Хабарнигори шинохтаи ширкати телевизионии амрикоии CBS Лара Логан дар ҷараёни бенизомиҳо дар майдони Таҳрири Қоҳира латукӯб ва таҷовуз шудааст. — Айни замон Логани 39-сола дар бемористони ИМА бистарист,- хабар медиҳад ВВС.

Ҳамла ба журналист рӯзи 11-уми феврал сурат гирифтааст. Ин замоне будааст, ки муҳофизон ва гурӯҳи наворбардорон дар муҳосира мондаанд. Анбӯҳи мардум, ки беш аз 200 нафар буданд, Лара Логанро аз ҳамкоронаш ҷудо намуданд ва ҳамзамон бо латукӯб шадидан таҷовуз ҳам кардаанд.

Ҷони Логанро аз хатар гурӯҳи занон аз миёни тазоҳуркунандагон ва наздик ба 20 сарбоз наҷот додаанд. Баъдан ӯ бо ҳамроҳони худ пайваст ва ба Амрико баргашт.
Лара Логан журналисти африқоитабори ИМА буда, солҳои охир дар Афғонистон ва Ироқ фаъолият кардааст.

Кумитаи ҳимоят аз журналистон мегӯяд дар бенизомиҳои Миср ҳадди ақал 52 журналист гирифтори ҳамла шуданд ва 76 нафарро ҳукуматдорон боздошт намуданд.

TojNews

Источник: http://tojnews.org/taj/index.php?option=com_content&task=view&id=11635&Itemid=28

Намояндагии Институти бритонии инъикоси ҷанг ва сулҳ (IWPR) дар Тоҷикистон рӯзҳои 18 ва 19 феврали соли ҷорӣ барои журналистони вилояти Хатлон дар шаҳри Кӯлоб семинар – тренинг дар мавзӯи «Меъёрҳои байналхалқии журналистика ва омодасозии гузоришҳои таҳлилии радиоӣ» мегузаронад.

Максади аз гузаронидани ин тренинг баланд бардоштани сатҳи малакаи радиожурналистони ҷавон ва инъикоси дурусти мавзӯҳои доғ ва нозуки минтақа мебошад. Тренингро муҳаррири радиолоиҳаи IWPR Шаҳодат Соибназарова мегузаронад.

Ҳамчунин барои донишҷӯёни курсҳои болоии Донишгоҳи Давлатии Кӯлоб дар мавзӯи «Нақши озодии сухан дар рушди иҷтимоӣ-иқтисодии ҷомеаи имрӯзаи Тоҷикистон» маърӯза карда мешавад. Маърӯзаро Додарбек Сайдалиев, раҳбари Маркази дастгирии ҷомеаи шаҳрвандии «Шаҳрванд», ки бевосита бо рушди сектори шаҳрвандӣ дар минтақа сару кор дорад, мехонад. Созмони ҷамъиатии «Шаҳрванд» ҳамчунин дар самти ҳамоҳангсозии муносибатҳои ташкилотҳои ғайридавлатӣ ва донорҳо фаъолият мебарад.

Чорабиниҳои мазкур дар доираи ду лоиҳаи IWPR омода шудаанд: «Дифоъ аз ҳуқуқи инсон ва таълими ҳуқуқӣ тавассути ВАО дар Осиёи Марказӣ», ки аз ҷониби Комиссияи Аврупо маблағгузорӣ мешавад ва «Барномаи иттилоотӣ оид ба инъикоси масъалаҳои ҳифзи ҳуқуқ, ихтилофҳо ва истиқрори боварӣ», ки аз ҷониби Вазорати корҳои хориҷии Норвегия маблағгузорӣ мешавад.

Источник:

Намояндагии Иттиҳодияи Аврупо дар Тоҷикистон ҳамла ба узви аршади ҲНИТ Ҳикматулло Сайфуллозодаро маҳкум намудааст.

