Гармои баҳс миёни даъвогарон ва масъулини нашрияҳо дар додгоҳи ноҳияи Фирдавсӣ, шиддати гармои бесобиқаи моҳи апрели имсоларо мемонад.Ҷави ҳоким дар ин моҷаро тавре шакл гирифтааст, ки рӯзноманигорон дар ин қазияҳо дар баробари худ камтар тарафҳои даъвогар, балки умдатан додрасҳоро дар рӯбарӯи худ мебинанд.

Имрӯз навбати баррасии парвандаи «Чархи гардун» аст. Ин парванда бо даъвои хусусии Сайвалӣ Нуров, собиқ вакили МН алайҳи Муҳаммадалии Мақсадулло, сардабири «ЧГ» боз шудааст. Ба фарқ аз парвандаҳои дигари алайҳи матбуот, ин қазия шаҳрвандӣ нест.

МОҶАРОЕ, КИ НИҲОӢ МЕШАВАД

Вакили собиқи МН дар матлабе зери унвони «Депутати авбошро говсуд мекунанд?» шахсияти худро тӯҳмат ва таҳқиршуда ёфта, хостори боз намудани парвандаи ҷиноӣ алайҳи Муҳаммадалии Мақсадулло ва дар ҷаласаи ахири додгоҳ хостори пардохти 35 ҳазор сомонӣ ҷуброн низ шуд. Қарор аст додгоҳ субҳи рӯзи чоршанбеи 27-уми апрел дар ин маврид ҳукми худро содир кунад. Ҳоло маълум нест, ки ин ҳукм чӣ хоҳад буд.

Баҳси тарафҳо аз як соли пеш, аз замони баргузории интихоботи МН идома дорад. Муҳаммадалии Мақсадулло, сардабири «ЧГ» мегӯяд, ки ҳадаф аз нашри он матлаб тӯҳмат ва таҳқири шахсияти С. Нуров набуд, балки инъикоси хабари боз шудани парвандаи ҷиноӣ алайҳи С. Нуров аз сӯи додситонии Хатлон бо иттиҳоми авобшӣ будааст.

Оқои Мақсадулло мегӯяд: «Дар он матлаб ягон осори тӯҳмат ва таҳқир нест, мо аз рӯи факти ҳодиса, яъне кушода шудани парвандаи ҷиноӣ алайҳи Сайвалӣ Нуров мавод ба табъ расонидем. Ва ин ҷо ҳеҷ гуна мавҷудияти тӯҳмат ва таҳқирро намебинам».

ХУЛОСАИ КОРШИНОСӢ ЧИСТ?

Аммо ҷониби даъвогар иддао дорад, ки дар сарлавҳаи хабар шахсияти ӯ, яъне С. Нуров авбош номида шуда ва таҳқир шудааст. Намояндаи С. Нуров аз изҳори назари худ ба хабарнигорон баъд аз ҷаласаи додгоҳ худдорӣ намуд.

Ин дар ҳолест, ки дар ҷаласаи ахир додраси парванда бо дархости намояндаи ҷониби даъвогар аз шунидани хулосаи коршиносии журналистии матни хабари дарҷшуда дар «ЧГ» сарфи назар кард. Сангин Гулов, коршиноси Шӯрои расонаҳои Тоҷикистон қарор буд хулосаи коршиносии матни хабари дарҷшуда дар нашрияро ба додгоҳ ироа кунад.

Оқои Гулов мегӯяд: «Ҳадаф аз он хабар тӯҳмат ва таҳқири номзад ба вакилии МН нест. Зеро он сарлавҳа ба сурати суолӣ гузошта шудааст. Яъне тасдиқи хабар нест дар он ҷо. Дуввум ин, ки баъди як ҳафтаи нашри ин матлаб, нашрия тасҳеҳ чоп карда ва навиштааст, ки ин ҷо хатои имлоӣ шудааст, яъне бо сабаби техникӣ нохунак афтидааст. Ин нишон медиҳад, журналист пеш аз даъвои он ҷониб, хатои худро эътироф карда ва онро ислоҳ кардааст».

Иноят Иноятов, вакили мудофеъи сардабири «ЧГ» дар суханронии худ дар ҷаласаи охирин гуфт, ин даъво бояд ба сурати даъвои шаҳрвандӣ баррасӣ шавад.

ПАРВАНДАҲОИ ДАВОМДОРИ НАШРИЯҲО

Сабаби кушодани парвандаи ҷиноятии мазкур, аризаи хаттии раиси комиссияи участкаи интихоботии №20 –и ноҳияи Вахш Толиб Хӯҷаназаров гардида буд, ки тибқи шикоятномаи ҷабрдида, номзад ба депутатии Маҷлиси намояндагон Сайвалӣ Нуров рӯзи 28-уми феврал дар ҳудуди участкаи интихоботӣ ва дар ҳузури шоҳидон ӯро латукӯб намудааст.

Сайвалӣ Нуров дар ҳоле алайҳи ЧГ даъво пеш мебарад, ки додгоҳи ноҳияи Бохтар ӯро дар авбошӣ муттаҳам донистааст. Додгоҳ Сайвалӣ Нуровро бар асоси моддаи 237, қисми 1-и Кодекси ҷиноятии Тоҷикистон, яъне авбошӣ, гунаҳкор дониста, ба пардохти 500 нишондиҳанда барои ҳисобҳо, яъне 17 ҳазору 500 сомонӣ (наздик ба 4000 доллар), маҳкум кардааст.

Аммо дар додгоҳи ноҳияи Фирдавсӣ чанд парвандаи дигари алайҳи нашрияҳо, аз ҷумла парвандаи алайҳи «АП» ва муассиси «Пайкон» дар дасти баррасӣ қарор дорад. Ин додгоҳ то кунун парвандаи алайҳи худи «Пайкон»-ро ба нафъи «Тоҷикстандарт» ва парвандаи алайҳи «Миллат»-ро ба нафъи вазорати кишоварзӣ ҳал намудааст.

Источник: http://www.ozodi.org/content/article/16794495.html

Додгоҳи ноҳияи Фирдавсӣ эъломи ҳукми “Чархи гардун”-ро то замони судури ҳукми додгоҳи ноҳияи Бохтар дар қиболи Сайвалӣ Нуров, вакили собиқи порлумон ва шокии аслии парванда алайҳи «Чархи гардун» ба таъвиқ гузошт.Қозии парвандаи “Чархи гардун” дар додгоҳи ноҳияи Фирдавсии шаҳри Душанбе гуфтааст, ки то замони эъломи ҳукми додгоҳи истинофии ноҳияи Бохтари вилояти Хатлон дар қиболи Сайвалӣ Нуров, имкони эъломи ҳукми «Чархи гардун» вуҷуд надоштааст.

Муҳокимаи парвандаи “Чархи гардун” бар асоси шикояти Сайвалӣ Нуров дар тобистони соли 2010 оғоз ёфта ва шокии парванда, нашрияро дар чопи матолиби тӯҳматомез ва таҳқиркунанда муттаҳам мекунад.

Ин ҳафтанома ба ҳангоми пӯшиши хабарии муттаҳам шудани Сайвалӣ Нуров дар авбошӣ дар он замон, матлабе бо номи «Депутати авбош»-ро говсуд мекунанд?» чоп карда буд, ки унвони ин матлаб боиси хашми оқои Норов шуда буд.

