Аз савум то панҷуми феврал торнамои ифшогари WikiLeaks панҷ номаи нави марбут ба Тоҷикистонро мунташир кард.

Ҳарчанд порчаҳо ва ишораҳое аз ин номаҳо пештар дар расонаҳои ахбори оми Олмон, Бритониё, Иёлоти Муттаҳида ва Русия чоп шудаанд, матни комилтари онҳо ҷузъиёти ҷолиб ва донистание дорад.

Се барқия аз дидору гуфтугӯҳои сафири Амрико дар Тоҷикистон Ричард Ҳоугленд бо раисиҷумҳур Эмомалӣ Раҳмон, сафири вақти Тоҷикистон дар Иёлоти Муттаҳида, Ҳамроҳхон Зарифӣ, ноиби аввали раиси Ҳизби наҳзати исломии Тоҷикистон ва вакили Маҷлиси намояндагон, Муҳиддин Кабирӣ ҳикоят мекунанд. Яки дигар аз мулоқоти сафири Амрико дар Тоҷикистон Кеннетс Гросс бо муовини раиси Кумитаи давлатии амнияти миллии Тоҷикистон Абдулло Назаров ва барқияи панҷум аз сафири Амрико дар Лондон аст, ки ба оғози кори телевизиони форсии Би-Би-Сӣ бахшида шудааст.

Мӯҳтавои барқияҳои марбут ба мулоқоти Ҳоугленд бо Раҳмон ва Гросс бо Абдулло Назаров мунташир шуда, аз барқияи марбут ба мулоқот бо Зарифӣ маълумоти моҷароангез берун омада буд ва мазмуни пурратари номаи марбут ба Кабирӣ аслан интишор нагаштааст.

[b]ДИПЛОМАТИЯИ ҶАНОБИ ЗАРИПОВ[/b]

Ниҳоят, барқияе дастраси ом гашт, ки дар атрофи номи вазири умури хориҷии Тоҷикистон, Ҳамроҳхон Зарифӣ сарусадои зиёд ба бор оварда буд.

Бархилофи интизориҳо, дар ин нома гуфта нашудааст, ки Зарифӣ мехоҳад, раисиҷумҳур Эмомалӣ Раҳмонро барканор кунад ва ҳукуматро ба даст бигирад. Аммо инро ҳам бояд афзуд, ки WikiLeaks шакли мухтасари барқияи сафири Амрико дар Тоҷикистон Ричард Ҳоуглендро нашр кардааст ва мегӯяд, шакли комили барқия дастрас нест. Шарҳ дода нашудааст, ки чаро матни пурра дастрас набудааст.

Ҷаноби Ҳоугленд менависад, дар рӯзҳои мураххасияш дар ватан сафири Тоҷикистон дар Амрико, Ҳамроҳхон Зарипов ба сафорати Амрико дар Душанбе даъват шуд ва дар мулоқоти рӯзи 19-уми октябри соли 2005 ӯро ноиби раиси раёсати Аврупо ва Амрикои Шимолӣ дар вазорат Сироҷ Раҷабов ҳамроҳӣ мекард. Ба назари Ҳоугленд ҳузури Раҷабов ба Зарипов имкон намедод, озодона сӯҳбат кунад ва танҳо дар поёни мулоқот, ҳангоми гардиш дар боғчаи сафорат, вақте ки Раҷабов чанд лаҳза ақиб монд, байни Зарипов ва Ҳоугленд сӯҳбати ошкорое сурат гирифт.

Дар ҳамин лаҳазот буд, ки Зарипов ба Ҳоугленд гуфтааст, Русия бузургтарин мушкили Тоҷикистон мебошад ва бо ҳар роҳ мехоҳад, ба густариши нуфузи Иёлоти Муттаҳида дар Тоҷикистон мумониат кунад. Вай меафзояд, раисиҷумҳур Раҳмонов зери ҳамлаҳои пайдарҳами на танҳо расонаҳои ҳамагонии Русия, балки Вазорати амнияти Тоҷикистон аст, ки Русия бар он ҳоким мебошад. “Зарипов гуфт, паёми Маскав, махсусан аз тариқи Вазорати амният ин аст, ки Иёлоти Муттаҳида мехоҳад, Раҳмоновро сарнагун кунад, русҳоро аз пойгоҳи ҳарбияшон берун афканад ва нуфузи Иёлоти Муттаҳидаро аз Афғонистон ба Тоҷикистон паҳн карда, онро ба ҳалқаи пайванд бо Қирғизистони таҳти таъсири Иёлоти Муттаҳида табдил диҳад.”

Зоҳиран, ин суханони сафир Зарипов дар посух ба суоли сафир Ҳоугленд дар бораи номаи ҳукумати Тоҷикистон бар зидди созмонҳои ғайридавлатии амрикоӣ, ба монанди Пажӯҳишгоҳи милли демократӣ, Фридом Ҳаус ва Интернюз садо додаанд. Зарипов ин номаро низ таъсири мустақими Маскав шумурдааст. Аммо ӯ нахостааст, дар ин бора дар ҳузури Раҷабов гап занад ва он вақт, дар сари миз ба Раҷабов нигариста, гуфтааст, аз чунин нома аслан хабар надорад.

Дар пайванд ба ин мавзӯъ Зарипов ҳамчунин аз мулоқоти президент Раҳмонов бо Ҷорҷ Сорос дар моҳи сентябри ҳамон сол (2005) дар ҳошияи ҷаласаи Маҷмаи умумии Созмони Милал дар Ню Йорк ёдовар шудааст. “Вай хотиррасон кард, ки Сорос аз Раҳмонов пурсид, то куҷо ӯ ба фаъолияти Пажӯҳишгоҳи ҷомеаи боз дар Тоҷикистон шубҳа дорад. Раҳмонов қотеъона посух дод, ки шубҳаи ӯ хеле зиёд аст ва аз фаъолияти ин созмон бодиққат муроқибат мекунад. То ҳоло ӯ ягон хато наёфтааст, аммо омодааст, агар камтарин “беназмӣ” ба гӯшаш расад, Соросро фавран хоҳад баст.”

Кӯтоҳи сухан, Ҳоугленд кӯмаки Зариповро дар ҳалли мушкил бо созмонҳои ғайридавлатии амрикоӣ мехоҳад ва Зарипов ӯро дилпур мекунад, ки мушкил бо сабурӣ ҳал хоҳад шуд. Ҳоугленд мегӯяд, пас дар посухи рамӣ ба ҳукумати Тоҷикистон шитоб нахоҳад кард.

[b]ДАР МОВАРОИ РУСИЯ ВА АМРИКО[/b]

Зарипов, дар ин байн, гуфтаҳои худро дар бораи хатаромезии вурудаш ба “бизнеси калон” шарҳ медиҳад. Вай мегӯяд, «Намояндаи доимии Тоҷикистон дар СММ, Рашид Олимов, аз мулоқоти Раҳмонов бо мудири кулли ширкати АЕС дар Ню Йорк пешгирӣ кард. Олимов ба Раҳмонов гуфтааст, ҳукумати Иёлоти Муттаҳида ширкати АЕС-ро барои он ба майдон хостааст, ки ҳамкориҳои Русия ва Тоҷикистонро дар бунёди нерӯгоҳҳои барқи обӣ шиканад ва Русияро аз Тоҷикистон хориҷ кунад.” Зарипов ба Ҳоугленд гуфтааст, “Ман омода будам, ки аз вазифа ронад шавам ё ҳатто ба зиндон афтам”, аммо Раҳмоновро қонеъ кардам, ки назари АЕС-ро шунавад ва акнун Раҳмонов, зоҳиран, андешаи ҳамкории АЕС ва РАО ЕЭС-ро пазируфтааст.

