[b]Хабарнигори шабакаи Би-би-сӣ Искандари Фирӯз дар Душанбе ҳамроҳ бо писараш дучори як садама шудааст.[/b]

Искандари Фирӯз, хабарнигори бахши форсии Би-би-сӣ дар Тоҷикистон, шоми сешанбе дар натиҷаи як садамаи автомобилӣ дар хиёбони Исмоили Сомонӣ ҷароҳати сангин бардошта дар ҳолати беҳушӣ (кома) ба бемористони Қарияи боло интиқол дода шудааст.

Шуҳратёр, яке аз наздикони Икандари Фирӯз гуфт, ки Искандар ҳамроҳи писараш Ҷавоншер савори мошини «Тойота Камрӣ» дар хиёбони Исмоили Сомонӣ тарафи Қаряи боло ҳаракат мекарданд, аммо дар наздикиҳои Боғи ҳайвонот як мошини «Ландкрузер» аз самти муқобил бо суръати беш аз 100 километр дар соат, ба мошини онҳо бармехӯрад.

Шуҳратёр мегӯяд, ки пушти фармони «Тойота Камри» писари Искандари Фирӯз, Ҷавоншер менишаст. Тавре пизишкони беморхонаи Қаряиболо ташхис кардаанд, дар натиҷаи ин зарбаи сангин ду пои Искандари Фирӯз аз се ҷой шикаста ҷигараш кафида ва сараш шадидан зарб хӯрдааст. Вазъи Ҷавоншер, ки мошинро идора мекард, беҳтар арзёбӣ мешавад. Ба қавли кормандони Бозрасии автомобилӣ, ҳодисаи мазкур дар ҳоли омӯзиш қарор дорад. Тибқи иттилои расида, мошини «Ландкрузер»-ро Аёмиддин Раҳмиддинов, як сокини шаҳри Душанбе идора мекард.

Аммо Шуҳратёр, додарзодаи Искандар мегӯяд, ки пас аз ин садама ронандаи «Ландкурзер» фирор кардааст ва то ҳол аз ӯ хабаре нест. Ба қавли вай, кормандони БДА шоми дирӯз мегуфтанд, ки ин садама бо айби ронандаи «Ландкурзер» рух додааст, аммо субҳи имрӯз кормандони Бозрасии автомобилӣ протокол тартиб дода, Искандари Фирӯзро гунаҳкор медонанд.

Аммо Шерафкан Латифов, сухангӯи идораи БДА-и шаҳри Душанбе гуфт, ки садамаи мазкур аз тарафи кормандони Бозрасии автомобилии шаҳр мавриди таҳқиқ қарор дорад. Ба гуфтаи вай, ин садама баҳсбарангез аст ва бинобар ҳамин тасмим гирифта шуд, ки барои ташхиси тарафи айбдор, бозрасии фаннӣ анҷом дода шавад. Ӯ афзуд, ки то замони анҷоми бозрасии фаннӣ, наметавон ҳеҷ яке аз тарафҳоро гунаҳкор донист.

Шоҳидони айнӣ мегӯянд, ки зарби бархӯрди «Ландкрузер» ба «Тойота Камри» ба андозае сахт буд, ки дуввуми комилан корношоям шудааст.

Источник: HTTP://WWW.OZODI.ORG/CONTENT/ARTICLE/24734933.HTML

[b]Душанбе, 5 октябр. (АМИТ «Ховар» Саидэҳсони Солеҳ).-Дар Донишгоҳи славянии Тоҷикистону Русия мубоҳисаи кушоди устодону донишҷўёни бахши журналистикаи факултаи филология бо аъзои Шӯрои ВАО-и Тоҷикистон доир гардид.[/b]

Зиннатулло Исмоилов, раиси Шўрои ВАО-и Тоҷикистон гуфт, мақсади асосии ин ҷаласа худтанзимкунии фаъолияти журналистӣ мебошад. Аъзои шўро Иброҳим Усмонов ва Мухтор Боқизода ҷиҳати риояи одоби касбӣ дар нигоштаҳои журналистон изҳори назар карда, ба журналистони оянда дар мавриди меъёрҳои ахлоқии фаъолияти касбӣ маълумоти муфассал пешниҳод карданд. Дар навбати худ устодону донишҷўён андешаҳояшонро роҷеъ ба нигоштаҳои воситаҳои ахбори омма баён намуда, ба суолҳои худ перомуни меъёрҳои касбиву ахлоқӣ посух гирифтанд.

