[b]Имрӯз дар Душанбе таҳти раёсати Шукурҷон Зуҳуров, райиси МН ҷаласаи якуми иҷлосияи чоруми палатаи поёнии парлумони мамлакат баргузор шуд.[/b]

Тибқи иттилои дафтари матбуотии МН, райиси парлумон дар назди вакилон суханронӣ намуда, аз вакилон даъват кард, ки ба таҳия ва эҷоди қонун ва дигар санадҳо ҷиддӣ машғул шуда, дархост ва пешниҳодҳои интихобккунандагони худро, ки аз мулоқот бо онҳо баромадааст, ба инобат гиранд.

Гуфта мешавад, дар ҷаласа лоиҳаи қонунҳои Ҷумҳурии Тоҷикистон «Дар бораи ворид намудани тағйирот ба Кодекси мурофиавии ҷиноятии Ҷумҳурии Тоҷикистон», «Оид ба ворид намудани илова ба Кодекси граждании Ҷумҳурии Тоҷикистон (қисми якум)», «Дар бораи шарикии давлат ва бахши хусусӣ», «Дар бораи ҳамроҳшавии Ҷумҳурии Тоҷикистон ба Конвенсия оид ба ҳимояи манфиатҳои истеҳсолкунандагони фонограммаҳо аз истифодаи ғайриқонунии фонограммаи онҳо» баррасӣ ва қабул шуданд.

Вазири адлия Рустам Менглиев ва вакили Маҷлиси намояндагон Насрулло Маҳмудов зимни суханронии худ роҷеъ ба лоиҳаи Қонуни Ҷумҳурии Тоҷикистон «Дар бораи ворид намудани тағйирот ба Кодекси мурофиавии ҷиноятии Ҷумҳурии Тоҷикистон» изҳор доштанд, ки лоиҳаи қонуни мазкур аз тарафи Ҳукумати Ҷумҳурии Тоҷикистон ҷиҳати иҷрои банди 7 Нақшаи чорабиниҳо оид ба иҷрои дастуру супоришҳои президенти Ҷумҳурии Тоҷикистон, ки зимни суханронӣ дар маҷлиси тантанавӣ ба муносибати 100-солагии Рӯзи матбуоти тоҷик дар таърихи 20 — уми марти соли 2012 баён гардидааст, бо мақсади боз ҳам тақвият бахшидани озодии матбуот, мутобиқ намудани Кодекси мазкур ба Кодекси ҷиноятии Ҷумҳурии Тоҷикистон таҳия ва пешниҳод гардидааст.

Зикр гардид, ки тибқи лоиҳаи пешниҳодшуда, бинобар сабаби аз Кодекси ҷиноятии Ҷумҳурии Тоҷикистон хориҷ намудани моддаҳои 135 ва 136, ки ҷавобгарии ҷиноятиро барои тӯҳмат ва таҳқир пешбинӣ менамуданд, зарурати аз моддаи 24 Кодекси мурофиавии ҷиноятии Ҷумҳурии Тоҷикистон, ки тартиби оғоз ва пешбурди парвандаҳои айбдоркунии хусусиро муайян менамояд, хориҷ намудани моддаҳои зикргардида ба миён омадааст.

Источник: http://www.ozodagon.com/khabarho/tojikiston/6491———135—136—-

[b]Бандҳои тӯҳмату таҳқир аз Кодекси мурофиавии Тоҷикистон низ хориҷ шуда, ба Кодекси шаҳрвандӣ интиқол ёфтаанд.[/b]

Вакилони Маҷлиси Намояндагон, маҷлиси поёнии порлумони Тоҷикистон, бандҳои марбут ба «тӯҳмат»-у «таҳқир»-ро аз Кодекси мурофиавии Тоҷикистон низ берун кардаанд. Хабарнигори порлумонии Радиои Озодӣ гуфт, ҳамакнун ин моддаҳо расман ба Кодекси шаҳрвандӣ «кӯчонда» шуданд.

Ин тасмим дар ҷаласаи субҳи рӯзи 1-уми октябр, ҷаласаи нахустин пас аз таътили вакилони порлумони Тоҷикистон, гирифта шуд. Аз ин пештар, бандҳои марбут ба «тӯҳмат»-у «таҳқир» аз Кодекси ҷиноии кишвар лағв гардида буд, ки маҳофили журналистӣ аз он ҳимоят карданд.