Сафир Ҳоугленд дар шарҳи ин нукта менависад, “ҳарчанд ин фарзияи Зарипов ба гунае худситоист, он бо чанде аз ҷузъиёти дигар, ки мо ҳамоно ҷамъу ҷӯр мекунем, ҳамоҳанг аст. Русия барои маҳдуд кардани таъсири Иёлоти Муттаҳида дар Тоҷикистон сарсахтона талош мекунад.”

Зарипов дар ин мулоқот Ҳоуглендро мутақоид кардааст, ки Раҳмонов аз умқ ва сатҳи муносибатҳои Тоҷикистону Амрико розист ва аслан хостори тағйири тунд, коҳиш ё густариши назарраси ин равобит нест. Биноан, Ҳугленд набояд ба номаи ҳукумати Тоҷикистон дар мавриди созмонҳои ғайридавлатӣ посухи тез ё ангезанда диҳад ва аз сабр кор гирад.

Дарвоқеъ, он вақт Иёлоти Муттаҳида ба ин нома вокуниши ҷиддӣ нишон надод ва ҳатто баста шудани Пажӯҳишгоҳи милли демократӣ дар Тоҷикистонро мисли як ҳабби талх фурӯ бурд.

Ҳоугленд ба ин нукта ҳам диққат додааст, ки Зарипов дар мавриди боздиди вазири умури хориҷии Амрико, Кондолиза Райс аз масҷиди ҷомеи Душанбе ва мактаби динии духтарона изҳори таҳайюр кардааст. Аз лаҳни барқияи Ҳоугленд бармеояд, ки ҳайрати Зарипов тобиши манфӣ доштааст. Ҳамзамон Зарипов тасдиқ кардааст, ки дар бораи боздиди Райс аз масҷид ва мадраса телевизиони давлатии Тоҷикистон ҳеҷ гуна хабар надод ва ҳеҷ кас аз ин боздид Зариповро огоҳ накард.

Ин нуктаро Ҳоугленд дар барқияаш шарҳ надода, танҳо бо зикри қаноатмандии Зарипов аз сафари хонуми Райс ба Тоҷикистон иктифо кардааст.

[b]КАБИРӢ ВА МУЛОҚОТИ РАЙСУ РАҲМОНОВ[/b]

Сафари хонуми Райс дар мулоқоти дигари Ҳоугленд, ин бор бо ноиби аввали раиси Ҳизби наҳзати исломии Тоҷикистон (ҲНИТ) ва узви Маҷлиси намояндагони Тоҷикистон, Муҳиддин Кабирӣ, рӯзи 22-юми ноябри соли 2005 низ баррасӣ шудааст. Кабирӣ боздиди Райсро аз масҷиди ҷомеаи Душанбе ва мадрасаи духтарона мавриди ситоиш қарор додааст, аммо шикоят кардааст, ки телевизиони давлатии Тоҷикистон ва куллан расонаҳои ҳамагонии давлатӣ дар бораи ин бахш аз сафари Райс ҳеҷ гуна маълумоте пахш накард.

Кабирӣ аз сафир Ҳоугленд тафсилоти мулоқоти Райс ва Раҳмоновро пурсидааст. “Сафир Кабириро мутмаин кард, ки вазир Райс ба Раҳмонов гуфт, Иёлоти Муттаҳида мехоҳад, интихоботи раёсатҷумҳурии соли 2006-и Тоҷикистон ба меъёрҳои байнулмилалӣ ҷавобгӯ бошад. Вай ба Раҳмонов фаҳмонд, ки интихоботи покиза танҳо рӯзи раъйдиҳииро дар назар надорад, балки ба ҳамин андоза муҳим аст, дар дарозмуддат сиёсатмадорон барои расондани паёми худ ба мардум ба васоити ахбори ом дастрасӣ дошта бошанд.”

Сафир ба Кабирӣ инро ҳам гуфтааст, ки бино бар паёми Райс ба ҳукумати Тоҷикистон, Иёлоти Муттаҳида мехоҳад, ҲНИТ-ро дар саҳнаи сиёсии Тоҷикистон фаъол ва бегазанд бубинад.

Кабирӣ зикр кардааст, ки мақомоти Тоҷикистон дар бораи демократия зиёд ҳарф мезананд, аммо дар амал демократияро хатаре ба қудрати худ мешуморанд ва ба саркӯб кардани он даст мезананд. “Вай изофа кард, ки худи ҲНИТ низ ба дараҷае, ки зарур аст, демократӣ нест, аммо дар шароити маҳдуди сиёсӣ ва фарҳангии феълӣ ба ҳадди имконаш талош мекунад.”

Ба ақидаи Кабирӣ, ҳукумат дар поёни ҷанги шаҳрвандӣ танҳо дар муқобили имконияти мухолифон ба истифода аз нерӯ ва бино бар заъфи худ маҷбуран бо гурӯҳҳои мухолиф ҳамкорӣ мекард. Ҳоло элитаи сиёсии ҳоким мебинад, ки мухолифони қавӣ ва мусаллаҳ дигар вуҷуд надоранд, идомаи муколамар зарур намешуморад.

Сафир Ҳоугленд дар посух гуфтааст, ҳукумати Тоҷикистон танҳо дар забон аз демократия ва чандандешӣ ҳимоят мекунад, аммо ҳарчӣ бештар ҳаёти сиёсиро зери назорат мегирад. “Ин як “демократияи идорашаванда”-и неошӯравист, на демократияи ҳақиқӣ ва бадбахтона, аз тарафи Маскав ташвиқ мешавад.” Кабирӣ гуфтааст, ҲНИТ ба ҳамин ҳам розист, аммо ҳарос дорад, ки ҳукумат то рафт худкома мешавад.

[b]РАҲМOНОВ ВА ИСЛОМ[/b]

Бино бар барқияе, ки торнамои Викиликс мунташир кардааст, сафир Ҳоугленд дар ин мулоқот оварда, ки “президент Раҳмонов зоҳиран дар пуштибонӣ аз ислом баёнияҳои оммавӣ медиҳад, аммо қоидаҳои тазодомезе мебарорад, ки ин мавқеъи ӯро коҳиш медиҳанд, аз ҷумла мамнӯъияти ахири пӯшидани ҳиҷоб дар мактабҳои умумӣ.”

Кабирӣ изҳори мувофиқат кардааст, ки чунин чораҳо бахши муҳофизакори ҳизби ӯро тундравтар мекунанд. Вай афзудааст, ин қарори ғалат тарафдорони ҳизби ӯро дар ҷомеа бештар кардааст. Дар ин робита ва ҳамчунин дар пайванд ба мавзӯъҳои дигари гуфтугӯ, ҷаноби Кабирӣ аз он изҳори нигаронӣ кардааст, ки аз як сӯ зери фишори қишри муҳофизакори ҳамҳизбиёни худ қарор дорад ва аз сӯи дигар зери зарбаҳои ҳукумат.

Вай мегӯяд, президент Раҳмонов намехоҳад, пас аз Нурӣ маҳз Кабирӣ раҳбари ҳизб шавад. Куллан ҳукумат, ба гуфтаи Кабирӣ, талош дорад, Кабириро аз саҳна берун ва ҳошиянишин кунад. Сафир дар шарҳи ин мавзӯъ менависад, “Ҳарчанд Раҳмонов ҲНИТ-ро як душмани хатарнок медонад ва ба бархе аз ҳамсӯҳбатони ғарбияш онро як созмони террористӣ меномад, вай инчунин мехоҳад ҲНИТ-ро дар зери Хаймаи Бузург бигирад, агар ба шарте ки ҳис кунад, метавонад, ба он назорат дошта бошад.”