Хонум Аквиле Норматиене, мушовири умури сиёсии дафтари намояндагии ИА дар Душанбе дар шарҳи баёнияи ин созмон ба РО гуфт, ки ИА ҳамла ба Сайфуллозода «як амали ваҳшиёна» талаққӣ карда аз мақомот хостааст, ки омилин ин ҳамларо дастгир ва муҷозат кунанд.

Дар ҳамин ҳол сафири Британияи Кабир дар Тоҷикистон низ нигаронии худро аз ҳамла ба Ҳикматулло Сайфуллозода баён доштааст.

Тревор Мур, сафири Британия дар Тоҷикистон рӯзи гузашта зимни мулоқот бо Муҳиддин Кабирӣ, раиси Ҳизби Наҳзати Исломии Тоҷикистон аз ҳамла ба як узви ҳизби сиёсӣ изҳори нигаронӣ намудааст.

Ин дар ҳолест, ки пас аз як ҳафтаи ҳамла болои Ҳикматулло Сайфуллозода дафтари САҲА дар Душанбе низ изҳори нигаронӣ ва хостори расидагии мақомот ба ин қазия шуда буд.

Ивар Вики, намояндаи дафтари САҲА дар Душанбе, гуфт, онҳое, ки сардабири «Наҷот»-ро латукӯб кардаанд, бояд ошкор ва боздошт шуда, ба ҷавобгарии ҷиноӣ кашида шаванд.

Қабл аз ин, сафорати Амрико дар Тоҷикистон низ ҳамла болои узви фаъоли ҲНИТ-ро маҳкум карда буд.

Худи масъулони Ҳизби наҳзати исломӣ онро «сӯиқасд ба ҷони Ҳикматулло Сайфуллозода ва ҳамла ба ин ҳизби динӣ» медонанд.

Ҳикматулло Сайфуллозода, сардабири нашрияи «Наҷот» ва узви раёсати олии ҲНИТ, субҳи 7-уми феврал дар роҳ ба сӯи идораи ҳафтанома, тақрибан дар наздикиҳои манзили худ, ба таври ғайримунтазира дучори ҳамлаи афроди ношинос шудааст.

Ӯ дар ҳолати беҳушӣ ба беморхонаи «Қарияи Боло» оварда мешавад ва то кунун дар он ҷо бистарист. Табибон мегӯянд, ҳамлаварон бештар дар ноҳияи сараш зарбаҳои сангин задаанд.

Ҳикматулло Сайфуллозода дар соли гузашта сардабирии ҳафтаномаи «Наҷот», нашрияи расмии ҲНИТ-ро ба ӯҳда гирифт. Вай дар маркази таҳлилии «Диалог» дар Душанбе низ кор карда, дар расонаҳо бештар ба унвони таҳлилгари масоили сиёсӣ ва динӣ сӯҳбат мекунад.

Ҷаноби Сайфуллозода як ҳафта пеш аз он, ки мавриди ҳамлаи афроди ношинос қарор бигирад, бештар дар бораи навори Алии Бедакӣ, таҳаввулоти Миср ва таъсири он ба кишварҳои худкома андешаҳои худро баён дошта буд.

Источник: http://www.ozodi.org/content/article/2310983.html

Коршиносон мегӯянд, тағйиру иловаҳо ба Кодекси андоз нашрияҳои камдаромадро муфлис хоҳад кард.

Бино бар ин ислоҳот, акнун нашрияҳо маҷбур хоҳанд буд, аз рӯи маоши ҳадди ақал — 562 сомонӣ ба буҷаи давлат молиёт пардозанд ва ҳам андози арзиши изофа диҳанд.

То кунун корхонаҳое арзиши изофа месупурандд, ки ҳаҷми умуии гардиши пулии онҳо дар сол 800 000 сомониро ташкил медод. Аммо ин меъёр то 200 000 коҳиш дода шуд. Дар ҳоле ки бо таваҷҷӯҳ ба мизони болои таваррум ё инфлятсия бояд ин ҳадди ақал коҳиш намеёфт, балки боло бурда мешуд.