Ҳарчанд Муҳаммадалии Мақсадуллоҳ, сардабири ҳафтаномаи «Чархи Гардун» мегӯяд, ки онҳо «танҳо як иштибоҳи фаннӣ» кардаанд, ки калимаи «авбош»-ро дар унвони матлаб дар дохили нохунак нагирифтаанд, «зеро он модае, ки оқои Нуров тибқи он муттаҳам шудааст, дар қонуни кайфарӣ «авбошӣ» ном гирифтааст.»

Аз сӯйи дигар Иноят Иноятов, вакили мудофеъи нашрияи “Чархи гардун” мегӯяд, ки ин қазия бояд дар чаҳорчӯби додгоҳи шаҳрвандӣ, на ҷиноӣ баррасӣ шавад.

Таърихи даъво бо «Чархи гардун»

Дар соли 2010 кормандони интизомӣ бар асоси се моддаи 237, 150 ва 112, яъне ба иттиҳоми авбошӣ, мамонеъат аз кори кумисиюни интихоботӣ ва расондани зарари ҷисмонӣ ба фарди дигар алайҳи Сайвалӣ Нуров, намояндаи қаблии порлумон, парванда боз кардаанд.

Ин парванда бар асоси шикоятии Толиб Ҳӯҷаназаров, раиси ҳавзаи интихоботӣ дар ноҳияи Бохтар, боз шуда буд. Сипас, додгоҳи шаҳри Қӯрғонтеппа ин парвандаро бидуни оғози муҳокима мутаваққиф кард.

Вале дар пойизи соли 2010 додгоҳи ноҳияи Бохтари ин вилоят, муҳокимаи ин қазияро дубора оғоз карда ва Сайвалӣ Нуровро дар авбошӣ муҷрим шинохт ва ӯро ба пардохти 17 ҳазор сомонӣ ғаромат ба суди оқои Ҳӯҷаназаров маҳкум кард.

Сайвали Нуров аз ин ҳукми додгоҳ ба додгоҳи истинофӣ шикоят бурд ва ин додгоҳ ҳанӯз ҳукми худро содир накардааст. Додгоҳи ноҳияи Фирдавсӣ эъломи ҳукми ин додгоҳро дар қиболи Сайвалӣ Нуров мунтазир ,будааст.

Дар соли 2010 шаш ҳафтанома ба додгоҳ кашида шуд ва аксари ин нашрияҳо бар асоси моддаҳои 135 ва 136 ба иттиҳоми чопи туҳмат ва тавҳин муттаҳм шуда буданд.

Дар моҳи феврали соли равон додгоҳи ноҳияи Фирдавсӣ нашрияи “Миллат”-ро ба чопи раддияи Вазорати кишоварзии Тоҷикистон ва пардохти ғаромат ба ин вазорат муваззаф кард.

Бар асоси ҳукми ин додгоҳ ин ҳафтанома бояд ба Вазорати кишоварзӣ ба миқдори 1500 сомонӣ ё беш аз 300 дулори омрикоӣ пардохт кунад.

Ҳамчунин дар ин додгоҳ муҳокимаи қазияи байни нашрияи “ASIA-Plus” ва бахши ҷароими созмонёфтаи пулиси Тоҷикистон низ идома дорад.

Гурӯҳҳои ҳуқуқи башар ва мудофеъони озодии баён зимни интиқод аз давлати Тоҷикистон борҳо хоста буданд, ки моддаҳои марбут ба «туҳмат» ва «таҳқир»-ро аз қонуни ҷиноӣ ҳазф кунанд ва ин гуна қазияҳо тибқи қонуни шаҳрвандӣ ё маданӣ баррасӣ шаванд.

Источник: http://www.bbc.co.uk/tajik/institutional/2011/04/110426_zkh_court_massmedia.shtml

Асадулло Раҳмонов, раиси Кумитаи родию ва телевизиюни Тоҷикистон, рӯзи ҷумъаи 15 апрел дар як нишасти хабарӣ дар шаҳри Душанбе дар ин бора хабар дод.Вай гуфт, ки ба асоси тафовуқоти руасои ҷумҳурии Тоҷикистон, Эрон ва Афғонистон дар мавриди таъсиси телевизиюни муштараки ин се кишвар ҷониби Эрон вазифаи харидории таҷҳизот барои ин телевизиюн ва ҳамли он ба шаҳри Душанберо ба ӯҳда дорад.

Оқои Раҳмонов гуфт, ки дар моҳҳои феврал ва марти соли ҷорӣ дар нашрияҳо ва расонаҳои Тоҷикистон дар бораи вориди шудани чунин таҷҳизот ба Тоҷикистон хабарҳо пахш шуда буд, ки воқеъият надорад.

Ин дар ҳолест, ки Алиасғари Шеърдӯст, сафири Эрон дар Тоҷикистон, дар нишасте хабарӣ дар шаҳри Душанбе дар моҳи гузашта дар бораи харидорӣ шудани таҷҳизоти фаннӣ барои телевизиюни муштараки форсизабонҳо аз Олмон ва ҳамли ин таҷҳизот ба шаҳри Душанбе хабар дода буд.

Оқои Шеърдӯст таъкид дошт, ки ба ин тартиб ҷониби Эрон таъаҳҳудоти худ барои таъсиси телевизиюни муштараки форсизабонҳоро иҷро кардааст.

Вале як манбаъи сафорати Эрон дар Тоҷикистон рӯзи ҷумъаи 15 апрел ба Би-би-сӣ гуфт, ки бахши аслии таҷҳизот, ки барои сабту истудию лозим аст, то ҳол ба Тоҷикистон ворид нашудааст.

Раиси Кумитаи родию ва телевизиюни Тоҷикистон гуфт, ки ин кишвар низ вазифаи худ мабнӣ бар омода сохтани бинои телевизиюн, таҳияи асноди ҳуқуқӣ ва сабти номи ин шабакаро анҷом додааст.

Аммо сафорати Эрон дар Тоҷикистон гуфт, ки ҷониби Тоҷикистон бояд як сохтмони муҷаҳҳазро дар ихтиёри ин шабакаи телевизиюнӣ мегузошт, вале ин кишвар танҳо ду табақа аз сохтмони “Баҳористон”, шабакаи телевизиюни бачагонаи Тоҷикистонро, барои ин амр пешниҳод кардааст.

Ин манбаъ афзуд, ки баъдан ин бино бо сармояи Эрон тармиму бозсозӣ ва мизу курсӣ харидорӣ шудааст.

Гуфта мешавад, Афғонистон ба таъсиси шабакаи муштараки телевизиюни форсизабонҳо чандон майле аз худ нишон надодааст.

Манобеъи сафорати Эрон дар Тоҷикистон мегӯянд, ки ин ду кишвар талош мекунанд то замони ҷашни 20-умин солгарди истиқлоли Тоҷикистон дар моҳи сентябри соли ҷорӣ ҳатто барои чанд соъат ҳам бошад шабакаи телевизиюни муштараки форсизабонҳо фаъол шавад.

Тардидҳо дар пахши телевизиюни форсизабонҳо

Бисёре аз коршиносони тоҷик дар фаъолияти муназзами шабакаи муштараки телевизиюни кишварҳои форсизабон ибрози тардид мекунанд. Онҳо ба тафовутҳои сиёсӣ ва идеулужӣ миёни кишварҳои Тоҷикистон, Эрон ва Афғонистон ба унвони монеъи аслӣ ишора мекунанд.

Масалан, ба гуфтаи Нуралӣ Давлат, коршиноси маҳаллӣ, Тоҷикистон ба тарғиби арзишҳои исломӣ аз сӯйи Эрон розӣ нахоҳад шуд. Ҳамчунин, баъид аст, ки давлати Эрон кунсерту рақсҳои духтарони тоҷик бо либоси ғайриисломӣ дар телевизиюнро бипазирад.