Мулоқот дар даврае ба амал омадааст, ки раҳбари ҳизб Сайид Абдуллоҳи Нурӣ дар бистари беморӣ буд ва сафир ӯро “яке аз ҷангсолорони ҷанги шаҳрвандӣ меномад, ки Раҳмонов ба вай иҷоза дод, хеле сарватманд шавад.” Сафир ба нақл аз сиёсатмадорони дигар гуфтааст, бо ин роҳ Раҳмонов тавонист, Нуриро зери назорат бигирад. Аммо бо Кабирӣ чунин равобит надорад ва аз дидорҳои ӯ бо сафирони кишварҳои хориҷӣ ва сафарҳояш ба Ғарб шадидан нороҳат аст.

Кабирӣ дар ин мулоқот бо Ҳоугленд гуфтааст, ҳадафи асосии ӯ ҳамчун “сиёсатмадори мухолиф” эҳтиёт аз зиндон шудан аст. Кабирӣ ин нуктаро пас аз шӯхие зикр мекунад, ки раиси маҷлис Сайдулло Хайруллоев ӯро бо гарданбанди норанҷӣ дар порлумон дида, ҳушдор додааст, ки дигар бо ин галстук дар мазҳари ом зоҳир нашавад. Кабирӣ посух додааст, ки ҳадафаш ягон паёми сиёсӣ аз инқилобҳо ранга нест.

Ба ёд орем, ки воқеа чанде баъд аз инқилоби норанҷии Украина рӯй додааст. Кабирӣ гуфтааст, Хайруллоев ҳамеша талош мекунад, ӯ ва раиси Ҳизби комунисти Тоҷикистон Шодӣ Шабдоловро зери назорат дошта бошад.

[b]МАНЗАРАИ ДЕМОКРАТӢ[/b]

Сафир дар ин мулоқот назари Кабириро дар мавриди ду ҳизби навтаъсис – Ҳизби ислоҳоти иқтисодӣ ва Ҳизби аграрӣ пурсидааст. Кабирӣ посух додааст, ки ҳарду ҳизб аз офаридаҳои Раҳмонов шумурда мешаванд, то манзараи дурӯғине падидор шавад, ки Раҳмонов аз пуштибонии чандҳизбӣ бархӯрдор аст, онҳо нишонаи демократияи ӯянд ва аз сӯи дигар ин аҳзоб бояд ҳизбҳои воқеии мухолифро ба кунҷи саҳна тела диҳанд.

Аммо Кабирӣ иқрор кардааст, ки ҳарчанд ин аҳзоб сунъиянд вай аз онҳо истиқбол мекунад, зеро афзоиши шумораи ҳизбҳо дар саҳна ба фоидаи кор аст. Мумкин аст, онҳо дар оянда мустақилияти бештар ба даст оранд ва битавонанд, ба эътилофҳое шарик шаванд. Сафир дар шарҳи худ ба ин назари Кабирӣ онро аз як сӯ баҳимматона ва аз сӯи дигар содалавҳона мешуморад, зеро агар ин аҳзоб аз хатти кашидаи Раҳмонов берун пой гузоранд, аз байн хоҳанд рафт.

Натиҷагирии сӯҳбати Ҳоугленд ва Кабирӣ хушбинона нест. Ҳарду ба хулосае меоянд, ки ҳукумат ба зуҳури насли нави сиёсатмадорон роҳ нахоҳад дод. На танҳо дар саҳнаи миллӣ, балки ҳатто дар сатҳи минтақа ва ноҳияҳо низ. Чанде аз сарварони эҳтимолӣ дар маҳбасанд ва чунин дурнамо дигаронро дар ҳолати тарс нигоҳ медорад. Аммо Кабирӣ мегӯяд, шахсе монанди раиси Ҳизби сотсиал-демократи Тоҷикистон, Раҳматулло Зойиров метавонад ба лидери ҳақиқии миллӣ табдил ёбад, аммо ӯ дар сатҳи умумимиллӣ муаррифӣ нашудааст. Кабирӣ мегӯяд, “агар ӯ дар соли оянда лоақал панҷ бор дар телевизиони давлатӣ зоҳир шавад, пойгоҳи воқеие пайдо хоҳад кард. Аммо чунин нахоҳад шуд, зеро Раҳмонов ба ин роҳ нахоҳад дод.”

Кабирӣ аз он низ шикоят кардааст, ки дари сафорати Русия барои ҲНИТ баъд аз сафир таъин шудани Абдулатипов баста шудааст. Ин ҳам дар ҳоле ки Кабирӣ хостори равобити ҳасана бо Русия аст.

Сафир Ҳоугленд дар шарҳи худ менависад, Кабирӣ сиёсатмадорест, ки майдон мехоҳад, вале Раҳмонов ба ӯ чунин майдонро нахоҳад дод. Биноан, меафзояд Ҳоугленд, кишварҳои Ғарб бояд роҳҳои дурусту боэҳтиёти муаррифии ӯро пайдо кунанд. Ва ин роҳҳо, ба гуфтаи сафир набояд танҳо аз даъват ба семинару конфаронсҳо иборат бошад.

Салими Аюбзод

Источник: http://www.ozodi.org/content/article/2301768.html

Ҳизби наҳзати исломии Тоҷикистон ҳамлаи рӯзи душанбе ба Ҳикматулло Сайфуллозода, аз аъзои фаъоли ин ҳизбро амале “тарҳрезишуда алайҳи ҲНИТ” ва навъе “душмантарошӣ” хонд.

Ин матлаб шоми рӯзи 8-уми феврал дар баёнияи Шӯрои сиёсии ин ҳизб дар поёни ҷаласаи изтирории ҳизб дар робита бо ҳамла ба оқои Сайфуллозода зикр шудааст.

Идомаи маводро дар бахши таҳлилии сомона мутолиа кунед: [url=http://www.taj.nansmit.tj/analysis/?id=15]http://www.taj.nansmit.tj/analysis/?id=15[/url]

Источник:

Ҳизби наҳзати исломии Тоҷикистон ҳамлаи рӯзи душанбе ба Ҳикматулло Сайфуллозода, аз аъзои фаъоли ин ҳизбро амале “тарҳрезишуда алайҳи ҲНИТ” ва навъе “душмантарошӣ” хонд.

Ин матлаб шоми рӯзи 8-уми феврал дар баёнияи Шӯрои сиёсии ин ҳизб дар поёни ҷаласаи изтирории ҳизб дар робита бо ҳамла ба оқои Сайфуллозода зикр шудааст.

Ба бовари аъзои Шӯрои сиёсии ҲНИТ, ҳамла ба оқои Сайфуллозода, фаъоли собиқадори ин ҳизб ва сардабири нашрияи ҳизбии “Наҷот”, амалест, ки аз сӯйи “доираҳои муъайян барои эҷоди тарсу ваҳм дар байни аъзо ва тарафдорон”-и ҳизб анҷом шудааст.

Шӯрои сиёсии ин ҳизб, ки аз муҳиммтарин аҳзоби мухолифи давлат дар Тоҷикистон маҳсуб мешавад, ҳамлаи ахир ба оқои Сайфуллозодаро дар як радиф бо фишорҳое қарор медиҳад, ки «доираҳои муъайян дар ин авохир алайҳи ҲНИТ» эъмол кардаанд.

[b]»Инҳироф аз раванди муколамаи миллӣ»[/b]

Ҳизби наҳзати исломӣ дар баёнияи худ ба ончи равандҳои ғайридемукротик дар Тоҷикистон хондааст, низ ишора кардааст: «Арзишҳои мардумсолорӣ, гуногунандешӣ, озодии виҷдон ва матбуъот батадриҷ заъиф гашта, ҷойи онро таҳкими усули авторитарии идораи давлат, фасоди моливу идорӣ, поймолшавии ҳуқуқи диниву сиёсии шаҳрвандон ва нодида гирифтани ниёзу хостаҳои мардум ишғол менамояд.»

Бо таъкид бар ин нукта, Шӯрои сиёсии ҲНИТ аз ончи ворид шудани Тоҷикистон ба як марҳилаи носолими сиёсӣ меномад, ҳушдор додааст.