Дар поёни ҷамъомад ба донишҷӯёну устодон адабиёт роҷеъ ба механизми худтанзимкунӣ, аз ҷумла шарҳи меъёрҳои ахлоқии фаъолияти журналистӣ дар Тоҷикистон тақдим гардид.

Дар ин бора аз дастгоҳи иҷроияи Шӯрои ВАО –и Тоҷикистон ба АМИТ «Ховар» иттилоъ доданд.

Источник: http://khovar.tj/society/24514-ba-zhurnalistoni-1207avon-ahlo1179i-kasb1251-meom1263zonand.html

[b]Душанбе, 5 октябр. (АМИТ «Ховар», Сарвинози Руҳуллоҳ)- Имрӯз мулоқоти навбатии Шӯрои ВАО-и ҶТ дар маркази маъмурии ВМКБ баргузор шуд. Дар ин бора ба АМИТ Ховар аз дастгоҳи иҷроияи Шўрои ВАО-и Ҷумҳурии Тоҷикистон хабар доданд. Тибқи иттилои расида дар чорабинӣ дабири кулли Шурои ВАО Хилватшоҳи Маҳмуд ва аъзои Шӯро Қурбон Аламшоев ва Мухтор Боқизода ширкат доштанд.[/b]

Дар аввал аъзои Шӯро ва иштирокчиёни семинарро намояндаи мақомоти иҷроияи ҳокимияти маҳаллии вилоят Сабоҳат Донаёрова, сармутахассиси бахши иттилооти дастгоҳи иҷроияи раиси ҳукумати вилоят ба ҳузур пазируфта баъдан дар бораи ҳадафи ин семинар сухан кард.

Маврид ба зикр аст, ки дар ин нишаст ҳудуди беш аз 35 нафар аз ҷумла, донишҷӯён устодон, кормандони мақомоти ҳокимияти маҳаллии вилоят, шаҳри Хоруғ ва ноҳияи Шуғнон ширкат ва суханронӣ доштанд. Зимни нишаст дар мавриди «Меъёрҳои ахлоқии журналистӣ ва фаъолияти касбии журналистӣ» ва дар атрофии масоили ба он вобаста суҳбати судманд сурат гирифт, ки дар он иштирокчиён назари худро иброз доштанд. Дар нишаст изҳори нигаронӣ карда шуд, ки дар бархе аз матбуоти даврии марказии ҶТ, ба арзишҳои динӣ ва мазҳабӣ арҷ гузошта намешавад ё ки бе эҳтиромӣ зоҳир мешавад, ки ин хилофи моддаи 5 ва 9 «Меъёрҳои ахлоқии фаъолияти журналистӣ дар Тоҷикистон» мебошад.

Иштирокчиён аз Шӯрои ВАО-и ҶТ даъват карданд, ки дар ҳалли ин масоил бетараф набошанд ва ба ин мушкилот расидагӣ кунанд. Ёдрас мекунем, ки ин чорабинӣ дар идораи ҳукумати шаҳри Хоруғ сурат пазируфта, дидору мулоқоти аъзои Шӯрои ВАО аз ВМКБ идома дорад.

Источник: http://khovar.tj/society/24527-sh1263roi-vao-dar-badahshon.html

[b]Созмонҳои рӯзноманигорӣ ҷиҳати мубориза бо масдуд шудани торнамоҳо иқдоми «100 рӯз барои озодии Тоҷнет» роҳандозӣ намуданд.[/b]

«Волоияти ҳуқуқи шаҳрвандон бояд баробар бо волоияти қонун бошад» ,-таъкид мекунанд, ташаббускорони маъракаи «100 рӯз барои озодии Тоҷнет».

Тибқи иттилои созмони ҷамъиятии «ИНДЕМ» дар 9 моҳи соли ҷорӣ рӯйхати торнамоҳои масдудшуда дар қаламрави Тоҷикистон ба 50 расидааст, ки дар байни онҳо хабаргузориҳои миллӣ ва шабакаҳои иҷтимоӣ ва тафреҳӣ ба мушоҳида мерасанд.

