[b]Солҳо боз баҳс атрофи «Қонуни матбуот» дар Ҷумҳурии Тоҷикистон идома дорад. Қисме ба он боваранд, ки ин қонун аз қонунҳои дигар давлатҳо рӯйбардор шудааст ва ба талаботи журналистикаи тоҷик созгор несту ба такмилу баррасӣ ниёз дорад. Шояд ҳамин омил аст, ки ба воридсозии тағйироту иловаҳо ба «Қонуни матбуот» Маҷлиси намояндагони Маҷлиси Олиии кишвар таваҷҷӯҳ зоҳир намуд. Ба замми номукаммалии «Қонуни матбуот», то кадом дараҷа риоя гаштани меъёрҳои ахлоқии фаъолияти журналистон дар Тоҷикистон низ мавзӯи баҳсу баррасӣ қарор гирифтааст.[/b]

Дар Ҷумҳурии Тоҷикистон меъёрҳои ахлоқии фаъолияти журналистон то кадом дараҷа риоя мешаванд? Оид ба ин мавзӯъ Шарифи Ҳамдампур — яке аз чеҳраҳои шинохтаи ҷумҳурӣ дар соҳаи журналистика, тиҷорати маводи чопӣ ва табъу нашр мегӯяд:

— Онҳое, ки дар сари мансаб ҳастанд, баъди рафтан аз мансаб ба журналистон муроҷиат мекунанд, ки ин хел кор шуд ва кӣ ҳақу кӣ ноҳақ буд, зеро журналистон дар ҷаҳон ҳамчун ҳокимияти чоруми ғайрирасмӣ фаъолият мекунанд.

Барои он, ки журналистон чеҳраи худро аз даст надиҳанд, мебояд ҳама вақт меъёрҳои ахлоқии фаъолияти журналистиро риоя намоянд.

Асасон журналист дар фаъолияташ озод аст, вале салоҳияти баромадан аз риояи ахлоқи журналистиро надорад. Масалан, мудири дӯкони доруфурӯшӣ мехоҳад барои ба фурӯш рафтани як доруяш, ки чандон хуб нест, тариқи журналистон онро таблиғ кунад. Нафақахӯре, ки бо сад ранҷ маблағ ҷамъ кардааст, зери таъсири таблиғи журналист он доруро харидорӣ мекунад, вале шифо намеёбад. Магар чунин рафтор дар доираи ахлоқи журналистӣ меғунҷад?!

Ҳозир ҳар касе ба сараш чизе омад, менависад, 90 дар 100 рӯзномаҳои мо ҳамин хел аст. Журналисти асил дар асоси факту рақамҳо бояд нависад.

Ёд дорам, дар замони Шӯравӣ барои навиштани як мақолаам бо номи «Фирор» 4 моҳ дар ҳаҷми 500 саҳифа мавод ҷамъ карда, баъд онро навиштам. Мақола, ки оид ба дуздии 7 миллион доллар аз ҷониби Гайс Бори — раиси ҳамонвақтаи савдои хориҷии Тоҷикистон буд, натиҷа дод ва дар Маҷлиси Олӣ мавриди баррасӣ қарор гирифт.

Як дӯстам, ки дар замони Шӯравӣ дар «Комсомольская правда» кор мекард гуфт: «Дар мо ҳолатҳое мешавад, ки журналист вақти зиёд сарф карда, 100 варақ рақам ҷамъ мекунад, вале дар ҳаҷми як саҳифа мавод менависад. Ҳамаи ин ба хотири он аст, ки ҳар ҷумлае, ки журналист менависад, бояд дар асоси асноду рақамҳо бошад, то ҷомеаро роҳгум наандозад».

Ман асосан обрӯи рӯзномаамро ба миллионҳо доллар намефурӯшам, вале дар таҷриба дидем, ки қисме аз рӯзномаҳо маводҳои ба нишонии дигар нашрияҳо навиштаро баъди расман даст кашидан аз чоп ба ивази 100 сомонӣ ба чоп расонидаанд. Ин кори онҳост, лекин риояи меъёрҳои ахлоқии фаъолияти журналистӣ, ҳамдилии журналистӣ беҳтарин роҳи интихоби ҳар як масъули рӯзнома, ҳафтанома ва ҳар як журналист мебошад.

Давлати ШОҲЭЪТИБОР

Источник: http://www.tojnews.org/taj/index.php?option=com_content&task=view&id=14838

[b]Ҳабибулло Ташрипов, як масъули Кумитаи родию ва телевизиюни Тоҷикистон, дар “қаллобӣ дар ҳаҷми бузург” муҷрим шинота шуда ва бо пардохти 61 ҳазор сомонӣ аз толори додгоҳ озод шудааст.[/b]

Додгоҳи ноҳияи Исмоили Сомонии шаҳри Душанбе ахиран оқои Ташриповро, ки пештар дар симати раиси бахши тиҷоратии Кумитаи родию ва телевизиюни давлатии Тоҷикистон ифои вазифа мекард, дар тасарруф, қаллобӣ ва ҷаъли аснод муҷрим шинохтааст.

Дар мусаввабаи додгоҳ омадааст, ки вай дар «ҳаҷми бузург» ҳамаи ин ҷароимро муртакиб шудааст. Бо ин вуҷуд, додгоҳ тасмим гирифтааст, ки оқои Ташрипов бо пардохти 61 ҳазору 512 сомонӣ ҷарима аз толори додгоҳ озод карда шавад.

Ҳабибулло Ташрипов моҳи сентябри соли гузашта аз сӯйи маъмурони Ожонси мубориза бо фасоди Тоҷикистон ба иттиҳоми ришваситонӣ боздошт шуда буд.

Он замон гузориш шуда буд, ки оқои Ташрипов, ки гуфта мешавад аз наздикони Асадулло Раҳмонов, раиси Кумитаи родию ва телевизиюн аст, ба ҳангоми гирифтани сӣ ҳазор дулор ришва боздошт шудааст.

Бархе аз соҳибназарон боздошти як мақоми Кумитаи родию ва телевизиюни Тоҷикистон ба иттиҳоми ришваситонӣ бо чунин маблағи бузургро барои ин кишвар бесобиқа хонда буданд.

Дар гузашта додгоҳҳои Тоҷикистон барои иртикоби чунин ҷароиме муттаҳамонро барои мӯҳлатҳои тӯлонӣ равонаи зиндон мекарданд.