Дар баёнияи ин ҳизб аз «дур шудани давлат аз арзишҳои тақдирсози ваҳдати миллӣ» ва «инҳироф дар раванди муколамаи миллӣ» ибрози нигаронӣ шудааст.

Дар ин баёния мехонем: «Бахусус, пас аз интихоботи парлумонии соли 2010 муносибат бо ҳизбҳои сиёсӣ комилан аз чорчӯби рақобати солими сиёсӣ берун рафт, ки нишонаҳои он дар мавқеъгириҳои расмӣ ва ғайрирасмии намояндагони мақомоти давлатӣ зоҳир мегарданд.»

Аъзои ин шӯро лату кӯби Ҳикматулло Сайфуллозодаро «василаи ғайриқонунӣ ва ғайриахлоқӣ алайҳи сиёсатмадорон, рӯзноманигорон ва фаъолони сиёсӣ» хонда ва таъкид карданд, ки чунин аъмол на танҳо ҷиноят аст, балки «хатари бузурге ба амнияти миллӣ ва суботи ҷомеъа» низ маҳсуб мешавад.

Шӯрои сиёсии ҲНИТ дар поёни баёнияи худ аз намояндагони давлат, ҳизбҳои сиёсӣ, расонаҳо, созмонҳои ғайридавлатӣ ва ҷомеъаи маданӣ даъват кардааст, ки барои «баргардонидани фарҳанги муколама ва ҳамдигарфаҳмӣ ба фазои сиёсии кишвар» талош намоянд.

[b]Вокуниши созмонҳои рӯзноманигорӣ[/b]

Пас аз зӯҳри рӯзи 8 феврал cозмонҳои рӯзноманигории Тоҷикистон низ ҳодисаи ҳамла ба Ҳикматуллоҳ Сайфуллозода, сардабири нашрияи “Наҷот” ва аз фаъолони ҳизби наҳзати исломиро маҳкум карданд.

Иттиҳодияи рӯзноманигорон, Анҷумани миллии расонаҳои мустақил, созмони ғайридавлатии “Медия-Алянс” ва маркази таҳлилии “Индем” бо интишори баёнияе муштарак ҳодисаи ҳамла ба оқои Сайфуллозодаро як “амали ваҳшиёна” хонданд.

Руасои ин созмонҳо аз мақомоти марбута талаб кардаанд, ки ҳодисаи ҳамла ва лату кӯби ваҳшиёнаи Ҳикматулло Сайфуллозода дар мӯҳлати кӯтоҳ ба таври ҷиддӣ таҳқиқ шавад.

Масъулони ин созмонҳои рӯзноманигорӣ ба мақомоти интизомӣ пешниҳод кардаанд, ки бо анҷоми таҳқиқоти рӯзноанигорӣ дар таҳқиқи ин қазия ба маъмурони интизомӣ кумак кунанд.

Ҳикматуллоҳ Сайфуллозода аз аъзои фаъоли ҳизби наҳзати исломӣ, муҳимтарин ҳизби мухолиф дар Тоҷикистон буда ва аз тобистони соли гузашта сардабирии “Наҷот”, нашрияи ин ҳизбро бар ӯҳда гирифтааст. Вай таҳлилгари маркази “Диолуг”, як муассисаи вобаста ба ин ҳизб ҳам ҳаст.

Нуриддин Қаршибоев, раиси Анҷумани расонаҳои мустақилли Тоҷикистон, гуфт, ки созмонҳои рӯзноманигорӣ аз оқои Сайфуллозода ҳамчун аз як журналист ҳимоят мекунанд.

Дар баёнияи ин созмонҳо мехонем: «Дар ҷомеъае демукротик сӯиқасд ба ҳаёт ва саломати на танҳо як журналист ва як шахси маъруф, балки ҳар як шаҳрванд қобили қабул нест ва гунаҳкорон бояд мавриди ҷазои сахт қарор бигиранд.»

Лаҳни ин баёния нисбатан нарм аст ва муаллифони баёния менависанд: «Баъзе коршиносон ин ҳодисаро ба фаъолияти касбии журналистии Сайфуллозода марбут мехонанд.»

Оқои Қаршибоев дар посух ба ин савол, ки оё ҳодисаи ҳамла ба оқои Сайфуллозодаро дорои ангезаҳои сиёсӣ медонад ё хайр, гуфт, ки ҳанӯз барои чунин иддаъо иттилоъи кофӣ дар даст надорад.

Вай афзуд: «Дар баробари ин, ки оқои Сайфуллозода узви як ҳизб ҳаст, вай як журналист низ ҳаст, ва мо ҳамчун созмонҳои журналистӣ вазифадорем, ки аз ӯ ҳамчун аз як хабарнигор пуштибонӣ кунем.»

Рӯзи 7 феврал Маҳмадалӣ Ҳайит, муъовини раҳбари Ҳизби наҳзати исломии Тоҷикистон, ба Би-би-сӣ гуфта буд, ки ин ҳодиса як навъ «суиқасд ба ҷони сардабири нашрияи «Наҷот» ва узви шӯрои сиёсии ҲНИТ» аст.

Дар ҳамин ҳол, Умаралӣ Ҳусейнов, намояндаи ин ҳизб дар порлумони Тоҷикистон, ба хабаргузории «ASIA-Plus» гуфтааст: «Суиқасд ба ҷони вай (Сайфуллозода) ба хотири фаъолияти сиёсиаш сурат гирифтааст. Сайфуллозода як рӯзноманигори шуҷоъ буда ва пайваста матолиби таҳлилӣ таҳия ва дар онҳо масоили доғи рӯзро матраҳ мекунад.»

Вай ҳамчунин таъкид кардааст, ки оқои Сайфуллозода мавқеъи худро дар мусоҳибаҳои зиёди худ бо расонаҳо «боҷасорат баён мекунад» ва аксари расонаҳо назарҳои ӯро ҳамчун ақидаи як коршинос дар масоили сиёсӣ ва мазҳабӣ иқтибос меоранд.

[b]Назари аҳзоби дигар[/b]

Ҳарчанд ҳизби наҳзати исломӣ ин ҳодисаро суиқасд ба ҷони оқои Сайфуллозода ба хотири фаъолияти сиёсиаш медонад, Масъуд Собиров, раҳбари ҳизби демукроти Тоҷикистон, гуфт, ки ба ҳеҷ ваҷҳ ин қазияро дорои ангезаҳои сиёсӣ арзёбӣ намекунад.

Вай мегӯяд, ки ҳизби ӯ дар робита бо ин ҳодиса ҳеҷ баёнияе содир нахоҳад кард, зеро ба эътиқоди онҳо, ин қазия сирфан хусусӣ буда ва ба оқои Сайфуллозода ва «равобити ӯ бо афроди алоҳида» вобаста аст.

Вай гуфт: «Агар ин ҳодиса ангезаи сиёсӣ медошт, ин ҳамла ба раҳбар ё муъовини раҳбари ин ҳизб анҷом мешуд. Ин ягон муноқишаи хусусии байни худи Сайфоллозода ва нафарони дигар бояд бошад.»

Шодӣ Шабдолов, раҳбари ҳизби кумунисти Тоҷикистон низ дар сӯҳбат бо бархе аз расонаҳои маҳаллӣ эҳтимоли ангезаҳои сиёсӣ доштани ҳамла ба Ҳикматулло Сайфуллозода ва аз сӯйи нерӯҳои давлатӣ анҷом шудани ин ҳамларо баъид хондааст.

Вай гуфтааст: «Ҳеҷ нерӯи давлатӣ дар ҷаҳон нисбат ба мухолифони сиёсияш чунин рафтори хашин анҷом намедиҳад.»

Ҳикматуллоҳ Сайфуллозода субҳи рӯзи 7 феврал дар назди хонаи худ ҳадафи ҳамлаи афроди ношинохта қарор гирифт ва дар пайи лату кӯби шадид ҷароҳатҳои сангин бардошта ва ҳоло дар бемористони Қараболои шаҳри Душанбе таҳти муроқибати пизишкон қарор дорад.

