[b]Зафар Абдуллоев, асосгузори “Авесто” мехоҳад батадриҷ аз журналистика канор равад ва рӯ ба тиҷорат биорад.[/b]

Ҳафтаномаи “Факти ин комментарии”, нашрияи дигари марбут ба Зафар Абдуллоев низ ба далели мушкилоти молӣ дастикам то моҳи апрел аз нашр бозмондааст ва ӯ мегӯяд, шояд ин ҳафтавор низ бо ҳамин қатъи фаъолият кунад.

Дар маҳофили хабарнигории Душанбе қарори рафтани Зафар Абдуллоев аз майдони матбуот ба гунаи мухталиф тафсир мешавад, вале бисёриҳо мегӯянд, мушкилоти иқтисодӣ домани аксари нашрияҳои мустақили Тоҷикистонро сахт панҷа задааст ва бархеи онҳо шояд ба айни сарнавишти “Авесто” ё “Факти и коментарии” рӯбарӯ шаванд.

Худи Зафар Абдуллоев санҷидани нирӯяш дар як касбу кори комилан дигарро аз омилҳои аслии тағйири касби хабарнигориаш ном мебарад, вале мегӯяд, мушкилоти молии омада бар сари “Авесто” низ дар ин амр нақши муҳим дошт.

[b]ЗАФАР РАФТ, ВАЛЕ “АВЕСТО” ҲАМОН МЕМОНАД[/b]

Зафар Абдуллоев дар ҳоле тарки “Авесто” мекунад, ки шумори кормандони он аз 20 нафари қаблӣ акнун то ба ҳадди 3 нафар коҳиш ёфта, теъдоди нашри “Факти и комментарии” низ ҳамагӣ 500 нусха шудааст.

Аммо оё табдили молики “Авесто” боиси кунд шудани забони то ҳол дар баррасии масоили Тоҷикистон тунди ин хабаргузорӣ нахоҳад шуд? Ҷамшед Улмасов, сардабири ҳафтаномаи “Бизнес и политика” ва молики нави хабаргузории “Авесто” мегӯяд, сиёсати эҷодии “Авесто” аз ин ба баъд низ кадом тағйири усулие нахоҳад кард: “Он сиёсате, ки дар даври Зафар Абдуллоев буд, бетағйир боқӣ хоҳад монд. Тағйирот танҳо дар бахши пӯшиши хабарҳо пеш меояд ва мо ба ҷустуҷӯи ахбори бештари хубу ихтисосӣ такя хоҳем кард. Зафар Абдуллоев матлабҳои худро дар “Авесто” ҳамчунон нашр хоҳад кард, касе ба ӯ монеъ намешавад. Як шарти қарордод ҳамин аст, ки Зафар ҳар матлабе, ки мехоҳад, дар мо нашр мекунад, касеро танқид мекунад, ихтиёри ӯст. Моро аз ҳоло айбдор мекунанд, ки мо гӯё хабарнигорони рӯ ба Русия бошем. Ин чунин нест. Сиёсате, ки дар “Авесто” то ҳозир буд, тағйир намекунад, ҳамон боқӣ хоҳад монд.”

[b]ТАРҶУМАИ ҲОЛ[/b]

Зафар Абдуллоев 35 сол ва 4 фарзанд дорад ва соли 1976 дар Норак ба дунё омадааст. Зафар хатмкардаи риштаи менеҷменти Донишкадаи соҳибкории Душанбе буда, соли 1997 дар хабаргузории “Азия Плюс” ба кори журналистӣ шурӯъ кард. Ӯ дар ин ҷо то мақоми сардабири ҳафтавори “Азия Плюс” сабзид ва 6 сол пеш, ба дунболи як даъвои додгоҳӣ бар сари тақсими саҳмияҳои “Азия Плюс” бо муассисаш Умед Бобохонов, хабаргузории “Авесто”-ро созмон дод. Абдуллоев асосгузори нашрияҳои “Фараж”, “Овоза” ва “Факти и комментарии” ҳам ҳаст, ки дуи аввалро баъдан ба ҳайъати эҷодии он ҳафтаномаҳо супурд ва акнун аз идомаи нашри “Факти и комментарии” ҳам, ки теъдоди нашру обунаи электрониаш дар маҷмӯъ зери 1000 нусха шудааст, даст мекашад. Оқои Абдуллоев ҳамчунин аз муассисони Медиа-Алянс аст, ки ҳамчун алтернатива ба Иттиҳодияи хабарнигорони Тоҷикистон ташкил шуда буд.

[b]МУОМИЛА БО «ТАЛКО»?[/b]

Зафар Абдуллоев бештар бо матлабҳои тунди интиқодиаш, бахусус пиромуни ношаффофиҳои фаъолияти «ТАЛКО», ширкати алюминсозии Тоҷикистон ва ба суратҳисобҳои бонкии машкук дар минтақаҳои оффшорӣ сарозер шудани фоидаҳои он маъруф буд. Хабари рафтани ӯ аз журналистика дар маҳофил ҳадсу гумонҳоеро ҳам эҷод кард, ки шояд ба манзури бастани забони ӯ аз танқидҳои минбаъдаи «ТАЛКО» муомилае дар ин миён сурат гирифта бошад ва ба Зафар Абдуллоев чунон пешниҳоди аз нигоҳи молӣ ҷолиб кардаанд, ки ӯ “не” гуфта натавонист.

Раҷаби Мирзо, хабарнигори мустақили тоҷик, мегӯяд, бештар худи Зафар Абдуллоев буд, ки тавассути чунин матлабҳои тунд роҳҳои тамос бо «ТАЛКО» ва ширкатҳои дигари марбут ба онро меҷуст. Вале Раҷаби Мирзо ҳам воқеъ шудани чунин як тамос дар ниҳояти амр ва сурат гирифтани муомилаҳое дар ин замина бо оқои Абдуллоевро баъид намедонад: “Шояд яке аз ҳадафҳои худи Зафар Абдуллоев ҳамин буд. Масалан, матлабҳои нисбатан тундтари “Авесто” ва худи Зафар Абдуллоев бештар равона шуда буд ба сӯи «ТАЛКО» ва ширкатҳои дигаре, ки бавосита ё бевосита ба раҳбарияти он наздикӣ доранд. Яъне шояд худи Зафар мехост бо чунин бархӯрд бо раҳбарони «ТАЛКО» наздикӣ пайдо кунад. Ва онки рӯзномаву сомонааш чандон муваффақ нашуд, фикр мекунам, шояд ба ҳамин самтгароиҳоии ин нашрияву ин хабаргузорӣ бастагӣ дошта бошад. Ва вақте ин ду тарҳ аз нигоҳи молӣ худро пӯшонда натавонист, шояд ба тавофуқоте ҳам рафта бошад. ”

[b]“ФАРАЖ” ДАР НАВБАТ АСТ…[/b]

Хуршеди Атовулло, сардабири ҳафтавори мустақили “Фараж”, ки муассиси аввали он ҳам Зафар Абдуллоев буд, вуҷуди кадом муомилаи пӯшидае ба хотири рӯфтани пайи пои оқои Абдуллоев аз саҳнаи матбуотро ҳадсе бепоя меномад. Аммо ӯ монанди “Авесто” ба мушкилоти молӣ гирифтор шудани “Фараж”-ро эътироф мекунад ва мегӯяд, манъ шудани нашри ҳафтанома, ки қариб се моҳ давом кард, барои “Фараж” аз ҳисоби молиёту ҳаққи хадамоти шаҳрӣ ва пули чопу қоғазу маоши коргарон зери 70 000 сомонӣ қарз ба мерос гузошт ва агар аз созмонҳои имдодрасон ба кӯмак нарасанд, ӯ ҳам мулзам аст, ба муомилаҳои барояш пешниҳодшуда тан дар диҳад. Муомилаҳое, ки сардабири “Фараж” дар мавриди табдили молики “Авесто” радд, вале дар баробари нашрияи худаш тасдиқ мекунад.

