷҷуҳ зоҳир мешавад.
Қайд мешавад, ки соли 2015 «дар кишварҳои Осиёи Марказӣ, Тоҷикистон, Ӯзбекистон ва Қазоқистон оид ба созмонҳои ғайриҳукуматӣ қонунҳо қабул шуданд, ки фазои фаъолияти сохторҳои шаҳрвандиро маҳдуд карда метавонанд». Зикр мегардад, дар Туркманистон чунин қонун аллакай мавҷуд аст.
Дар гузориш ба Русия таваҷҷуҳи хосса зоҳир шуда гуфта мешавад, ғасби нимҷазираи Қрим, ки моҳи марти соли 2014 сурат гирифт, давоми сол ба таъсири назаррасу манфӣ ба вазъ дар бахши риояи ҳуқуқи инсон идома бахшид.
http://news.tj/tj/news/ima-ukumat-oi-khudkoma-ba-fishor-boloi-omeai-sha-rvand-ta-viyat-bakhshidand