Қудратуллоҳ Исмоилов, пизишки асабшинос, ки оқои Сайфуллозода таҳти муроқибати ӯ қарор дорад, вазъи саломати ӯро “беҳтар аз дирӯз” хонд. Вай гуфт, ки ҳаққи ироаи иттилоъи бештаре дар бораи вазъи беморонро ба ҷуз хешовандонашон надорад.

Аммо гуфта мешавад, ки оқои Сайфуллозода фақат аз ноҳияи сар ҷароҳат бардоштааст. Вай садамаи мағзӣ дида, лабу даҳон ва сари ӯ чок шудааст. Ба гуфтаи пизишкон, дар чунин вазъият беморон маъмулан то 7 рӯз дар бемористон ба сар мебаранд.

Источник: http://www.bbc.co.uk/tajik/news/2011/02/110208_sq_islam_crime.shtml

[b]Таҳлилгари масоили сиёсӣ Ҳикматулло Сайфуллозода, ки аз тарафи ашхоси ношинос мавриди латукӯб қарор гирифта, дар шӯъбаи ҷарроҳии асаби №2-и маркази миллии тиббии Қарияи Боло бистарист, ин амали бераҳмонаро сӯиқасд ба ҷонаш хонда, онро ба таҳлили амиқу ошкоргӯиҳояш дар масъалаҳои доғи ҷомеа вобаста медонад. Айни замон аз рӯйи ин қазия тафтишот ҷараён дорад ва мақомот далели аслии сар задани моҷаро ва гунаҳкоронро ҷӯёянд.[/b]

Ҳанӯзам ин савол нокушода аст, ки Ҳикматулло Сайфуллозода ба кӣ чӣ «бадӣ» кард, ки мавриди «ҳамла» қарор гирифт? Худи ӯ мегӯяд, ки бо касе ҳарфҳои пасту баланд назадааст ва оне, ки шахсе бо ӯ пешорӯ омада салом мегӯяду ду нафари дигар ногумон ӯро аз пушти сар зада беёд мекунанд, амали тарҳрезишуда аст.

Дар ин росто, сардабирони нашрияҳои кишвар ин амалро ба ҷуз сӯйиқасд чизе намедонанд ва чунин рухдодро дар ҷомеаи мутамаддин маҳкум мекунанд.

Матни пурраи маводро дар саҳифаи таҳлили сомона мутолиа кунед: [url=http://www.taj.nansmit.tj/analysis/?id=13]http://www.taj.nansmit.tj/analysis/?id=13[/url]

TojNews

Источник:

[b]Таҳлилгари масоили сиёсӣ Ҳикматулло Сайфуллозода, ки аз тарафи ашхоси ношинос мавриди латукӯб қарор гирифта, дар шӯъбаи ҷарроҳии асаби №2-и маркази миллии тиббии Қарияи Боло бистарист, ин амали бераҳмонаро сӯиқасд ба ҷонаш хонда, онро ба таҳлили амиқу ошкоргӯиҳояш дар масъалаҳои доғи ҷомеа вобаста медонад. Айни замон аз рӯйи ин қазия тафтишот ҷараён дорад ва мақомот далели аслии сар задани моҷаро ва гунаҳкоронро ҷӯёянд.[/b]

Ҳанӯзам ин савол нокушода аст, ки Ҳикматулло Сайфуллозода ба кӣ чӣ «бадӣ» кард, ки мавриди «ҳамла» қарор гирифт? Худи ӯ мегӯяд, ки бо касе ҳарфҳои пасту баланд назадааст ва оне, ки шахсе бо ӯ пешорӯ омада салом мегӯяду ду нафари дигар ногумон ӯро аз пушти сар зада беёд мекунанд, амали тарҳрезишуда аст.

Дар ин росто, сардабирони нашрияҳои кишвар ин амалро ба ҷуз сӯйиқасд чизе намедонанд ва чунин рухдодро дар ҷомеаи мутамаддин маҳкум мекунанд.

Ба андешаи Муҳаммадалӣ Мақсадуллоҳ — сармуҳаррири ҳафтаномаи «Чархи гардун», сӯиқасд ва латукӯби сардабири ҳафтаномаи «Наҷот» Ҳикматулло Сайфуллозода сирф ба фаъолияти коршиносии ӯ марбут аст ва албатта он хоси ҷомеае нест, ки худро мутамаддин мешуморад. «Бешак ин амали матраҳшуда маҳз ба таҳлилҳои густурдааш нисбати рӯйдодҳои ахири ҷомеаи кишвар ва ҷаҳон рабт доранд. Яъне метавон гуфт, ки «забони сурхаш ба сари сабзаш ҳамин балоро овард» ва Худо кунад, ки онро ба хайр гардонад. Агар чунин аст, пас шояд ба хотири эҳтиёт ва ҳифзи амнияти худу пайвандон журналистон ва коршиносони тоҷикро салоҳ набошад дар ҷомеае, ки чорчӯбаи қолабҳояш тавони бардошти фошгӯӣ ва ё воқеъбаёниро надорад, даҳон кушоянд. Чунки вақтҳои охир таҳдид ва ё ба истилоҳ, ниқорталабӣ дар муқобили журналистон афзоиш ёфта истодааст. Ва ин таҳдид чашми онҳоро тарсонидааст, ки ҳангоми вохӯрӣ аз ҳамдигар мепурсанд: «Оянда навбати кист?». Модоме чунин аст, пас, вақти он нарасидааст, ки ба таври қонунӣ ба журналистон яроқи муҳофизатӣ диҳанд?»,- иброз медорад ӯ.

Зафари Сӯфӣ — муассиси ҳафтаномаи «Озодагон» дар ин маврид мегӯяд: «Дар ҳар сурат бо таваҷҷӯҳ ба он вазъу воқеияте, ки ҳаст, яъне ҷаноби Сайфуллозода имрӯз дар бемористон дар як вазъи ноҷуре қарор доранд, табиист, ки касе ӯро латукӯб карда. Ин сӯиқасд буда ё набуда, бояд, ки ниҳодҳои қудратии Тоҷикистон инро мушаххас кунанд ва онҳое, ки Сайфулозодаро задаанд, маълум шаванд. Он вақт метавон дар мавриди сӯйиқасд будан ё набуданаш возеҳтар сӯҳбат кард. Вале атрофиҳояшон ва манобеъе, ки маълумот додаанд, гуфтаанд, ки чанд рӯз аст дар атрофи устод Сайфуллозода баъзе нафарон рафтуомад доштанд ва эҳтимол дорад, ки ин латукӯб аз пеш барномарезӣ шуда бошад. Агар барномарезӣ шуда бошад, дар назар бигирем, воқеан ҳам сӯйиқасд аст. Агар сӯйиқасд мушаххас шавад, табиист, ки метавонад он ба фаъолияти ҳизбӣ ё сармуҳарририи Сайфуллозода, ки чун коршиноси масоили сиёсӣ дар хеле маврид боҷуръат сухан мегӯяд, рабт дошта бошад. Ҳама гуна фишор рӯи ҳама гуна озодии як инсон маҳкумшаванда аст. Аз ин назар, агар ин чиз сӯйиқасд ба фаъолияти устод Сайфуллозода ба унвони як рӯзноманигор не, ба унвони як соҳибандеша бошад, воқеан қобили маҳкумият аст ва бояд маҳкум шавад, на танҳо аз тарафи мани кӯчак, балки аз ҷониби ҷомеаи мутамаддин. Чун дар ҷомеаи мутамаддин набояд инсонро чунин латукӯб кард. Агар чӣ Сайфуллозода, чӣ ҳар каси дигар дар андешааш хатое рух дода, бояд бо роҳи қонунӣ баррасӣ шавад».