Нуриддин Қаршибоев, раиси Анҷумани миллии расонаҳои мустақили Тоҷикистон ё НАНСМИТ, иброз дошт, ки танҳо дар моҳҳои июл-августи соли ҷорӣ хадамоти мониторинги ин созмон масдуд шудани фаъолияти 15 торнамо (сайт)-ро сабт кардааст. «Пеш аз ҳама, манзурамон масдуд шудани як зумра сайтҳо дар фазои Тоҷнет аст, ки бидуни қарори додгоҳ ё баррасии пешазсудӣ аз ҷониби Хадамоти алоқаи назди ҳукумати Тоҷикистон ва масъулини дигар маҳдуд карда шудаанд. Ин имконияти дастрасиро ба сарчашмаҳои алтернативии ахбор маҳдуд мекунад ва ҳуқуқи конститутсионии шаҳрвандонро поймол месозад»,-афзуд ӯ.

Мунтазам аз дӯст ба душмани интернет табдил ёфтани Тоҷикистон дар ҷаласаи Созмони Амният ва Ҳамкорӣ дар Аврупо дар Варшава низ дар ҳафтаи гузашта мавриди баррасӣ қарор дода шуд.

Хилватшоҳи Маҳмуд, дабири кулли Шӯрои ВАО-и Тоҷикистон, ки дар ин ҷаласа ширкат дошт, ин амалро нақзи ҳуқуқи шаҳрвандон медонад. Ба гуфтаи ӯ, дар қиёс ба дигар давлатҳои минтақа ин масъала дар Тоҷикистон доғтар мегардад: «Дар Қазоқистон ва Қирғизистон ҳеҷ як расона ҳатто сабти ном намешавад ва муҷаввиз (литсензия) намегирад. Агар фаъолияташ дар чаҳорчӯбаи қонун бошад, фаъолият кардан мегирад ва ҳеҷ як ниҳод барои бастани онҳо ҳақ надорад ва ин корро ҳам намекунад. Аммо дар Туркманистону Узбакистон ва инак дар Тоҷикистон, ки як кишвари дӯсти интернет маҳсуб мегардид, ин падидаи номатлуб ҳам ба миён омадааст.»

Бо ҳадафи расидагӣ ба ин мушкил ва ҷалби ҷомеаи шаҳрвандӣ ва ҳукумат ба мушкилоти озодии баён дар интернет созмонҳои рӯзноманигории Тоҷикистон, муассисон ва сардабирони расонаҳо иқдомеро зери номи «100 рӯз барои озодии Тоҷнет» роҳандозӣ намуданд. Саймуддин Дӯстов, яке аз ташаббускорони ин иқдом ва муассиси торнамои Тоҷнюс мегӯяд, «фикр мекунам, ин иқдом сабаби он мегардад, ки фарҳанги муносибати маъмури бозор — Хадамоти алоқаи Тоҷикистон ба Тоҷнет дигар хоҳад шуд. Ҳамчунин, нафароне, ки дар сатҳи ҳукумат, мансабдорони зирабт инчунин муносибати худро ба ин муҳит дигар хоҳанд кард. Барои мо муҳим аст, ки волоияти қонун дар ин бахши ҳаёти ҷамъиятӣ таъмин бошад.»

Нозирони умур ин иқдомро барои ҷалби таваҷҷӯҳ ба мушкилоти марбут ба масдуд кардани сайтҳо дар Тоҷикистон муҳим медонанд. Аммо Асомиддин Атоев, раиси Академияи иттилоот ва коммуникатсия, бар ин назар аст, ки он ба тағйир хӯрдани мавқеи Хадамоти алоқа таъсире нахоҳад дошт. Ҳарчанд ба таъкиди ҷаноби Атоев ин гуна иқдоми ҷомеаи шаҳрвандӣ, дар маҷмӯъ, барои ҷалби таваҷҷӯҳ ба ин гуна мушкилоти озодии баён бетаъсир нахоҳад буд.

Дар ҳамин ҳол, муддати ду рӯзи охир ҳудуди 60 тан ҷонибдории худро ба иқдоми «100 рӯз барои озодии Тоҷнет» аз тариқи шабакаи иҷтимоии Фейсбук баён доштаанд. Ҳамзамон беш аз 400 нафари дигар тавассути Фейсбук ба ин иқдом даъват шудаанд.