Вале қозии додгоҳи ноҳияи Исмоили Сомонӣ Ҳабибулло Ташриповро танҳо ба пардохти ҷарима маҳкум кардааст. Зеро тибқи мусаввабаи додгоҳ, оқои Ташрипов зиёни воридшударо ба давлат бозпардохтааст.

Дар мусаввабаи додгоҳ омадааст, ки тибқи қонуни ҷазои Тоҷикистон, оқои Ташрипов дар се банди ин қонун муҷрим шинохта шуда ва бо пардохти ҷарима аз толори додгоҳ озод карда шавад.

Ҳамчунин, додгоҳ ҳукм кардааст, ки молу мулки оқои Ташрипов мусодира карда шавад ва ӯ наметавонад тӯли якуним соли оянда дар Кумитаи родию ва телевизиюни Тоҷикистон ба симате интисоб шавад.

Додгоҳ ҳамчунин Ҳалим Раҳимов ном шаҳрвандро ба ҷурми ҳамдастӣ бо оқои Ташрипов дар тақаллуби аснод ба пардохти 3500 сомонӣ ҷарима муваззаф кардааст. Зимнан, ҳукми додгоҳ алайҳи ин ду нафар ба иҷро даромада ва ҷонибҳо дархости истиноф (кассатсия) накардаанд.

Як масъули Ожонси мубориза бо фасоди Тоҷикистон, ки нахост номаш ифшо шавад, ба Би-би-сӣ гуфт, ки масъулони ин ниҳод бо ҳукми додгоҳ мувофиқанд, зеро дар ниҳоят, иттиҳомоти ворида алайҳи оқои Ташрипов дар додгоҳ собит шудааст.

Вале ба гуфтаи вай, ахиран дар қонуни ҷазо ё кайфарии Тоҷикистон ислоҳоте ворид карда шуд, ки тибқи он, афроди муҷрим ё муртакиби бархе аз ҷиноёт, назири қаллобӣ, тасарруф ва тақаллуби аснод бо пардохти ҷарима метавонанд аз маҳбас озод шаванд.

Ба ин тартиб, ба гуфтаи вай, давлати Тоҷикистон мехоҳад зиёни молие, ки дар пайи фаъолияти ин афрод ба буҷети кишвар ворид шуда, ҷуброн кунад ва муҷримон тавонанд “кору фаъолияте” дошта бошанд.

Абдуқаюм Юсупов, ҳуқуқдони мустақил, мегӯяд, ки дар моҳи июни соли гузашта ба ибтикори Президент Раҳмон дар қонуни ҷазои Тоҷикистон ислоҳоте ворид карда шуда буд.

Ҳадафи ин ислоҳот сода кардани муҷозот барои иртикоби ҷароими ба истилоҳ “иқтисодӣ ва молӣ” унвон шудааст. Оқои Юсупов мегӯяд, ки агар зиёни иқтисодии ин гуна ҷароим ҷуброн карда шавад, додгоҳ метавонад шахси гунаҳгорро бо пардохти ҷарима аз зиндон озод кунад.

Вай гуфт, ки дар ивази як рӯзи зиндон 17,5 сомонӣ ҷарима муқаррар шудааст. Бо дарназардошти ҳаҷми умумии ҷаримаи Ҳабибулло Ташрипов чунин баровард мешавад, ки ҳукми додгоҳ алайҳи ин масъули собиқи Кумитаи родию ва телевизиюни Тоҷикистон муъодили 10 соли зиндон будааст.

Зимнан, дар бархе аз кишварҳо аз чунин таҷруба зиёд истифода мешавад. Вале маъмулан қонуни ин кишварҳо муқаррар кардааст, ки ҳаҷми ҷарима аз ҳаҷми зиёни ворида бояд бамаротиб бештар бошад.

Ба унвони мисол, дар Русия барои ришваситонӣ шахси мазнун бояд ба буҷети кишвар маблағи то даҳ маротиба бештар аз ҳаҷми ришваро пардохт кунад ва сипас, ӯ метавонад аз зиндон озод шавад.

Дар ҳамин ҳол, Иззатулло Шарипов, раиси идораи умури зиндонҳои Тоҷикистон, дар мусоҳибае бо хабаргузории «ASIA-Plus» гуфтааст, ки ҳоло теъдоди 10 ҳазор маҳбус дар зиндонҳои ин кишвар ба сар мебаранд, ки ин рақам бештар аз зарфияти зиндонҳост.

Ба гуфтаи оқои Шарипов, вай хостори ин аст, ки шумори зиндониён аз роҳи ҷойгузин кардани ҷарима ва корҳои иҷборӣ ба ҷойи ҳукми зиндон дар Тоҷикистон коҳиш дода шавад.

Источник: http://www.bbc.co.uk/tajik/institutional/2011/06/110601_if_court_corruption.shtml

[b]Фаъолияти дафтари намояндагии шабакаи телевизиюнии «Стан ТВ»-и Қазоқистон, ки дар миёни сокинони Тоҷикистон бештар бо исми «К+» маъруф аст, дар Душанбе мутаваққиф шуд.[/b]

Дар ин бора рӯзи чаҳоршанбеи 1 июн Музаффар Юсупов, раиси дафтари намояндагии телевизиюни «Стан ТВ» дар Тоҷикистон хабар дод.

Ба гуфтаи ӯ, иҷрои тарҳи намояндагии «Стан ТВ» дар Тоҷикистон поён ёфтааст. Ин тарҳро намояндагии минтақаии ин телевизиюн дар шаҳри Бишкек ба иҷро дроварда буд.

Ба ин тартиб, аз рӯзи аввали июн фаъолияти дафтари намояндагии шабакаи телевизиюнии «Стан ТВ” дар Тоҷикистон мутаваққиф шудааст.

Бино ба иттилоъи оқои Юсупов, фаъолияти ин шабака аз кишварҳои Осиёи Марказӣ танҳо дар Тоҷикистон мутаваққиф шудааст. Ҳамчунин, вай гуфт, ки то ягон ҳодисаи ҷиддӣ дар Тоҷикистон рух надиҳад, ин шабака ҳеч гузоришеро аз ин кишвар пахш нахоҳад кард.

Оқои Юсупов мегӯяд, ки ҳарчанд шумори тамошобинони ин телевизиюн дар Тоҷикистонро намедонад, лекин мутмаин аст, ки ин шабака аллакай дар бозори иттилоърасонии ин кишвар ҷойгоҳи худро ёфтааст.