Ин ҳама ислоҳҳо ба дунболи дастури раисиҷумҳури Тоҷикистон дар рӯзи таҷлил аз 100-умин солгарди матбуоти тоҷик амалӣ мешавад. Эмомалӣ Раҳмон гуфта буд, то ин ду банди баҳсбарнгез бояд ба қонуни шаҳрвандӣ интиқол шаванд.

Аммо иддае ба ин боваранд, ки дар қонуни ҷиноии Тоҷикистон бандҳои дигаре, ки муҷозот барои таҳқиру тӯҳматро пешбинӣ мекунад, ҳанӯз мавҷуд аст. Аз ҷумла, банди 137-и Кодекси ҷиноӣ муҷозоти то панҷ сол маҳрумият аз озодиро барои таҳқир ва тӯҳмати президенти Тоҷикистон пешбинӣ мекунад. Дар пешниҳоди раисиҷумҳур аз ислоҳи ин банд ҳарфе гуфта нашудааст.

Бо ин ҳама, коршиносон мӯътақиданд, ки лағви ин бандҳо аз қонуни ҷиноӣ ва мурофиавӣ мавридҳои баҳси додгоҳӣ бо хабарнигоронро коҳиш хоҳад дод. Дар ҳоле ки дар гузашта чунин мавридҳо, ки барои нашри матолиби танқидӣ хабарнигорон маҳкум ба зиндон шуда буданд, ҷо доштанд.

Намунаи равшани он ба се соли зиндон ва 35 ҳазор сомонӣ муҷозот шудани Муҳаммадюсуф Исмоилов, хабарнигори минтақаии нашрияи «Нури Зиндагӣ» аст, ки наздик ба як сол дар зиндон ба сар бурда ва гуноҳаш ҳам «таҳқир»- и як масъули додситони ноҳияи Ашт зимни нашри як матлаб буд.

Источник: http://www.ozodi.org/content/article/24724830.html

[b]Душанбе, 28 сентябр. (АМИТ «Ховар», Сарвинози Руҳуллоҳ). — Дар шаҳри Панҷакент ҳамоиши омўзишии Шўрои ВАО-и Тоҷикистон дар мавзўи «Нақши Шўрои ВАО-и Тоҷикистон дар риояи меъёрҳои ахлоқии фаъолияти журналистӣ» доир гардид.[/b]

Дар ин бора ба АМИТ «Ховар» аз дастгоҳи иҷроияи Шўрои ВАО-и Тоҷикистон хабар доданд. Шоҳида Худойбердиева, мудири шӯъбаи рушди иҷтимоӣ ва робита бо ҷомеаи дастгоҳи раиси шаҳри Панҷакент дар ин нишаст нақши Шўрои воситаҳои ахбори оммаи кишварро дар бобати ба вуҷуд омадани журналистикаи босифат ва риояи меъёрҳои ахлоқии фаъолияти журналистон муҳим арзёбӣ кард. Ҳамчунин Зинатулло Исмоилов, раиси Шӯрои ВАО бо таърихи фаъолияти ин ниҳоди худтанзимкунии фаъолияти журналистӣ ширкаткунандагонро ошно сохта таъкид намуд, ки ҳар шахси манфиатдор метавонад дар сурати вайрон гардидани меъёрҳои ахлоқӣ ба Шӯро бо аризаи хаттӣ муроҷиат кунад.

Дар поёни ҳамоиш ба иштирокчиён китоби «Шарҳи меъёрҳои ахлоқии фаъолияти журналистӣ» дар Тоҷикистон тақдим карда шуд.

Ёдовар мешавем, ки Шӯрои ВАО ташкилоти ҷамъиятии ҷумҳуриявии ғайритиҷоратӣ, ихтиёрӣ, мустақил, машваратӣ ва худтанзимкунии ВАО буда, фаъолияти худро мутобиқи қонунгузории Тоҷикистон, санадҳои меъёрии байналмилалӣ, Оиннома ва меъёрҳои ахлоқии фаъолияти журналистӣ дар Тоҷикистон роҳандозӣ мекунад. Муассисони ин созмон Иттиҳоди журналистони Тоҷикистон, АМВАОТ, АМВЭАОТ, Хазинаи гиромидошт ва дифоъ аз ҳуқуқи журналистон, ҶДММ «Оила», «Азия-Плюс», «Бонувони Тоҷикистон» ва СМТ мебошанд.