Источник: http://www.ozodi.org/content/article/24728552.html

[b]Додситонии вилояти Суғд ба иттиҳоми нақзи муқаррароти идорӣ алайҳи сардабири телевизиюни «Ҷаҳоноро» дар шаҳри Ғафурови ин вилоят парванда боз кардааст.[/b]

Дар ин замина Анҷумани расонаҳои мустақилли Тоҷикистон аз қавли Муҳаббат Ҷӯраева, ҳуқуқдони Маркази ҳимоят аз расонаҳо ва рӯзноманигорон дар вилояти Суғд, хабар додааст.

Ба гуфтаи хонуми Ҷӯраева, пахши иттилоъ дар бораи оташсӯзӣ дар бахши умдафурӯшии бозори «Корвон» дар шаҳри Душанбе ба чунин вокуниши додситонӣ мунҷар шудааст.

Маҳмудҷон Дадобоев, раиси телевизиюни «Ҷаҳоноро» гуфтааст, ки дар барномаи «Ахбор»-и ин телевизиюн дар истинод ба сойти иттилоотии «Tojnews» хабари оташсӯзӣ дар бозори «Корвон» пахш шуда ва ба дунболи ин ӯ ба бахши маҳаллии Кумитаи амнияти миллӣ дар вилояти Суғд эҳзор шудааст.

Ба гуфтаи оқои Дадобоев, баъдан ӯро ба додситонии вилоят эҳзор карда ва пас аз суҳбат фаъъолияти шабакаи «Ҷаҳоноро» дар ин замина қонунӣ унвон шудааст. Аммо пас аз чанд рӯз рӯшан шудааст, ки додситонии вилояти Суғд дар мавриди нақзи моддаи 373-и Қонуни идории Тоҷикистон ба додгоҳ шикоят бурдааст.

Муҳаббат Ҷӯраева, ҳуқуқдон, мегӯяд, тибқи ин модда расонаҳое, ки расман сабти ном нашудаанд, барои пахши хабар муҷозот хоҳанд шуд. Ин дар ҳолест, ки шабакаи телевизиюни «Ҷаҳоноро» сабти ном шуда ва хабари оташсӯзӣ аз расонаи дигар дарёфт шудааст.

Аз ин лиҳоз, ба гуфтаи хонуми Ҷӯраева, бар асоси моддаи 36-и Қонуни «Телевизиюн ва родию»-и Тоҷикистон, телевизиюн ё родию дар сурати истифода аз хабари манобеъи дигар мавриди пайгарди қонунӣ қарор намегиранд.

Бино ба иттилоъи ӯ, ба далели тафҳими иттиҳом нашудани фарди мазнун аз сӯйи додситонӣ додгоҳи ноҳияи Бобоҷон Ғафуров парвандаро баррасӣ накардааст.

Дар ҳамин ҳол, манобеъи додситони вилояти Суғд хабари боз шудани парванда алайҳи корманди шабакаи телевизиюни «Ҷаҳоноро»-ро таъйид карда ва гуфтаанд, ки ҳамакнун ин парванда бо таваҷҷуҳ ба назокатҳои ҳуқуқӣ барои баррасӣ ба додгоҳ ироа шудааст.

Барои бори аввал нест, ки шабакаи телевизиюни «Ҷаҳоноро» дар таҳияи хабару гузоришҳо бо мушкилоту мавонеъи идории ниҳодҳои давлатии Тоҷикистон рӯбарӯ мешавад.

Дар моҳи майи соли ҷорӣ, масъулони ин телевизиюн аз рафтори ғайриқонунии кормандони бахши амниятии Фурӯдгоҳи байналмилалии шаҳри Хуҷанд дар қиболи хабарнигори ин шабака ба додгоҳи шаҳри Хуҷанд шикоят бурда буданд.

Ба гуфтаи мақомоти шабака, хабарнигори шабакаи телевизиюни «Ҷаҳоноро» бар асоси дархости мусофирон ба фурудгоҳи шаҳри Хуҷанд омада ва барои рӯшан кардани иллати таъвиқи парвози ҳавопаймо талош кардааст. Аммо кормандони бахши амниятии фурудгоҳ ба рӯзноманигор барои дидор бо масъулони фурудгоҳ иҷоза надода ва ба зӯр ва алфози қабеҳ ӯро аз сохтмони фурудгоҳ берун кардаанд.

