[b]Ҳамасола дар саросари олам 21-уми ноябр ҳамчун Рӯзи ҷаҳонии телевизион таҷлил карда мешавад.[/b]

Ин сана ба ифтихори нахустин Форуми байналмилалии телевизион, ки дар таърихи 21-22 ноябри соли 1996 сурат гирифт, бо қарори Ассамблеяи генералии СММ интихоб гардидааст. Телевизион яке аз васоити муассири ахбори омма ба шумор меравад, ки дар ҳаёти ҳаррӯзаи мардум нақши муҳим мебозад.

Дар Тоҷикистон дар ҳоли ҳозир чаҳор Шабакаи сартосарии давлатӣ: Шабакаи Якум, ТВ «Сафина», ТВ «Баҳористон» ва ТВ «Ҷаҳоннамо» фаъолият мекунанд. Ин Шабакаҳо аз тариқи моҳвораҳо низ барномаҳои худро дар саросари олам пахш мекунанд. Аммо бештари сокинони Тоҷикистон ахбору иттилоъро аз шабакаҳои хусусӣ ё хориҷӣ дастрас мекунанд, чун гуфта мешавад Шабакаҳои расмии Тоҷикистон барномаҳои ҷолиб ва диданӣ таҳия ва нашр намекунанд.

Аммо дар ин авохир ТВ Пойтахт, Шабакаи марбут ба шаҳрдории Душанбе ба нашру пахши барномаҳое шурӯъ кардааст, ки нашру пахши чунин барномаҳо дар Шабакаҳои дигар тақрибан номумкин аст. Чунин гардиши баъди ба вазифаи мудири ин Шабака омадани Абдуқодири Абдуқаҳҳор, раиси пешини Радиои тоҷик сурат гирифтааст. Хабарнигори «Озодӣ» бахшида ба Рӯзи ҷаҳонии телевизион сӯҳбате дошт бо мудири нави ин шабака ва нахуст аз ӯ пурсид, ки бо чи ҳадаф ба нашру пахши барномаҳое даст задааст, ки дар Шабакаҳои дигар мамнӯъ аст:

[b]Абдуқодири Абдуқаҳҳор:[/b] Ҳар кас, ки профессионал ва ҳирфавист, ҳуқуқи дар телевизиони мо сӯҳбат карданро дорад. Ва ҳар кас сухане гуфтанӣ ба манфиати миллат ба манфиати шаҳри Душанбе ва ба бартараф кардани проблемаҳои пойтахт, мо барои ӯ вақти эфирӣ хоҳем дод. Ҳар кас, ки ҳунари ноб дорад, дар телевизиони мо баромад хоҳад кард. Мо ба хулоса омадем, ки ягон нафар мамнӯъ эълон намешавад ва нахоҳем гузошт, ки чунин шавад. Як ҳунарманд мумтоз бошад, чанд сад ҳазор бинанда дошта бошад, чи ҳақ дорем, ки онро дар ТВ роҳ надиҳем. Вай агар ҷинояткор набошад, дар пушти панҷара набошад ва баракс вай маҳбуб бошад, бинанда дошта бошад, чаро ӯ аз чашму назари тамошобин канор афтад. Баъдан ТВ моли падари ман ва ё аз касе дигар нест. Телевизиони шаҳри Душанбе аз ҳисоби андозсупорандаҳои пойтахт фаъолият мекунад. Ва шаҳрванди Душанбе чун андоз месупорад, ин телевизион аз они ӯст, чун мо аз ҳисоби бюҷети Душанбе фаъолияти худро пеш мебарем ва ӯ ҳақ дорад аз мо тақозо кунад, ки чаро фалон ҳунармандро шумо нишон намедиҳед, шумо аз ҳисоби маблағҳои мо фаъолият карда истодаед, ку. Аз ин рӯ ман гумон мекунам, ки ҳамаи онҳое, ки дар ҳавзаи бузурги фарҳангии шаҳри Душанбе ба сар мебаранд, бояд онҳо эфир дошта бошанд.