Аз сӯйи дигар, оқои Давлат гуфт, ки миёни ин се кишвари форсизабон танҳо Эрон аз лиҳози иқтисодӣ тавоно буда ва Тоҷикистону Афғонистон ба кумакҳои молии Омрикою Урупо пойбанд ҳастанд ва табиъист, ки наметавонанд аз арзишҳои урупоӣ ва демукротик сарфи назар кунанд.

Аз сӯйи дигар, ба гуфтаи ӯ, Афғонистон сад дар сад кишвари форсизабон набуда ва гурӯҳҳои қавмгарои паштун дар ин кишвар ба ҳеч ваҷҳ бо саҳми Афғонистон дар телевизиюни муштараки форсизабонҳо мувофиқат нахоҳанд кард.

Зимнан, се сол қабл, ҷониби Афғонистон пешниҳод карда буд, ки дар ин телевизиюн ба забони пашту низ барномаҳое пахш шавад, аммо ин пешниҳод пазируфта нашуд.

Бо таваҷҷӯҳ ба чунин мушкилот, коршиносон имкони роҳандозии шабакаи муштараки телевизиюни форсизабонҳоро душвор арзёбӣ кардаанд.

Панҷ сол қабл, руасои ҷумҳурии Эрон, Тоҷикистон ва Афғонистон дар мавриди таъсиси шабакаи муштараки телевизиюни форсизабонҳо тавофуқ карда буданд, аммо то ҳол ин тасмим иҷро нашудааст.

Источник: http://www.bbc.co.uk/tajik/news/2011/04/110415_mm_tv_farsi.shtml

Хабарнигори нашрияи «Пажвок» ва донишҷӯи Донишгоҳи Кӯлоб аз идомаи фишорҳо ба ӯ изҳори нигаронӣ кард.Ҷаноби Сангмадов гуфт, рӯзи сешанбе, 8-уми март, мувоини раиси Донишгоҳ ва як маъмури пулис ӯро барои аксбардорӣ ҳангоми буридани дарахтон боздошт ва сипас ҳудуди 20 дақиқа мавриди бозпурсӣ қарор додаанд.

Вай афзуд, ҳанӯз ҳам афроди вобаста ба раҳбарияти Донишгоҳи шаҳри Кӯлоб ӯро барои кори хабарнигорияш таъқиб мекунанд.

Ба гуфтаи ин хабарнигори ҷавон дар Кӯлоб, натиҷаи бозпурсӣ собит кардааст, ки раҳбарияти донишгоҳ дар ин ҳодиса муқассиранд ва ӯ танҳо вазифаи хабарнигорияшро иҷро кардаасту тамом.

Баҳриддин Сангмадов мегӯяд, дар гузашта низ болои фаъолияти хабарнигории ӯ фишорҳо зиёд буда, вале ҳодисаи ахир, тарҳрезишуда ва ба хотири берун карданаш аз Донишгоҳ ва ҳамин тавр аз нашрияи «Анвори Дониш» анҷом шудааст.

Зеро ҷаноби Сангмадов мӯътақид аст, ки фаъолияти хабарнигорияш дар нашрияи «Пажвок» барои бархе аз доираҳои Донишгоҳ хушоянд нест.

Вай мегӯяд, бар асари бозпурсӣ ва озору азияти рӯзи 8-уми март зарари ҷисмонӣ ва маънавӣ гирифтааст. Ба ин далел ин хабарнигори ҷавон ҳушдор дод, ки «агар ин фишору асабвайронкуниҳо қатъ нашавад, ба додгоҳ ва ниҳодҳои болотари ҳуқуқи башар шикоят хоҳам бурд.»

Ҳоло Баҳриддин Сангмадов, ба НАНСМИТ ё Анҷумани миллии расонаҳои мустақили Тоҷикистон, ки созмони дифоъ аз ҳуқуқи хабарнигорон аст, муроҷиат ва хостори кӯмаки ҳуқуқӣ шудааст.

Ин дар ҳолест, ки Нуралӣ Солеҳов, раиси Донишгоҳи давлатии Кӯлоб амалкарди Баҳриддин Сангмадовро дар мавриди аксбардорӣ ғайриахлоқӣ номид ва гуфт, ки ин хабарнигор ҳамроҳи Орзу Ҳамидов, ҳамкасби дигари худ бидуни мувофиқа бо раҳбарияти донишгоҳ ба аксбардорӣ машғул шудаанд.

Ба қавли ҷаноби Солеҳов, ин хабарнигорон ҳамчунин бо масъулони донишгоҳ дағалона рафтор намудааанд. Аммо раиси Донишгоҳи давлатии Кулоб дар мавриди бозпурсӣ ва мавриди озор қарор гирифтани Баҳриддин Сангмадов изҳори беиттилоӣ кард.