Источник: http://khovar.tj/society/24400-1202amoishi-omzishii-shroi-vao-dar-pan1207akent.html

[b]Маҳмадсаид Убайдуллоев, шаҳрдори Душанбе, Абдуқодири Абдуқаҳҳорро ба симмати раиси шабаккаи телевизионии «Пойтахт» пазируфтааст. Абдуқодири Абдуқаҳҳор дар ин мақом Раҳмон Остон, собиқ раиси шабкаи телевизионии «Пойтахт»- ро, ки муддати беш аз даҳ сол раҳбарии онро ба ӯҳда дошт, иваз кард.[/b]

Ин ҳам дар ҳоле, ки Абдуқодирои Абдуқаҳҳор то кунун раиси Радиои Тоҷикистон, мутааллиқ ба Кумитаи радио ва телевизиони Тоҷикистонро бар дӯш дошт.

Таъини Абдуқодирои Абдуқаҳҳор ба симмати раиси шабакаи телевизионии «Пойтахт» дар пайи баргузории озмуне барои дарёфти номзад ба ин мақом, ки муддати як моҳ идома дошт, сурат мегирад. Абдуқодири Абдуқаҳҳор дар миёни 10 нафар аз номзадҳо пирӯз шуда ва аз ин ба баъд раёсати шабакаи телевизионии «Пойтахт» -ро хоҳад дошт. Зимнан, шабакаи телевизионии «Пойтахт» минбари шаҳрдории Душанбе буда, беш аз 15 сол боз фаъол аст. Абдуқодирои Абдуқаҳҳор аз соли 1995 дар вазифаҳои муҳаррир, муовини сармуҳаррири идораи иттилоотии телевизиони Тоҷикистон, муовини сармуҳаррири идораи «Субҳ», сармуҳаррири идораи барномаҳои сиёсии ТВ Тоҷикистон ва аз соли 2006 инҷониб ба ҳайси директори радиои Тоҷикистон кор кардааст. Вай хатмкардаи факултаи филологияи Донишгоҳи миллии Тоҷикистон буда, 44 сол дорад.

Источник: http://www.ozodi.org/content/news/24724906.html

[b]Дар шаҳри Душанбе барои боло бурдани сатҳи ҳамкориҳо миёни сухангӯёни расмии давлатӣ ва рӯзноманигон як семинори омӯзишӣ доир шуд.[/b]

Ин семинори дурӯза бар асоси тарҳи вижаи Анҷумани расонаҳои мустақилли Тоҷикимстон дар ҳамкорӣ бо Вазорати умури хориҷа дар маркази иттилоъотии ин вазорат баргузор шудааст.

Созмони мавсум ба Ҳимояти Байналмилалӣ аз Расонаҳо (International media support) ҳазинаи ин тарҳро пардохтааст. Дар ин нишаст раҳбарони бархе аз расонаҳои давлатӣ ва мустиқилли Тоҷикистон низ ширкат кардаанд.

Дар ин семинори омӯзишӣ беш аз 30 корманди дафотири матбӯъотии вазоратхонаҳо ва кумитаҳои давлатӣ роҳҳои беҳтар кардани ҳамкориҳо бо расонаҳо барои ироаи иттилоъоти саҳеҳ ба рӯзноманигоронро омӯхтаанд.

Нуриддин Қаршибоев, раиси Анҷумани расонаҳои мустақил, рӯзи ҷумъаи 28 сентябр дар суҳбат бо Би-би-сӣ гуфт, ки дар рӯзи дуввуми ин ҳамоиш, ҳуқуқшиносон ва масъулони бархе аз расонаҳо пешниҳодҳои мушаххасеро барои беҳбуди ҳамкориҳои мақомот бо расонаҳо дар заминаи дарёфти иттилоъоти дақиқ ироа кардаанд.

Ба гуфтаи ӯ, дар меҳвари барномаи омӯзишии ин семинор тақвияти ҳамкориҳо бо расонаҳо ва таҳлили шароити ҳуқуқӣ ва ахлоқии дастрасӣ ба иттилоъот қарор дошт.

Оқои Қаршибоев гуфт: «Дар семинори омӯзишӣ ҳам кормандони собиқадор ва ҳам ҷавонони муассисаҳои давлатӣ ширкат доштанд. Яке дигар аз аҳдофи баргузории ин нишаст, омӯзиши низоми ваколатдор кардан ва низоми кор бо расонаҳои хабарӣ ба ширкаткунандагон буд, ки дар оянда онҳо тавонанд дар ниҳодҳои хеш ин таҷрубаро роҳандозӣ кунанд.»