Акнун ба ин қатор нашрияҳои мустақил, ки солона 52 шумора ва ҳафтае то як то даҳ ҳазор нусха нашр мешаванд, шомил хоҳанд буд.

[b]»Ниқоргирӣ аз матбуот»?[/b]

Сайёфи Мизроб, сардабири ҳафтаномаи «СССР», чунин муносибат ба матбуотро амдӣ ва ҳатто як навъ сӯиқасди бархе аз мақомот ба матбуот медонад.

Ӯ мегӯяд, ҷорӣ шудани андози изофӣ миёни матбуоти мустақил ва озоди Тоҷикистонро хоҳад шикаст: «Нашрияҳои Тоҷикистон бе ин ҳам тоби рақобат бо расонаҳои хориҷро надоранд. Аммо ин андозҳо якбора миёншикани матбуоти бе ин ҳам заифи мо мешавад. Дар Дания, Шведсия, Шветсария ва дигар кишварҳо давлат ба матбуот кӯмакпулӣ медиҳад. Дар мо баръакс ба назар мерасад ва ин иқдом ҳам як навъ ниқоргирии ду-се мансабдори фосид аст, ки бо ҳамин роҳ мехоҳанд садди роҳи матбуоти озод бишаванд.»

[b]»Нашрияҳо муфлис мешаванд»[/b]

Нуриддин Қаршибоев, раиси Анҷумани миллии расонаҳои мустақили Тоҷикистон, мегӯяд, нукоти нави Кодекси андоз матбуоти Тоҷикистонро дар дуроҳаи бӯҳронӣ қарор додааст. Ӯ мегӯяд, аз суханони масъулони нашрияҳо бӯи навмедӣ меояд ва онҳо ду роҳ дар пеш доранд: яке бастани нашрияҳо қабл аз муфлисшавӣ ва ихтисори зиёди кормандонашон.

Аммо оқои Қаршибоев мегӯяд, масъулони расонаҳо ва созмонҳои дигари ғайридавлатӣ мехоҳанд ин масъаларо дар назди мақомот матраҳ намоянд ва роҳи ҳалле барои он ҷустуҷӯ кунанд.

[b]Қарз болои қарз[/b]

Тибқи як муқаррароти дигар акнун нашрияҳо маҷбур ҳастанд, ҳатто дар сурати поин будани миқдори маоши моҳони кормандонашон нашрияҳои мустақил, аз рӯи ҳисоби 562 сомонӣ молиёт бисупоранд.

Ҷорӣ шудани ин муқаррарот хосса ба вазъи нашрияҳое, ки ҳудуди се моҳ аз нашр боз монда буданд, таъсири сӯ хоҳад гузошт. Масъулини ин нашрияҳо мегӯянд, ки бозмондани онҳо аз нашр боис ба афзоиши қарзи нашрияҳо аз матбаа ва иҷораи дафтар шудааст.

Ба ҳамин сурат, нашрияҳои мустақил, ки чанд моҳи гузаштаро дар тарси афзоиши фишори мақомот ва бозмондан аз нашр пушти сар кардаанд, дар рӯбарӯи тарси дигаре, ба номи муфлисшавӣ қарор гирифтаанд.

Источник: http://www.ozodi.org/content/article/2310167.html

Кумитаи дифоъ аз журналистон соли 2010-ро яке аз мушкилтарин давраҳои озодии баён шумурдааст.