Источник: http://www.bbc.co.uk/tajik/news/2012/10/121003_mm_court_jahonoro.shtml

[b]Додситонии вилояти Суғд алайҳи сармуҳаррири телевизиони мустақили “Ҷаҳоноро” дар Чкалов, парванда боз кардааст.[/b]

Муҳаббат Ҷӯраева, вакили дифои Маҳмудҷон Дадобоев ба «Озодӣ» гуфт, ки рӯзи ҷумъаи 28- уми сентябр, додситонии Суғд нисбат ба зерҳимояаш барои пахши хабари сӯхтори бозори “Корвон” -и Душанбе дар барномаи ахбори телевизиони “Ҷаҳоноро”, парвандаи маъмурӣ боз кардааст.

Ба қавли хонум Ҷӯраева, сармуҳаррири телевизиони мустақили «Ҷаҳоноро» мутобиқ ба банди 373 – и Қонуни матбуоти Тоҷикистон — “риоят накардан ба қонунҳои васоити ахбори омма” айбдор дониста шуда, додситонӣ парвандаи ӯро ҷиҳати бозбинӣ ба додгоҳи ноҳияи Бобоҷон Ғафуров ирсол намудааст.

Хонум Ҷӯраева афзуд: «Мо ин амали додситониро ғайриқонунӣ меҳисобем. Чунки мутобиқи банди 36 — и Қонун дар бораи телевизион ва радиошунавонӣ, расонае, ки иттилоъро аз манбаи дигар пахш мекунад, дар назди қонун аз ҷавобгарӣ озод аст. Ва хабаре, ки телевизиони “Ҷаҳоноро” пахш кард, моли онҳо набуд, балки аз саҳифаи хабаргузории “Тоҷнюс” гирифта буданд. Мо бар зидди ин қарори додситонӣ ба Додситонии кулл шикоят мебарем.»

Аз додситонии Суғд ба Озодӣ гуфтанд, ки сабаби аслии боз шудани парвандаи маъмурӣ алайҳи сармуҳаррири телевизиони “Ҷаҳоноро”, “пахши носаҳеҳ” — и хабари “Тоҷнюс” дар барномаи ахбори телевизиони “Ҷаҳоноро” будааст, ки шумораи эҳтимолии ҳалокшудагон дар сӯхтори бозори “Корвон”- ро “ бинобар маълумоти ғайрирасмӣ”, ба ҷойи 3-8 нафар, “38 нафар” эълон кардааст.

Ҳамчунин, ба гуфтаи манбаи муътамад аз додситонии Суғд, телевизиони “Ҷаҳоноро” барномаҳои худро бидуни қайд дар дафтари махсус иҷозаи пахш додааст, ки ин низ мухолиф ба қонун аст. Ҳамин манбаъ афзуд, радд нашудани ин хабари носаҳеҳ аз ҷониби телевизиони “Ҷаҳоноро”, додситониро водор ба боз кардани парвандаи маъмурӣ алайҳи раҳбари телевизиони мазкур кард.

Вале Маҳмудҷон Дадобоев, раҳбари телевизиони “Ҷаҳоноро” гуфт, хабари шумораи ғайрирасмии одамони ҳалокшуда дар сӯхтори бозори “Корвон”- ро аз хабаргузории “Тоҷнюс” айнан пахш карда буданд ва дар ин маврид аз ҷониби телевизион саҳве нарафтааст, ки раддия пахш кунанд. Ва дар ин бора асноди расмиро ба додситонӣ ироа карда буданд ва тавре ба назар мерасад, пазируфта нашудааст. Вай афзуд, барояш сабаби аслии барангехтани ин моҷаро алайҳи телевизиони “Ҷаҳоноро” комилан норӯшан аст.

Нуридин Қаршибоев, раҳбари иттиҳодияи расонаҳои мустақили Тоҷикистон, НАНСМИТ дар сӯҳбат бо радиои Озодӣ назарашро дар бораи ин қазия чунин баён дошт: “Ба назари ман, ин мушкилро ба сурати умум то расидан ба марҳалаи додгоҳӣ ҳал кардан мумкин буд. Ҷониби даъвогар метавонист аз ширкати телевизиони хусусии “Ҷаҳоноро» талаби тасҳеҳи хабари хатояшро кунад ва бо иҷрои он баҳс поён меёфт. Аммо ҳоло, ки мутаассифона ин даъво то додгоҳ рафтааст, умедворам додгоҳ онро мунсифона баррасӣ мекунад.”