Дар ҳоле ки бисёре аз рӯзноманигорон ва масъулони расонаҳои мутақил аз мушкилоти дарёфти иттилоъоти дақиқ аз ниҳодҳои интизомӣ ва амниятии Тоҷикистон шикоят мекунанд, оқои Қаршибоев гуфт, ки дар нишасти дурӯзаи омӯзишӣ намояндагони ин ниҳодҳо низ ширкат доштанд.

Вай афзуд, ки бавижа ду ҳодисаи ахир дар Тоҷикистон, аз ҷумла ҳаводиси Бадахшон дар моҳи июл ва оташсӯзии бозори «Корвон» дар аввали моҳи сентябр ҳокӣ аз он буд, ки мушкилоти дастрасӣ ба иттилоъот, бахусус аз муассисаҳои давлатӣ вуҷуд дошт.

Бисёре аз соҳибназарон ин давраи омӯзишӣ барои сухангӯёни дафотири матбӯъотии ниҳодҳои давлатиро барои ҳамкориҳои ояндаи онҳо бо хабарнигорон муфид арзёбӣ мекунанд.

Аммо иддае аз ҳуқуқдонҳо бо ишора ба ҳаводиси бархӯрди номатлуби кормандони интизомӣ ва амниятӣ бо хабарнигорон, мегӯянд, ки як давраи омӯзишии ҷудогона барои кормандони амниятӣ ва пулис барои эҳтиром ба озодии баён кумак мекунад.

Источник: http://www.bbc.co.uk/tajik/news/2012/09/120928_zkh_massmedia_official_information.shtml

[b]Тайи ду рӯз аст, ки дар Душанбе маҳфили омӯзишӣ барои котибони матбуоти мақомоти давлатӣ идома дорад.[/b]

Нуриддин Қаршибоев, раиси Ассотсиатсияи миллии расонаҳои хабарии мустақил, аз ҷумлаи созмондиҳандагони маҳфили мазкур, баён дошт, ки беҳтар намудани дастрасии Васоити ахбори умум ба манбаъҳои расмии иттилоот ва рушди ҳамкории самарабахши марказҳои матбуотии сохторҳои ҳукуматӣ ва ВАО аз ҳадафи аслии ин тадбири таълимӣ аст.

Давлат Назрӣ, сардори Раёсати иттилоот, матбуот, таҳлил ва банақшагирии сиёсати хориҷии Вазорати корҳои хориҷии Тоҷикистон, тарзи ба қайд гирифтани воситаҳои ахбори хориҷӣ ва дастёбии онҳо ба иттилоотро ба ҳозирон фаҳмонд. Ӯ гуфт, воситаҳои ахбори миллӣ бояд кормандони хосаи худро дар назди ин ё он вазорат ба қайд гиранд ва ҳамкориро вусъат бахшанд.

Ҳолатҳое мешавад, ки барои як хабар аз як идора ду-се нафар муроҷиат мекунанд, котиби матбуот намедонад, ки кадоме аз онҳо хабарнигор ҳастанд.

Яъне ба сатҳи ҳирфаӣ ба роҳ мондани фаъолияти маркази матбуот ва ВАО зарур ва имконпазир аст,- гуфт Давлат Назрӣ.

Источник: http://tojnews.org/node/4272
http://orxwu3tfo5zs433sm4.cameleo.ru/2jmj7l5rSw0yVb-vlWAYkK-YBwk=bm9k

[b]Сохтор, мизони маблағгузорӣ ва тарзи ироаи хабар дар шабакаҳои телевизиюни давлатии Тоҷикистон шабеҳи даврони шӯравии пешин аст.[/b]

Дар маҳфили «Ҳамкории иҷтимоъӣ»-и Шӯрои ҷамъиятии Тоҷикистон дар рӯзи панҷшанбеи 27 сентябр, дар бораи сатҳи фаъъолият ва вазъи шабакаҳои телевизиюни давлатии Тоҷикистон чунин натиҷагирӣ шуд.

Саймуддин Дӯстов, раиси Сандуқи «ИНДЭМ» ва муассиси нашрияи «Нигоҳ», гуфт, ки шабакаҳои расмии телевизиюни Тоҷикистон рақиб надоранд, аз сӯйи давлат идора мешаванд ва дар пахши хабарҳо мустақил нестанд.

Ба гуфтаи оқои Дӯстов, додани муҷаввиз ба шабакаҳои телевизиюнӣ низ дар инҳисори давлати Тоҷикистон буда ва дарёфти муҷаввизи фаъъолият барои шабакаҳои мустақил душвор аст.