[b]Озодӣ:[/b] Радио,ТВ ва умуман Васоити ахбори омма асбоби сиёсӣ ҳастанд ва бидуни инъикоси масоили сиёсӣ фаъолияти онҳо то андозае камранг мешавад. Агар намояндагони аҳзоби сиёсии расмии Тоҷикистон бихоҳанд, ки аз тариқи Шабакаи «Пойтахт» сӯҳбатҳо дошта бошанд, мусоҳибаҳо ороянд, назарашонро дар ин ё он маврид иброз намоянд омода ҳастед, ки бо онҳо минбар диҳед?

[b]Абдуқодири Абдуқаҳҳор:[/b] Гуфтан мумкин аст, ки мо то андозае формати корро иваз кардем. Мо ба хулосае омадем, ки дар шаҳри Душанбе як шабакае намерасад, ки ниёзи мардумро дар иртибот ба масоили фарҳангиву фароғатӣ бароварда битавонад. Аслан мо мехоҳем, ки ТВ-и мо фарҳангиву фароғатӣ бошад. Аз ин рӯ мо барномаҳои сиёсиро дар Шабака камтар кардем.

[b]Озодӣ:[/b] Соли оянда соли интихоботи раёсати ҷумҳурии Тоҷикистон ҳаст ва ҳатто сӯҳбатҳое ҳам ба гӯш мерасанд, ки ТВ Пойтахт низ дар ин рухдод бетараф буда наметавонад ва муассисонаш шояд ҳадафҳое ҳам дошта бошанд ва аз ин хотир имкон дорад таблиғу ташвиқи шаҳрдорӣ бештар шавад?

[b]Абдуқодири Абдуқаҳҳор:[/b] Мо ҳама хуб медонем, ки ин овозаҳо ва ин суханҳо асос надорад. Мо медонем, ки ҲХДТ номзади арзандаи худро, яъне Ҷаноби Олиро интихоб кардааст. Дар сӯҳбати нахустине, ки бо шаҳрдор доштам, таъкид карданд, ки дар бораи он кас, яъне раиси шаҳр барномаҳо таҳия нашавад, гирди номи он кас ҳарфе нагӯем. Худашон намехоҳанд, ки дар навор бошанд. Мо шояд ягон нақл ё ягон план медиҳем, лекин қатъиян зид ҳастанд. Ба чӣ хотир мо «Пойтахт»-ро фарҳангиву фароғатӣ кардем? Мо паём доданӣ ҳастем, ки ин ҳадафро касе надорад ва худи ҷаноби раис ҳам гуфтанд, ки мо як номзад дорем – сарвари давлат, як пешво дорем – он ҳам сарвари давлат. Аз ин рӯ ин овозаҳо ҳам асос надоранд, ки шабакаро он кас барои тарғиби худ фаъол карда бошанд. Гуфтем, ки форматро дигар кардем, яъне соли оянда мо тақрибан бо сиёсат сарукор намегирем. Аз рӯи қонунҳое, ки моро иҷозат медиҳанд ва албатта, тарғиби интихобот, ки ҳар шабака бояд анҷом диҳад, яъне мардумро ба интихобот даъват кунад. Атрофи ин ё он шахсияти алоҳида мо намеистем. Ҳатто ман пешниҳод кардам, ки дар назди ҳукумати шаҳр як гурӯҳи вижа ташкил кунем. Аммо он кас розӣ нашуданд.Танҳо дар як ҳафта муҳимтарин рӯйдоде, ки дар шаҳр мешавад, ё иҷлосия мешавад, танҳо дар он сурат иҷозат доданд, ки як дақиқа дар бораи ҳамон иҷлосия маълумот диҳем, на дар бораи худашон. Худашон намехоҳанд.

Источник: http://www.ozodi.org/content/article/24777490.html

[b]Тавре роҳбари Ассосиатсияи миллии васоити ахбори оммаи мустақили Тоҷикистон Нуриддин Қаршибоев дар семинари «Ҳамкории судманди намояндагони ВАО ва хадамоти матбуоти сохторҳои давлатӣ» дар шаҳри Қӯрғонтеппаи вилояти Хатлон иброз дошт, дар Тоҷикистон ассосиатсияи нави намояндагони хадамоти матбуот ба миён меояд.[/b]

Мувофиқи суханони мавсуф, кумитаи тадорукотӣ аз ҷумлаи намояндагони хадамоти матбуоти Вазорати корҳои хориҷӣ, Вазорати маориф, Вазорати тандурустӣ, Кумитаи ҳифзи сарҳадоти давлатӣ ва Кумитаи кор бо занон ва оилаи Тоҷикистон дар семинаре, ки Ассосиатсия дар шаҳри Душанбе аз рӯи масоили муносибатҳои байни хадамоти матбуоти сохторҳои давлатӣ ва намояндагони ВАО доир намуд, тасмим гирифт, ки Ассосиатсияи намояндагони хадамоти матбуоти сохторҳои давлатию ҷамъиятӣ таъсис дода шавад.