Хуршеди Атовуллоҳ мегӯяд: “Бале, дар сӯҳбатҳои ғайрирасмӣ бо нафарони “гуногунсоҳа” ин гуна гуфтугӯҳо матраҳ шуда буд. Вале шарти онҳо ин буд, ки ман дигар ба журналистика машғул нашавам. Албатта, ман метавонам ҳамчун хабарнигори оддӣ кор кунам. Вале онҳо хавотир буданд, ки мабодо ман бо пули онҳо нашрияи дигари беҳтар аз “Фараж” бисозам Ин пешниҳодҳо як сол боз ироа шуда истодаанд, вале ман ба далели ҳамон шарташ розӣ набудам. Вале имрӯз, ки ҳоли “Фараж” беҳтар аз “Авесто” нест, дар сурати пешниҳоди ҷиддитар, ман маҷбурам, рӯи он ҷиддӣ фикр кунам.”

[b]З.АБДУЛЛОЕВ: “МАРО КАСЕ НАХАРИДААСТ”[/b]

Зафар Абдуллоев сарусадоҳо дар бораи кадом муомилаи пӯшидаи ӯ бо гурӯҳҳое, чун «ТАЛКО»-ро такзиб мекунад ва мегӯяд, касе ӯро “нахаридааст”: “Дар мавриди «ТАЛКО». Ман ба фарқ аз дигарон ҳамеша мегуфтам, ки мо хостори дастгирӣ ҳастем, вале ин бояд аз тариқи як Сандуқи пуштибонии матбуоти мустақили Тоҷикистон сурат бигирад. Рӯзномаҳоро нахаранд, вале кӯмак кунанд, ки онҳо аз нигоҳи ҳирфаӣ пеш бираванд. Аммо чунин Сандуқ дар кишвари мо нест, мутаассифона. Агар ман бо «ТАЛКО» ё ягон гурӯҳи дигар муомила мекардам, бовар кунед, онҳо хеле хуш мешуданд. Аммо на, маро нахаридаанд. Ҷамшед Улмасов ҳам намояндаи кадом гурӯҳи молӣ нест. Ман бояд дар бораи «ТАЛКО» ҳатман ягон чизи дигар бинависам ва шояд ин мардумеро, ки фикр мекунанд, маро харидаанд, таскини хотир диҳад.”

Зафар Абдуллоев мегӯяд, қаблан ҳам пешниҳодҳое барои фурӯхтани “Авесто” гирифта буд, вале ба ин далел, ки харидорон ғаразҳои сиёсӣ доштанд, розӣ нашуд ва дар ниҳоят онро бидуни дарёфти кадом маблағ ба нафаре супурд, ки дидгоҳи бо ӯ наздик дошта, сиёсати қаблии ин хабаргузориро дигар намекунад.

Раҷаби Мирзо, хабарнигори тоҷик мегӯяд, яке аз онҳое, ки хоҳиши харидани “Авесто”-ро доштанд, худи ӯст. Раҷаби Мирзо то поёни соли гузашта сардабирии рӯзномаи “Имрӯз Нюс”, як нашрияи наздик ба «ТАЛКО» ва Ориёнбонкро бар ӯҳда дошт ва аз ин рӯ аз ӯ пурсидам, ки оё “Авесто”-ро худи ӯ харидан мехост ва ё миёнҷие байни Зафар Абдуллоев ва мухотаби матлабҳои интиқодии ӯ буд. Ӯ дар посух гуфт: “На, на. Ин пешниҳоди инфиродӣ буд, вале Зафар Абдуллоев гоҳе бо шӯхӣ, вале гоҳе ҳам хеле ҷиддӣ мегуфт, ки ман “Авесто”-ро ба шумо намефурӯшам, чунки ман гӯё ҳадафҳои сиёсӣ дорам. Ва инак ба нафаре вогузораш кард, ки дар мавқеъи наздик ба Зафар Абдуллоев ва чанд тани дигаре, ки аз ин гурӯҳанд, қарор дорад. Фикр мекунам, дар ин ҷо масоили сиёсӣ чандон вуҷуд надошт. Ҳадди ақал барои онки мо бархӯрди ҷиддии мақомоти Тоҷикистон ва ширкатҳоеро, ки ӯ нисбат ба онҳо интиқоди шадид мекард, то имрӯз надидаем.”

[b]ҚАЗИЯИ СОМОНАБАНДӢ[/b]

Аммо дар ҳамин тирамоҳи гузашта сомонаи “Авесто” дар пайи шурӯъи даргириҳои Камароб бо баҳонаҳои фаннӣ масдуд шуд ва танҳо дар ин авохир мақомот эътироф карданд, ки масдуд шудани “Авесто” ва сомонаҳои дигари тундгӯ далоили амниятӣ дошт ва ба амалиёти зидди гурӯҳҳои мусаллаҳи мухолифи давлат дар Рашт марбут буд.

Ба бовари Хуршеди Атовуллоҳ, масдуд шудани дастрасӣ ба сомонаи “Авесто” ҳамон қатраи охире шуд, ки косаи сабри Абдуллоевро пур кард ва ӯ аз идомаи кори хабарнигорӣ дигар батамом дасту дил шуст: “Зафар метавонист, ҳамчун муассис боқӣ монда, кори хабаргузориро ба як нафари мавриди эътимодаш бисупорад ва сарашро сабук кунад. Вале вақте болои мушкилоти иқтисодӣ сомонааш баста шуд ва ба будҷаи бе он ҳам хароби хабаргузорӣ зарбаи ҷиддитар зад, албатта, ҳамаи ин болои ҳам мешавад ва боис шуд, ки ӯ ба як тасмими қатъӣ биояд.”

Аммо Зафар Абдуллоев мегӯяд, масдуд шудани сомонаи “Авесто” ӯро баръакс то чанд моҳи дигар барои идомаи кор дар хабаргузорӣ ташвиқ кардааст: “Ман аз ягон навъ фишор наметарсам. Баръакс барои ман, ки аксар вақт муқобили маҷро меравам, кор кардан дар шароити фишор роҳаттар аст. Вақте сомонаи “Авесто”-ро бастанд, ман чанд моҳ бо шавқи хеле бештар кор кардам. Вале вақте ин ҳама фишор фурӯ нишаст ва вазъ ба ҳолати оддиаш баргашт, шавқи ман ба кор дар сомона ҳам дубора гум шуд.”

[b]МАТБУОТИ МУСТАҚИЛ, ВАЛЕ БӮҲРОНӢ[/b]

Масъалаи дигаре, ки табдили молики “Авесто” ва қасди рафтани Зафар Абдуллоев аз майдони матбуот бармало кард, мушкилоти сахти молиест, ки аксари расонаҳои мустақили Душанбе, ба хусус нашрияҳову сомонаҳои дар тирамоҳ, дар пайи нооромиҳои водии Рашт масдудшуда, гирифтор шудаанд.

Нуриддин Қаршибоев, раиси НАНСМИТ, Анҷумани миллии расонаҳои мустақили Тоҷикистон мегӯяд, бахусус нашрияҳои мустақил дар вазъи хеле мушкил қарор гирифтанд ва бар иловаи буҳрони молӣ, рӯйдодҳои тирамоҳи гузашта, ки 3 нашрияи мустақили “Фараж”, “Пайкон” ва “Нигоҳ” аз нашр бозмонд ва сомонаҳои интернетии “Авесто”-ву “Тоҷнюс” масдуд шуданд, ба мушкилоти матбуоти мустақили тоҷик афзуд.