Зимнан, бо вуҷуди муҷаҳҳаз будан бо таҷҳизоти мудерни фаннӣ шабакаи мустақилли телевизиюнии «Asia-Plus» дар муддати чанд сол натавонистааст муҷаввизи фаъъолият дарёфт кунад.

[b]Матни пурраи гузоришро бо пахш кардани нишони зерин дар сомонаи мо мутолиа кунед:[/b] [url=http://www.taj.nansmit.tj/analysis/?id=211]http://www.taj.nansmit.tj/analysis/?id=211[/url]

Источник:

[b]Сохтор, мизони маблағгузорӣ ва тарзи ироаи хабар дар шабакаҳои телевизиюни давлатии Тоҷикистон шабеҳи даврони шӯравии пешин аст.[/b]

Дар маҳфили «Ҳамкории иҷтимоъӣ»-и Шӯрои ҷамъиятии Тоҷикистон дар рӯзи панҷшанбеи 27 сентябр, дар бораи сатҳи фаъъолият ва вазъи шабакаҳои телевизиюни давлатии Тоҷикистон чунин натиҷагирӣ шуд.

Саймуддин Дӯстов, раиси Сандуқи «ИНДЭМ» ва муассиси нашрияи «Нигоҳ», гуфт, ки шабакаҳои расмии телевизиюни Тоҷикистон рақиб надоранд, аз сӯйи давлат идора мешаванд ва дар пахши хабарҳо мустақил нестанд.

Ба гуфтаи оқои Дӯстов, додани муҷаввиз ба шабакаҳои телевизиюнӣ низ дар инҳисори давлати Тоҷикистон буда ва дарёфти муҷаввизи фаъъолият барои шабакаҳои мустақил душвор аст.

Зимнан, бо вуҷуди муҷаҳҳаз будан бо таҷҳизоти мудерни фаннӣ шабакаи мустақилли телевизиюнии «Asia-Plus» дар муддати чанд сол натавонистааст муҷаввизи фаъъолият дарёфт кунад.

Аз сӯйи дигар, Иззатманд Саломов, раиси созмони «Интернюз-нетворк», аз наҳваи хабаррасонии шабакаҳои телевизиюни давлатии Тоҷикистон интиқод карда ва гуфт, ки ин шабакаҳо аз пахши хабарҳои доғи кишвар имтиноъ меҷӯянд. Дар натиҷа, сокинони Тоҷикистон ин гуна ахборро аз шабакаҳои телевизиюнии кишварҳои хориҷӣ дарёфт мекунанд.

Гуфта мешавад, хабарҳо дар мавриди ҳаводиси табиъӣ, назири обхезӣ, сел ё оташсӯзӣ, ки талафоти ҷонӣ ба дунбол доранд, аз тариқи телевизиюнҳои расмии Тоҷикистон пахш намешаванд.

Масалан, оташсӯзии бузург дар бахши умдафурӯшии бозори «Корвон» дар шаҳри Душанбе дар аволии моҳи ҷорӣ, ки боъиси талафоти ҷонӣ ва хисороти зиёди молӣ шуда ва эътирозоти тоҷиронро дар пай дошт, дар барномаҳои хабарии шабакаҳои телевизиюни расмии Тоҷикистон пӯшиш наёфтааст.

Ба эътиқоди ширкаткунандагони ҳамоиш, пойин будани сатҳи барномаҳо ва рақобатпазир набудани барномаҳои телевизиюнҳои давлатии Тоҷикистон аз далоили коҳиши теъдоди бинандагони шабакаҳои миллӣ дар соли ҷорӣ будааст.

Асомиддин Атоев, раиси Фарҳангистони маҷозии «ICT 4D» (текнулуҷии иттилоъотию иртибототӣ) гуфт, ки дар шароити кунунӣ бинанда дар интихоби шабака озод асту танҳо шабакаи телевизиюни беҳтаринро тамошо хоҳад кард.

Оқои Атоев гуфт, ки дар бештари маворид сокинони манотиқи марзии Тоҷикистон бо Афғонистон, Узбакистон ва Қирғизистон барномаҳои телевизиюнии кишварҳои ҳамсояро тамошо мекунанд.

Аз ҷумла, ба гуфтаи ӯ, сокинони ноҳияи Мастчоҳи вилояти Суғд, дар шимоли Тоҷикистон, барномаҳои телевизиюни Узбакистонро бар телевизиюнҳои миллӣ тарҷеҳ медиҳанд. Дар ин минтақа 5-6 шабакаи телевизиюнии Узбакистон пахш шуда ва аз лиҳози ҳунари таҳияи барнома ва ҷаззобияти мавзӯъоти онҳо аз барномаҳои телевизиюни Тоҷикистон пешӣ доранд.