Ба андешаи Хуршеди Атовулло — сармуҳаррири ҳафтаномаи «Фараж», аз ҳама фарзияҳо, фарзияи ба фаъолияти журналистии Сайфуллозода рабт доштани ин латукӯб бештар аст. « Ин амал шояд ба хотири тарс додани журналистон сурат гирифта бошад, аммо гумон дорам, мақомоти тафтишотӣ ба ин суол посух хоҳанд ёфт»,- гуфт ӯ.

Мавсуф ҳамзамон афзуд, ки ҳамчун сардабир ва раиси ассотсиатсияи журналистии «Медиа-Алянс» бо дигар сардабирон ва раҳбарони созмонҳои журналистӣ назари худро нисбати ин қазия пахш хоҳанд намуд.

Ёдовар мешавем, ки Ҳикматулло Сайфуллозода дар баробари кор карданаш дар маркази таҳлилии «Диалог», соли гузашта сардабирии ҳафтаномаи «Наҷот» — нашрияи расмии ҲНИТ-ро бар ӯҳда гирифт.

Мушкинисо АСОЗОДА, TojNews

Источник: http://tojnews.org/taj/index.php?option=com_content&task=view&id=11385&Itemid=28

Иттифоқи журналистони Тоҷикистон, Анҷумани миллии ахбори оммаи мустақили Точикистон, Медиа Алянси Тоҷикистон ва Бунёди «Индем» бо пахши як баёния ҳодисаи аз ҷониби ашхоси номаълум ба таври ваҳшиёна мавриди ҳамла ва латукӯб қарор гирифтани сармуҳаррири ҳафтаномаи «Наҷот» Ҳикматулло Сайфуллозодаро маҳкум карда, аз мақомоти ҳифзи ҳуқуқ дар мӯҳлати кӯтоҳтарин ва ба таври ҷиддӣ тафтиш шудани қазияи мазкурро талаб доранд.

«Субҳи рӯзи 7-уми феврали соли 2011 Ҳикматулло Сайфуллозода аз ҷониби бадхоҳони номаълум мавриди ҳамла қарор гирифта, ба таври ваҳшиёна латукӯб шуд. Сабаби латукӯб шудани Сайфуллозода ҳанӯз аниқ нест. Бо вуҷуди он, дар ҷомеаи демократӣ сӯиқасд ба ҳаёт ва саломатии на танҳо журналист ва шахси маъруф, балки ҳар як шаҳрванд қобили қабул нест. Бо чунин тарз қасос гирифтан аз одамони номақбул ҷиноят буда, мутобиқи қонун бояд ҷиддан мавриди ҷазои сахт қарор бигирад. Баъзе коршиносон ҳодисаи мазкурро ба фаъолияти касбии журналистии Ҳикматулло Сайфуллозода марбут медонанд. Созмонҳои ҷамъиятӣ ва ВАО омода ҳастанд, ки ин ҳодисаро мавриди таҳқиқи журналистӣ қарор дода, ба мақомоти ҳифзи ҳуқуқ барои фош кардани ҷинояти мазкур мусоидат намоянд. Ошкор намудани ҷиноят оид ба ҳодисаи ҳамла ва латукӯб кардани Ҳикматулло Сайфуллозода марбут ба обрӯю эътибори мақомоти ҳифзи ҳуқуқ ва дигар сохторҳои босалоҳияти давлатии Тоҷикистон мебошад,- омадааст дар изҳороти дастҷамъии созмонҳои журналистӣ.

Ёдовар мешавем, ки Ҳикматулло Сайфуллозода дар баробари кор карданаш дар маркази таҳлилии «Диалог», соли гузашта сардабирии ҳафтаномаи «Наҷот» — нашрияи расмии ҲНИТ-ро бар ӯҳда гирифт.

Мушкинисо АСОЗОД, TojNews

Источник: http://tojnews.org/taj/index.php?option=com_content&task=view&id=11395&Itemid=30

[b]Додгоҳи ноҳияи Фирдавсии шаҳри Душанбе нашрияи “Миллат”-ро ба чопи раддияи Вазорати кишоварзии Тоҷикистон ва пардохти ғаромат ба ин вазорат муваззаф кардааст.[/b]

Бар асоси ҳукми додгоҳ, ки рӯзи сешанбеи 8 феврал эълом шуд, ин ҳафтанома ба Вазорати кишоварзӣ ба миқдори 1500 сомонӣ ё беш аз 300 дулори омрикоӣ бояд пардохт кунад.

Баҳси нашрияи мустақилли “Миллат” бо Вазорати кишоварзии Тоҷикистон ҳудуди як сол қабл дар додгоҳи ноҳияи Фирдавсӣ шурӯъ шуда ва ҳамакнун ҳукми он эълом гардид.

Адолати Мирзо, сардабири нашрияи “Миллат”, ба Би-би-сӣ гуфт: «Ҳукми додгоҳ барои мо мисли пари коҳе арзиш надорад ва ба фаъолияти журнолистии мо таъсире нахоҳад гузошт.»

Дар матлабе, ки дар сойти интернетии “Миллат” мунташир шудааст, ҳукми додгоҳи ноҳияи Фирдавсӣ дар қиболи ин нашрия ғайриқонунӣ арзёбӣ шудааст.

Дар ин матлаб омадааст: «Тибқи қавонини Тоҷикистон, зарари маънавӣ ба шахси зинда расонда мешавад, на ба вазорат. Аз ин лиҳоз, баррасии ин мавзӯъ дар додгоҳ муғойир бо қавонини кишвар аст.»

«Аз сӯйи дигар, қозии додгоҳ мавориди ҷой доштани фасод дар вазорати кишоварзиро, ки аз сӯйи ниҳодҳои давлатӣ ошкор шуда ва дар расонаҳои хориҷию дохилӣ бозтоб ёфта буданд, ба ҳангоми эъломи ҳукм ба назари эътибор нагирифт.»

Нашрияи “Миллат” қасд дорад дар мавриди ин ҳукм ба догоҳи истинофӣ (кассатсионӣ) шикоят барад.

Моҳи декабри соли 2009 Вазорати кишоварзии Тоҷикистон ба додгоҳи ноҳияи Фирдавсии шаҳри Душанбе номаи шикоятӣ ирсол карда ва дар он масъулони нашрияи “Миллат”-ро барои чопи матлабе ба унвони “Вазорати кишоварзӣ фасодзадатарин ниҳод” ба «тавҳин ба шаъну шарафи худ» муттаҳам карда буд.

Ин вазорат аз нашрияи «Миллат» дархости пардохти беш аз як милюн сомонӣ ғаромат ё товон карда ва ваъда дода буд, ки ин маблағро ба суратҳисоби нерӯгоҳи “Роғун” ирсол мекунад.

Дар муқобил, ҳафтаномаи «Миллат» низ аз вазорати кишоварзӣ ба иттиҳоми нақзи қонуни матбуъот ба додгоҳ шикоят карда ва аз ин ниҳод пардохти як сомонӣ ё ҳудуди 23 сентро тақозо карда буд.

[b]Қазияи «ASIA-Plus»[/b]

Дар ҳамин ҳол, интизор мерафт рӯзи душанбеи 7 феврал дар додгоҳи ноҳияи Фирдавсии шаҳри Душанбе баррасии муқаддамотии қазияи байни нашрияи “ASIA-Plus” ва бахши ҷароими созмонёфтаи пулиси Тоҷикистон баргузор шавад.

Аммо ба далели ҳозир нашудани ҷониби муддаъӣ ин ҷаласа то ба як ҳафтаи дигар ба таъвиқ афтодааст.

Дар пайи чопи матлаби Рамзия Мирзобекова, хабарнигори “ASIA-Plus” таҳти унвони “Бозрасӣ ё истинтоқ?” дар 21 декабри соли гузашта дар мавриди истифода аз шиканҷа дар ниҳодҳои интизомӣ Анвар Тағоймуродов, раиси Идораи мубориза бо ҷароими созмонёфтаи Вазорати умури дохилаи Тоҷикистон ин нашрияро ба «таҳвину бӯҳтон» муттаҳам кардааст.