Источник: http://www.ozodi.org/content/article/2332165.html

Ахиран расонаҳо, созмонҳо ва давлатҳо бар аҳаммияти интернет дар кишварҳои дорои давлатҳои худкома ва, бахусус, дастрасии мардум ба шабакаҳои иҷтимоъӣ таваҷҷӯҳ мекунанд.Ба гуфтаи таҳлилгарон, мардуми Тунис ва Миср ба ҳангоми инқилоб ба ҳадди зиёде эътирозот ва тазоҳуротро тавассути шабакаҳои интернетӣ ҳамоҳанг кардаанд.
Суръати афзояндаи густариши интернет дар кишварҳои дар ҳоли тавсеъа дар Тоҷикистон низ маҳсус аст. Аммо оморе, ки дар ин замина аз сӯйи манобеъи мухталиф ироа мешавад, мутаноқиз аст.
Омори мутаноқиз
Раиси ҷумҳурии Тоҷикистон дар яке аз суханрониҳояш дар авосити соли гузашта гуфта буд, ки шумораи корбарони интернет дар ин кишвар ба беш аз якуним милюн нафар расидааст.
Пас аз ин, Вазорати нақлиёт ва иртиботот эълом карда буд, ки теъдоди нафароне, ки ба интернетӣ васл ҳастанд, ҳудуди 850 ҳазор аст. Вале ахиран ин вазорат рақами корбарони интернетӣ дар Тоҷикистонро беш аз 900 ҳазор хонд.
Аз сӯйи дигар, Вазорати хориҷаи Омрико барои тавсеъаи интернет ва густариши дастрасии мардум ба интернет дар кишварҳои дар ҳоли тавсеъа ва дорои режимҳои диктотурӣ 25 милюн дулор ихтисос додааст.
Алексей Семёнов, мудири омили ширкати «MLT» дар Тоҷикистон, мегӯяд, касе омори дақиқ дар бораи корбарони интернет дар ин кишварро наметавонад бигӯяд.
Аммо вай мӯътақид аст, ки шумори корбарони интернет дар ин кишвари дорои ҷамъияти беш аз ҳафт милюн нафар ҳанӯз зери як милюн нафар аст.
Вай мегӯяд: «Ба ақидаи ман, теъдоди корбарони интернет дар Тоҷикистон имрӯз аз як милюн фаротар нарафтааст. Теъдоди онҳо чизе байни 600 то 900 ҳазор нафар аст. Вале мусаллам ин аст, ки теъдодашон басуръат боло меравад. Зеро теъдоди корбарони интернет ва мизони трофики интернетии мо ҳар моҳ даҳҳо дарсад афзоиш пайдо мекунад.»
Нархи гарон
Барои истифода аз интернет сокинони Тоҷикистон бояд чизе ҳудуди 30 дулор дар моҳ пардохт кунанд. Дар кишваре, ки маъоши мутавассит дар он 40 дулор аст, пардохти 30 дулор барои истифода аз интернет барои бисёриҳо маҳол ба назар мерасад.
Аммо Карине Аскарова, ки дар яке аз нуқоти фурӯши модемҳои интернетӣ кор мекунад, мегӯяд, ки вай ҳар рӯз дар идорааш даҳҳо нафарро ба шабакаи интернетӣ васл мекунад.
Хонуми Аскарова мегӯяд: «Ширкати мо барои пайвастан ба интернет нархномаҳои мухталифе дорад. Масалан, ҷавонон ва донишҷӯён тарҷеҳ медиҳанд таъруфаи арзонтарин, яъне 15 дулор дар моҳро, интихоб кунанд. Ба ивази ин қадар пул, онҳо метавонанд фақат дар соъоти муъайяни рӯз ва аз миқдори муъайяни килубойт аз интернет истифода кунанд.»
Ҳаитмурод Шарипов, устоди яке аз донишгоҳҳои шаҳри Душанбе аст. Вай модем харидорӣ карда, то ки ба интернет васл шавад. Ӯ мегӯяд ҳарчанд интернет арзон нест, аммо ба кори ӯ хеле кумак мекунад.
Вай гуфт: «Ман ҳоло рисолаи илмӣ менависам ва раҳбари рисолаи ман дар Маскав аст. Интернет чизи хуб аст, ки ман метавонам маводдро ба ӯ аз ин тариқ ирсол кунам ва ӯ низ ба ман аз ин тариқ посух нависад, ки ҳам вақт ва ҳам пулро сарфаҷӯӣ мекунад. Умуман имконот ва таъсири хуби интернет дар зиндагии ҷаҳони имрӯз беандоза зиёд аст.»
Ҳоло дар бархе аз амокини умумӣ дар шаҳри Душанбе, яъне қаҳвахонаҳо ва ё ҳатто фурӯдгоҳи шаҳр, сокинон метавонанд лаптопи худро бидуни харидории модем ва ё хатти интернетӣ ба интернет васл кунанд.
«Ба ҷойи китобхона»
Дар як соли ахир вожаи хориҷии Вай-Фай (Wi-Fi), унвони як системи васли бесим ба интернет, аз истилоҳоти муъмул дар миёни сокинони шаҳри Душанбе шудааст.
Бахусус, ҷавонон медонанд, ки ҷое Вай-Фай навишта шуда, он ҷо метавонанд лаптопҳои худро биёранд ва рӯшан кунанд ва ба интернети бесим васл шаванд.
Бунафша ҳамарӯза барои истифода аз интернети бесим ба қаҳвахонаи «Сегафреда» меояд. Вай мегӯяд ҳарчанд қимати қаҳва дар ин қаҳвахона гаронтар аз ҷойи дигар аст, аммо шикоят намекунад, зеро инҷо метавонад аз интернет бепул истифода кунад.
Вай як устоди забони фаронсавӣ дар донишкадаи низомӣ аст ва интернет барояш манбаъи муфиде барои пайдо кардани дастрасӣ ба адабиёти марбут ба таълими забони хориҷӣ аст.
Вай мегӯяд: «Интернет бароям тақрибан ҷойи китобхонаро гирифтааст.»
Тоҷикистон дар соли 2007 нахустин кишвар дар миёни кишварҳои мустақилли ҳамсуд буд, ки системи насли севум ё 3G-ро роҳандозӣ кард.
Ахиран ширкати «MLT» дар Душанбе истифодаи озмоишӣ аз системи Насли чаҳорум ё 4G-ро ба намоиш гузошт, ки то ҳоло чунин озмоишҳо фақат дар Русия ва Ӯзбакистон баргузор шудаанд.
Вижагии ин систем суръати бамаротиб болотари интернет аст. Маълум нест, ки ин систем кай ба бозори Тоҷикистон ворид мешавад. То ҳол ин систем танҳо дар чаҳор кишвари пешрафтаи дунё, яъне Суед, Омрико, Нурвеж ва Жопун роҳандозӣ шудааст.

Источник: http://www.bbc.co.uk/tajik/news/2011/02/110218_sq_internet.shtml

Вазорати умури хориҷии Тоҷикистон мавқеи расмии ин кишвар дар баробари ҳаводиси Мисрро эълон кард. Дар изҳороти вазорат вазъи ҳоким дар Миср «ҳассос ва сарнавиштсоз» арзёбӣ ва ҳамзамон «изҳори боварӣ» мешавад, ки «ниҳодҳои давлатӣ»-и ин кишвар ҷиҳати «ҳарчи зудтар ба эътидол овардани вазъ» талош хоҳад варзид.Вазорати умури хориҷии Тоҷикистон ба сабаб ва заминаҳои таҳаввулоти охири Миср ишора накарда ва пайомадҳои эҳтимолии ин ҳаводисро шарҳ надодааст.

Аммо бархилофи изҳороти расмии давлат, назар ва мавқеи аҳзоби сиёсӣ ва ба хусус аҳзоби мухолиф рӯшану ошкортар ба назар мерасад.

Масъулони ин ҳизбҳо истеъфои Ҳуснӣ Муборак аз мақоми раёсати ҷумҳурии Миср дар пайи пофишории мӯътаризонро оғози заволи низомҳои худкома ва дарозумр дар саросари олам унвон карданд.

Ноиби аввали раиси Ҳизби наҳзати исломӣ ва вакили Маҷлиси намояндагони Тоҷикистон, Сайидумар Ҳусайнӣ. истеъфои Муборакро пирӯзии ҷавонони Миср унвон ва мисриёнро «қаҳрамони имрӯзии ҷаҳон» хонд. Ба андешаи Ҳусайнӣ, инқилоби мисриён пояи зулм ва худкомагиро шикаста, мардум нишон доданд, ки ҳар гуна сабру тоқатро низ марзу ҳадде ҳаст.

Раиси Ҳизби сотсиал-демократи Тоҷикистон, ҳуқуқшинос, Раҳматулло Зойиров, бо истиқбол аз натоиҷи тазоҳуроти мардуми Миср мегӯяд, таъсири он новобаста аз майл ва иродаи гурӯҳҳои сиёсӣ ва ё ҳукумат, ба Тоҷикистон хоҳад расид. Ҳоло, ки давлат худро пойбанди гирифториҳои идеологӣ карданист ва бо ин васила мехоҳад, таваҷҷӯҳи ҷомеаро ба дигар сӯ бикашад, аммо муваффақ нахоҳад шуд. Зеро технологияи иттилоотӣ ба ҳадде пешрафта аст, ки фурсати бештар барои низомҳои авторитариро намедиҳад.

Аммо бархе дигар аз коршиносон бо таваҷҷӯҳ ба он ки дар пайи ин таҳаввулот ҳокимият ба дасти низомиён гузашт, ин масъаларо низ матраҳ мекунанд, ки дар чунин шароит чи тавр метавон ба тағйири демократӣ нойил шуд. Ин ҳам дар ҳолест, ки ин низомиён парвардаи замони раҳбарии Ҳуснӣ Муборак ҳастанд.