Намояндагии «Стан ТВ» дар Тоҷикистон 14 нафар корманд дошт, ки аз онҳо 6 нафар хабарнигор, 4 нафар муҳаррир ва 4 нафар коргардон буданд. Бархе аз ин хабарнигорон аз шаҳри Хуҷанд барои ин телевизиюн гузоришҳое таҳия мекарданд.

Раиси дафтари намояндагии ин телевизиюн мегӯяд, ки ҳоло кормандон дар бораи фаъолиятҳои ояндаи худ ҳеч тасмиме нагирифтаанд.

Нуриддин Қаршибоев, раиси Анҷумани расонаҳои мустақилли Тоҷикистон, мегӯяд боъиси таассуф аст, ки фаъолияти телевизиюни «Стан ТВ» дар Тоҷикистон мутаваққиф мешавад.

Ба гуфтаи вай, ин яке аз расонаҳое будааст, ки як манбаъи иттилоърасонии олтернатив буд ва ахбору матолибашро бо тавозуни назарҳо ба тамошобинон пешкаш мекард.

Оқои Қаршибоев афзуд, ки ин телевизиюн дар байни афроде, ки бо ахбору иттилоъот сару кор доштанд, аз маъруфияти зиёд бархурдор будааст.

Ӯ мутмаин аст, ки агар набуди маблағ сабаби мутаваққиф шудани фаъолияти ин телевизиюн дар Тоҷикистон шуда бошад, имконии пайдо кардани сармоя ва дубора фаъол шудани он вуҷуд дорад.

Оқои Қаршибоев афзуд: «Аммо агар ин иқдом ангеза ё тобиши сиёсӣ дошта бошад, дар он сурат аз нав ба роҳ мондани фаъолияти телевизиюн мушкил мегардад.»

Аммо Музаффар Юсупов, раиси намояндагии «Стан ТВ» дар Тоҷикистон, мегӯяд, ки қатъи фаъолияти ин тезевизиюн ҳеч гуна ангезаҳои сиёсӣ надорад.

Дар ҳамин ҳол, бархе аз дидоргарони сойти «Стан ТВ» мегӯянд, ки аз он мутаассифанд, ки ҳамакнун наметавонанд аз ин шабака ахбору матолиби ҷолиберо дар бораи Тоҷикистон дарёфт кунанд.

Меҳрангез, як сокини Душанбе, мегӯяд: «Шабакаҳои телевизиюнии давлатии Тоҷикистон наметавонанд барои мо иттилоъоти дақиқу бетарафонаро таъмин кунанд. Ин шабакаҳо бештар ба таърифу тавсифи мансабдорон машғуланд ва танҳо дар бораи вазъи кишоварзӣ ва варзиш хабар медиҳанд.»

Фаъолияти дафтари намояндагии «Стан ТВ» дар Тоҷикистон аз соли 2008 шурӯъ шудааст. Аммо бисёре аз мардуми ин кишвар ба ин шабака аз тариқи моҳвора дастрасӣ доштанд.

Источник: http://www.bbc.co.uk/tajik/institutional/2011/06/110601_ea_mt_stan_tv.shtml

[b]Баррасии парвандаи ҷиноӣ алайҳи Муҳаммадюсуф Исмоилов, хабарнигори нашрияи “Нури зиндагӣ” дар ноҳияи Ашт, дар додгоҳе дар шимоли Тоҷикистон, оғоз шуд.[/b]

Муҳокимаи ӯро пас аз зӯҳри 31 май додгоҳи сайёри шаҳри Табошар дар ноҳияи Ашт оғоз кардааст.

Муҳаммадюсуф Исмоилов, хабарнигори маҳаллӣ, аз таърихи 23 ноябри соли гузашта дар боздоштгоҳе дар вилояти Суғд нигаҳдорӣ мешавад.

Ҷумъаи Мирзо, сардабири нашрияи «Нури зиндагӣ», ба Би-би-сӣ гуфт, ки дар рӯзи аввали додгоҳ шикояти бархе аз муддаъиён шунида шуд ва додгоҳ кори худро пас аз фардо идома хоҳад дод.

Муҳаммадюсуф Исмоилов, ба таҳқиру тавҳин ва барангехтани низоъи миллию мазҳабӣ дар ноҳияи Ашт муттаҳам шудааст.

Аммо Анҷумани миллии расонаҳои мустақили Тоҷикистон (АМРМТ) ва ё НАНСМИТ боздошти ӯро ба чопи матолиби интиқодӣ дар бораи фаъолияти ҳукуматҳои маҳаллӣ ва ниҳодҳои қудратӣ марбут мехонад.

Бар пояи ин, чанде аз созмонҳои бонуфузи дифоъ аз ҳуқуқи хабарнигорон аз давлати Тоҷикистон даъват ба амал овардаанд, ки Муҳаммудюсуф Исмоиловро озод кунад.

Аз ҷумла, созмони Гузоришгарони Бидуни Марз ва Кумитаи дифоъ аз ҳуқуқи рӯзноманигорон (CPJ) созмонҳое, ки аз озодии баён ва ҳуқуқи рӯзноманигорон ҳимоят мекунанд, пештар хостори озодии Муҳаммадюсуф Исмоилов шуда буданд.

Гузоришҳо ҳокист, ки тайи соли 2010 дар Тоҷикистон чанд нашрия бо баҳонаҳои мухталиф ба додгоҳ кашида шуда ва хабарнигорони зиёде низ барои нашри матолиби интиқодомез бо фишори мақомоти давлатӣ ва афроди алоҳида рӯбарӯ шудаанд.

Источник: http://www.bbc.co.uk/tajik/institutional/2011/05/110531_ea_aa_ismoilov_trial.shtml

[b]Мушкилоти риояи меъёрҳои ахлоқӣ дар фаъолияти журналистӣ ва роҳҳои беҳтар намудани сифати журналистикаи муосир дар мизи мудавваре, ки бо ибтикори Шӯрои ВАО-и ҷумҳурӣ дар идораи рӯзномаи «Хатлон» доир гардид, муҳимтарин мавзӯи баррасӣ буд. Дар ин бора ба TojNews аз дафтари кории Шӯрои ВАО хабар доданд.[/b]

Ба иттилои манбаъ, Зинатулло Исмоилов — раиси Шӯрои ВАО дар оғози ин ҳамоиш иброз дошт, ки мулоқоти бевосита бо журналистони минтақавӣ ба он хотир аст, ки перомуни риояи одоби касбӣ дар нигоштаҳои журналистон ва худтанзимкунии фаъолияти журналистӣ сӯҳбатҳои озод баргузор гарданд.