Нуриддин Қаршибоев мегӯяд, вазъ ба ҳадде печида шудааст, ки дар ғайри сурати кӯмаки созмонҳои ҳомии озодии матбуот, сарнавишти “Авесто”-ро бисёре аз нашрияҳои дигар низ шояд такрор кунанд: “Бино бар он, ки чопхонаҳо чопи ин нашрияҳоро бар ӯҳда нагирифтанд ва дастрасӣ ба сомонаҳои интернетӣ маҳдуд буд, онҳо аз муштариёни худ маҳрум шуданд. Теъдоди нашри “Фараж”, барои мисол, аз 8 000 нусха то ба 3000 фуромад ва чанд шумора, ки чоп нашуд, ин нашрияҳо аз даромад низ маҳрум шуданд. Ва ба ҳамин хотир, он созмонҳое, ки рисолаташон кӯмак ба воситаҳои мустақили ахбор аст, бояд ин хабаргузориҳо ва нашрияҳоро ҳаддалимкон дастгирӣ кунанд, то аз байн нараванд.”

НАНСМИТ ҳанӯз дар шурӯъи бӯҳрони саросарии молӣ таҳқиқоте анҷом дода буд, ки бар асоси натоиҷаш, 40 дарсади нашрияҳои мустақил худро дар вазъи мушкили молӣ эҳсос мекунанд. Дар пайи ин таҳқиқот, созмонҳои хабарнигорӣ ва нашрияҳои мустақил аз ҳукумати Тоҷикистон хоста буданд, ки дар давраи бӯҳрон ба манзури дастгирии матбуот ба расонаҳо имтиёзҳое, аз ҷумла дар мавриди пардохти молиёт, қоил шавад.

Нуриддин Қаршибоев мегӯяд, ки дархости онҳо аслан баррасӣ нашуд ва бо онки аз он дархост як солу чанд моҳ гузашт, посухи расмие ҳам то ҳол аз сӯи ҳукумат нагирифтаанд: “Муттаассифона, аз ҷониби ҳукумат ва мақомоташ ин пешниҳоди раҳбарони нашрияҳои хусусӣ дастгирӣ наёфт. Онҳо ҳатто он имконотеро, ки доштанд, аз тариқи имтиёзҳои андоз ё таъсиси як сандуқи кумак ба матбуот дар шароити бӯҳрониро напазируфтанд ва ин пешниҳодҳо ҳатто мавриди баррасӣ дар сатҳи ҳукумат ҳам қарор нагирифт. Азбаски матбуоти мустақил як рукни демократия аст ва дар ҳар ҷомиаи демократӣ ҳаққи вуҷуд дорад, давлат низ бояд нисбат ба он бетафовут набояд ва бояд бо роҳҳои гуногун чунин нашрияҳоро дастгирӣ кунад. Мо пешниҳод дорем, ки ҳамаи васоити ахбор, сарфи назар аз шакли моликияташ, ки хусусист ё ҳукуматӣ, бояд ба маблағҳои будҷа дастрасии баробар дошта бошанд.”

[b]БОЗОРЁБӢ КОРЕ ОСОН НЕСТ[/b]

Раҷаби Мирзо аммо бозорёбиро яке дигар аз мушкилоти умдаи матбуоти муосир дар Тоҷикистон медонад ва мегӯяд, расонаҳои марбут ба Зафар Абдуллоев низ бо вуҷуди онки масоили доғеро доман мезаданд ва мавзеъи тунди интиқодӣ доштанд, натавонистанд мухотаби зиёд пайдо кунанд: “Мангар, ки кӣ мегӯяд, бингар, ки чӣ мегӯяд. Барои ман муҳим ҳамин аст, ки оё як расона рисолати худро то куҷо анҷом медиҳад? Новобаста аз онки ба пуштибонӣ аз ин ё он гурӯҳ, ё кадом кишваре муттаҳамаш кунанд. “Авесто” дар оғоз яке аз хабаргузориҳои хеле муваффақ буд. “Факти и комментарии” ҳам аз нашрияҳои хеле ҳирфаӣ маҳсуб мешуд. Вале баъдан бархӯрди Зафар ба як доираи хеле маҳдуд сурат гирифт, ки ин боиси пайдо накардани маҳбубият ё аудиторияи васеътар барои ин нашрияву ин хабаргузорӣ шуд.”

Аммо Хуршеди Атовулло Зафар Абдуллоевро аз қавитарин хабарнигорони русзабон дар кишвар ба қалам дода мегӯяд, ки ӯ ҷои худро дар матбуоти тоҷик ёфта буд: “Зафар аз созмондиҳандагони Медиа-Алянс ва муассиси “Фараж” ва ҳафтавори як замони пуровозаи “Овоза” ҳам ӯст. Ва имрӯз “Авесто”-ву “Факти и комментарии”.. Ин ҳама аз ҷойгоҳи хеле мустаҳкам ва аз ҳунари рӯзномасозӣ доштану сайт сохта тавонистани Зафар Абдуллоев гувоҳӣ медиҳад. Бо вуҷуди бӯҳрон ва камбудиҳои молӣ, “Авесто” имрӯз ҳам сомонаи дуввум ё севвуми пурхонандатарин дар кишвар аст. Дуввуман, аз назари ҷасорати журналистӣ ҳам кам нашрияе ҳаст, ки ҳампои “Факти ин комментарии” бошад. Вале инки Зафар Абдуллоев ба далели мушкилоти иқтисодӣ наметавонад бозори фурӯши нашрияашро пайдо ё кори беҳтари хабаргузоришаро таъмин кунад, мавзӯъи дигар аст.”

[b]ЗАФАР БА ОСИЁБИ КӢ ОБ МЕРЕХТ?[/b]

Бархе, аз ҷумла дар байни хабарнигорони тоҷик ҳам, фаъолияти Зафар Абдуллоевро чандон холисона намедонанд. Бархе мӯътақиданд, ки ӯ дар ин майдон аз ҷониби Тошканд бозӣ мекунад. Ба бовари бархеи дигар, Зафар Абдуллоев ба осиёби Маскав об мерехт.

Дар гуфтугӯ бо оқои Абдуллоев шӯхиомез пурсидамаш, ки ин ҳама сол ба нафъи кӣ кор мекард ва ба осиёби кӣ об “мерехт”?. Зафар Абдуллоев гуфт: “Ман барои кӣ кор мекунам. Барои ҳеҷ кас! Вақте ман аз «РусАЛ» танқид мекардам, сафири Русия Максим Пешков боре таънаомез маро гуфт, ки ман бояд аз Тошканд маош бигирам. Сафорати Узбакистон ду дафъа алайҳи ман номаи эътирозӣ навишта буд ва маро ҳатто ба вазорати хориҷа даъват карда буданд. Вақте мо аз созмонҳои амрикоӣ кӯмак дарёфт кардем, афроди наздик ба мақомоти Тоҷикистон маро айбдор мекарданд, ки рӯ ба Амрико овардаам. Вале баъди онки чанд матлаби танқидӣ навиштем, фикр накунам, ки сафири Амрико имрӯз моро дӯсти кишвараш бишуморад. Ҳамин тавр, як вақт маро 3-4 бор дар сафарҳои хориҷии президент Эмомалӣ Раҳмон ҳамроҳ гирифтанд. Ба дунбол гап хест, ки Зафар “ҳукуматӣ” ва тарафдори Раҳмон аст. Вале шукри Худо, сомонаи мо масдуд шуд ва мушкилоти молии мо собит мекунад, ки мо аз ҳукумат ягон маблағ ё имтиёз нагирифтаем.”