Аз сӯи дигар на ҳама инқилобҳои мардумӣ аз ҷумла инқилоби қирғизҳо дар соли 2005, ки Қурмонбек Боқиевро рӯи кор овард хостаҳои мардумро бароварда накард ва ин мардум баъди панҷ сол дубора ҳокимиятро сарнагун карданд. Саймуддин Дӯстов, коршиносои мустақили тоҷик мегӯяд, акнун танҳо метавон ба нерӯҳои сиёсӣ ва ҷавонони Миср умед баст, ки аз ин инқилоб бар суди демократия истифода кунанд.

Бо ин ҳол бештари коршиносон ва таҳлилгарон мегӯянд, баъид ба назар мерасад, ки аз таҳаввулоти кишварҳои арабӣ аз ҷумла Туннис ва Миср бархе аз роҳбарони кишварҳои Осиёи Миёна сабақ бигиранд.

Зеро, ба гуфтаи коршиносон, табиати низомҳои худкома ин аст, ки бо вуҷуди нишонаҳои ошкори афзоиши эътироз дар ҷомеаи гирифтори фақр, фасод, бекорӣ ва ҷабр, ба ислоҳи вазъ намекунанд, балки бештар дар фикри ҳифзи ҳокимияти худ мешаванд.Онҳо замоне ба ҳуш меоянд, ки қисмати Аскар Акаев, Қурмонбек Боқиев ва ё Бен Аливу Ҳуснӣ Муборакро худ таҷриба кунанд, вале он вақт ҳама фурсат барои тадбирҳои изтирорӣ боқӣ намемонад.

Источник: http://www.ozodi.org/content/article/2307153.html

Созмонҳои рӯзноманигорӣ ва расонаҳои Тоҷикистон сабти ном тариқи «равзанаи ягона» ва муқаррар шудани ҳадди ақалли музди меҳнат барои муассиаҳои ғайридавлатиро хатароти нав ба озодии баён унвон карданд.Нигарониҳои рӯзноманигорон зимни ҳамоиши вижае таҳти унвони «Таҳдидҳои нав ба васоити ахбори умуми Тоҷикистон ва роҳҳои ҷилавгирии онҳо» баён шуд.

Хатароти «зериобиву тагисангӣ»

Ин ҳамоиш бо ибтикори Эътилофи расонаҳо ё Медиа Алянси Тоҷикистон ва Бунёди Сорос ва ширкати созмонҳои дохиливу хориҷии расонаӣ ва рӯзноманигорон аз саросари кишвар сурат гирифт. Масъулини расонаҳо бар инанд, ки муқаррароти нав мушкилоти молӣ эҷод ва дар дарозмуддат ба муфлисшавии матбуоти озод хоҳад овард.
Акбари Саттор, раиси Иттиҳоди рӯзноманигорони Тоҷикистон ва муассиси ҷамъияти масъулияташ маҳдуди «Чархи гардун», ки 8 ҳафтаномаро муттаҳид мекунад гуфт, дар пайи маҳдудиятҳо ва ба додгоҳ кашиданҳои моҳҳои ахир, боз хатароти «зериобиву тагисангӣ» дар шакли сабти ном дар мақомоти андоз барои нашрияҳои мустақил халқ шудааст:

«Мушкил дар ин аст, ки қонуни кунунии матбуот мегӯяд, бояд ҳар як воситаи ахбори умум ҳамчун шахси ҳуқуқӣ ба қайд гирифта шавад, яъне талаби мақомоти андоз дар ин маврид дуруст, қонунӣ аст. Аммо амалан дуруст нест. Чӣ тавр? Ҳоло талаботи нав ин аст, ки агар дар ҶДММ 6 нашрия бошад, бояд ҳар яки онҳо муҳосибот (бухгалтерия) дошта, комилан соҳибихтиёр бошанд. Ин мантиқан ҳам дуруст нест».

Тибқи муқаррароти ҷадиди андоз, ки аз 1 январи соли равон дар Тоҷикистон ҷорӣ шудааст, тамоми корхонаву муассисаҳои кишвар бояд тариқи «равзанаи ягона» сабти ном шаванд. Расонаҳои Тоҷикистон низ ҳамчун шахсони ҳуқуқӣ бояд аз ин сабти ном гузаранд, аммо Ҷунайд Ибодов, коршинос дар умури ҳуқуқ мегӯяд, мақомоти андоз чорумин ниҳоде хоҳад буд, ки фаъолияти расонаҳоро танзим хоҳад кард.

Вай афзуд, тибқи қонуни ҷории матбуот, аз соли 1990 расонаҳоро бояд хадамоти нотариалӣ сабти ном кунанд, аммо соли 2003 ин масъулият ғайриқонунӣ ба вазорати адлия гузашт ва соли 2007 вазорати фарҳанг низ ҳаққи сабти номи онҳоро гирифт. Вай афзуд, ҳоло ҳамаи ин ниҳодҳо ҳуқуқ доранд, ки сабти ном кунанд:

«Ду даҳсола боз киҳое нестанд, ки ба ин машғул мешаванд. Як соҳиб даркор, соҳиб на ба маъное, ки ҳар кас масъулиятро гираду қонунҳои худро сари расонаҳо бор кунаду фишор ораду расонаҳои озодро маҷақ кунад. Танзим кунад, ки ҳамин бесарусомонӣ барҳам хӯрад. Ягон оҷонсӣ ё ниҳоди давлатие бошад, ки лоақал як навъ фаҳмидани қонунҳоро таъмин кунад»

Нигаронии дигари рӯзноманигорон аз 1-уми январи соли равон 562 сомонӣ муайян шудани ҳаққи ақалли музди меҳнат барои корхонаву муассисаҳои ғайридавлатӣ дар шаҳри Душанбе аст, ки аксари кулли расонаҳо дар ин шаҳр фаъолият мекунанд.

Масъулини нашрияҳо нигаронанд

Хуршеди Атовулло, раиси Эътилофи расонаҳои Тоҷикистон ва сардабири нашрияи «Фараж» мегӯяд, баъд аз манъи семоҳаи фаъолият, ҳоло ҳафтаномааш аз чопхонаву дигар хадамот 55 ҳазор сомонӣ қарздор шудааст ва роҳандозии ҳатмии ҳадди ақалли маош бар мушкилоти молиявии ҳафтаномааш хоҳад афзуд.

Оқои Атоуллоев афзуд: «Тамоми сардабирони нашрияҳову созмонҳои ғайридавлатие, ки ман сӯҳбат доштам, мегӯянд, ки роҳи ҳал, коҳиш додани теъдоди кормандон ва ба боқимондаҳо бор кардани масъулияти бештар аст»

Шарифи Ҳамдампур, раҳбари ҷамъияти масъулияташ маҳдуди «Оила», муассиси 8 нашрия роҳандозии ҳатмии ҳадди ақалли маош барои корхонаву муассисаҳои ғайридавлатиро ғайривоқеӣ унвон кард.
Вай афзуд: «Корхонаҳо маҷбуранд ба иқдоми дигар даст зананд, яъне теъдоди кормандонашонро коҳиш диҳанд ва ҳадди ақали маошро боло баранд. Аммо ин ба чӣ меорад? Сафи бекорон меафзояд ва норизоиятиҳои мардумро дар Тоҷикистон меафзояд, ки паёмадҳои нохуби амниятӣ хоҳад дошт»

Акбари Саттор мегӯяд, мушкилоти ҷадиди нашрияҳо бояд дар лоиҳаи нави қонуни матбуот аз миён бурда шаванд.