Дар фасли марбут ба Тоҷикистон дар ин гузориш гуфта мешавад, ки дар моҳи январи соли 2010 бо шикояти ду додраси Додгоҳи олӣ ва як додраси Додгоҳи шаҳри Душанбе се ҳафтаномаи мустақил – “Фараж”, “Озодагон” ва “Азия-Плюс” ба додгоҳ кашонда шуданд. Муддаиён аз ин се нашрия пардохти 5,5 миллион сомонӣ ё 1 миллиону 200 000 долларро талаб карданд. Ин шикоят дар ҳоле ба додгоҳ рафт, ки ҳафтаномаҳо мӯҳтавои нишасти хабарии вакили ҳуқуқӣ, Солеҳҷон Ҷӯраев ба нашр расонданд. Сипас дар бархе аз онҳо шарҳи Ҷӯраев мунташир шуда буд. Вакил додрасонро айбдор мекард, ки ҳукми ғайриқонунӣ содир кардаанд. Баррасии парванда идома дорад.

Ба навиштаи Кумитаи дифоъ аз журналистон, дар моҳи сентябр мақомоти Тоҷикистон дастрасиро ба чанд торнамои хабарии мустақил манъ карданд ва ба чопхонаҳои маҳаллӣ фишор оварданд, ки бархе аз нашрияҳои мустақилро чоп накунанд. Мавҷи фишор ба дунболи гузоришҳои интиқодӣ нисбати Вазорати дифои Тоҷикистон омад, ки дар нашрияҳои чопи Душанбе – “Фараж”, “Озодагон”, “Нигоҳ”, “Миллат” ва “Пайкон” ва ҳам торнамоҳои хабарии “Азия-Плюс”, “Авеста”, Тҷкнюз, Сентразия ва Фергана интишор шудаанд.

Расонаҳо аз тарафи вазорат дар ихлол ба амалиёти зидди ошӯб дар шарқи Тоҷикистон айбдор шуданд. Бино бар хабарҳои матбуоти маҳаллӣ дар ин амалиёт ба камияш 28 сарбози давлат кушта шудаанд. Вазири дифоъ Шералӣ Хайруллоев нашрияҳоро дар кӯмак ба террористон муттаҳам кард. Фишори ҳукумат дар давоми сол идома кард.

Мақомоти давлат дар вилояти шимолии Суғд хабарнигори ҳафтаномаи чопи Душанбе – “Нури зиндагӣ”, Маҳмадюсуф Исмоиловро дар моҳи ноябр ҳабс карданд. Хабаргузориҳои минтақаӣ дар ин бора дар моҳи декабр иттилоъ доданд. Анҷумани миллии расонаҳои мустақили Тоҷикистон мегӯяд, Исмоилов ба тӯҳмат ва таҳқир аз тариқи матбуот айбдор шуда, ба ӯ то ду соли зиндон таҳдид мекунад. Журналист ҳукумати маҳаллӣ, ниҳодҳои ҳифзи ҳуқуқ ва адлияро ба сиёсатҳои иштибоҳӣ айбдор кард. Исмоилов то поёни сол дар маҳбаси Хуҷанд нигаҳдорӣ шудааст.

Источник: http://www.ozodi.org/content/article/2309870.html

Додгоҳи ноҳияи Шоҳансури шаҳри Душанбе Ҳуснигул Даминова, хабарнигори телевизиюни Тоҷикистонро, ки аз сӯйи раиси Кумитаи родию ва телевизиюни давлатӣ, ба авбошӣ муттаҳам шуда буд, табраа кардааст.Бар асоси мусаввабаи додгоҳ, ҷанҷоли хонуми Даминова бо Асадулло Раҳмонов, раиси кумитаи родию ва телевизиюни давлатӣ, ки ин қазияи додгоҳиро ба дунбол дошт, дар шароите рух дода, ки вазъи равонии хонуми Даминова хуб набудааст.
Бино бар ин, додгоҳ тавсия кардааст, ки хонуми Даминова таҳти муроқибати пизишкон қарор бигирад.
Дар моҳи октябри соли гузашта, Қимат Розиева, вакили мудофеъи хонуми Даминова, вуҷуди ҳар гуна нишонаҳои ҷиноят дар рафтори ӯро рад карда ва хостори озодии фаврии ӯ шуда буд.
Ба гуфтаи ӯ, боздошти муваккилаш «ба таври ғайриқонунӣ» сурат гирифтааст.
Ҳуснигул Даминова солҳои зиёде дар телевизиюни давлатии Тоҷикистон кор мекард ва дар замони ҷанги дохилии ин кишвар масъули барномаи «Инсон ва қонун» буд.
Ба гуфтаи вакили мудофеъаш, баҳси ӯ бо раиси кумитаи родию ва телевизиюни давлатӣ бар сари манзили маскунӣ сурат гирифта ва хонуми Даминова раисашро ба ин муттаҳам карда буд, ки ба дигарон манзил дода ва аз фаъолияти чандинсолаи вай дар телевизиюн сарфи назар кардааст.