Ба қарибӣ дар шаҳри Душанбе конфронси тадорукотии ассосиатсияи мазкур баргузор мегардад. Мақсад аз фаъолияти он баланд бардоштани сатҳи касбии намояндагони хадамоти матбуот, ҳамчунин дастгирии техникии хадамоти матбуоти сохторҳои давлатӣ мебошад.

Источник: АМИТ «Ховар»

[b]Сухангӯёни ниҳодҳои расмии Тоҷикистон тасмим гирифтаанд, ки Анҷумани намояндагони хадамоти матбуотиро таъсис диҳанд.[/b]

Нуриддин Қаршибоев, раиси Анҷумани миллии расонаҳои мустақили Тоҷикистон ба Радиои Озодӣ гуфт, ин тасмим бо ҳамоҳангии хадамоти матбуотии вазоратҳои корҳои хориҷӣ, маориф, тандурустӣ ва раёсати марзбонии Кумитаи давлатии амниятӣ миллӣ ва Кумитаи занон ва оилаи Тоҷикистон гирифта шудааст. Вай афзуд, ҳадаф аз ташкили ин анҷуман, боло бурдани сатҳу сифати кори хадамоти матбуотии ҳукумати Тоҷикистон ба хотири беҳтар кардани дастрасии мардум ба иттилои расмист.

Ҳамчунин ба марокизи навтаъсиси матбуотӣ кӯмак расонида мешавад, ки барои расонидани иттилоъ ба мардум мусоидат кунанд. Дастрасӣ ба иттилоот ҳаққи қонунии ҳар як шаҳрванд аст, то ба истифода аз он дар ҳолатҳои зарурӣ тасмими заруриро гирифта тавонад».

Эҷоди Анҷумани сухангӯён дар ҳолест, ки аксари хабарнигорон кори марокизи матбуотии идораҳои давлатии Тоҷикистонро чандон муассир намедонанд ва мегӯянд, ба ҳамин далел дастрасӣ ба иттилои комилу фарогир, ки ироааш ба расонаҳо умдатарин вазифаи дафтарҳои матбуот аст, як мушкили асосӣ барои озодии матбуот дар ин кишвар боқӣ мемонад.

Дар ҳоле, ки дар дунёи имрӯз манобеи хабарсоз сухангӯёнанд, ки дар бораи ҳаводис ё таҳаввулоти муҳим мавқеи раҳбарият ва ҳукумати худро баён мекунанд, сухангӯёни ҳукумати Тоҷикистон дар аксар маворид ба даҳон об мегиранд ва дар иҷрои рисолати худ қафо мондаанд.

Тоҷикистон аз соли 2007 ба ин сӯ «Консепсияи сиёсати давлатӣ – иттилоотӣ» — ро қабул кардааст, ки бар пояи он, ҳар як ниҳоди давлатӣ бояд маркази матбуотии худро дошта бошад.

Давлат Назриев, сарвари Департаменти таҳлил ва иттилооти вазорати корҳои хориҷии Тоҷикистон мегӯяд, иҷрои ин консепсия камбудиҳои зиёд дорад ва дар бархе мақомот ба аҳамияти иттилоъ ҳанӯз сарфаҳм нарафтаанд. Вай афзуд: «Дар баъзе вазорату идораҳо ҳамчун як воҳид ё зерсохтори алоҳида вуҷуд доранд, аммо дар бархеи дигар сухангӯён ҳамчунин бо корҳои дигар машғуланд ва аз ӯҳдаи кори худ намебароянд. Дуюм масъала, ин салоҳияти онҳо аст, ки то куҷо дастрасӣ ба иттилоъ ва ҳаққи пешниҳод кардани онро доранд. Дар ин маврид сухангӯён бояд мустақим ба раҳбари ин ё он ниҳод ва иттилои дасти аввал дастрасӣ дошта бошанд».