[b]Шикоят алайҳи молики «Пайкон»[/b]

Дар таҳаввуле дигар, Вазорати адлияи Тоҷикистон аз Бюрои маслиҳатдиҳӣ, сухансанҷӣ ва таҳқиқоти журнолистӣ, як созмони мустақил дар ин кишвар, ба додгоҳи ноҳияи Фирдавсии шаҳри Душанбе шикоят бурда ва хостори мутаваққиф кардани фаъолияти ин созмон шудааст.

Ҷумъабой Толибов, раиси ин созмон ва сардабири нашрияи “Пайкон”, гуфт, ки ҳадаф аз ин иқдоми вазорат эҷоди маҳдудият дар фаъолияти ин ҳафтаномаи мустақил аст.

Ба гуфтаи оқои Толибов, Бюрои маслиҳатдиҳӣ, сухансанҷӣ ва таҳқиқоти журнолистӣ муассис ва молики нашрияи “Пайкон” буда ва ин нашрия дар моҳҳои октябри соли гузашта ва январи соли ҷорӣ дар бораи вазир ва Вазорати адлия матолиби интиқодӣ чоп карда буд.

Ӯ гуфт барои бори аввал нест, ки аз ҷониби ниҳодҳои давлатӣ ба нашрияи “Пайкон” фишор ворид мешавад.

Дар авохири моҳи январи соли гузашта додгоҳи шаҳри Душанбе нашрияи мустақилли «Пайкон»-ро муваззаф карда буд, ки маблағи беш аз 300 ҳазор сомонӣ ба «Тоҷикстандарт», як ниҳоди нозир бар колоҳои воридотӣ дар Тоҷикистон, ғаромат пардозад.

Ин ниҳод нашрияи «Пайкон»-ро ба иттиҳомоти мушобеҳ, яъне тавҳину туҳмат муттаҳам карда буд.

Ҳамчунин, дар пайи ҳаводиси водии Рашт дар тирамоҳи соли гузашта фаъолияти нашрияи “Пайкон” як муддат мутаваққиф шуда буд.

Гуруӯҳҳои дохилӣ ва байналмилалии мудофеъи озодии баён аз мавориди ба додгоҳ кашидани нашрияҳо дар Тоҷикистон ҳамвора интиқод карда ва гуфтаанд, ки ин маворид ба густариши худсонсурӣ дар миёни рӯзноанигорон хоҳад анҷомид.

Источник: http://www.bbc.co.uk/tajik/news/2011/02/110208_ea_mm_millat_court.shtml

[b]Субҳи рӯзи душанбеи 7 феврал афроди номаълум ба Ҳикматулло Сайфуллозода, аз фаъолони Ҳизби наҳзати исломии Тоҷикистон (ҲНИТ), аз аҳзоби умдаи мухолиф, ҳамла карда ва ӯро ҳадафи зарбу шатм қарор додаанд.[/b]

Оқои Сайфуллозода дар асари ин ҳамла ҷароҳатҳои сангин бардошта ва ба бемористон мунтақил шудааст.

Ин ҳодиса дар назди манзили вай дар маҳаллаи 112, дар бахши ғарбии шаҳри Душанбе, замоне сурат гирифтааст, ки вай ба ҷойи кораш мерафт.

Далоили ин ҳодиса маълум нест ва афроди муҳоҷим шинохта нашудаанд. Аммо пулис ба таҳқиқи ин ҳодиса оғоз кардааст.

Маҳмадалӣ Ҳайит, муъовини раҳбари Ҳизби наҳзати исломии Тоҷикистон, ба Би-би-сӣ гуфт, ки ин ҳодиса як навъ «суиқасд ба ҷони сардабири нашрияи «Наҷот» ва узви шӯрои сиёсии ҲНИТ» аст.

Ба гуфтаи вай, шоҳидони айнӣ гувоҳӣ додаанд, ки афроди муҳоҷим ба оқои Сайфуллозода тайи чанд рӯзи ахир «ба дунболи ӯ» будаанд. Вай ҳамчунин ҳадс зад, ки ин ҳамла «суфоришӣ» аст ва имкон дорад ба ибрози назарҳои ахири оқои Сайфуллозода дар матбуъот муртабит бошад.

Ба гуфтаи вай, Саидиброҳими Назар, узви порлумони Тоҷикистон аз ҲНИТ, дар тамосе телефунӣ бо вазири умури дохилӣ ин мавзӯъро баррасӣ карда ва женерол Абдураҳим Қаҳҳоров ваъда кардааст, ки таҳқиқи ин ҳодисаро таҳти назар хоҳад дошт.

Ҳикматулло Сайфуллозода аз фаъолони ҲНИТ буда ва сардабирии нашрияи «Наҷот»-ро бар ӯҳда дорад. Вай таҳлилгари Маркази таҳлилии «Диалог», вобаста ба ин ҳизб, низ буда ва пайваста дар матбуъот дар масоили мухталифе ибрози назар кардааст.

Дар ин авохир, вай бавижа дар бораи ҳаводиси Миср ва асароти эҳтимолии он бар вазъи Тоҷикистон ва минтақа ибрози назар мекард. Вай пештар аз тарҳи баҳсбарангези қонуни масъулияти волидон, ки давлат ахиран таҳия карда ва ба баррасии умумӣ гузоштааст, низ интиқод карда буд.

Дар ҳамин ҳол, масъулони ҲНИТ хабар доданд, ки зуҳри рӯзи душанбе ҷаласаи изтирории раҳбарони ин ҳизб баргузор ва ҳодисаи ҳамла ба Ҳикматулло Сайфуллозода баррасӣ шудааст.

Онҳо эълом карданд, ки рӯзи сешанбе як баёнияи расмии ин ҳизб дар мавриди лату кӯби оқои Сайфуллозода мунташир хоҳад шуд.

Зимнан, Муҳиддин Кабирӣ, раҳбари ҲНИТ, барои анҷоми маъмурияте ба шаҳри Истонбули Туркия рафта ва дар кори анҷумани порлумонии кишварҳои узви Созмони Ҳамкориҳои Иқтисодӣ ширкат мекунад.

Дар ҳамин ҳол, намояндагони аҳзоби дигар, аз ҷумла ҳизби ҳокими халқи демукроти Тоҷикистон, ҳамла ба Ҳикматулло Сайфуллозодаро маҳкум карда ва хостори таҳқиқи сареъи ин ҳодиса шудаанд.

Источник: http://www.bbc.co.uk/tajik/news/2011/02/110207_ea_if_sayfullozoda.shtml

[b]Созмони Гузоришгарони Бидуни Марз боз шудани парвандаи ҷиноӣ алайҳи нашрияи «ASIA-Plus» аз сӯйи як мақоми пулиси Тоҷикистонро маҳкум кардааст.[/b]

Ин созмон ҳамчунин аз ниҳодҳои қазоии Тоҷикистон даъват кардааст, ки ба нақзи ҳуқуқи шаҳрвандон дар заминаи озодии баён ва дастёбӣ ба иттилоъот хотима диҳанд ва ба Қонуни асосии Тоҷикистон ва меъёрҳои ҳуқуқи байналмилалӣ эҳтиром гузоранд.

Қаблан Иттиҳодияи рӯзноманигорон ва Анҷумани миллии расонаҳои мустақилли Тоҷикистон зимни интишори баёнияе муштарак аз пайгарди қазоии ин ҳафтанома аз сӯйи Анвар Тағоймуродов, раиси Идораи мубориза бо ҷароими созмонёфтаи Вазорати умури дохилаи Тоҷикистон ибрози нигаронӣ карда буданд.