[b]ЖУРНАЛИСТИКА ҲАМЧУН ҲОББӢ[/b]

Зафар Абдуллоев мегӯяд, акнун орзуи таъсиси як тиҷорати хурдеро дар сар дорад, вале бо вуҷуди канор рафтанаш аз журналистикаи фаъол ҳаққи нашри матлабҳояш дар “Авесто”-ро махсус ҳифз кардааст ва ҳам дар садади сохтани як блоги хусусии интернетист, то минбаре барои гуфтани ҳарфҳои дар дилаш ҷамъшуда дошта бошад: “Ин як тиҷорати хеле хурд аст, чунки пули маҳдуду ночизи ман барои кушодани тиҷорати ҷиддӣ намерасад. Ман зиндагии худро дигарбора аз сифр оғоз хоҳам кард. Аммо журналистика бароям як ҳоббӣ хоҳад монд. Яъне чизе, ки пул намеорад, балки танҳо барои роҳати маънавист.”

Аммо Хуршеди Атовулло мегӯяд, аз майдон рафтани хабарнигороне, чун Зафар Абдуллоев, хеле ҳайф аст: “Бояд ягон кӯмак мекарданд, то худи Зафар дар майдон мемонд, чунки мисли Зафар Абдуллоев журналистони ҷасур ва ҳам забондоне, ки ба чанд забон навишта метавонанд, Тоҷикистон қариб ки надорад. Албатта, ҳайф аст рафтанаш.”

Мирзои Салимпур

Источник: http://www.ozodi.org/content/article/2297073.html

Иттиҳоди рӯзноманигорони Тоҷикистон ва НАНСМИТ аз таъқиби хабарнигори нашрияи “Азия-Плюс” изҳори нигаронӣ кардаанд.

Ҳафтаи гузашта сардори раёсати Вазорати корҳои дохилӣ нашрияи «Азия-Плюс»-ро ба додгоҳ кашида, 1 миллион сомонӣ товон хоста буд.

[b]“Тафтишот ё инквизитсия?”[/b]

Анвар Тағоймуродов, сардори раёсати ҷиноёти созмонёфтаи Вазорати корҳои дохилӣ гуфтааст, дар мақолае дар “Азия-Плюс” дар ҳаққи ӯ суханони дурӯғ ва таҳқиромез нашр шуда, шаъну шараф ва ҳайсияти ӯро паст задааст.

Дар мақолаи таҳқиқотии “Тафтишот ё инквизитсия?”, ки ба қалами хабарнигор Рамзия Мирзобекова марбут аст, саҳнаҳое аз шиканҷаи боздоштшудагон тавассути кормандони раёсати мубориза бо ҷиноёти созмонёфтаи ВКД, аз ҷумла дар вилояти Суғд тасвир шуда буд.

Сардори раёсати ҷиноёти созмонёфтаи Вазорати корҳои дохилӣ дар ин мақола мавриди ба иддаои худаш дурӯғ ва таҳқирро нисбат ба шахсияти худаш кашф карда ва аз додгоҳ хостори расидагӣ ба ин қазия шудааст.

Анвар Тағоймуродов дар аризаи даъвогии худ ҳатто таъкид кардааст, ки шояд муаллифи мақола ва хабарнигорони дигар омилони ҳамлаи интиҳории Хуҷандро мешинохтанд ва аз нияти онҳо огаҳӣ ва эҳтимолан бо онҳо ҳамкорӣ доштанд.

[b]»Қонунро нодида мегиранд»[/b]

Дар изҳороти ду созмони хабарнигории Тоҷикистон ба нақли қавл аз Марат Мамадшоев, муҳаррири ҳафтаномаи “Азия-Плюс” низ чунин гуфта шудааст: “Рамзия Мирзобековаро борҳо ба Додситонии кулл барои дақиқ кардани маълумоте, ки дар мақола истифода шудааст, даъват карданд. Худи онҳо қонунро, ки ифшои номи манбаъро манъ мекунад, нодида мегиранд.”

Нуриддин Қаршибоев, раиси Анҷумани миллии расонаҳои мустақил ё НАНСМИТ, мегӯяд, таъқибу бозпурсии хабарнигорон, на бо ҳадафи ислоҳи кор, балки барои бастани даҳони хабарнигорон сурат мегирад.

Вай афзуд, онҳо аз Додситонии кулл ва дигар ниҳодҳои ҳифзи ҳуқуқ хостаанд, ки ин қазияро пайгирӣ кунанд.

Источник: http://www.ozodi.org/content/article/2293537.html

Зафар Абдуллоев хабаргузории “Авесто”-ро ба ихтиёри ҷамъияти “Муҳаммад Ҳилол”, ки молики «Бизнес и политика» низ ҳаст, вогузоштааст.

Мудири акнун собиқи хабаргузори «Авесто» мегӯяд, бино ба далели мушкилоти молӣ ва иқтисодӣ водор ба чунин иқдоме шудааст.

[b]»Хабаргузорӣ имкони рушдро надошт»[/b]

Ҷаноби Абдуллоев мегӯяд, ӯ дигар масъули ин хабаргузорӣ нест, балки фақат то чанд муддате ба масъулони нави он дар мудирияти кори хабаргузорӣ кӯмак хоҳад кард.

«Тайи солҳои охир хабаргузории «Авесто» ба мушкили молӣ ва иқтисодӣ мувоҷеҳ буд. Чанд соли аввал аз ҳисоби кӯмакҳои билоивази созмонҳои байналмилалӣ фаъолият мекард. Баъд аз соли бӯҳронии 2008 то кунун вазъи молии хабаргузорӣ ба шиддат заиф шудааст. Ман ҳамчун молик ба чунин натиҷа расидам, ки ин хабаргузорӣ дигар имкони рушдро надорад. Дар ин муддат назари ман ҳам роҷеъ ба масоил тағйир ёфт ва тасмим гирифтам, ки дигар ба сурати фаъолона машғули кори жураналистӣ набошам. Онро ба сурати ройгон ва барои ҳамеша ба ихтиёри ҷамъияти «Муҳаммад Ҳилол» додам. Бовар дорам, ки молики нав метавонад кори хабаргузориро муваффақона пеш барад»,-афзуд ӯ.

Молики собиқи хабаргузории «Авесто» мегӯяд, акнун бо эҳтимоли зиёд шояд ба тиҷорат машғул шавад, аммо ҳамзамон муаллифи матбуот боқӣ хоҳад монд.
Зафар Абдуллоев вуҷуди ҳар гуна фишор дар гирифтани чунин тасмимро рад мекунад. Вай мегӯяд, харидорони дигаре низ ба ӯ пешниҳоди фурӯхтани хабаргузориро дода буданд, аммо бо эҳтимоли зиёд ҳадафи онҳо ба даст овардан ва баъдан куллан бастани «Авесто» буд.

Аммо акнун суол ин аст, ки бо молики нав пайдо кардани хабаргузории «Авесто» самту сӯ ва ҷиҳати фаъолияти он низ тағйир пайдо хаҳад кард ва ё ба ҳамин шева ба фаъолияти худ идома хоҳад дод.

Ҷамшед Улмасов, сардабири нашрияи русизабони “Бизнес и Политика”, ки акнун молики хабаргузории “Авесто” ҳаст, мегӯяд, тағйири усулие дар фаъолияти ин хабаргузорӣ пеш нахоҳад омад.

Ҷаноби Улмасов мегӯяд: «Дар сиёсате, ки то кунун Зафар Абдуллоев пеш мебурд, дар ин хабаргузорӣ тағйироте пеш нахоҳад омад. Танҳо барои тақвияти бештари хабаргузорӣ талош хоҳем кард, то матолиб ва хабарҳои бештареро пӯшиш диҳем. Инчунин, талош мекунем, ки нашри хабарҳо бо забони англисиро низ роҳандозӣ кунем.»