Источник: http://www.bbc.co.uk/tajik/news/2011/02/110215_ea_daminova_court.shtml

[b]Додгоҳ журналисти пешини телевизион, Ҳуснигул Даминоваро аз ҷазо озод ва ба муолиҷа маҷбур кард.[/b]

Додгоҳи ноҳияи Шоҳмансури шаҳри Душанбе, ки зимни шикояти раиси Кумитаи давлатии Радио ва Телевизиони Тоҷикистон, Асадуллоҳ Раҳмонов, парвандаи авбошии хонуми Даминоваро баррасӣ кард, ба муолиҷаи ҳатмии равонпизишкии ӯ ҳукм дод.

Додрас Малоҳат Домуллоҷонова ба Радиои Озодӣ гуфт, ташхис нишон додааст, ки хонуми Даминова ба ҷурме айбдор мешуд, ки дар ҳолати бӯҳрони шадиди равонӣ содир кардааст: «Қонунггузорӣ ин эҳтимолро дар назар гирифтааст, ки агар дар ҳақиқат шаҳрванд ҳангоми амали авбошӣ аз лиҳози равонӣ дарк накунад, ки чӣ карда истодааст, додгоҳ ӯро аз ҷавобгарӣ раҳо мекунад.»

Ҳуснигул Даминова, муаллифи барномаи маъруфи телевизионии «Инсон ва қонун» дар моҳи апрели соли 2010 бо фармони раиси кумита, Асадуллоҳ Раҳмонов, барканор гашта, баъдтар алайҳи ӯ бо ҷурми авбошӣ парванда боз шуд.

Ба қавли яке аз наздикони Ҳуснигул Даминова, вақте ки ӯ хостааст дар масъалаи манзилгоҳ бо Раҳмонов сӯҳбат кунад дарбонҳо барояш иҷозаи вуруд надодаанд ва ӯ аз сари хашм раиси кумитаро дашном додааст. Посбонони даромадгоҳ садои ӯро забт карда, наворро ба раиси кумита додаанд.

Ин манобеъ мегӯянд, хонум Даминова рӯзи дигар бидуни иҷоза ба утоқи раиси кумита ворид шуда, бо ӯ баҳси тезутунд кардааст. Дар пайи ин баҳс Асадулло Раҳмонов, раиси кумитаи давлатии радио ва телвизиони Тоҷикистон ба бахши умури дохилаи ноҳияи Шоҳмансур шикоят бурдааст.

Аммо ин кашокаш дар ҳоле ба вуқӯъ пайвастааст, ки Даминова қаблан низ барои вайрон шудани навбати хонагирӣ бо раис баҳс карда, аз кор ронда шудааст, вале бо қарори додгоҳ ба мақомаш барқарор гашт. Дар ин байн ҳаққи гирифтани манзил барои ӯ лағв шуда буд.

Раиси Анҷумани миллии расонаҳои мустақили Тоҷикистон, Нуриддин Қаршибоев, ҳукми дордгоҳро дар баробари хонум Даминова одилона номид. Ба қавли вакили мудофеъ Қимматгул Розиева, агар додгоҳ бемории равонии Даминоваро ба назар намегирифт, журналист метавонист ба муддати аз 3 то 5 сол аз озодӣ маҳрум шавад.