Хавфи басташавии нашрияҳои «номақбул»

Лоиҳаи қонуни нави Тоҷикистон дар бораи васоити ахбори умум ҳоло дар баррасии парлумони Тоҷикистон қарор дорад. Аммо Нуриддин Қаршибоев, раиси Анҷумани миллии расонаҳои мустақили Тоҷикистон ё НАНСМИТ, узви комиссиюни омодасозии ин қонун мегӯяд, хатари аввалин ба озодии баён худи рӯзноманигоронанд, ки дар кори таҳияи қонуни барои онҳо сарнавиштсоз фаъолона ширкат намекунанд.

Вай афзуд, то ба ҳол дар бораи мушкилоти андоз ба масъулини ин қонун, ки дар як ду моҳи оянда бояд аз сӯи парлумон ба тасвиб расад, пешниҳоде нарасидааст: «Он пешниҳодҳое, ки имрӯз рӯзноманигорон мекунанд, агар баррасӣ нашавад, зарурати аз дигар сабти ном шудани васоити ахбори умум лозим меояд, ки дар он сурат бархе нашрияҳои барои мақомот номақбул баста хоҳанд шуд»

Нигарониҳо аз сабти ном тариқи «равзанаи ягона» ва муқаррар шудани ҳадди ақалли музди меҳнат дар ҳолест, ки мақомот тайи моҳҳои ахир иддае аз расонаҳои чопиву сомонаҳои мустақили Тоҷикистонро муваққатан манъ карда буданд. Як соли расо ба ин сӯ дар кишвар равандҳои додгоҳии нашрияҳои мустақил идома доранд ва шикоятҳои нави мақомот низ аз расонаҳо ба додгоҳҳо расидаанд.

Иддае аз коршиносон мегӯянд, ин фишорҳоро метавон тариқи қонуни нави матбуот ҷилавгирӣ кард, аммо иддае ҳам бар инанд, ки он маҳдудиятҳои навро барои расонаҳо «ҳадя» хоҳад овард.

Источник: http://www.ozodi.org/content/article/2306502.html

Як масъули вазорати умури хориҷаи Тоҷикистон гуфт, нашри номаҳои «Викиликс» ва доман задани онҳо тавассути расонаҳои Ғарб дар ҳеҷ сурат ба таври ҷиддӣ пазируфта намешавад ва ин номаҳо ба равобити Тоҷикистон бо сойири кишварҳои дунё таъсир надорад.Ин манбаъ афзуд, муносибат ва ҳамкории Тоҷикистон бо Русия ва Амрико дар чаҳорчӯби қарордодҳо сурат мегирад ва давлат талош хоҳад кард то ин ҳамкориҳо густариши бештар пайдо кунанд.

Ҳарфҳое, ки сари забонҳо буд

Дар матлаби ба нашррасида дар рӯзномаи бритониёии «Гардиан» бо истинод ба маводи Викиликс фаъолияти давлати Тоҷикистон таҳти раҳбарии раисиҷумҳури он мавриди арзёбӣ қарор гирифтааст.

Аммо доираҳои сиёсӣ ва рӯзноманигорони тоҷик мегӯянд «Викиликс» дар ошкоргӯиҳои худ ҳеҷ иттилоъи фавқулодда махфӣ ва муҳимро пешниҳод накардаст. Ба эътиқоди хабарнигорони тоҷик, мӯҳтавои ин мақола аз хабарҳое таркиб ёфтааст, ки қаблан низ сари забонҳо буданд.

Зафари Сӯфӣ, сардабири нашрияи «Озодагон», мегӯяд, бархе аз навиштаҳои сомонаи Викиликс қаблан низ дар маҳфилҳои таҳлилгарон матраҳ шудаанд, вале барои нашри онҳо далели қотеъ вуҷуд надорад.

Таъсири фошкориҳои Викиликс ба сиёсати ИМА

Аммо коршиносон ва таҳлилгарони тоҷик мегӯянд, ки нашри ин номаҳо дар равобити кишварҳо ва аз ҷумлаи робитаи Амрико бо кишварҳои дигар бетаъсир нахоҳад буд. Рашид Ғанӣ, коршиноси тоҷик, мегӯяд, таъсири нашри ин матлаб дар он зоҳир мешавад, ки масъулини давлатӣ дар сӯҳбат бо дипломатҳо аз эҳтиёти шадид кор мегиранд.

Вале аз сӯи дигар, мегӯяд оқои Ғанӣ, кишварҳо ҳамеша дар тарозуи сиёсат манофеи худро мегузоранд ва муносибат ва ҳамкориҳо низ бо назардошти ин манфиатҳо сард ва ё гарм мешавад.

Клинтон: WikiLeaks амниятро аз байн мебарад

Ҳилларӣ Клинтон, вазири корҳои хориҷаи Амрико дар бораи номаҳои ифшошудаи электронӣ аз сӯи сомонаи интернетии WikiLeaks изҳори назар кард ва онро «ҳамла ба ҷомеаи байналмилалӣ» хонд. Хонум Клинтон гуфт, Амрико аз ифшои санадҳо амиқан ибрози таассуф мекунад.

Ӯ афзуд: «Амрико ба таври ҷиддӣ ифшои ғайриқонунии асноди касбиро маҳкум мекунад. Ин ҳаёти одамонро дар хатар мегузорад, ба амнияти мо таҳдид мекунад ва талошҳои моро барои ҳамкорӣ бо кишварҳои дигар ҷиҳати ҳали мушкилоти муштарак аз байн мебарад».

Хонум Клинтон изҳор дошт, ки чунин кор вазифаҳоро дар бахши амнияти байналмиллалӣ ва ташкили эътилофҳо бо муттаҳидини хориҷӣ душвортар хоҳад кард.

Вокуниши сафорати Амрико

Сафорати Амрико дар Тоҷикистон зимни ироаи посухи катбӣ ба радиои «Озодӣ» маводи чопшуда дар нашрияи «Гардиан»-ро шубҳаовар хонд ва таъкид кард, «дар робита ба маълумоте, ки даъвои махфӣ буданро дорад, ибрози назар нахоҳад кард».

Дар номаи сафорат таъкид шудааст, ки Амрико «яке аз якумин кишварҳои ҷаҳон мебошад, ки истиқлолияти Тоҷикистонро эътироф намуда ва ҳеҷ гоҳ ба корҳои дохилии Тоҷикистон дахолат накардааст. Ҳамчунин ҳукумати Иёлоти Муттаҳида ҳеҷ вақт барои ивази ҳукумати Тоҷикистон талош наварзидааст.»

Бо ин ҳама маводи нашршуда дар торнамои Викиликс дар ҳоли ҳозир аз пурсарусадотарин матолиб ва гузоришҳо ба ҳисоб мераванд. Чопи матолиби марбут ба Тоҷикистон дуввумин мавриде аз маводҳои ин торнамо аст, ки дар ду ҳафтаи ахир мунташир мешавад.

Источник: http://www.ozodi.org/content/article/2247032.html

Рӯзномаи «The Guardian», чопи Лондон, дар шумораи навбатии хеш се барқияи махфии сафорати Амрико дар Тоҷикистонро, ки Викиликс дастрас кардааст, ба чоп расонд ва бо истинод ба онҳо навиштааст, ки Тоҷикистон бо маҷмӯе аз мушкилоти ҷиддӣ рӯбарӯст ва яке аз муҳимтарини онҳо президенти ин кишвар аст.Ин дар ҳолест, ки бино бар номаҳои дипломатӣ, Тоҷикистон метавонад дар эътидол ва рушди минтақа нақши муҳим дошта бошад, аммо мушкилоти чандгонаи сиёсӣ ва иқтисодӣ, фақр, муносибатҳои бад бо Узбакистон, фасоди фарогир, саноате бо сохтор ва нақшасолории мероси Шӯравӣ, низоми ғайридемократӣ, заъфи мудаввом дар амнияти озуқавӣ ва пойбандӣ ба муҳоҷирати корӣ дар Русия ин кишварро гирифтор кардаанд.