[b]Аз тиҷорати сухан ба тиҷорати коло[/b]

Хабаргузории “Авесто” дар соли 2004 тавассути созмони иҷтимоии «Кӯҳи нор» таъсис шуда буд. Ин хабаргузорӣ дар баробари «Азия-плюс» ва хабаргузории давлатии «Ховар» яке аз се хабаргузории умдаи Тоҷикистон маҳсуб мешавад, ки ахбори кишварро пӯшиш медиҳанд.

Вале бештар аз як соли охир «Авесто» бо нашри матолиби интиқодӣ маълум шуда буд. Дар ин муддат «Авесто» бисёр талош кард, то робитае миёни мақомоти сиёсии кишвар ва ширкати Талко, инчунин, муомилоти молии онро ошкор кунад.

Ҳоло Зафар Абдуллоев ба нашрияи ба гуфтаи худаш номуназзами нашрияи «Факты и комментарии» идома хоҳад дод, вале он ҳам ба гуфтаи худаш як амри муваққат аст.

Ӯ мегӯяд, бештар моил аст ба тиҷорат машғул шавад. Акнун на тиҷорати хабар ё сухан, балки тиҷорати коло.

Раҳматкарими Давлат

Источник: http://www.ozodi.org/content/article/2293604.html

Ҳукуматдорони Миср пахши барномаҳои телевизиони «Ал-ҷазира»-и давлати Қатарро дар қаламрави ин кишвар манъ карданд. Тибқи иттилои телевизиони давлатӣ, ҳамчунин фаъолияти журналистон ва дафтари намояндагии ин ширкати телевизионӣ манъ шуда, дастарсӣ ба «Ал-ҷазира» аз тариқи алоқаи маҳвораӣ низ масдуд гардид.

Аҳолии Миср маъмулан хабарҳои кишварашонро тариқи ҳамин ширкати телевизионӣ дастрас мекарданд ва гузоришоти зиндаи ин шабака сурати ҳолро возеҳтару равшантар инъикос менамуд. Сокинон мегӯянд давлат беш аз пеш дастарсии онҳоро ба ахбори дақиқ маҳдуд кардааст ва ширкатҳои телевизиониву радиоии давлатӣ ахбореро пешкаш мекунанд, ки даҳҳо бор сонсур шудааст.

«Ал-ҷазира» зарфи чанд рӯзи охир халои иттилоотиро роҷеъ ба рӯйдодҳои Миср пур мекард, ки акнун ҷои он холӣ монд.

Фирӯзи МУҲАММАД, TojNews

Источник: http://tojnews.org/taj/index.php?option=com_content&task=view&id=11177&Itemid=30

Хабарнигорони минтақаи Қӯрғонтеппа маҳфилеро бо номи «маҳфили журналистон» таъсис додаанд, ки он моҳе як маротиба баргузор шуда, ҳамаи журналистонро ҷамъ мекунад. Дар нахустин маҳфиле, ки рӯзи 29-уми январ дар бинои Раёсати телевизион ва радиои вилоят баргузор гардид, Саидқул Шомалангзода — сухангӯи дафтари матбуотии раиси вилояти Хатлон баён дошт, ки ин маҳфил аз ҷониби худи хабарнигорон таъсис ёфта, аслан мавзӯҳои вобаста ба мушкилоти рӯзноманигорони минтақаро баррасӣ менамояд.

Дар нахустин маҳфил аслан мушкилоти пайдо намудани иттилоъ аз ҷониби мансабдорон матраҳ гардида, аз ҷумла гуфта шуд: «Баъзе хабарнигорон зимни пайдо кардани хабар аз мансабдорони вилояти Хатлон ба мушкилот рӯ ба рӯ мешаванд. Бисёре аз мансабдорон барои пешкаши иттилоъ аз онҳо мактуби расмии махсусеро аз номи раиси вилоят талаб мекунанд ва ба ин баҳона аз ҳамкорӣ бо хабарнигорон дар масъалаи пешкаши иттилоъ худдорӣ меварзанд».

Мушкили дигаре, ки дар маҳфил сари он баҳс ба вуҷуд омад, вокуниш нишон надонани баъзе аз мансабдорони вилоят ба матлабҳои навиштаи таҳлилию танқидии хабарнигорон мебошад.

Аксари журналистон гуфтаҳои хешро аз баргузории нишастҳои хабарии Шарифхон Самиев — раиси шаҳри Қӯрғонтеппа мисол оварданд, ки ба гуфтаи онҳо, муносибати шаҳрдор бо хабрнигорон дар нишастҳояш нигаронкунанда мебошад.

Рустами САФАР, TojNews

Источник: http://tojnews.org/taj/index.php?option=com_content&task=view&id=11167&Itemid=28

Дар шаҳри Қӯрғонтеппаи вилояти Хатлон нахустин маҳфили “Хабарнигорон” баргузор шуд, ки дар он хабарнигорон мавзӯъи ҳамраъйии рӯзноманигоронро мавриди баррасӣ қарор доданд.Дар ин маҳфил, ки ба ҷуз хабарнигорон дар он мақомоти раёсати вилоят низ ҳузур доштанд, таъкид шуд, ки хабарнигорон дар заминаи дастарӣ ба хабар аз “мансабдорони вилоят” бо мушкилот рӯ ба рӯ мешаванд, зеро аксаран аз хабарнигорон барои мусоҳиба иҷозати катбии раиси вилоят тақозо мешавад.
Хабарнигорон ҳамчунин шикоят карданд, ки мақомоти маҳаллӣ дар посух ба гузориш ва мақолаҳо дар расонаҳо “аслан вокуниш нишон намедиҳанд.”
Дар маҳфили хабарнигорони расонаҳои тоҷикӣ ва ӯзбакию русии Қӯрғонтеппа ширкат карданд. Онҳо аз риъоят нашудани одоб аз сӯйи бархе аз мақомот дар ҷараёни нишастҳои матбуъотӣ шикоят карданд.
Хабарнигорон барои мисол аз Шарифхон Самиев, шаҳрдори Қурғонтеппа мисол оварданд. Ба гуфтаи онҳо оқои Самиев дар ҷараёни як нишасти матбуъотӣ хабарнигори ҳафтаномаи ӯзбакии “Халқ овозӣ”-ро, ки ба сар кулоҳи тоҷикӣ дошт, “Тоқӣ!” садо додааст, ки боиси норизоятӣ ва ранҷиши хабарнигорон гаштааст.

Источник: http://www.bbc.co.uk/tajik/news/2011/01/110131_sq_ak_press_freedom.shtml

Таркиш дар фурудгоҳи «Домодедово», ки боис ба кушта шудани ду шаҳрванди Тоҷикистон низ шуд, аз муҳимтарин матолиби ин ҳафтаи нашрияҳои Душанбест.
«Боз навҳаи «Бачамой …» баланд шуд», «Ноновари хона», «Тоҷикистониёни кушташуда», «Теракт дар Маскав: тоҷикон фавтиданд» Таҳти ин сарлавҳаҳо бахши аъзами ҳафтномаҳои чопи Душанбе ҳодисаи таркиш дар «Домодедово» ва куштаву захмӣ шудани шаҳрвандони Тоҷикистонро бо аксҳо ва нигаронӣ аз ваҳшати терроризм ба риштаи тасвир кашидаанд.

[b]»Мардони ватан нонбиёрӣ рафтанд»[/b]

«Азия-плюс» бо хабарҳои расмӣ дар робита ба таркиш иктифо намуда, ному насаби ду тан аз кушташудаҳо ва 16 захмишударо бо нишонии пурраашон дарҷ кардааст.

«Миллат» як сафҳаи худро ба ин ҳодисаи маргбор бахшида, изҳори таассуф мекунад, ки тоҷиконро бе ин ҳамалоти террористӣ ҳам скинҳедҳо ё тоссарҳо ва миллатгароёни рус таъқиб мекунанду ба қатл мерасонанд. Ба навиштаи ин ҳафтанома, дар ҳодисаи «Домодедово» низ балои марг ба сари ҳамватанони бечораи мо рехтааст.