Хабарнигорон фаъолияти чанд маркази матбуотии муассир дар Тоҷикистон, аз қабили хадамоти матбуотии вазоратҳои корҳои хориҷӣ, дохилӣ, дифоъ, маориф, Агентии назорати маводи мухаддир ва шаҳрдории Душанберо беҳтар мешуморанд, аммо ба қавли як рӯзноманигор, ки аз гуфтани номаш худдорӣ кард, тайи як соли ахир онҳо ҳам «ҳисоби корро рафтаанд».

Ба қавли ӯ, бахусус ҳангоми ҳаводиси Бадахшон ҳеҷ як аз сухангӯёни таърифии ҳукумати Тоҷикистон аз ӯҳдаи вазифаи худ — дастрас кардани ҳатто иттилои расмӣ набаромад ва хабари Бадахшон аз манбаъҳои беруна бештар мерасид, то аз дафтарҳои матбуоти идораҳои расмӣ ва масъул.

Фаридуни Раҳнавард, сардабири Оҷонсии Тоҷнюс мегӯяд, хадамоти матбуотӣ бештар майл ба тарғиби фаъолияти ниҳодҳои худро доранд, на расонидани иттилоъ. Вай афзуд: «Аммо вақте иттилои хеле муҳим пайдо мешавад, марокизи матбуотӣ ё мегӯянд, ки пешниҳоди ин иттилоъ танҳо бо ризоияти раҳбар имкон дорад, ё мегӯянд, ки ягон мактуб орем ва ё умуман гӯширо намебардоранд. Ҳол он ки як оҷонсӣ бояд бо фаврияти худ аз дигар расонаҳо фарқ кунад».

Дар сӯҳбат бо мо як корманди маркази матбуотӣ бар нокифоятии маоши сухангӯён низ ишора карда, гуфт, дар асл ин вазифа «номи калону шаҳри вайрон» аст. Коршиносон ҳамчунин ба сатҳи нокифояи касбияти бархе сухангӯён дар идороти давлатии Тоҷикистон ҳам ишора мекунанд, ки танҳо ба хотири доштани дипломи рӯзноманигорӣ, соҳиби мақоми сухангӯ шудаанд.

Источник: http://www.ozodi.org/content/article/24772996.html

[b]Мо ба дараҷае нарасидаем, ки нашрияҳоямон аз дӯконҳо дар ҳоли навбатпоии хонандагони бешумор (чанд лаҳза ҳам бошад) фурӯхта шаванд. Мо ба дараҷае нарасидаем, ки матбуоти озод имкони фаротар аз пойтахти кишвар инъикоси воқеаю проблемаро дошта бошад, ки бештар идоранишин будани журналистонро гувоҳ аст. Аммо дар ҳолате қарор дорем, ки аз ҳама паҳлӯи фаъолияти онҳо андоз меситонем, ки мувофиқи зербанди 2-и моддаи 211-и Кодекси андоз, ба ин зайланд:[/b]

— андози ҳадди ақал (1% аз даромади корхонаҳо);

— андоз аз истифодаи роҳҳои автомобилгард (2% аз фонди музди меҳнат);

— андози замин (дар як сол як маротиба);

— андоз аз даромади шахсони воқеӣ;

— андоз аз хароҷот (то 13%);

— андози тибқи низоми соддакардашуда (4% аз даромади корхонаҳо) ва мувофиқ ба Кодекси нави таҳияшудаи андоз, ки аз якуми январи соли 2013 амал хоҳад кард, 6%-ро ташкил медиҳад;

— андоз аз фонд (25% солона).

Агар шавад, ки рӯзномаву маҷаллаҳои мустақили мо аз 200000 сомонӣ боло даромад кунанд, андоз аз арзиши иловашуда низ болояшон бор карда мешавад. Ҳарчанд аз даромади 200000 сомонӣ болои корхонаҳо андози тибқи низоми соддакардашуда ва андоз аз истифодаи роҳҳои автомобилгард дар ин ҳол гирифта намешавад, лек боз ҳам вазнинӣ болои ВАО меафтад.