Ҳамакнун, Гузоришгарони Бидуни Марз низ ба ин ду созмон пайваста ва ин амалро навъе нақзи муқаррароти байналмилалӣ ва қавонини Тоҷикистон дар бораи озодии баён талаққӣ кардааст.

Иттиҳодияи рӯзноманигорон ва Анҷумани расонаҳои мустақилли Тоҷикистон зимни интиқод аз ин иқдоми оқои Тағоймуродов аз Додситонии кул ва ниҳодҳои дигари интизомӣ даъват карда буданд, ки ин ҳодисаро мавриди баррасӣ қарор дода ва аз мавориди нақзи қавонин дар заминаи дастрасии мардум ба иттилоъот ва озодии баён ҷилавгирӣ кунанд.

Зимнан, дар пайи чопи матлабе аз Рамзия Мирзобекова, хабарнигори “ASIA-Plus” таҳти унвони «Бозрасӣ ё инкивизитсия (истинтоқ)?» дар 21 декабри соли гузашта дар мавриди истифода аз шиканҷа дар ниҳодҳои интизомӣ оқои Тағоймуродов ин нашрияро ба «таҳвину бӯҳтон» муттаҳам кардааст.

Ӯ нашрияи “ASIA-Plus”-ро ба яке аз додгоҳҳои шаҳри Душанбе кашида ва тақозои пардохти ғаромат ба миқдори 1 милюн сомонӣ ё муъодили 165.625 юруро кардааст.
Ҳамчунин, Анвар Тағоймуродов хонуми Мирзобекова ва хабарнигорони дигарро ба пӯшиши муғризонаи инфиҷори авоили моҳи сентябр дар шаҳри Хуҷанд муттаҳам карда ва гуфтааст, ки «онҳо аз қасди бади ин афрод иттилоъ доштанд ва мумкин аст бо онҳо робита дошта бошанд.»

Ба гуфтаи Марат Мамадшоев, сардабири “ASIA-Plus”, ба дунболи шикояти Анвар Тағоймуродов Рамзия Мирзобекова, хабарнигори ин нашрия, ба додситонии кулли Тоҷикистон даъват шуда ва мавриди бозпурсии як маъмури додситонӣ қарор гирифтааст.

Ба гуфтаи хонуми Мирзобекова, ин маъмур аз ӯ умдатан дар бораи манобеъи хабариаш суол кардааст. Бар асоси моддаи 19-и Қарордоди байналмилалии ҳуқуқи маданӣ ва сиёсӣ, ки Тоҷикистон онро дар соли 1999 имзо кардааст, «ба ҳар нафар озодии баён, ҳаққи озодии ҷустуҷӯ, дарёфт ва инъикоси иттилоъот дар шакли лафзӣ, катбӣ ё чопӣ» замонат дода шудааст.

Афзун бар ин, дар моддаи 30-и Қонуни асосии Тоҷикистон низ чунин замонат ба ҳар шаҳрванд дар заминаи озодии баён ва истифода аз куллияи манобеъи иттилоъотӣ дода шуда ва сонсури давлатӣ ва таъқиб барои интиқод мамнӯъ эълом шудааст.

Созмони Гузоришгарони Бидуни Марз мегӯяд, ки афзоиши мавориди таъқиби хабарнигорон ва пайгардҳои қонунӣ алайҳи онҳо намоишгари он аст, ки ҳадаф аз ин иқдом бештар на ислоҳи иштибоҳот ё тантанаи адолат, балки хотима додан ба нашри матолиби интиқодӣ ва хомӯш сохтани нашрияҳои мухолиф аст.

Аз сӯйи дигар, ба гуфтаи Гузоришгарони Бидуни Марз, фишори афзоянда бар нашрияҳои мустақил боъиси маҳдуд шудани озодии баён ва афзоиши худсонсурӣ дар Тоҷикистон шуда ва ба эътбори байналмилалии ин кишвар низ латмаи ҷиддӣ хоҳад зад.

Ҳарчанд дар гузашта низ мавориди ба додгоҳ кашидани нашрияҳои мустақил аз сӯйи мақомот ва афроди гуногун дар Тоҷикистон зиёд ба мушоҳида расида, вале ба навиштаи Гузоришгарони Бидуни Марз, корзори густардаи саркӯби хабарнигорон ва сонсури матбуъот дар пайи ҳамлаи гурӯҳе мусаллаҳ ба мошинҳои вазорати дифоъ дар авохири моҳи сентябри гузашта оғоз шудааст.

Ин созмон ёдовар мешавад, ки ба дунболи ин ҳодиса Шералӣ Хайруллоев, вазири дифоъи Тоҷикистон, аз шеваи пӯшиши ин ҳодиса дар нашрияҳои мустақил башиддат интиқод карда ва 17 созмони расонаиро ба «ҳамдастӣ бо терруристҳо» муттаҳам кардааст.

Дар пайи ин, ниҳодҳои молиётӣ чанде аз нашрияҳои мустақил ва чопхонаҳоро бозрасӣ карданд ва фаъолияти чанд нашрия барои муддате мутаваққиф шуд. Дар моҳи октябри гузашта мақомот чанд сойти хабариро низ дар Тоҷикистон масдуд карданд.

Источник: http://www.bbc.co.uk/tajik/news/2011/02/110204_mm_rsf_statement.shtml

Иттифоқи журналистони Тоҷикистон, Анҷумани миллии ахбори оммаи мустақили Точикистон, Медиа Алянси Тоҷикистон ва Бунёди «Индем» бо пахши як баёния ҳодисаи аз ҷониби ашхоси номаълум ба таври ваҳшиёна мавриди ҳамла ва латукӯб қарор гирифтани сармуҳаррири ҳафтаномаи «Наҷот» Ҳикматулло Сайфуллозодаро маҳкум карда, аз мақомоти ҳифзи ҳуқуқ дар мӯҳлати кӯтоҳтарин ва ба таври ҷиддӣ тафтиш шудани қазияи мазкурро талаб доранд.«Субҳи рӯзи 7-уми феврали соли 2011 Ҳикматулло Сайфуллозода аз ҷониби бадхоҳони номаълум мавриди ҳамла қарор гирифта, ба таври ваҳшиёна латукӯб шуд. Сабаби латукӯб шудани Сайфуллозода ҳанӯз аниқ нест. Бо вуҷуди он, дар ҷомеаи демократӣ сӯиқасд ба ҳаёт ва саломатии на танҳо журналист ва шахси маъруф, балки ҳар як шаҳрванд қобили қабул нест. Бо чунин тарз қасос гирифтан аз одамони номақбул ҷиноят буда, мутобиқи қонун бояд ҷиддан мавриди ҷазои сахт қарор бигирад. Баъзе коршиносон ҳодисаи мазкурро ба фаъолияти касбии журналистии Ҳикматулло Сайфуллозода марбут медонанд. Созмонҳои ҷамъиятӣ ва ВАО омода ҳастанд, ки ин ҳодисаро мавриди таҳқиқи журналистӣ қарор дода, ба мақомоти ҳифзи ҳуқуқ барои фош кардани ҷинояти мазкур мусоидат намоянд. Ошкор намудани ҷиноят оид ба ҳодисаи ҳамла ва латукӯб кардани Ҳикматулло Сайфуллозода марбут ба обрӯю эътибори мақомоти ҳифзи ҳуқуқ ва дигар сохторҳои босалоҳияти давлатии Тоҷикистон мебошад,- омадааст дар изҳороти дастҷамъии созмонҳои журналистӣ.

Ёдовар мешавем, ки Ҳикматулло Сайфуллозода дар баробари кор карданаш дар маркази таҳлилии «Диалог», соли гузашта сардабирии ҳафтаномаи «Наҷот» — нашрияи расмии ҲНИТ-ро бар ӯҳда гирифт.

Источник: http://tojnews.org/taj/index.php?option=com_content&task=view&id=11395&Itemid=30