«Пайкон» зери сарлавҳаи «Мардони ватан нонбиёрӣ рафтанд» аксҳоеро аз лаҳзаҳои таркиш дар «Домодедоево» дар сафҳаи аввали худ ҷой додааст.

«СССР» ду саҳифаи худро ҳамроҳ бо аксу хабарҳо ба таркиши «Домодедово» ихтисос дода, таъкид мекунад, ки новобаста аз изҳои «қафқози»-ю «исломӣ» мақомоти Русия бояд дастандаркорони аслиии ин воқеаро фош кунанд. Зеро ба навиштаи ин нашрия, Русия дар ростои баргузории як маъракаи муҳими ҷаҳонӣ Олимпиадаи Сочӣ ва Ҷоми ҷаҳон-2018 қарор дорад.

[b]Чаро вазорати муҳоҷирон таъсис нашуд?[/b]

«Фараж» дар заминаи ҳодисаи «Домодедово» ба масъалаи таъсиси Хадамоти муҳоҷират ҳам таваҷҷӯҳ намуда, навиштааст, ки бунӣди ин ниҳод бисёр муҳим аст, вале набояд ин идора ба манбаи даромади чанд масъули дигар табдил ёбад.

Ба ҳамин мавзӯъ нашрияи Ҳизби наҳзати исломии Тоҷикистон — «Наҷот» низ рӯ оварда, таҳти унвони «Чаро вазорати муҳоҷират таъсис дода нашуд?» зарурати як ниҳоди фарогирро, ки тавонад лашкари муҳоҷирони тоҷик дар Русияро танзим кунад дар миён гузоштааст.

«Нигоҳ» низ ба зарур будани ин хадамот таъкид карда, менависад, ки барои ҳамаҷониба таҳти назорат қарор додани муҳоҷирони корӣ ниҳоди босалоҳиятар, яъне вазорат зарур аст.

[b]Қонунҳои ғайриодии Тоҷикистон[/b]

Дар ҳоле ки аз тариқи расонаҳои давлатӣ ва ғайридавлатӣ баҳси қонуни масъулияти падару модар идома дорад, «Азия Плюс» менависад, Тоҷикистон чанд қонуни ғайриодие қабул кардааст, ки дар ҳеҷ гӯшаи дунё вуҷуд надорад.

Яке қонуни танзими расму оинҳо ва ҳоло — тарҳи қонуни масъулияти падару модар. Ин ҳафтанома пешниҳод мекунад, ки як қонуни дигари ғайриодӣ ҳам бояд пазируфта шавад ва ин ҳам қонун дар бораи мубориза алайҳи маҳалгароӣ.

Дар ҳамин ҳол, шоир Бозор Собир қабл аз бозгашташ ба Амрико дар сӯҳбат ба нашрияи «Миллат» ба номуассир будани ҳузури аҳзоби сиёсӣ таъкид карда, гуфтааст, аксари ин аҳзоб барои ҷомеаи Тоҷикистон зарур нестанд, бахусус, ҳизби динии наҳзати исломӣ.

[b]Оромгоҳи бузургон дар Лучоб[/b]

Дар ҳоле ки ҳафтаномаҳо ба масоили мухталифи ҷомеаи Тоҷикистон таваҷҷӯуҳ доранд, ҳафтаномаи «СССР» таҳти унвони «Дар бодияи хомӯшони Миллат» аз оромгоҳи Лучоб гузориши муфассале нашр намудааст, ки вазъи ногувори қабри чеҳраҳои фарҳангу ҳунар ва адаби тоҷикро бо аксҳои мухталиф тасвир кардааст.

Ин мақола ба 100-солагии Мирзо Турсунзода, шоир ва қаҳрамони миллии Тоҷикистон бахшида шудааст. Ба навиштаи ин ҳафтанома, мармари марқади оромгоҳи устод Турсунзода рахна хӯрда, навиштаҳои қабр нохоно шудаанд ва қабри дигар аз шоирону ҳунармандони номовари тоҷик, ки дар ин оромгоҳ ҳастанд ба вайрона табдил шудааст.

Мирзонабии Холиқзод

Источник: http://www.ozodi.org/content/article/2288910.html

[b]Додгоҳи ноҳияи Шоҳмансур аз баррасии даъвои хабаргузории «Авесто» алайҳи ширкати «Сомон Эйр» худдорӣ кардааст.[/b]

Зафар Абдуллоев, сардабири нашрияи «Факти и комментарии» ва хабаргузории «Авесто» аз болои чанд ширкат, аз ҷумла ширкати ҳавопаймоии «Сомон Эйр» ба додгоҳ шикоят бурда ва даъво кардааст, ки ин ширкатҳо ба саволҳои нашрия посух нагуфта, қавонини ҷории кишварро зери по гузоштаанд.

Аммо додгоҳи ноҳияи Шоҳмансур аз баррасии даъвои Зафар Абдуллоев нисбат ба раҳбари ширкати «Сомон Эйр» Алишер Рустамов худдорӣ карда, гуфтааст, ки ин баҳс бояд дар додгоҳи иқтисодӣ мавриди баррасӣ қарор бигирад.

Зафар Абдуллоев мегӯяд, ӯ ҳеҷ гуна даъвои иқтисодӣ надорад, ки баҳсро ба додгоҳи иқтисодӣ бикашад. Балки даъвои ӯ аз болои раиси «Сомон Эйр» барои посух надодан ба саволҳои нашрия ва зери по гузоштани чанд қонун, аз ҷумла Қонуни матбуоти Тоҷикистон аст.

Оқои Абдуллоев гуфтааст, «ин тасмими додгоҳи сиёсӣ аст, на ҳуқуқӣ. Ва номи ширкати мазкур ба гуфтаи коршиносон, ба Ҳасан Асадуллозода, додарарӯси президенти Тоҷикистон ва шахсони наздики ӯ робита дорад. Барои ҳама маълум аст, ки ӯ дар низоми сиёсии Тоҷикистон як мӯҳраи муҳим аст. Намедонам, ки бар кадом асос додрас ин масъаларо ба додгоҳи иқтисодӣ ҳавола кардааст.»

Зафар Абдуллоев гуфтааст, аз болои ин тасмими додгоҳи Шоҳмансур ба додгоҳи шаҳри Душанбе шикоят хоҳад бурд.

Хабаргузории «Авесто» аз болои ширкатҳои «Сомон Эйр», «Вавилон-М», «Барқи тоҷик» ва «Воҳиди махсус» -и Вазорати корҳои дохилӣ ба додгоҳ шикоят бурда ва гуфта буд, ки ин муассисаҳо аз додани посух ба номаҳои расмии хабаргузорӣ сарфи назар кардаанд. Аммо бархе аз ин муассисаҳо чунин даъворо беасос хонда буданд.

Дар ин номаҳо роҷеъ ба чӣ мавзӯъҳое аз раҳбарони муассисаҳои номбурда суол шудааст, ки онҳо нахостаанд посух бигӯянд?

Зафар Абдуллоев, раҳбари хабаргузории «Авесто» мегӯяд: «Ба сурати мисол, мо аз «Воҳиди махсус» пурсида будем, ки кормандони ин ниҳод дар кадом қаламрав ҳаққи фаъолиятро доранд, чаро онҳо айни вазифаҳои бозрасии давлатии автомобилиро такрор мекунанд. Ҳамчунин аз раҳбари ин воҳид пурсида будем, ки чӣ моликияте дорад, назири амволи манқул ва ғайри манқул. Аз «Сомон Эйр» пурсида будем, ки оё дарвоқеъ дуруст аст, ки муассисони он дар минтақаи офшори Вирҷиния ҳастанд? Чӣ робитае бо «Талко менеҷмент» доранд? Ва аз кадом сарчашма 180 миллион доллар барои харидории «Боинг» дарёфт мекунанд? Суолҳое ҳам, ки аз ширкати «Вавилон» доштем ба мушкили сайтҳои интернетӣ дар тирамоҳи гузашта, инчунин ба ҳодисаи қатъи робитаи телефонӣ бо минтақаи Рашт вобаста буд. Ва аз ширкати «Барқи тоҷик» низ роҷеъ ба фаъолияти ин корхона ва қарзҳои он, инчунин робитаи он бо сохторҳои молии дигар ва «Талко» пурсида мешуд, ки мутаасифона посух дарёфт накардем.»