— Узви Шӯро ва сармуҳаррири ҳафтаномаи «Тоҷикистон» Шариф Ҳамдампур оид ба зарурати қабули меъёрҳои ахлоқӣ ва таҷрибаи дар ин бахш ҳосилгардида суханронӣ карда, таваҷҷӯҳи ҳозиринро ба риояи тавозуни назарҳо дар навиштаҳои муаллифон махсусан таъкид кард. Қайд гардид, ки маҳз риояи одоби касбӣ манзалати журналистонро боло мебарад ва онҳоро ба нерӯи воқеан қавии иҷтимоӣ табдил медиҳад,- афзуд манбаъ.

Ба гуфтаи манбаъ, дар мизи мудаввар журналистон Сайраҳмон Назриев, Носирҷон Маъмурзода, Давлат Шоҳэътиборов, Асалмо Сафарова, Мурод Сотиев, Умар Камолов ва Латофат Чориева перомуни мушкилоти хабарнигорони минтақавӣ изҳори назар карданд. Ба андешаи онҳо, маҳз риояи меъёрҳои ахлоқӣ ҷиҳати таҳияи маводи босифат замина фароҳам меорад.

— Дар баробари ин таъкид гардид, ки мушаххасан ҷудо будани фаъолияти эҷодӣ аз фаъолияти тиҷоратӣ, риояи эҳтиром ба ҳаёти шахсӣ, ҳифзи манбаи ахбор ва ҳамрайъии касбии журналистон муҳимтарин нукоти Меъёрҳои ахлоқӣ ҳастанд, ки риояи ҳамешагии онҳо дар фаъолияти журналистӣ обрӯи касби рӯзноманигориро боло мебарад. Дар поёни ҳамоиш иштироккунандагони он муроҷиатнома қабул намуданд, ки дар он бо эътирофи Меъёрҳои ахлоқӣ ба риояи одоби касбӣ ва ҳамкории фаъоли ВАО бо мақомоти давлатӣ ва ҷомеаи шаҳрвандӣ даъват шудааст,- гуфт дар охир манбаъ.

Зулолаи НУР, TojNews

Источник: http://tojnews.org/taj/index.php?option=com_content&task=view&id=14725&Itemid=30

[b]«Мушкилоти риояи меъёрҳои ахлоқӣ дар фаъолияти журналистӣ ва роҳҳои беҳтар намудани сифати журналистикаи муосир». Таҳти чунин унвон дар идораи рӯзномаи вилоятии «Хатлон» бо ибтикори Шӯрои ВАО-и ҷумҳурӣ мизи гирд бо ширкати хабарнигорони минтақавӣ баргузор гардид.[/b]

Тавре Зинатулло Исмоилов, раиси Шӯрои ВАО дар оғози ин ҳамоиш иброз дошт, мулоқоти бевосита бо журналистони минтақавӣ ба он хотир аст, ки перомуни риояи одоби касбӣ дар нигоштаҳои журналистон ва худтанзимкунии фаъолияти журналистӣ суҳбатҳои озод баргузор гарданд.

Узви Шӯро ва сармуҳаррири ҳафтаномаи «Тоҷикистон» Шариф Ҳамдампур оид ба зарурати қабули меъёрхои ахлоқӣ ва таҷрибаи дар ин бахш ҳосилгардида суханронӣ карда, таваҷҷӯҳи ҳозиринро ба риояи тавозуни назарҳо дар навиштаҳои муаллифон махсусан таъкид кард. Қайд гардид, ки маҳз риояи одоби касбӣ манзалати журналистонро боло мебарад ва онҳоро ба нерӯи воқеан қавии иҷтимоӣ табдил медихад.

Журналистон Сайраҳмон Назриев, Носирҷон Маъмурзода, Давлат Шоэътиборов, Асалмо Сафарова, Мурод Сотиев, Умар Камолов ва Латофат Чориева перомуни мушкилоти хабарнигорони минтақавӣ изҳори назар карданд. Ба андешаи онҳо маҳз риояи меъёрҳои ахлоқӣ ҷиҳати таҳияи маводи босифат замина фароҳам меорад. Дар баробари ин таъкид гардид, ки мушаххасан ҷудо будани фаъолияти эҷодӣ аз фаъолияти тиҷоратӣ, риояи эҳтиром ба ҳаёти шахсӣ, ҳифзи манбаи ахбор ва ҳамраъйии касбии журналистон муҳимтарин нукоти меъёрҳои ахлоқӣ ҳастанд, ки риояи ҳамешагии онҳо дар фаъолияти журналистӣ обрӯи касби рӯзноманигориро боло мебарад.

Дар поёни ҳамоиш иштироккунандагони он муроҷиатнома қабул намуданд, ки дар он бо эътирофи меъёрҳои ахлокӣ ба риояи одоби касбӣ ва ҳамкории фаъоли ВАО бо мақомоти давлатӣ ва ҷомеаи шаҳрвандӣ даъват шудааст.

Источник: http://ozodagon.com/khabarho/tojikiston/605-2011-05-27-12-09-52.html

Таъсиси телевизони муштараки форсизабононро метавон номуваффақтарин лоиҳаҳои ҳамдастии се кишвари ҳамзабон унвон кард. Ин тарҳ, ки нахустин бор моҳи сентябри соли 2006 дар шаҳри Душанбе байни сарварони се кишвари форсизабон-Тоҷикистону Эрону Афғонистон матраҳ шуд, манзалату вазни сухану қарордоди раисони се ҷумҳурро бо дарҳамбарҳамиҳои пешомада ва наздики панҷ соли нокомӣ пойин бурд.