Шояд фикр мекунед, ки ин қадар вазнин будааст, то нашрияе таъсис бидиҳию аз пайи муваффақиятҳояш бошӣ. Аммо ҳоло ҳам ин барои парлумону ҳукумат кам буд, ки ин қадар нашрияҳои мустақилро меҷафиданд ва метарсониданд, ки боз иқдом карданду дар таҳияи Кодекси нави андоз, ки аз якуми январи соли 2013 амал хоҳад кард, андоз аз арзиши иловашуда (НДС)-ро ҳам зам намуданд. Тибқи моддаи 169, банди 2-и он барои таҳвили рӯзномаю маҷаллаҳо, адабиёти бадеӣ, адабиёти бачагона, асарҳои илмӣ ва ғайра андоз аз арзиши иловашуда (НДС) ситонида мешавад, ки бечуну чаро боиси муфлисии рӯзномаю маҷаллаҳои мустақил хоҳад гардид. Зеро имрӯз нашрияву маҷаллаҳои хусусии мо то он ҳад камдаромаданд, ки мухбиронашон тавони аз пойтахти кишвар фаротару дуртар рафта, аз он ҷойҳо инъикоси воқеаю мушкили мардумро надоранд. Хатмкардаҳои факултаҳо ва дигар муассисаҳои таълимии журналистии кишвар бо сабаби камии маош дар идораҳои матбуот, намехоҳанд рӯзноманигор шуда кор кунанд ва барои нашрияҳо низ корманди зиёд доштан муҳим нест. Ин аз он гувоҳӣ медиҳад, ки ҳоло матбуот ва минбари озодии сухани мо худ дар ҳоли буҳрон аст. Куҷо расад ба он, ки болояшон ин қадар андозбандӣ мекунанд, ки дар боло зикрашон рафт.

Дар Амрико, Англия, Шветсия, Дания, Олмон ва дигар кишварҳои мутараққӣ барои рӯзномаю маҷаллаҳо имкониятҳои зиёди молию ҳуқуқӣ дода шудааст, ки он беҳуда нест. Пеш аз ҳама барои ҳифзи идеологияи миллӣ ва фалаҷ нагардидани ҳукумат аст.

Даргириҳо ва тазоҳурот дар Тунис, Либия, Сурия ва дигар кишварҳои Шарқи наздик, ки боиси истеъфои ҳукуматҳо низ шудааст, ҳамин хел ба вуқӯъ наомадааст. Балки бо пошидани «шарбати заҳролуд», яъне иттилооъ ва мулоҳизаҳои бофтаю сохтаи ҷосусони интернетии Ғарб тариқи ВАО дар бораи ҳукумати онҳо ба вуҷуд омадааст.

Пас муфлисии рӯзномаҳои миллӣ ба манфиати кист? Ба манфиати тоҷик? Ба фоидаи ҳукумати кунунӣ? Не! Ҳеҷ гоҳ! Танҳо ба нафъи аҷнабиёни пулдору доною зирак ва муғриз. Ана баъд, онҳо пул медиҳанду матбуоти мустақилро фаъол мекунанд. Ба хотире, ки идеологияи худро тавассути он болои оммаи бедониш бор кунанд ва онро барои фалаҷ гардидани ҳукумат, ваҳдат, якпорчагӣ, демократия, дин ва ғайра ба по хезонанд.

Ин ки вазъ то ҷоест, ки ҳатман буҷаи давлатро бояд тавассути андозбандии ВАО пур кард, «русиёҳист». Агар «русиёҳӣ» нест, пас чаро ширкатҳои тиҷории «Ҳауксин Ғаюр семент», «IRS» ва ахиран «Осиё экспресс»-ро, ки нафъаш чисту соҳибаш кист, мақсадаш чист муайян нест, ҳукумат тавонист аз пардохти андоз озод кунад?

Аммо матбуоти озод аз онҳо дида, барои мардум бамаротиб нафъовартар аст. Рӯзномаҳои давлатӣ дар идораҳо болои ҳам хобанд. Чунки онҳоро ҳатто кормандони давлат ба пуррагӣ намехонанд, ки рисолаташон то ҷое амалӣ шавад.