Аммо мақомоти ширкати «Барқи тоҷик» мегӯянд чунин даъвое асос надорад, зеро масъулини «Барқи тоҷик» ба дархости хабаргузории «Авесто» посух додаанд.

Источник: http://www.ozodi.org/content/article/2289906.html

[b]Сардори раёсати Вазорати корҳои дохилӣ нашрияи «Азия-Плюс»-ро ба додгоҳ кашида, 1 миллион сомонӣ ҷуброн хостааст.[/b]

Анвар Тағоймуродов, сардори раёсати ҷиноёти созмонёфтаи ВКД зимни даъвои худ гуфтааст, ки дар мақолае дар ҳафтаномаи «Азия плюс» дар ҳаққи ӯ суханони дурӯғ ва таҳқиромез нашр шудааст, ки шаъру шараф ва ҳайсияти ӯро паст мезанад. Аммо масъулини нашрия ва муаллифи мақола ин даъворо рад мекунанд.

[b]»Азиа плюс» боз ба додгоҳ кашида шуд[/b]

Мурофиаи пешакӣ аз рӯи даъвои Анвар Тағоймуродов, сардори раёсати ҷиноёти созмонёфтаи ВКД аз болои ҳафтаномаи «Азия плюс», ки қарор буд имрӯз оғоз шавад, бо хоҳиши ҷониби ҷавобгар ба таъхир гузошта шуд.

Анвар Тағоймуродов даъво дорад, ки дар мақолаи «Тафтишот ё инквизитсия?» аз моҳи декабри соли 2010 шахсияти ӯ ва ҳайсияти корияш паст зада шудааст ва бояд нашрия онро бар ивази 1 миллион сомонӣ ҷуброн кунад. Дар ин мақолаи таҳқиқотии хабарнигор Рамзия Мирзобекова, саҳнаҳое аз шиканҷаи боздоштшудагон тавассути кормандони раёсати мубориза бо ҷиноёти созмонёфтаи ВКД, аз ҷумла дар вилояти Суғд тасвир шуда буд.

Ин пардакушоӣ аз саҳнаҳои шиканҷа дар мақолаи мазкур бар асоси нақли ҷабрдидаҳо ва санадҳои парвандаҳои ҷиноӣ сурат гирифта буд. Аммо Анвар Тағоймуродов, дар ин мақола мавриди ба иддаои худаш дурӯғ ва таҳқирро нисбат ба шахсияти худаш кашф кардааст ва аз додгоҳ хостори расидагӣ ба қазия ва рӯёндани ҷуброн шудааст.

Сардори раёсати мубориза бо ҷиноёти ВКД дар аризаи даъвогии худ ҳатто таъкид кардааст, ки шояд муаллифи мақола ва хабарнигорони дигар омилони ҳамлаи интиҳории Хуҷандро мешинохтанд ва аз нияти онҳо огаҳӣ доштан ва эҳтимолан бо онҳо ҳамкорӣ доштанд.

[b]»Азия плюс» иддаоро рад мекунад[/b]

Аммо муаллифи мақола ва масъулини нашрияи «Азия плюс» ин ҳама даъворо рад мекунанд. Марат Мамадшоев, муҳаррири ин нашрия мегӯяд, ки чунин даъвое асос надорад. Ӯ мегӯяд: «Ин даъво заминаи қонунӣ надорад, ҳатто бо забони давлатӣ пур аз иштибоҳи имлоӣ ва мантиқӣ навишта шудааст. Даъвогар аз мансаби худ истифода кардааст. Гарчанде, ки даъворо аз номи шахси воқеъӣ, яъне аз номи худаш пешниҳод кардааст. Ҷолиб ин аст, ки гӯё ҳайсияту шахсияти раёсати УБОП таҳқир шудааст. Аммо аз ин ҷо бар меояд, ки гӯё онро ба моликияти ҳуқуқии худаш табдил кардааст».

[b]Оё журналистон бо террористон ҳамкорӣ мекунанд?[/b]

Дар ҳоле як мақоми аршади вазорати дохилӣ аз журналистон ба унвони ҳамкорони эҳтимолии террористон ном мебарад, ки дар пайи ҳамла ба корвони нерӯҳои вазорати дифоъ ва куштани шудани 26 сарбоз, вазири дифоъи Тоҷикистон низ зимни баёнияе айни чунин даъвоеро матраҳ карда ва гуфта буд, ки журналистон бо амалкарди худ ба гурӯҳҳои террорстӣ кӯмак мекунанд. Раиси ҷумҳури Тоҷикистон ҳам гуфта буд, ки бархе расонаҳо ҷангҷӯ шудаанд ва ба думболи он чанд нашрия барои як муддат аз нашр боз монданд.

Аз як соли пеш то кунун чанд маврид парванда дар додгоҳҳои Тоҷикистон бар алайҳи нашрияҳои мустақил дар ҳоли баррасӣ қарор дорад. Ва дар ҳамаи мавридҳо даъвогарон аслан мақомоти давлатӣ ҳастанд. Феълан баррасии даъвои се додрас аз болои нашряи «Азия плюс» ва инчунин нашрияҳои «Озодагон» ва «Фараж»дар додгоҳи ноҳияи Сино ҳамчунон идома дорад. Даъвогарон хостори мутавақиф шудани ин нашрияҳо ва пардохти товон ба маблағи 5, 5 миллион сомонӣ шудаанд.

[b]Раванди фишор ба матбуот[/b]

Акнун даъвои навбатӣ аз болои «Азия плюс» ва тақозои тавон ва он ҳам аз сӯи як мансабдор, нигаронии маҳофили матбуотиро ба думбол доштааст. Масъулини иттиҳодияҳои хабарнигорӣ мегӯянд, ки даъво аз болои нашрияҳо дар Тоҷикистон дар ҳоли табдил шудан ба як раванд ё тамоюл аст ва он саранҷом бар зарари озодии баён тамом хоҳад шуд.

Нуриддин Қаршибоев, раиси Анҷумани расонаҳои мустақили Тоҷикистон мегӯяд: «Муроҷиати мардум ва мақомот ба додгоҳ нишонаи мусбат аст, ки шаҳрвандон мехоҳанд низоъро дар чаҳорчӯби қонун ҳал кунанд. Аммо тарафи манфии кор ин аст, ки ҳадафи даъвогарон на рӯи об омадани ҳақиқат ва адолат, балки фишор болои матбуот аст. Аксари даъвоҳо характери худсафедкунӣ дорад. Ва ин паёмади фармони раиси ҷумҳур бар бораи вокуниш ба навиштаҳои матбуот аст. Мутаасифона, дар он фармон шеваи иҷрои он мушаххас нашудааст. Идомаи ин ҳол боиси афзоиши худсензурӣ ва халал ворид шудан ба фаъолияти матбуот мешавад».

Аз моҳи марти соли гузашта ба ин сӯ дар додгоҳи ноҳияи Фирдавсӣ баҳси вазорати кишоварзӣ бо нашрияи «Миллат» низ идом адорад. Вазири кишоварзии Тоҷикистон даъво дорад, ки ҳафтаномаи «Миллат» бо нашри матлабе зери номи «Вазорати кишварзӣ фасодзадатарин ниҳод» кормандони вазоратро тӯҳмат кардааст ва хостори пардохти як 1 миллион сомонӣ ҷуброн шудааст.