Акнун дар ин майдони ҳамкории се ҷониб яке аз муваззафшудагони амалисозии ин тарҳ Алиасғари Шеърдӯст худро тани танҳо мебинад. Дар мизи мудавваре, ки бо тасмими намояндагии хабаргузории «Форс» дар Душанбе доир гашт, мушкилоти ба таъхир афтодани ифтитоҳи телевизиони муштараки форсизабонон «Наврӯз» баррасӣ шуда, гилагузориҳои зиёдеро ба бор оварда сифати ҳукуматҳои се кишварро ба намоиш гузошт…

[b]Матни пурраи гузоришро дар торномаи мо мутолиа карда метавонед:[/b] [url=http://www.taj.nansmit.tj/analysis/?id=65]http://www.taj.nansmit.tj/analysis/?id=65[/url]

Источник:

Таъсиси телевизони муштараки форсизабононро метавон номуваффақтарин лоиҳаҳои ҳамдастии се кишвари ҳамзабон унвон кард. Ин тарҳ, ки нахустин бор моҳи сентябри соли 2006 дар шаҳри Душанбе байни сарварони се кишвари форсизабон-Тоҷикистону Эрону Афғонистон матраҳ шуд, манзалату вазни сухану қарордоди раисони се ҷумҳурро бо дарҳамбарҳамиҳои пешомада ва наздики панҷ соли нокомӣ пойин бурд. Акнун дар ин майдони ҳамкории се ҷониб яке аз муваззафшудагони амалисозии ин тарҳ Алиасғари Шеърдӯст худро тани танҳо мебинад. Дар мизи мудавваре, ки бо тасмими намояндагии хабаргузории «Форс» дар Душанбе доир гашт, мушкилоти ба таъхир афтодани ифтитоҳи телевизиони муштараки форсизабонон «Наврӯз» баррасӣ шуда, гилагузориҳои зиёдеро ба бор оварда сифати ҳукуматҳои се кишварро ба намоиш гузошт…

[b]Қадами ҷиддии Эрону канораҷӯйии Афғонистон[/b]

Зарурати таъсиси телевизиони муштараки форсизабонон пешниҳоди қӯҳнаи Президенти Тоҷикистон Эмомалӣ Раҳмон буд, ки аз забони Маҳмуди Аҳмадинажод садо доду хуш қабул шуд. Аммо амалисозии ин тарҳ муаммои сарбастаро мемонад, ки кас намедонад нуги калоба дар дасти кист. Гуфта мешавад, ки дар қадамҳои аввали амалисозии ин тарҳ масъулияти пешбурди корро дар ин самт аз ҷониби Ҷумҳурии исломии Эрон сафири он дар Тоҷикистон Алиасғари ШЕЪРДӯСТ, намояндаи Тоҷикистон мушовири давлатии Президенти кишвар Сайидмурод ФАТТОЕВ ва масъулияти ҷониби дигарро муовини раиси Кумитаи радио ва телевизиони Афғонистон Сайиднозири АҲМАДӣ бар дӯш гирифтаанд. Дар ҳамин лаҳзаҳои аввал Президенти кишвар аз сарони ду давлати ҳамзабон даъват ба амал овард, ки маркази ин телевизон шаҳри Душанбе бошад. Ҳамин буд, ки ҷониби Тоҷикистон муваззаф шуд, ки макони қароргоҳи телевизионро таъмин намояду давлати Эрон таъмини васоили техникии онро. Дар назар будааст, ки Афғонистон таъминоти моҳвораиро ба дӯш дошта бошад. Вале, ба изҳори Алиасғари Шеърдӯст мақомоти марбутаи Эрон то ҷойи имкон вазифаҳои худро дар мисоли таъмини таҷҳизотҳо амалӣ ва ҳатто зиёдтар аз он гардонида истодааст, вале ҷониби Афғонистон аз лаҳзаи имзои қарордоди сарони давлатҳо то ин замон баъди гузаронидани ду ҷаласаи васеъ ҳам мавқеи худро рӯшан накардааст.

— Бояд барои таҳияи барномаҳо бо тавлидоти муштарак ва эҷоди дафтаре дар Кобул амалиётҳои лозим анҷом бигирад. Аммо ҳанӯз ҷониби Афғонистон намехоҳанд дар ин саҳна ворид бишаванд, — мегӯяд ӯ.

Ба изҳори сафир, таъкиди Аҳмадинажод ҳам буд, ки мо вақте мегӯем шабакаи муштараки форсизабонон, ғойиб будани Афғонистон дуруст нест. Алиасғари Шеърдӯст нахуст аз мақомоти баландпояи Афғонистон дар кундии амалишавии телевизион шиква карда, гуфт, ки ахиран хостори мулоқот шуданаш сари ин масъала бо Вазири иттилоот ва фарҳанги Ҷумҳурии исломии Афғонистон, ки чанде бо сафари расмӣ дар Тоҷикистон қарор доштанд, бенатиҷа будааст.

[b]Асадулло Раҳмон нота мехоҳад[/b]

Мутобиқи қарордоди ҷонибҳо Кумитаҳои садову симои ҳар се кишвар ӯҳдадор шудаанд, ки амалисозии ин тарҳро бароҳ монанд. Вале ба гуфтаи Алиасғари Шеърдӯст он ҳамкориеро ҳам, ки дар назар буд бо Кумитаи радио телевизиони Тоҷикистон бошад, надидаанд.

— Дар ҳақиқат табақае аз бинои шабакаи «Баҳористон» ба мо доданд, ки барояшон қобили истифода набуд. Баъзе васоили сохтмон ҳам дар он маҳал рехта шуда буд. Аввал гуфтанд, ки мо худамон таъмир мекунем. Муддате мунтазир мондем. Чун дидем, ки амале накарданд, худи тарфи Ҷумҳурии исломии Эрон шӯрӯъ ба таъмири ин бино кард. Системаи барқаш аз замони шӯравӣ буд. Ҳамаи кораш кулия тармим шуд. Мо агар дар як замини холӣ корро шурӯъ мекардем, осонтар ва бароямон хеле камхарҷтар мебуд. Вале чун онҷоро бароямон вогузор карда буданд, мо ночор будем, ки онҷоро омода ба кор бикунем», — гуфт сафир.

Баръакси ҳолате, ки раиси Кумитаи радио телевизион Асадулло Раҳмон чанде пеш дар мусоҳибае Эронро муттаҳами адами ҳамкорӣ кардааст, ба изҳори Алиасғари Шеърдӯст раиси Кумита ҳатто ба зангҳои телефонияш ҷавоб намедодааст.