Паёми меҳварии ҳар се номаи дипломатӣ ба як мавзӯъ — равобити байни Тоҷикистон, Амрико, Русия ва Чину Эрон пайванд дошта, давраеро нишон медиҳанд, ки Душанбе аз Маскав дилсард шудааст ва хостори кӯмакҳои густардаи дигарон, махсусан Иёлоти Муттаҳида аст. Аммо сафорати Амрико дар Тоҷикистон бархе аз чунин интизориҳоро «ғайривоқеӣ» мешуморад, аз ҷумла «сармоягузорӣ дар нерӯгоҳҳои баҳсталаб, нақбҳое ба Покистон ва пулҳое ба нокуҷо.»

Мушкили давомдор ва хусумати шахсии ду раҳбар

Мушкили давомдори Тоҷикистон бо Узбакистон, ки гуфта мешавад, хусумати шахсии байни ду роҳбар ба оташи он рӯған мерезад, ба вазъи иқтисодӣ ва тиҷорати Тоҷикистон асари манфӣ гузоштааст ва набуди эътидол дар Афғонистон онро бо мушкили маводи мухаддир рӯбарӯ кардааст. «Тоҷикон ҳарос доранд, ки густариши ақидаҳои тундгароёна ва убури ситиезаҷӯён аз марзи пуршикофи Тоҷикистону Афғонистон амнияти Тоҷикистонро зери хатар мегузорад.»

Танҳо Чин аст, ки ба иқтисодиёти Тоҷикистон сармоягузорӣ мекунад ва Эрон ҳарчанд бархе аз тарҳҳо дорад, ҳамраъйии форсизабонон натавонистааст, шубҳаву тафовути амиқи саромадони шаробӣ ва шуравимаоби сунниро бо муҳофизакорони мазҳабии шиъа бипӯшонад.

Раисиҷумҳури Тоҷикистон, Эмомалӣ Раҳмон аз созишномаи сулҳ бо мухолифонаш, ки дар соли 1997 ба ҷанги шаҳрвандӣ хотима гузошт, кайҳо хориҷ шуда, мухолифонро аз ҳукумат берун кардааст. Бархеи онҳо дар маҳбасанд, бархе ҷилои ватан карданд ва бархи дигар ба шакли мармузе мурдаанд. Дар моҳи майи соли 2009 яке аз фармондеҳон Мулло Абдулло Раҳимов ба Тоҷикистон баргаштааст ва мақомоти Тоҷикистон ба ин боваранд, ки Русия аз Мулло Абдулло ҳимоят мекунад.

«Муҳимтарин монеъаҳои пешрафти кишвар»

Дар асноди ифшошуда дипломатии Иёлоти Муттаҳида гуфта мешавад, Тоҷикистон бар замми он, ки аз қашшоқтарин кишварҳои қаламрави Шӯравии пешин аст, «аз заминларзаҳо, обхезиҳо, хушксолу ҳамлаи малах», «муҷозотгариҳои Узбакистон» ва «ҷангзадагии Афғонистон» азият мекашад.

Аммо дар номаҳои дипломатии Амрико омадааст, «бадтарин монеа»-и ин кишвар, раисиҷумҳурии он Эмомалӣ Раҳмон аст. Дар барқияи махфии сафорати Амрико дар Тоҷикистон аз 16-уми феврали соли 2010 гуфта мешавад, ки Раҳмон иқтисодиёти ин кишварро ба манфиати хеш истифода мекунад ва кишвар ба хешутаборбозию фасод фурӯ рафтааст.

Дар ин нома омадааст: «Раҳмон ва хонадони ӯ бизнесҳои асосӣ, аз ҷумла бузургтарин бонкро зери назорат доранд ва барои дифоъ аз манофеи бизнеси хеш сахткӯшанд, қатъи назар аз он, ки ин барои иқтисодиёт чӣ пайомад хоҳад дошт. Тавре, ки як дипломати хориҷӣ хулоса кардааст, президент Раҳмон ба он бартарӣ медиҳад, ки 90 дарсади дастархони даҳдоллариро назорат кунад, то 30 дарсади дастархони саддоллариро.»

Дар ин барқия гуфта мешавад, даромади бузургтарин корхонаи Тоҷикистон, «Талко», ки ба тавлиди алюмин машғул аст, ба дасти ширкати махфии оффшорие медарояд, ки аз тарафи президент назорат мешавад. «Будҷаи давлат аз ин корхона даромади каме дорад.»

Дар ин нома ҳамчунин аз истифодаи пинҳонии зиёда аз 1 миллиард доллар аз тарафи Бонки миллӣ ёд шудааст.

Аҳамияти Тоҷикистон барои Ғарб

Бино бар номаҳои сафорати Амрико дар Тоҷикистон, аҳамияти Тоҷикистон барои Иёлоти Муттаҳида ҳамчун роҳи такмили нерӯҳои байнулмилалӣ дар Афғонистон дар ҳоли афзоиш аст. Аммо талошҳои қатъи қочоқи беохири маводи мухаддири Афғонистон аз тариқи Тоҷикистон ба Русия ва Аврупо, то ҳол натиҷае надодааст.

Дар соли гузашта Тоҷикистон танҳо 5 дарсади 40 тонна мухаддироти афғониро, ки ба Русия қочоқ шуданд, кашф ва мусодира кардааст. Фасод мушкили асосист ва бар замми он нерӯҳои марзбони Тоҷикистон омӯзиши нокофӣ, музди нокофӣ ва таҷҳизоти нокофӣ доранд.

Хунсо шудани кӯшиши табаддулот

Дар номаи сафири Амрико дар Тоҷикистон, Ричард Ҳугланд, ки мулоқоташ бо Раҳмонро пас аз хуруҷи марзбонони рус аз марзи Тоҷикистону Афғонистон қаламдод кардааст, гуфта мешавад, Раҳмон шарҳ додааст, ки Маскав нерӯҳои марзбонашро барои таҳияи табаддулоти зидди ӯ дар ҳамкорӣ бо фармондеҳи Горди президентӣ Ғаффор Мирзоев истифода мекардааст.

Бино ба гузориши Ҳугланд, Раҳмон дар ин мулоқот ба ӯ гуфтааст, ки андешаи ихроҷи нерӯҳои марзбони Русия аз марзи Тоҷикистону Афғонистон аз худи ӯст ва барои иҷрои он худ хеле пойфишорӣ кардааст.

Ба гуфтаи Раҳмон, Маскав хостори хуруҷ набуд, аммо замоне, ки Раҳмон генерал Ғаффор Мирзоевро барканор кардааст, танҳо он вақт Путин ноилоҷ монда, аз тарҳи табаддулот даст кашида ва ба хуруҷи марзбонон розӣ шудааст.

Вай афзудааст, ки дар ин кор ба ӯ раҳбари Хадамоти федероли Русия дар назорат бар маводи мухаддир, Виктор Черкесов кӯмак кардааст. Черкесов дар Тоҷикистон вазъи қочоқи маводи мухаддирро омӯхтааст ва ба хулосае омадааст, ки марзбонони Русия дар ин қочоқ нақши бузург доштаанд. Президенти Тоҷикистон»Вай аз номи ман ба назди Путин рафт».