Телевизиони мустақили “Ҷаҳоноро” субҳу шом барои сокинони шаҳри Чкалов ва атрофи он намоиш пахш мекунад. Мавҷи он дар қисматҳои марказии Суғд танҳо тавассути шабакаи кабелии “Мавҷи Ориёно” дастрас аст.

Маҳмудҷон Дадобоев аз рӯзноманигорони ботаҷрибаи тоҷик ва муассиси ҳафтавори “Суғдиён” дар Хуҷанд ва телевизиони “Баҳри тоҷик” дар шаҳри Қайроқум мебошад. Ҳафтавори «Суғдиён» ду соли пеш ба сабаби мушкилоти молӣ баста шуд ва телевизиони “Баҳри тоҷик” то ҳол муҷаввиз дарёфт накардааст.

Источник: http://www.ozodi.org/content/article/24727285.html

[b]Дафтарҳои матбуъоти сохторҳои давлати Тоҷикистон дар сададанд, ниҳоди тахассусии худро созмон диҳанд.[/b]

Дар ин замина, рӯзи душанбеи 1 октябр, Анҷумани Миллии Расонаҳои Мустақили Тоҷикистон хабар дод.

Табодули таҷруба, роҳандозии тарҳҳои омӯзишӣ, боло бурдани сатҳи сухангӯён ва таҳияи барномаи иртиботӣ бо васоили ахбори умуми Тоҷикистон аз аҳдофи ин ниҳод маҳсуб шудааст.

Тибқи иттилоъи ин манбаъ, дар конфаронси муассисон сухангӯёни ниҳодҳои давлатӣ дар бораи таъсиси иттиҳод, анҷуман ё бошгоҳи марказҳои матбуъот тасмим хоҳанд гирифт.

Ҳамакнун ба манзури анҷоми корҳои тадорукотӣ барои баргузории конфаронс аз ҷумлаи намояндагони марказҳои матбуъоти Вазоратҳои хориҷа, беҳдошт, маориф, Кумитаҳои амнияти миллӣ ва занони Тоҷикистон гурӯҳи ибтикорӣ таъсис шудааст.

Зимнан, ин мавзӯъ дар давраи омӯзишӣ барои кормандони марказҳои матбуъоти сохторҳои давлатӣ, ки дар рӯзҳои 27 ва 28 сентябри соли ҷорӣ таҳти унвони “Ҳамкории марказҳои матбуъоти ниҳодҳои давлатӣ бо ВАУ” дар шаҳри Душанбе баргузор шуд, матраҳ гардид.

Ин ҳамоиш ба ибтикори Анҷумани Миллии Расонаҳои Мустақили Тоҷикистон ва Идораи иттилоъот, матбуъот, таҳлил ва тарҳрезии сиёсати хориҷии Вазорати хориҷаи ин кишвар ва кумаки молии созмони байналмилалии «International Media Support” баргузор гардид.

Источник: http://www.bbc.co.uk/tajik/news/2012/10/121001_mm_press_centre.shtml

[b]Кумиссюни Паҳнбонди СММ барои Тавсеъаи Диҷитол дар нахустин гузориши худ дар бораи истифода аз интернети паҳнбонд дар ҷаҳонро мунташир кардааст.[/b]

Ин гузориш омори корбарони интернет дар Тоҷикистонро 13 дарсад аз ҷамъияти кишвар хондааст.

Дар ин пажуҳиш ҳамчунин омадааст, ки дар Қазоқистон 45 дарсад дар Узбакистон 30.2 дарсад дар Қирғизистон 29 дарсад ва дар Афғонистону Туркманистон 5 дарсади мардум аз интернет истифода мебаранд.

Ҳарчанд давлати Тоҷикистон пайваста таъкид мекунад, ки мардумаш аз озодиҳои бештар дар муқоиса ба кишварҳои ҳамсояаш баҳраманд аст, бино ба ин гузориши ниҳоди СММ ҷамъияти Тоҷикистон дар муқоиса ба кишварҳои минтақа камтарин корбарони интернетӣ дорад.