— Мо як моҳ талош кардем, ки бо эшон як ҷаласа бигзорем. Ба мо гуфтанд, ки бояд ёдошти расмӣ бидиҳед. Аслан дар кори барномасозӣ набояд чунин бошад. Нотаи расмӣ мо фақат барои мулоқоти мақомоте медиҳем, ки як бор меҳоҳанд биёянд инҷо. Мо ҳар рӯз бояд чунин ҷаласот дошта бошем. Дар ин миён алъон шонздаҳ ҳайати расмӣ аз Эрон, Олмон, Ҳоланд омаданд инҷо, ҳолатро боздид карданд. Ҳамин алъон, ки ман бо шумо сӯҳбат мекунам, як ҳайати муҳиме аз Олмон инҷо аст. Як ҳайати муҳиме аз Эрон ҳам омадаанд. Дӯстонамон ҳастанд, ки на харҷ бикунанд, мизбонӣ бикунанд, балки меомаданд, ки мо намояндаи телевизиони Тоҷикистон ҳастем, шумо ки омадед инҷову ин корҳоро анҷом медиҳед, хушомадед, вале афсӯс. Ман узрхоҳӣ мекунам, се-чор нафаре наҳор дар хонаи ман буданд. Олмониҳо дӯст медоранд, ки як хонаи тоҷикистонӣ бубинад. Ман онҳоро даъват кардам ба хонаи худ.

Аслан дӯст намедоштам, ки инҷо гилояе матраҳ бишавад, аммо ҳақиқатан дилозурда шудам. Ман дар ин майдон танҳо ва шахси ман танҳо ҳастам. Афғонистон худашро берун кашида канор. Тоҷикистон, ки мо инҷо меҳмонашон ҳастем, телевизион дуруст мекунем, ҳайате, ки омаданд, ҳоло ду муовини радио телевизиони Эрон дар инҷо ҳастанд, як ронадаашонро нафиристоданд фурудгоҳ, ки бигӯяд «оғо омадед, хуш омадед». Як бор оғои Асадулло Раҳмон дар сӯҳбат бо ман нашуд, ки ту ки инҷо масъулияти ин корро ба ӯҳда дорӣ, ҳолат чӣ ҷурӣ аст? Мо хеле вақтҳо то соати 12 шаб дар он макони телевизион будем. Бачаҳои «Баҳористон шоҳиданд», меоянд баъзе вақтҳо мебинаду мегӯяд: «Худо қувват!», Як бор Асадулло Раҳмон наомаданд, ки чунин гӯянд. Боз ине, ки мегӯянд ҷониби Эрон ҳеҷ коре накардаст, ман мегӯям, ки ҷаноби Асадулло Раҳмон, шумо чӣ коре кардаед? Мо ки омадем кор бикунем инҷо. Ман намехоҳам гилоя бикунам. Агар Асадулло Раҳмон ин масъаларо матраҳ накарда буд, ман матраҳ намекардам. Ҳоло ки муовинашон инҷост, мепурсам, ки ба чуз ду табақа аз як сохтмони фарсуда барои ин телевизион чӣ коре карданд? Чаро инҷо наомаданд то мо рӯ ба рӯ сӯҳбат дошта бошем? Ман аз Вазорати корҳои хориҷӣ дархост мекунам, ки сӯҳбати моро бо Асадулло Раҳмон ҳамоҳанг созад, — бо шикваи зиёд дархост кард сафир.

Муовини раиси Кумитаи радио ва телевизиони Тоҷикистон Ҳабибулло НОЗИРӣ, ки дар нишаст бо сафири Эрон ширкат дошт, дар посухи суханони сафир гуфт:

— Ростӣ, ман ба пуррагӣ огоҳ нестам. Ман пеш аз омадан омӯхтам, дар ин бора гуфта мешавад, ки биноро бояд Тоҷикистон омода кунад, таҷҳизотро Эрон ва моҳвораро Афғонистон. Дар ҳамин ҳудуд ман маълумот дорам, маълумоти зиёде надорам. Он чӣ ки Алиасғари Шеърдӯст гуфтанд, ман нав огоҳӣ ёфтам, пешниҳоди ҷаноби Шеърдӯстро ба раиси Кумитаи радио телевизион ва шахсони масъули мақомот мерасонам, мо ба ҳам меоем, дар ин мавзӯъ сӯҳбат мекунем.

[b]Хомӯшии шубҳаноки Фаттоев[/b]

Ба изҳори Алиасғари Шеърдӯст мушовири Президенти кишвар Сайидмурод Фатттоев ҳам, ки масъули ҷониби Тоҷикистон дар амалисозии ин тарҳ аст, хомӯшӣ ихтиёр кардааст.

— Ман ду се бор бо Сайидмурод Фаттоев сари ин мавзӯъ мулоқот кардам. Чанд матлабро аз онҳо хостам. Яке ин буд, ки ин маҳали телевизион кӯчак асту ё онро такмил бикунем, то мо битавонем таҳририяву студиёро дар онҷо мустақар бикунем ё маҳалле бидиҳед, ки мо бихарем. Мутаассифона аввалин матлаб, ки масъалаи ҷой буд, ҳанӯз ҳал нашудааст. Дигар дархостамон ин буд, ки як ҷаласоте бо масъулини радио телевизион дошта бошем, то барномасозон бояд бишинаду нақшаҳояшонро ҳамоҳанг бикунанд.Эшон қабул карданду гуфтанд, ки дастур медиҳанд, то ин иттифоқ биуфтад. Матлаби севум он буд, ки як таърихеро муайян бикунанд, ки дар ин рӯз телевизиони Наврӯз бояд ифтитоҳ бишавад. Мутаассифона аз Фаттоев ҷавобе нагирифтем, — изҳор дошт сафир.

Ба гуфтаи сафири Ирон муҳимияти мушаххас шудани саннаи ифтитоҳи телевизион, ки мутобиқи қарордод бо ду ширкати ду ширкати хориҷӣ онҳо 45 рӯз қабл аз замони шурӯъи кор бояд инҷо оянду 20 рӯз таҷҳизотро насб кунанд, 25-рӯз таҷриба баранд ва як моҳи аввал қарордод аст, ки болои сари дастгоҳҳо бошанд.

Дар ин баробар Алиасғари Шеърдӯст масъалаи воридоти таҷҳизотро низ мувоҷеҳ ба мушкилот хонд. ӯ гуфт, ки барои ворид кардани таҷҳизотҳои зарурӣ аз Олмон бо сафири Тоҷикистон дар Берлин ва раиси ширкати «Сомон-Эйр» сӯҳбат доштааст, вале мутаассифона натиҷае набахшидааст.

— Ба ҳар ҳол, ҳоло мо мехоҳем рӯзи мушахаси пахши телевизионро маълум кунанд, то барномасозиҳои аввалияро анҷом бидиҳем, — мегӯяд сафир.