Аммо то кунун додгоҳи ноҳияи Фирдавсӣ яке дигар аз нашрияҳои Тоҷикистон бо номи «Пайкон»-ро дар тӯҳмат ба идораи «Тоҷикстандатр» ба маблағи 300 ҳазор сомонӣ ҷарима баста аст.

Раҳматкарими Давлат

Источник: http://www.ozodi.org/content/article/2288990.html

[b]Раиси бахши ҷароими созмонёфтаи вазорати умури дохилии Тоҷикистон ҳафтаномаи «ASIA-Plus»-ро ба додгоҳи ноҳияи Фирдавсии шаҳри Душанбе кашида ва пардохти як милюн сомонӣ ғароматро аз ин нашрия тақозо кардааст.[/b]

Анвар Тағоймуродов иддаъо дорад, ки ин нашрия бо чопи матолиби таҳвиномез ба эътибори ин ниҳоди интизомӣ латма задааст.

Вале масъулони нашрия ва вакили мудофеъи он ин итиҳомро бепоя медонанд. Бо ин вуҷуд, қарор аст якуми феврал додгоҳ дар ҷаласаи нахустини худ ин қазияро баррасӣ кунад.

Анвар Тағоймуродов ба унвони далел ба матлаби «Тафтиш ё инквизитсия», ки авоили моҳи декабр дар нашрияи «ASIA-Plus» чоп шуд, ишора кардааст, ки дар он аз мавориди шиканҷа алайҳи боздоштшудагон дар ноҳияи Исфараи вилояти Суғд интиқод шуда буд.

Муаллифи ин матлаб аз номи пайвандони афроде, ки иддаъо мекунанд мавриди шиканҷа қарор гирифтаанд, навиштааст, ки маъмурони пулис барои дарёфти гувоҳӣ аз онҳо аз зарбу шатм истифода кардаанд.

Ҳамчунин, дар ин матлаб таъкид шудааст, ки созмони Афви Байналмилалӣ (Amnesty International) иддаъо дорад, ки дар фаъолияти бахши ҷароими созмонёфтаи вилояти Суғд аз шиканҷа ба сурати фаровон истифода мешавад.

Вале оқои Тағоймуродов ин иддаъоҳоро “беасос” хонда ва гуфтааст, ки «ASIA-Plus» бо чопи чунин матолибе эътибори чунин як ниҳоди қудратии Тоҷикистонро пойин бурда ва ин матлаб аз “таҳвин ва иттилоъоти муғризона” иборат аст.
Дар мақолаи «ASIA-Plus» аз ҷумла зикр шуда буд, ки шояд яке аз далоили ҳамлаи интиҳории моҳи сентябр ба бахши ҷароими созмонёфтаи пулис дар вилояти Суғд ҳамин вуҷуди мавориди густардаи шиканҷа дар ин ниҳод буда бошад.

Аммо бо ишора ба ин нукта, оқои Тағоймуродов дар шикояти худ ба додгоҳ навиштааст: «Аз ин навиштаҳои Р. Мирзобекова ва хабарнигорони дигар чунин бармеояд, ки онҳо омилони ин ҳамлаи теруристиро мешинохтанд, аз нияти бади онҳо огоҳ буданд ва эҳтимолан бо онҳо робита доштанд.»

Оқои Тағоймуродов ҳамчунин ба матлаби дигаре аз ин нашрия ишора кардааст, ки дар бораи мавриди шиканҷа қарор гирифтани мулло Мавлавии Абдуқаҳҳор, сокини ноҳияи Рӯдакӣ ва Фаромуз Амонбеков, як сокини шаҳри Хоруғ, ҳикоят мекунад. Вай иддаъоҳои матраҳшуда дар ин матлабро низ “беасос ва бӯҳтон” номидааст.
Марат Мамадшоев, муҳаррири нашрияи «ASIA-Plus», дар сӯҳбат бо Би-би-сӣ гуфт, ки баъд аз чопи ин матолиб ҳеҷ вокунише аз сӯйи мақомоти пулис ба он ироа нашуда буд. Вай афзуд, ки ин иддаъои оқои Тағоймуродовро қабул надорад, зеро «куллияи иттиҳомот бепоя аст.»

Оқои Мамадшоев ҳамчунин аз он изҳори таъаҷҷуб кард, ки агар чопи ин матолиб ба эътибори бахши ҷароими созмонёфтаи пулис асар гузошта бошад, пас чаро оқои Тағоймуродов аз номи худ ба додгоҳ муроҷиъа кардааст?

Вай афзуд: «Оқои Тағоймуродов тақозо кардааст, ки як милюн сомонӣ ба суратҳисоби хусусии вай ирсол карда шавад. Магар бахши ҷароими созмонёфтаи пулис ба ширкати тиҷоратӣ табдил шудааст?»

Шӯҳрат Қудратов, вакили мудофеъи нашрияи «ASIA-Plus», мегӯяд, ки феълан аз шарҳи ин қазия худдорӣ мекунад, зеро қарор аст якуми феврал муҳокимаи нахусти додгоҳӣ оғоз ёбад.

Вале вай афзуд: «Даъвои оқои Тағоймуродов комилан бепоя аст. Гузашта аз ин, наҳваи таҳияи даъво аз лиҳози ҳуқуқӣ дуруст нест ва ман таъаҷҷуб мекунам, ки чаро додгоҳ ин гуна даъворо ба баррасӣ гирифтааст?»

Зимнан, барои бори нахуст нест, ки «ASIA-Plus» вориди қазияҳои додгоҳӣ бо афроди мухталиф мешавад. Соли гузашта чанд тан аз қуззоти тоҷик алайҳи нашрияҳои «ASIA-Plus», «Озодагон» ва «Фараж» ба додгоҳ шикоят карда ва пардохти панҷ милюн ғароматро аз ин ҳафтаномаҳо тақозо карда буданд.
Матолиби мавриди баҳс ба баррасии забоншиносон ироа шуд ва тӯли чанд моҳи ахир муҳокимаи ин қазия ба таъвиқ дароварда шудааст.

Соли гузашта Саломат Сафарова, як сокини Душанбе низ «ASIA-Plus»-ро ба додгоҳ кашида ва пардохти 12 ҳазор сомониро тақозо карда буд. Вале нашрия дар ин қазия баранда шуд.

Соли 2007 масъулони ширкати «Ситора», ки гуфта мешавад ба яке аз духтарони Президент Раҳмон муртабит аст, нашрияи «ASIA-Plus»-ро ба додгоҳ кашида ва пардохти 250 ҳазор сомонӣ ғароматро тақозо карданд. Вале дар ниҳоят ин қазия бо созиши ҷонибҳо анҷом ёфт.

Нуриддин Қаршибоев, раиси Анҷумани расонаҳои мустақилли Тоҷикистон, мегӯяд, ки афзоиши мавориди ба додгоҳ кашидани нашрияҳои мустақил дар ин кишвар падидаи хуб аст, ки нишонгари ҳалли мадании қазияҳо мебошад.

Вале аз сӯйи дигар, ба гуфтаи оқои Қаршибоев, чунин ба назар мерасад, ки баррасии ин қазияҳо дар додгоҳҳо замони тӯлонӣ сурат мегиранд, ки дар ниҳоят, фаъолияти расонаҳоро бо мушкил мувоҷеҳ мекунанд ва ин амр мӯҷиби афзоиши худсонсурӣ дар миёни хабарнигорон мешавад.

Источник: http://www.bbc.co.uk/tajik/news/2011/01/110127_if_court_asiaplus.shtml