Ин дар ҳолест, ки ширкатҳои фароҳамгари интернетӣ дар Тоҷикистон муддате бо мақомоти зирабти кишвар кашмакашҳои қонунӣ доштанд, ки ба гуфтаи Анҷумани фароҳамгарони интернет дар кишвар барои рушди ин арса латма ворид кард.

Моҳи ноябри соли гузашта Кумитаи молиёти Тоҷикистон бо ирсоли номае ба ширкатҳои фароҳамгари интернет аз онҳо тақозо карда буд, ки молиёти ғайримустақими седарсадиро аз авоили соли гузашта пардохт кунанд.

Ширкатҳои фароҳамгари интернети Тоҷикистон нахуст аз ин тақозои мақомот ба додгоҳ шикоят буданд. Зеро гуфтанд, ки қонуни молиёт ин навъи молиётро танҳо шомили фароҳамгарони телефунҳои мобилӣ хондааст.

Аммо Кумитаи молиёт фароҳамгарони интернетиро низ шомили ин муқаррарот кард.

Дар ниҳоят, ширкатҳои фароҳамсози хадамоти интернетӣ дар Тоҷикистон аз моҳи июни соли ҷорӣ ба пардохтани молиёти “ғайримустақими седарсадӣ” оғоз карданд.

Масъулони Анҷумани фароҳамгарони интернет дар Тоҷикистон ин амрро “шикасти ширкатҳои фароҳамсози интернет дар кишвар” унвон карданд.

Аммо гузориши Кумиссюни Паҳнбонди СММ ба давлатҳои кишварҳои дар ҳоли рушд тавсия додааст, ки молиёти хадамот ва воридоти таҷҳизоти электруниро коҳиш бидиҳанд.

Бино ба пажуҳиши онҳо ин амр метавонад, ба афзоиши қобили мулоҳиза дар истифодаи интернет дар кишварҳо мунҷар шавад.

Ин гузориш ба унвони мисол аз Шри Ланка ёд мекунад ва ишора мекунад, ки пас аз коҳиши молиёти хадамот ва воридоти таҷҳизоти электрунӣ дар ин кишвар теъдоди истифодабарандагони интернетиро дар зарфи 18 смоҳ аз 3.5 милюн ба 13 милюн афзоиш додааст.

Ин кумиссюн мегӯяд, ки нақши тавсеъаи истифодаи интернет дар беҳбуди зиндагии мардумони кишварҳои дар ҳоли рушд қобили мулоҳиза аст.

Дар гузориш мехонем: “Интернети паҳнбонд ба зиндагии мардумони кишварҳои ҷаҳон аз роҳи беҳдошти мобилӣ, омӯзиш аз роҳи дур, таҳсили мобилӣ ва пардохтҳои мобилӣ беҳбуд мебахшад.”

Ин гузориш ҳамчунин таъкид кардааст, ки тавсеъаи интернет барои беҳбуди зиндагии занон, афзудани навовариҳо ва касби малакаҳои тоза кумак мекунад.

Бо ин ҳама қимати истифода аз интернет дар Тоҷикистон нисбат ба соири кишварҳои ҳамсуд болотар аст.

Ба гуфтаи соҳибназарон, коҳиши нархи интернет танҳо бо коҳиши анвоъи молиёт ва афзоиши теъдоди корбарон имконпазир будааст.

Омори расмӣ дар бораи теъдоди истифодабарандагони интернет дар Тоҷикистон зиддунақиз будааст. Аммо тибқи иттилоъи Вазорати нақлиёт ва иртибототи Тоҷикистон дар соли 2010 теъдоди корбарони шабакаи интернет дар ин кишвар 850 ҳазор нафар будааст.

Источник: http://www.bbc.co.uk/tajik/institutional/2012/09/120926_sq_internet.shtml

[b]Раҳбарони ниҳодҳои журналистӣ ва расонаҳои Тоҷикистон аз тариқи “Facebook” амалиёти “100 рӯз барои озодии Тоҷнет”-ро роҳандозӣ кардаанд.[/b]

Дар баёнияи созмондиҳандагон, ҳадаф аз ин амалиёт ҷалби таваҷҷӯҳи ҷомеъа ва давлати Тоҷикистон ба масъалаи озодии баён дар Интернет унвон шудааст.