Бояд гуфт, ки аз аз оғози қарордоди ин тарҳ борҳост, ки саннаи ифтитоҳи телевизион маълуму баъд номаълум қафо партофта мешавад. Бори ахир қарор буд, ки он дар арафаи рӯзҳои Наврӯз ифтитоҳ шавад ва шояд «Наврӯз» ном гирифтани телевизиони муштарк ҳам бар ин асос буд. Акнун ба асоси тасмигириҳои аввалия раиси Ҷумҳурии исломии Эрон Аҳмадинажод ва Президенти Тоҷикистон Эмомалӣ Раҳмон дар дидори Наврӯзии худ дар Теҳрон тавофуқ ва таъкид кардаанд, ки ифтитоҳи озмоишии ин шабака дар моҳои наздик, пеш аз оғози 20-умин солгарди ҷашни истиқлол сурат бигирад.

[b]Хостаҳои ҳукумат болост ё ҷомеа?[/b]

Ба андешаи иштирокчии мизи мудаввар коршинос Саймиддин Дӯстов таъсиси телевизиони муштарак афсонаи халқи тоҷикро ба хотир меорад. Ба андешаи ӯ, ин ҳамон қиссаи ба шавҳар додани духтари Лаку Пак аст, ки намедонад ҳоло духтарашон дар синфи ҳафт-ҳашт мехонаду синаш ба шавҳар нарасидааст.

— Орзуи фарҳангиёни се кишвар, ки зарурати мавҷудияти як телевизиони муштаракаро эҳсос мекарданд, чун ба дасти ҳукуматҳои ин давлатҳо расид, шарманда шуд. Соли панҷум аст, ки дар ин бора мақомдорон сухан мегӯянду ба натиҷае нарасидаанд. Ба назри инҷониб сабаби асосӣ сифат ва хостаҳои ин ҳукуматҳост. Ман ба он боварам, ки ҳар пружа, ки мисли ин телевизион ба он аз нигоҳи ҳукуматҳо ҳамчун ба абзори сиёсӣ назар афканда мешавад ва ба он аз ҳамин зовия баҳо медиҳанд, номуваффақ хоҳад буд. Ҳукумати кунунии Тоҷикистон хостаҳои худро дорад, Ҷумҳурии исломии Эрон хостаҳои худро, ҳукумати Карзай хостаҳои худро, вале мусаллам аст, ки ҷомеаи Тоҷикистон, Эрон ва Афғонистон ҳам ҳама хостаҳои худро доранд. Беҳтар мебуд, ки ин ҳукуматҳо ба хостаҳои ҷомеаҳои ин кишварҳо такя мекарданд ва бо ҷалби фарҳангиён ин тарҳро амалӣ мекарданд, — мегӯяд ӯ.

Ба гуфтаи коршинос, гумон аст, ки «ин телевизион баъди ба истифода дода шудан ҳам диққати ҳазоронро ҷалб кунаду боиси таваҷҷӯҳ бошад, зеро ин телевизион телевизиони ҳукуматҳои ин давлатҳо хоҳад буду хостаҳои ин ҳукуматҳо на ҳама вақт баёнгари манфиатҳои миллианд. Ин тарҳ бояд тарҳи ҷамъиятӣ бишавад, вагарна ҳич асаре дар муҳити итилоотӣ нахоҳад дошт».

[b]Роҳи қафо гаштан нест…[/b]

Бовуҷуди, Алиасғари Шеърдӯст ба он бовар аст, ки чун ин кор дар сатҳи сарварони давлат матраҳ гардидааст, амалӣ шуданист.

ӯ он андешаеро ҳам, ки шояд дар барномасозиву пахши намоиш барои мардуми Афғонистон мушкили забонӣ пеш ояд, сода шуморида мегӯяд, ки метавон ҳамон барномаҳоро дар баробари забони форсии дарӣ бо забони пашту низ таҳия кард.

Ин ҳам дар ҳоле, ки Назари дигаре ҳам вуҷуд дорад, ки бояд ҳукуматҳо дар амалисозии ин тарҳ ба ширкатҳои хусусӣ такя кунанд, зеро дар ягон длавлат телевизионҳои ҳукуматӣ муваффақ набуданду намешаванд.

Дар ҳама ҳолат, амалисозии тарҳи телевизиони муштарак муҳиму ҷиддисту дар ҳолати хаёли хом шудани он ҳадси ҳамдиливу ҳамзабониву ҳамфарҳангӣ зери суол мемонад.

«Нигоҳ»

Источник: http://www.tojnews.org/taj/index.php?option=com_content&task=view&id=14694

[b]Теъдоде аз созмонҳои рӯзноманигорӣ ва хабарнигорони мустақил дар сададанд барои ҳимояти ҳуқуқии худ дар додгоҳҳо як сандуқи изтирорӣ таъсис диҳанд.[/b]

Нуриддин Қаршибоев, раиси Анҷумани миллии расонаҳои мустақилли Тоҷикистон (АМРМТ), рӯзи панҷшанбеи 26 май дар ҳамоише бо номи “Дастрасӣ ба кумакҳои ҳуқуқӣ” дар шаҳри Душанбе гуфт, ки дар пайи афзоиши қазияҳои додгоҳӣ алайҳи расонаҳо зарурати таъсиси чунин сандуқе ба миён омадааст.

Оқои Қаршибоев афзуд, ки феълан дар додгоҳҳои Тоҷикистон 8 парванда дар қиболи нашрияҳои мустақил ва хабанигорон баррасӣ мешавад ва бештари хабарнигорон ва расонаҳои мустақил имкони пардохти ҳаққи хидмати вакили мудофеъро надоранд.

[b]Матни пурраи гузоришро дар сомонаи мо бо пахш кардани суроғаи зерин мутолиа кунед:[/b] [url=http://www.taj.nansmit.tj/analysis/?id=64]http://www.taj.nansmit.tj/analysis/?id=64[/url]

Источник:

[b]Теъдоде аз созмонҳои рӯзноманигорӣ ва хабарнигорони мустақил дар сададанд барои ҳимояти ҳуқуқии худ дар додгоҳҳо як сандуқи изтирорӣ таъсис диҳанд.[/b]

Нуриддин Қаршибоев, раиси Анҷумани миллии расонаҳои мустақилли Тоҷикистон (АМРМТ), рӯзи панҷшанбеи 26 май дар ҳамоише бо номи “Дастрасӣ ба кумакҳои ҳуқуқӣ” дар шаҳри Душанбе гуфт, ки дар пайи афзоиши қазияҳои додгоҳӣ алайҳи расонаҳо зарурати таъсиси чунин сандуқе ба миён омадааст.