Дар ҳамин ҳол, дуктур Муллозуҳур Тоҳирӣ, пажӯҳишгари тибби мардумии Тоҷикистон, далели дигари коҳиши теъдоди бинандагонро ба системи пахши рақамӣ гузаштани чаҳор шабакаи давлатии телевизиюни Тоҷикистон дар авоили соли ҷорӣ марбут хонд.

Ба гуфтаи оқои Тоҳирӣ, худи ӯ шоҳид будааст, ки дар навоҳии Айнию Панҷакент ва шаҳри Турсунзода сокинон имкони харидории телевизори мудели ҷадид ва таҷҳизоти фаннӣ барои дарёфти амвоҷи пахши рақамии чаҳор шабакаи давлатии Тоҷикистонро надоштаанд.

Вале гуфта мешавад, то ҳол дар Тоҷикистон ниҳоди мустақилле барои арзёбии фаъъолияти шабакаҳои телевизиюн ва теъдоди бинандагони онҳо вуҷуд надошта ва бештари арқом дар ин замина тахминӣ аст.

Ивар Виккӣ, раҳбари дафтари Созмони Амният ва Ҳамкории Урупо дар Тоҷикистон, гуфт тибқи як пажӯҳиш, ки ду сол қабл ин ниҳод дар Тоҷикистон анҷом додааст, 77 дар сади ҷамъияти ин кишвар аз тариқи амвоҷи қиёсӣ (аналог) барномаҳои телевизиюнро тамошо карда ва 22 дар сад дорои онтенҳои моҳвораӣ будаанд.

Мизони корбарони телевизиюни кобелӣ дар Тоҷикистон ба 1 дар сад баробар будааст.

Дар ҳамин ҳол, Шаҳло Акобирова, раиси созмони «Хома», гуфт, бар асоси таъаҳҳудоти худ дар ҳамоиши байналмилалии «Женева-2006» Тоҷикистон муваззаф шудааст, ки то моҳи июни соли 2015 пахши рақамии куллияи шабакаҳои телевизиюнии кишварро таъмин кунад.

Ин ҳамоиш дар моҳи майи соли 2006 ба ибтикори Созмони Ҷаҳонии Иртиботи Электрунӣ, як ниҳоди вобаста ба СММ, ва бо ширкати намояндагон аз 104 кишвари ҷаҳон дар Женев баргузор шуда, масоили марбут ба гузариш ба пахши рақамии барномаҳои телевизиюнро матраҳ карда буд.

Хонуми Акобирова гуфт, дар ҳоле ки барномаҳои шабакаҳои телевизиюни давлатии Тоҷикистон аз ба навҳи рақамӣ (диҷитол) ва бо кайфияти олӣ пахш мешавад, аммо «маҳсулоти телевизиюнҳои Тоҷикистон дар сатҳи минтақа рақобатпазир нест.»

Ӯ гуфт, ки ба ин далел мизони пахши таблиғоти бозаргонӣ (реклом) низ дар шабакаҳои телевизиюни Тоҷикистон дар муқоиса бо кишварҳои ҳамсоя ночиз буда ва дар соли гузашта пуле, ки тавассути пахши таблиғот ба даст омада, ҳамагӣ се милюн дулор будааст. Ин рақам дар Қирғизистон 7 милюн дулор ва дар Қазоқистон 850 милюн дулорро ташкил додааст.

Дар ҳамин ҳол, Саидмурод Фаттоев, мушовири раиси ҷумҳурии Тоҷикистон, аз хатароти ношӣ аз истифода аз фанновариҳои ҷадиди интернетӣ тавассути гурӯҳҳои теруристӣ ва бунёдгаро ҳушдор дода ва гуфт, ки расонаҳои Тоҷикистон бояд барои «муборизаи иттилоъотӣ барои ҳифзи манофеъи миллӣ», бахусус, амнияти давлатӣ ва ҷомеъа хидмат кунанд.

Источник: http://www.bbc.co.uk/tajik/news/2012/09/120927_mm_digital_tv.shtml

[b]Мумкин аст, ба зудӣ 80 дарсади сокинони Тоҷикистон аз тамошои телевизионҳои маҳаллӣ маҳрум шаванд.[/b]

Гузариш ба пахши рақамии намоишҳои телевизионӣ сокинони Тоҷикистонро маҷбур хоҳад кард, аз баҳри телевизорҳои оддии хеш бароянд ё ҳадди ақал дастгоҳи махсуси қабули мавҷ харидорӣ кунанд. Ин харҷест байни 70 то 500 доллари амрикоӣ, ки барои аксари хонаводаҳо гаронӣ хоҳад кард.