Ҳуснигул Даминова 16 сол дар Телевизиони Тоҷикисон ба ҳайси хабарнигор фаъолият намуда, муаллиф ва муҷрии барномаи маъруфи «Инсон ва Қонун» буд.

Хонуми Даминова дар рӯзҳое ин намоиши ҳассоси телевизиониро таҳия мекард, ки кишвар нав аз нооромиҳои дохилӣ берун меомад ва барои як журналисти телевизион хеле ҷасорат мехост, ки аз ҷурму ҷиноят ва қонунмандӣ дар он рӯзҳо сӯҳбат кунад.

Источник: http://www.ozodi.org/content/article/2308953.html

[b]Мақомот мегӯянд, дар робита ба латукӯби сардабири “Наҷот” Ҳикматулло Сайфуллозода парванда боз шудааст.[/b]

Як масъули идораи пулиси “Сино-2”, ки бо “Озодӣ” сӯҳбат мекард, дар ин бора хабар дод, аммо аз ироаи ҷузъиёт худдорӣ варзид.

Ҳафтаи гузашта мақомоти тафтишотӣ гуфта буданд, ки пас аз эълони натиҷаҳои ташхиси тиббӣ-судӣ, дар робита ба қазияи Ҳикматулло Сайфуллозода парванда боз мекунанд.

Ин дар ҳолест, ки пас аз як ҳафтаи ҳамла болои Ҳикматулло Сайфуллозода дафтари САҲА дар Душанбе изҳори нигаронӣ ва хостори расидагии мақомот ба ин қазия шудааст. Ивар Вики, намояндаи дафтари САҲА дар Душанбе, гуфтааст, онҳое, ки сардабири «Наҷот»-ро латукӯб кардаанд, бояд ошкор ва боздошт шуда, ба ҷавобгарии ҷиноӣ кашида шаванд.

Қабл аз ин, сафорати Амрико дар Тоҷикистон низ ҳамла болои узви фаъоли ҲНИТ-ро маҳкум карда буд. Худи масъулони Ҳизби наҳзати исломӣ онро «сӯиқасд ба ҷони Ҳикматулло Сайфуллозода ва ҳамла ба ин ҳизби динӣ» медонанд.

Ҳикматулло Сайфуллозода, сардабири нашрияи «Наҷот» ва узви раёсати олии ҲНИТ, субҳи 7-уми феврал дар роҳ ба сӯи идораи ҳафтанома, тақрибан дар наздикиҳои манзили худ, ба таври ғайримунтазира дучори ҳамлаи афроди ношинос шудааст.

Ӯ дар ҳолати беҳушӣ ба беморхонаи «Қарияи Боло» оварда мешавад ва то кунун дар он ҷо бистарист. Табибон мегӯянд, ҳамлаварон бештар дар ноҳияи сараш зарбаҳои сангин задаанд.

Ҳикматулло Сайфуллозода дар соли гузашта сардабирии ҳафтаномаи «Наҷот», нашрияи расмии ҲНИТ-ро ба ӯҳда гирифт. Вай дар маркази таҳлилии «Диалог» дар Душанбе низ кор карда, дар расонаҳо бештар ба унвони таҳлилгари масоили сиёсӣ ва динӣ сӯҳбат мекунад.

Ҷаноби Сайфуллозода як ҳафта пеш аз он ки мавриди ҳамлаи афроди ношинос қарор бигирад, бештар дар бораи навори Алии Бедакӣ, таҳаввулоти Миср ва таъсири он ба кишварҳои худкома андешаҳои худро баён дошта буд.

Источник: http://www.ozodi.org/content/article/2309571.html

Тибқи гузориши Анҷумани миллии расонаҳои мустақили Тоҷикистон (АМРМТ) дар соли гузашта дар ин кишвар сиву ду мавриди маҳдудият барои дастрасӣ ба иттилоъот ва 42 мавриди шикоят дар робита бо ҳимоят аз шаъну шараф сабт шудааст.