Дар ин баёния омадааст, дар рӯзи 8 сентябри соли ҷорӣ теъдоди сойтҳои масдудшуда дар Тоҷикистон ба 50 адад расида буд. Бештари сойтҳои иттилоотӣ, назири [url=www. news.tj,www.tojnews.org]www. news.tj,www.tojnews.org[/url] бидуни мусаваббаи додгоҳ ва ба таври ғайриқонунӣ масдуд шуданд.

Гуфта мешавад, бахши ироъакунандаи Интернет дар Тоҷикистон мавсум ба “Тоҷнет” ба дастури мақомоти зирабти давлати Тоҷикистон бахше аз сойтҳои иттилоотӣ, ки матолиби интиқодӣ мунташир кардаанд, масдуд кардааст.

Аз ин лиҳоз, созмондиҳандагони амалиёти “100 рӯз барои озодии Тоҷнет” ибрози умедворӣ кардаанд, ки ин иқдом барои боло бурдани сатҳи дониши компютерии мардум, муқобала бо мавориди масдудкунии ғайриқонунии сойтҳо ва ташаккули системи иҷтимоъии масдудсозии қонунии сойтҳо мусоидат хоҳад кард.

Источник: http://www.bbc.co.uk/tajik/news/2012/10/121002_mm_internet.shtml

[b]Порлумони Тоҷикистон бо тасвиби асноди лозим банди марбут ба тавҳин ва таҳқирро дар Қонуни мадании кишвар ҷой додааст.[/b]

Дар ин замина рӯзи душанбеи 1-уми октябр, ба ду моддаи Қавонин ё Кодеси маъмурии Тоҷикистон тағйирот ворид гардид.

Рустам Менглиев, вазири адлияи Тоҷикистон, ки пешнависи ин санадро дар иҷлоси порлумон муъаррифӣ мекард, гуфт, ки ин амр бо тавсияи Кумиссюни ҳуқуқи башари Созмони Миллали Муттаҳид сурат гирифт.

Ӯ гуфт, ки бо ворид шудани бандҳои марбут ба таҳқир ва тавҳин ба Қавонин ё Кодекси маъмурии Тоҷикистон, тарафҳои мавриди баҳс метавонанд қазоёъи аз ин навъро дар сурати лозим тавассути нашри раддия ва ё пардохти ҷарима анҷом бидиҳанд.

Дар як соли ахир қазияҳои марбут ба таҳқир ва тавҳин дар додгоҳҳои Тоҷикистон афзуда ва ба гуфтаи созмонҳои мудофеъи хабарнигорон ба унвони фишанги фишор ба озодии баён истифода мешудааст.

Зеро шикоёти марбут ба таҳқир ва тавҳин дар чорчӯби қонуни кайфарӣ ҳамчун ҷурми сангин муҷозот мешуд.

Барои мисол, Маҳмадюсуф Исмоъилов, дар соли гузашта ба иттиҳоми тавҳин ва таҳқири мақомоти маҳаллӣ 11 моҳ дар боздошт ба сар бурда буд.

Зимнан, дар моҳи майи соли ҷорӣ Маҷлиси намояндагони Тоҷикистон, бо пешниҳоди Президент Раҳмон бандҳои марбут ба тавҳин ва таҳқир аз Қавонин ё Кодекси ҷинойии ин кишвар лағв гардид.

Ба гуфтаи Маҳмадалӣ Ватанов, раиси Кумитаи қонунгузорӣ ва ҳуқуқи инсони Маҷлиси намояндагон, «Бо бардошта шудани моддаҳои 135 ва 136 аз қонуни ҷиноӣ одамон дигар барои тӯҳмат ва таҳқир ба ҷавобгарии ҷиноятӣ кашида намешаванд ва нисбати онҳо парвандаҳои ҷиноятӣ боз намешавад.”

Дар ҳамин ҳол, дар гузорише, ки аз сӯйи Сандуқи иҷтимоъии сиёсати ибтикори шаҳрвандии интернет ва бо мусоидати созмони байналмилалии “Internews network” ва USAID таҳия шудааст, таъкид шудааст, дар Қавонини ҷинойии Тоҷикистон моддаҳои 137 (таҳқири аланӣ ва тӯҳмат ба раиси ҷумҳурӣ) ва 330 (таҳқири масъулони давлатӣ) ҳамчунон боқӣ мондаанд.

Источник: http://www.bbc.co.uk/tajik/institutional/2012/10/121001_sq_mm_media_law.shtml