Ивар Вики, сафири САҲА (ОБСЕ) дар Тоҷикистон гуфт, пажӯҳише дар ин замина нишон дода, ки 97 дарсади хонаводаҳои тоҷик телевизор доранд ва 80 дарсади аҳолӣ тамошобини фаъоли барномаҳои телевизиониянд. Аммо 67 дарсади сокинон ба ғайр аз тамошои 6 шабакаи маҳаллӣ дигар интихоб надоштаанд. Сафири САҲА мегӯяд, баъд аз соли 2015-ум, вақте ки Тоҷикистон чун ҳама кишварҳои дунё пурра ба пахши рақамӣ мегузарад, ин рақамҳо метавонанд ба таври назаррас тағйир ёбанд.

Гузариш ба пахши рақамӣ ба ҳар як сокини кишвар дахл хоҳад кард ва аз ин рӯ барои ин давраи гузариш бояд ҳама омода бошанд»,-гуфт сафири САҲА. Вай илова кард, «агар фанноварии нав нодуруст роҳандозӣ шавад, бисёре аз экранҳои телевизорҳои сокинони Тоҷикистон торик гардида, шумори аъзами онҳоро аз тамошои барномаҳои телевизион дар шакли нав маҳрум мекунад. Аз ин рӯ, миллион тамошобини тоҷик бояд огоҳ ва онҳо бовар карда шаванд, ки каме маблағ сарф карда телевизори нав ё мавҷқабулкунандаи рақамӣ харидорӣ кунанд.»

Бисёре аз созмонҳои ҷамъиятӣ мегӯянд, барои омодагӣ ба телевизиони рақамӣ, бояд қабл аз дигарон бозор ва бозоргонҳо омода шаванд ва маҳсулотеро ворид намоянд, ки боиси фиреб ва саргардонии мардум нашавад. Шаҳло Акобирова, раҳбари созмони ҷамъиятии «Хома», мегӯяд, «масъалаи муҳим он аст, ки кадом намуди чунин асбобҳои мавҷқабулкунанда ворид мешавад. Дар Чин беш аз 40 коргоҳест, ки ба истеҳсоли ин дастгоҳ машғуланд. Муҳим аст, ки онҳо ба стандартҳои фаннии ширкати дастраскунандаи мавҷи рақамии Тоҷикистон мувофиқат кунанд.»

Ин баҳсу баррасиҳо ва таъкидҳову пешбиниҳо дар ҳоле садо медиҳанд, ки бахши умдаи тамошобини тоҷик мегӯянд, ҳоло ки шабакаҳои телевизиони Тоҷикистон на дар ҳама кунҷу канори кишвар пахш мешаванд, пас гуфтан душвор нест, ки баъд аз ҷорӣ шудани телевизиони рақамӣ вазъият чигуна хоҳад шуд. Бархе ҳам чандон нигарон нестанд ва мегӯянд, барои тамошои чаҳор шабакаи телевизиони маҳаллӣ, ки барномаҳои ҷолиб надоранд, маблағи иловагӣ сарф нахоҳанд кард. Онҳо бовар доранд, ки барномаҳои дилгиркунанда якҷоя бо ин таҳаввулоти техникӣ мардумро умуман аз телевизион дур хоҳад кард.

«Бе ин ҳам барномаҳои телевизион такрори барномаҳои телевизионҳои дигар ва якранганд. Боз ҳамеша консерт нишон медиҳанд. Консертро ман аз DVD ҳам тамошо мекунам»,-мегӯяд як хонуми ҷавон, ки худро Мунира муаррифӣ кард.