Дар гузориши ин анҷуман омадааст, ки «дастрасӣ ба иттилоъот ва даъвоҳо дар робита бо ҳимоят аз шаъну шараф аз масоили умда дар роҳи густариши озодии баён дар кишвар боқӣ мемонад».

Тибқи ин гузориш дар соли гузашта нӯх парвандаи нашрияҳо ва хабарнигорон дар додгоҳ баррасӣ шудааст, ки парвандаҳои “ASIA-Plus”, “Озодагон” ва “Фараж” дар робита бо даъвои се қозии Додгоҳи олии Тоҷикистон “аз пурсару садотарин баҳсҳои додгоҳӣ» будааст.

Идомаи мавод дар саҳифаи таҳлилии сомонаи мо: [url=http://www.taj.nansmit.tj/analysis/?id=22]http://www.taj.nansmit.tj/analysis/?id=22[/url]

Источник:

Тибқи гузориши Анҷумани миллии расонаҳои мустақили Тоҷикистон (АМРМТ) дар соли гузашта дар ин кишвар сиву ду мавриди маҳдудият барои дастрасӣ ба иттилоъот ва 42 мавриди шикоят дар робита бо ҳимоят аз шаъну шараф сабт шудааст.
Дар гузориши ин анҷуман омадааст, ки «дастрасӣ ба иттилоъот ва даъвоҳо дар робита бо ҳимоят аз шаъну шараф аз масоили умда дар роҳи густариши озодии баён дар кишвар боқӣ мемонад».

Тибқи ин гузориш дар соли гузашта нӯх парвандаи нашрияҳо ва хабарнигорон дар додгоҳ баррасӣ шудааст, ки парвандаҳои “ASIA-Plus”, “Озодагон” ва “Фараж” дар робита бо даъвои се қозии Додгоҳи олии Тоҷикистон “аз пурсару садотарин баҳсҳои додгоҳӣ» будааст.

Дар ин гузориш ҳамчунин мехонем: «Дар моҳи ноябри соли гузашта Маҳмадюсуф Исмоилов, хабарнигори “Нури зиндагӣ” барои фаъолияти касбии худ боздошт шудааст, ки чунин ҳодиса дар таърихи рӯзноманигории тоҷик собиқа надошт».

Дар санади АМРМТ ба муҳокимаи додгоҳии Заррина Абдулвоҳидова, муҳаррири бахши форсии радиои давлатии “Овози тоҷик” ишора гардидааст, ки ҳукми додгоҳ ба нафъи рӯзноманигор содир шудааст.

Хонуми Абдулвоҳидова аз барканории ғайриқонунии худ аз симмати муҳаррири бахш ба додгоҳ шикоят бурда ва бар асоси ҳукми додгоҳ ба симматаш барқарор шуда ва ба ӯ ғаромати зарурӣ пардохт шудааст.

Гуфта мешавад, дар Тоҷикистон ин нахустин ҳодисаест, ки рӯзноманигор барои дифоъ аз ҳуқуқ ба кор ба додгоҳ шикоят карда ва муҳокимаи додгоҳ ба нафъи ӯ анҷом шудааст.

Илова бар ин, ба навиштаи гузориши Анҷумани миллии расонаҳои мустақили Тоҷикистон «арзёбии вазъи озодии баён дар Тоҷикистон нишон медиҳад, ки бархе аз мавориди нақзи ҳуқуқи расонаҳо ва рӯзноманигорон сабт намешаванд. Зеро бархе афрод ба далоили мухталиф намехоҳанд, мавориди нақзи ҳуқуқи онҳо дар расонаҳо пӯшиш ёбад».