Ва ахиран як сухани устод Айниро дар нисбати рӯзномаҳо иқтибос меорем, ки гуфтааст: «Миллате, ки рӯзнома надорад, забон надорад». Лек агар устод имрӯз мебуданд, шояд чунин мегуфтанд: «Миллате, ки рӯзнома надорад, аз худ бехуд шуда, забоне мебарорад, ки оқибат худро мехӯрад».

Ташрифуллоҳ САЪДУЛЛОЕВ

Источник: http://www.faraj.tj/index.php?newsid=1517

[b]Шаҳрдори Душанбе алайҳи Муҳиддин Кабирӣ, вакили Маҷлиси Намояндагон ва раиси ҲНИТ, ба додгоҳ шикоят бурдааст.[/b]

Маҳмадсаид Убайдуллоев, шаҳрдори Душанбе, аз болои Муҳиддин Кабирӣ, ҳамчун вакили Маҷлиси Намояндагон, ба Додгоҳи ноҳияи Исмоили Сомонии пойтахт шикоят бурдааст.

Як корманди шӯъбаи умумии Додгоҳи ноҳияи Исмоили Сомонӣ рӯзи 15-уми ноябр ин хабарро дар сӯҳбат бо Радиои Озодӣ тасдиқ карда гуфт, номаи шикоятӣ дар охирҳои ҳафтаи гузашта ба дасти онҳо расида буд.

Аммо дар хусуси ин ки Маҳмадсаид Убайдуллоев дар аризаи худ мушаххасан аз кадом амал ва ё ҳарфи Муҳиддин Кабирӣ шикоят кардааст, корманди шӯъбаи умумии додгоҳи ноҳияи Исмоили Сомонӣ изҳори бехабарӣ кард. Вай гуфт, ки аз ин масъала муфаттишон огоҳанд.

Бо ин ҳол, ба қавли манбаъ, азбаски маҳалли ҷойгиршавии Маҷлиси Намояндагон ба қаламрави ноҳияи Исмоили Сомонӣ тааллуқ дорад, аз ин рӯ, аризаи шикоятии шаҳрдорӣ низ ба Додгоҳи ин ноҳия фиристода шудааст. Манбаъ гуфт, ин нома ҳоло дар дасти муфаттишон аст.

То ҳол мақомоти шаҳрдорӣ дар бораи ин масъала ҳарфе нагуфта ва даъвои худро ҳам шарҳ надодаанд. Вале яке аз устодони Донишгоҳи миллии Тоҷикистон, ки дар ҷаласаи рӯзи 12-уми ноябри ҳукумати шаҳри Душанбе ҳузур дошт, ба Радиои Озодӣ гуфт, Маҳмадсаид Убайдуллоев дар мавриди нигарониҳои Муҳиддин Кабирӣ оид ба буридани дарахтҳо дар шаҳри Душанбе бо хашм сӯҳбат карда ва дар ин ҷаласа гуфтааст, ки зидди Муҳиддин Кабирӣ ба додгоҳ шикоят мебарад.

Қаблан Муҳиддин Кабирӣ дар як матлабе, ки таҳти унвони “10 сол пас Душанбе урён мешавад” (Тоҷнюс) дар хусуси дарахтбуриҳо дар хиёбонҳои пойтахт изҳори ташвиш карда буд.

Ҳукумати Душанбе дафъатан ба ин ҳарфҳои Кабирӣ посух дода, нигарониҳои раиси ҲНИТ-ро бепоя хонд.

Аммо Муҳиддин Кабирӣ дар сӯҳбат бо Радиои Озодӣ ба посухи шаҳрдорӣ ҷавоб гардонида гуфта буд, ки «даври дӯғу пӯписа ва воҳимаҳо кайҳо гузаштааст ва ҳатто ин гуна шеваи раҳбарӣ низ дигар ба кор намеравад. Беҳтар аст, бо тафоҳум ва орому бидуни асабоният сӯҳбат кард ва ба шаҳрвандон низ имкон бояд дод, то танқид кунанд ва эрод бигиранд.»