Коршиносон мегӯянд, дар сурати нодуруст амалӣ шудани стратегияи гузариш ба пахши рақамӣ хатари дар халои иттилотӣ қарор гирифтани аҳолӣ ба вуҷуд меояд ва ин дар навбати худ ба амнияти иттилоотӣ таъсири ҷиддӣ мерасонад. Коршинос Асомиддин Атоев гуфт, сокинон бо истифода аз имконоти телевизорҳои нав ва ё қаблукунакҳои мавҷи рақамӣ, метавонанд зиндагиашонро роҳаттар намоянд: «Онҳо метавонанд, интихоб кунанд шабакаҳоеро ки мехоҳанд тамошо кунанд. Яъне шумори шабакаҳо зиёд мешавад. Баъдан вобаста ба вақт, агар Шумо серкор бошед, метавонед дар мавҷқабулкунак барномаи дилхоҳатонро сабт кунед ва бегоҳ онро баҳузур тамошо кунед. Телевизор ба як компютер табдил меёбад.»
Дар давраи аввали гузариш ба пахши рақамӣ ҷамъияти саҳомии кушодаи «Телерадиоком» барои пахши барномаҳои «Шабакаи аввал», «Сафина», «Баҳористон», «Ҷаҳоннамо» фиристандаи пахши рақамиро дар саросари навоҳии кишвар насб мекунад. Хуршед Ҳабибов, муовини аввали директори генералии «Телерадиоком», гуфт, дар шакли рақамӣ барномаҳои телевизион тавассути дастгоҳи вижа, ки «Мултиплекс» ном дорад ва аз имкони ғунҷоиши 16 шабакаи телевизионӣ бархӯрдор аст, пахш мешаванд. Феълан ба ин асбоб 4 шабакаи телевизиони давлатӣ ва 6 шабакаи хориҷӣ ба таври санҷишӣ ворид шудааст. Ба гуфти Хуршед Ҳабибов телевизионҳо ба ин асбоб дар асоси шартнома ва бо пардохти маблағи муайян, ки нагуфт чӣ қадар аст, пайваст мешаванд.

Дар Тоҷикистон 57 канали телевизион ва радио амал мекунад, ки аз он 18-тояш давлатӣ аст. Фаъолони ҷомеаи Тоҷикистон мегӯянд, аз байн бардоштани муҷаввиз барои истеҳсоли маводи аудио ва визуалӣ метавонад, рақобатро дар бозор гармтар ва зиндагии сокинонро рангинтар созад. Вале он ҳам дар ҳоле ки мардум битавонад харҷи гарони табдили телевизионҳои худ ё хариди дастгоҳи махсусро бардорад.

Источник: http://www.ozodi.org/content/article/24721895.html

[b]Асомиддин Атоев, раиси Академияи технологияҳои иттилоотӣ ва мухобиротии Тоҷикистон натиҷаи гузориши СММ доир ба дастарасии аҳолии Тоҷикистон ба интернетро нодуруст арзёбӣ кард.[/b]

Асомиддин Атоев рӯзи сешанбеи 25-уми сентябр ба радиои Озодӣ гуфт, ки Созмони Милали Мутаҳҳид гузориши худро бар асоси рақамҳои Иттиҳодиия байналмилии алоқа (МСЭ) таҳия кардааст, ки ба ҳақиқат дуруст намеояд.

Асомиддин Атоев мегӯяд, ки дар таърихи 27-уми июли солди 2012 Хадамоти алоқаи Тоҷикистон маълумоти расмӣ пешниҳод карда буд, ки мувофиқ ба он, корбарони интернет ва афроде, ки ақалан як маротиба дар рӯз вориди интернет мешаванд, беш аз ду миллион нафар нишон дода буд. Яъне ба қавли Асомиддин Атоев, феълан ҳудуди 30 дарсади аҳолии Тоҷикистон ба интернет дастрасӣ дорад.

Ҷаноби Атоев меафзояд, ки соли 2010 дар Душанбе дар ин замина як таҳқиқоте сурат гирифта буд, ки мувофиқ ба он ҳудуди 2 миллион аҳолии Тоҷикистон ба интернет сару кор доранд.

Созмони Милали Мутаҳид дар як гузориши таҳқиқотии худ, ки 24-уми сентябр ба нашр расонидааст, мизони корбарони интернет дар кишварҳои ҷаҳонро нишон додааст.

Миёни кишварҳои Осиёи Миёна дар Узбакистон 30, 2 дарсади аҳолӣ ба интернет дастрасӣ доштаанд ва корбарони интернет дар Қирғизистон ба 20 дарсад баробар мебошад. Дар Тоҷикистон 13 дарсад ва дар Туркманистон 5 дарсад ба интернет сару кор доштаанд.

Исландия бо 95 дарсади фарогирии корбарони интернет дар ҷаҳон дар ҷои аввал буда, Олмон бо 83 дарсад дар ҷои дуввум ва Иёлоти Мутаҳидаи Амрико бо 77,9 дарсад дар мақоми севвум қарор доранд.

Источник: http://www.ozodi.org/content/article/24719398.html