Аммо Созмонҳои хабарнигорӣ ва рӯзноманигорони тоҷик аз афзоиши шикоятҳои додгоҳӣ алайҳи расонаҳо ва хабарнигорон ва эҷоди мавонеъ дар роҳи сабти номи расонаҳо ибрози нигаронӣ карда ва ин вазъро навъе таҳдид ба озодии баён дар Тоҷикистон унвон карданд.

Ба бовари Хуршеди Атоулло, сардабири нашрияи “Фараж”, афзоиши мухолифати расонаҳои мустақил бо ниҳодҳои давлатӣ ва фишор бар нашрияҳои ғайридавлатӣ дар баҳори соли гузашта, дар пайи фаъол шудани нахустин роҳи утумубилрави пулакӣ дар Тоҷикистон оғоз шуд.

Зеро ба гуфтаи вай, бархе аз нашрияҳои мустақил зимни баррасии ҳуввияти ширкати «Innovative Road Solutions», ба эҳтимоли муталлиқ будани ин ширкат ба хонаводаи раиси ҷумҳурии Тоҷикистон ишора карда буданд.

Ширкати «Innovative Road Solutions» аз 31 марти соли гузашта ҷамъоварии пул аз ронандагон дар масири Душанбе-Чаноқ, нахустин роҳи пулакӣ дар Тоҷикистонро ба ӯҳда дорад.

Дар гузориши АМРМТ ба ҳодисаи боздошт шудани Шарифи Ҳамдампур, сардабири нашрияи “Тоҷикистон” дар ноҳияи Айнии вилояти Суғд аз сӯйи кормандони пулис ишора шудааст.

Дар гузориш омадааст, ки имкон дорад, далели ин боздошт аксбардории оқои Ҳамдампур аз посгоҳи ҷамъоварии маблағ дар маҳаллаи “Ҳушёрӣ” дар ноҳияи Варзоб бошад.

Дар ин санад дар канори баҳсҳои додгоҳӣ аз «мавориди таҳдиду фишорҳои зиёд ба расонаҳои мустақил аз ҷониби ниҳодҳои давлати Тоҷикистон» гузориш шудааст.

ДАр ин гузориш ёдоварӣ шудааст, ки дар пайи ҳаводиси водии Рашт дар тирамоҳи соли гузашта ва бозтоби он дар нашрияҳои мустақил фаъолияти нашрияҳои “Фараж”, “Нигоҳ” ва “Пайкон” мутаваққиф ва бо дастури муъовини вазири нақлиёт ва иртибототи Тоҷикистон сойтҳои интернетии “avesta.tj”, “centrasia.ru”, “tjknews.com” ва “fergana.ru” масдуд шуданд.

Ба дунболи ин ҳодиса, дар авоили моҳи октябри соли гузашта сардабирони иддаъе аз нашрияҳои мустақили чопи Душанбе ва созмонҳои дифоъ аз ҳуқуқи журнолистон Кумитаи дифоъ аз ҳуқуқи журнолистони мавсум ба “Кумитаи 29 сентябр” таъсис шуд.
Дар ҳамин ҳол, Зӯҳро Ҳалимова, масъули дафтари Сандуқи Сорос дар Тоҷикистон мӯътақид аст, ки мумкин аст мухолифати расонаҳои мустақил бо ниҳодҳои давлатӣ аз тариқи муколамаҳо ҳалл шуда ва адами эътимод миёни онҳо аз байн равад.

Бино ба гузориши Анҷумани Миллии Расонаҳои Мустақили Тоҷикистон, дар соли гузашта дар маҷмӯъ 248 ҳодисаи марбут ба фаъолияти расонаҳои ин кишвар сабт шудааст, ки аз ин ҷумла, 58 ҳодиса ба нақзи ҳуқуқи хабарнигорону расонаҳо ва 52 қазия ба иттиҳомот алайҳи рӯзноманигорону нашрияҳо рабт доштааст.

Источник: http://www.bbc.co.uk/tajik/news/2011/02/110214_mm_press_naimt.shtml