Оқои Қаршибоев афзуд, ки феълан дар додгоҳҳои Тоҷикистон 8 парванда дар қиболи нашрияҳои мустақил ва хабанигорон баррасӣ мешавад ва бештари хабарнигорон ва расонаҳои мустақил имкони пардохти ҳаққи хидмати вакили мудофеъро надоранд.

Ҳамчунин, ширкаткунандагони ҳамоиш таъкид карданд, ки Маҳмадюсуф Исмоилов, хабарнигори нашрияи “Нури зиндагӣ”, муддати 7 моҳ боз дар боздоштгоҳи муваққатӣ ба сар мебарад ва зану фарзандонаш ба кумакҳои молӣ шадидан ниёз доранд.

Зимнан, оқои Исмоилов ҳафт моҳ пеш дар ноҳияи Ашт, дар шимоли Тоҷикистон, боздошт шуда ва аз сӯйи мақомоти додситонӣ ба таҳқиру тавҳин ва барангехтани низоъи миллию мазҳабӣ муттаҳам шудааст.

Аммо масъулони АМРМТ боздошти ӯро ба чопи матолиби интиқодӣ дар бораи фаъолияти ҳукуматҳои маҳаллӣ ва ниҳодҳои қудратӣ дар шимоли Тоҷикистон муртабит хондаанд.

Ҳамчунин, Алиҷони Муҳаммад, хабарнигори дигари мустақил аз шаҳри Душанбе, ахиран дар пайи як баҳси шаҳрвандӣ перомуни хариду фурӯши манзил аз сӯйи мақомоти интизомӣ боздошт шудааст.

Ҳамчунин, додгоҳи ноҳияи Фирдавсии шаҳри Душанбе ахиран фаъолияти Бюрои маслиҳатдиҳӣ, сухансанҷӣ ва таҳқиоти рӯзноманигорӣ, як созмони рӯзноманигориро, ки муассиси нашрияи «Пайкон» аст, мутаваққиф карда ва нашрия низ аз чоп мондааст.

Нуриддин Қаршибоев гуфт, ки дар сурати таъсиси Сандуқи изтирорӣ барои ҳимояти ҳуқуқӣ аз расонаҳо ва хабарнигорон мумкин аст дар канори пардохти ҳаққи хидмати вукалои мудофеъ ба хонаводаҳои хабарнигорони боздоштшуда низ кумакҳои молӣ ироа шавад.

Ба гуфтаи оқои Қаршибоев, АМРМТ ҳамасола ба ин манзур 1800 дулор ихтисос медиҳад, ки ин маблағ ночиз буда ва барои ҳимоят аз ҳуқуқи расонаҳо ва хабарнигорон дар додгоҳҳо кифоят намекунад.

[b]Имкони дастрасӣ ба кумаки ҳуқуқии ройгон[/b]

Зулфиқор Замонов, раиси Шӯрои назоратии Идораи ҳуқуқи башар ва риъояти қонуният дар Тоҷикистон, гуфт, ки моддаи 19-и Қонуни Асосӣ ироаи кумакҳои ҳуқуқии ройгон ба атбоъи ин кишварро замонат додааст.

Ба гуфтаи вай, бар асоси ин санад, давлати Тоҷикистон муваззаф аст хадамоти ройгони вакили мудофеъро барои намояндагони ақшори фақири ҷомеъа дар додгоҳҳо таъмин кунад.

Ӯ таъкид кард, ки бархе аз нашрияҳо ё хабарнигорон, ки имкони молии гирифтани вакили мудофеъро надоранд, метавонанд аз ин ҳаққи худ истифода кунанд.

Аммо бархе аз сардабирони нашрияҳои мустақил, ки таҷрубаи муҳокимаҳои додгоҳиро доштанд, истифода аз хидмати ройгони вакили мудофеъро дар ҳалли қазоёи додгоҳӣ ғайримуассир хонданд.

Онҳо гуфтанд, ки таҷрубаи муҳокимаҳои додгоҳӣ ҳокист, ки кайфияти кумаки ҳуқуқии ройгони вукалои мудофеъ пойин буда ва ба таври фаврӣ ироа намешавад.

Хуршеди Атовулло, сардабири “Фараж”, нашрияи мустақил, гуфт, ки аз ин лиҳоз ба ҳангоми муҳокимаи додгоҳии ин нашрия аз хадамоти ҳуқуқии пулӣ истифода шуда ва ҳаққи хидмати вакили мудофеъро Анҷумани миллии расонаҳои мустақилли Тоҷикистон пардохтааст.

Ҳамзамон, раҳбарони созмонҳои рӯзноманигорӣ гуфтанд, ки бештари вукалои мудофеъ аз ҳимояти ҳуқуқии нашрияҳои мустақил дар додгоҳ бо баҳонаҳои мухталиф худдорӣ мекунанд ва «танҳо чанд нафари нотарс» назири Иноят Иноятов, Қимат Розиева, Солиҷон Ҷӯраев ва Қаюм Юсуфов, ба ҳимоят аз расонаҳои мустақил дар додгоҳҳо розӣ шудаанд.

Қимат Розиева, вакили мудофеъ, гуфт, ки ба ҳангоми баррасии парвандаҳои нашрияҳои мустақил дар додгоҳҳо на танҳо рӯзноманигорон, балки вакилони мудофеъ низ таҳти фишори мақомоти давлатӣ қарор мегиранд.

Ҳамзамон, хонуми Розиева таъкид кард, ки дар сурати муттаҳид шудани рӯзноманигорон ва талошҳои муштараки вукалои мудофеъ, хабарнигорон, расонаҳо ва созмонҳои дифоъ аз ҳуқуқи башари Тоҷикистон дар қазоёи додгоҳӣ ба пирӯзӣ даст ёфтан мумкин аст.

Ӯ ба унвони мисол аз даъвои се додрас бо Солиҷон Ҷӯраев, вакили мудофеъ ва нашрияҳои “ASIA-Plus”, “Фараж” ва “Озодагон” дар соли ҷорӣ ёдовар шуд, ки ба таври мусолиматомез ҳал шудааст.

Источник: http://www.bbc.co.uk/tajik/institutional/2011/05/110526_mm_press.shtml