Раисиҷумҳури Тоҷикистон сарусадоҳои матбуоти Русияро дар бораи бадтар шудани қочоқи маводи мухаддир пас аз ихроҷи марзбонони рус кори генералҳое номидааст, ки мехоҳанд, ба ин марз баргарданд ва назорат бар қочоқро ба дасти худ гиранд.

«Русия Тоҷикистонро ноором карданӣ буд»

Эмомалӣ Раҳмон гуфтааст, хадамоти махфии Русия вазифадор шудаанд, ки дар Тоҷикистон нооромӣ эҷод кунанд. «Ин аз Кремлин меояд ва бархе аз ин корҳо аз сатҳи олӣ. «Мо ҳаргиз набояд фаромӯш кунем, ки худи Путин дар таҳти дилаш «чекист» аст.»

Дар нома омадааст, президент изҳори омодагӣ кардааст, ки бархилофи Кремлин барои пойгоҳи Амрико дар ҳудуди Тоҷикистон ҷой диҳад.

Сафорати Амрико дар Тоҷикистон низ дар соли 2006 гуфтааст, ба бовари он, Русия барои коҳиши ҳузури Иёлоти Муттаҳида ва Ғарб дар Тоҷикистон ба Душанбе фишори зиёд меорад.

Источник: http://www.ozodi.org/content/article/2246493.html

Таҳлилгари масоили сиёсӣ Ҳикматулло Сайфуллозода, ки аз тарафи ашхоси ношинос мавриди латукӯб қарор гирифта, дар шӯъбаи ҷарроҳии асаби №2-и маркази миллии тиббии Қарияи Боло бистарист, ин амали бераҳмонаро сӯиқасд ба ҷонаш хонда, онро ба таҳлили амиқу ошкоргӯиҳояш дар масъалаҳои доғи ҷомеа вобаста медонад. Айни замон аз рӯйи ин қазия тафтишот ҷараён дорад ва мақомот далели аслии сар задани моҷаро ва гунаҳкоронро ҷӯёянд.Ҳанӯзам ин савол нокушода аст, ки Ҳикматулло Сайфуллозода ба кӣ чӣ «бадӣ» кард, ки мавриди «ҳамла» қарор гирифт? Худи ӯ мегӯяд, ки бо касе ҳарфҳои пасту баланд назадааст ва оне, ки шахсе бо ӯ пешорӯ омада салом мегӯяду ду нафари дигар ногумон ӯро аз пушти сар зада беёд мекунанд, амали тарҳрезишуда аст.

Дар ин росто, сардабирони нашрияҳои кишвар ин амалро ба ҷуз сӯйиқасд чизе намедонанд ва чунин рухдодро дар ҷомеаи мутамаддин маҳкум мекунанд.

Ба андешаи Муҳаммадалӣ Мақсадуллоҳ — сармуҳаррири ҳафтаномаи «Чархи гардун», сӯиқасд ва латукӯби сардабири ҳафтаномаи «Наҷот» Ҳикматулло Сайфуллозода сирф ба фаъолияти коршиносии ӯ марбут аст ва албатта он хоси ҷомеае нест, ки худро мутамаддин мешуморад. «Бешак ин амали матраҳшуда маҳз ба таҳлилҳои густурдааш нисбати рӯйдодҳои ахири ҷомеаи кишвар ва ҷаҳон рабт доранд. Яъне метавон гуфт, ки «забони сурхаш ба сари сабзаш ҳамин балоро овард» ва Худо кунад, ки онро ба хайр гардонад. Агар чунин аст, пас шояд ба хотири эҳтиёт ва ҳифзи амнияти худу пайвандон журналистон ва коршиносони тоҷикро салоҳ набошад дар ҷомеае, ки чорчӯбаи қолабҳояш тавони бардошти фошгӯӣ ва ё воқеъбаёниро надорад, даҳон кушоянд. Чунки вақтҳои охир таҳдид ва ё ба истилоҳ, ниқорталабӣ дар муқобили журналистон афзоиш ёфта истодааст. Ва ин таҳдид чашми онҳоро тарсонидааст, ки ҳангоми вохӯрӣ аз ҳамдигар мепурсанд: «Оянда навбати кист?». Модоме чунин аст, пас, вақти он нарасидааст, ки ба таври қонунӣ ба журналистон яроқи муҳофизатӣ диҳанд?»,- иброз медорад ӯ.

Зафари Сӯфӣ — муассиси ҳафтаномаи «Озодагон» дар ин маврид мегӯяд: «Дар ҳар сурат бо таваҷҷӯҳ ба он вазъу воқеияте, ки ҳаст, яъне ҷаноби Сайфуллозода имрӯз дар бемористон дар як вазъи ноҷуре қарор доранд, табиист, ки касе ӯро латукӯб карда. Ин сӯиқасд буда ё набуда, бояд, ки ниҳодҳои қудратии Тоҷикистон инро мушаххас кунанд ва онҳое, ки Сайфулозодаро задаанд, маълум шаванд. Он вақт метавон дар мавриди сӯйиқасд будан ё набуданаш возеҳтар сӯҳбат кард. Вале атрофиҳояшон ва манобеъе, ки маълумот додаанд, гуфтаанд, ки чанд рӯз аст дар атрофи устод Сайфуллозода баъзе нафарон рафтуомад доштанд ва эҳтимол дорад, ки ин латукӯб аз пеш барномарезӣ шуда бошад. Агар барномарезӣ шуда бошад, дар назар бигирем, воқеан ҳам сӯйиқасд аст. Агар сӯйиқасд мушаххас шавад, табиист, ки метавонад он ба фаъолияти ҳизбӣ ё сармуҳарририи Сайфуллозода, ки чун коршиноси масоили сиёсӣ дар хеле маврид боҷуръат сухан мегӯяд, рабт дошта бошад. Ҳама гуна фишор рӯи ҳама гуна озодии як инсон маҳкумшаванда аст. Аз ин назар, агар ин чиз сӯйиқасд ба фаъолияти устод Сайфуллозода ба унвони як рӯзноманигор не, ба унвони як соҳибандеша бошад, воқеан қобили маҳкумият аст ва бояд маҳкум шавад, на танҳо аз тарафи мани кӯчак, балки аз ҷониби ҷомеаи мутамаддин. Чун дар ҷомеаи мутамаддин набояд инсонро чунин латукӯб кард. Агар чӣ Сайфуллозода, чӣ ҳар каси дигар дар андешааш хатое рух дода, бояд бо роҳи қонунӣ баррасӣ шавад».

Ба андешаи Хуршеди Атовулло — сармуҳаррири ҳафтаномаи «Фараж», аз ҳама фарзияҳо, фарзияи ба фаъолияти журналистии Сайфуллозода рабт доштани ин латукӯб бештар аст. « Ин амал шояд ба хотири тарс додани журналистон сурат гирифта бошад, аммо гумон дорам, мақомоти тафтишотӣ ба ин суол посух хоҳанд ёфт»,- гуфт ӯ.

Мавсуф ҳамзамон афзуд, ки ҳамчун сардабир ва раиси ассотсиатсияи журналистии «Медиа-Алянс» бо дигар сардабирон ва раҳбарони созмонҳои журналистӣ назари худро нисбати ин қазия пахш хоҳанд намуд.

Ёдовар мешавем, ки Ҳикматулло Сайфуллозода дар баробари кор карданаш дар маркази таҳлилии «Диалог», соли гузашта сардабирии ҳафтаномаи «Наҷот» — нашрияи расмии ҲНИТ-ро бар ӯҳда гирифт.

Источник: http://tojnews.org/taj/index.php?option=com_content&task=view&id=11385&Itemid=28