Дар чанд моҳи пеш низ шаҳрдории Душанбе шабакаи аввали телевизиони Тоҷикистонро барои нашри матлабе интиқодӣ ба додгоҳ кашонид ва додгоҳ низ ин қазияро ба нафъи шаҳрдорӣ ҳал кард ва ҳатто шабакаи телевизион муваззаф шуд, ки аз шаҳрдорӣ узр пурсад. Аммо шабакаи аввал на танҳо узр напурсид, балки барномаи муфассале дар бораи матлабаш ва иддаои шаҳрдориро нашр кард.

Источник: http://www.ozodi.org/content/ubaydulloev-vs-kabiri/24771837.html

[b]Телевизиони “Ҷаҳоноро” дар Чкалов аз додгоҳи шаҳри Хуҷанд талаб кардааст, парванда алайҳи ин муассисаро қатъ намояд.[/b]

Додситонии вилояти Суғд охири моҳи сентябри соли равон алайҳи телевизиони хусусии “Ҷаҳоноро” барои пахши хабари «нодуруст» дар бораи ҳалокати 38 нафар дар сӯхтори бозори “Корвон”, мутобиқи банди 373- и Кодекси ҳуқуқвайронкунии маъмурии Тоҷикистон, парванда боз карда буд.

Як манбаъи наздик ба тафтиши ин қазия аз додситонӣ ба “Озодӣ” гуфт, дар сарчашмаи иттилоъ шумораи эҳтимолии ҳалокшудагон “бинобар маълумоти ғайрирасмӣ 3 – 8 нафар” нашр шуда буд, вале “Ҷаҳоноро» бидуни санҷиш, иштибоҳан онро “38 нафар” эълон кард, вале баъдан ҳам дар мавриди хабари нодурусти худ раддия пахш накард.

Аммо Муҳаббат Ҷӯраева, вакили дифоъи телевизиони мазкур ба “Озодӣ” гуфт, манбаъи он хабар хабаргузории “Тоҷнюс” буда, Қонуни матбуоти Тоҷикистон дар чунин ҳолат истифодакунандаи онро “бо зикри манбаъ” аз ҷавобгарӣ озод менамояд. Ҳамчунин, дар пайи пахши он хабар, “Ҷаҳоноро” раддия пахш карда, хабари дурустро дар ихтиёри бинандаҳои худ гузошт, вале аз ҷониби мақомот нодида гирифта шуд.

Хонум Ҷӯраева афзуд, додситонӣ бо мухолифат ба қонунгузорӣ беш аз 40 рӯзи баъди ифтитоҳи парванда аз додани нусхаи қарор ба “Ҷаҳоноро” худдорӣ мекард ва онҳо ҳамакнун баъди ба даст овардани он, ба додгоҳ шикот бурданд. Дар сурати исботи шудани даъвои додситонӣ, қонун ба раҳбар ва сармуҳаррири телевизиони хусусии “Ҷаҳоноро” аз 30 тоо 200 нишондиҳандаи ҳадди ақал ҷарима пешбинӣ кардааст.

Ба гуфтаи хабарнигорони “Ҷаҳоноро”, пас аз нашри хабари нодуруст мақомот роҳбар ва сармуҳаррири телевизиони мазкурро мавриди фишору таҳдид қарор додаанд. Маҳмудон Дадобоев, раҳбари “Ҷаҳоноро” ба “Озодӣ” гуфт, дар пайи фишорҳои мақомот ва соҳиби телевизион, ночор зери аризаи истеъфои худ имзо гузошт.

Телевизиони хусусии “Ҷаҳоноро” соли 1992 таъсис ёфта, субҳу шом 8 соат намоиш пахш мекунад. Ҳамчунин, дар канори он радиои ҳамномаш низ аз моҳи июли соли равон бо 6 соат барномаҳои хабариву мусиқӣ дар шабонарӯз фаъол шудааст.

Источник: http://www.ozodi.org/content/article/24770323.html

[b]Анҷумани ширкатҳои интернетрасон хостори мулоқот бо Бег Зуҳуров, сарвари Хадамоти алоқаи Тоҷикистон шудааст.[/b]

Асомуддин Атоев, сарвари Анҷумани ширкатҳои фароҳамкунандаи Интернет дар Тоҷикистон, ба Радиои Озодӣ гуфт, ҳадаф аз ин мулоқот баёни нигаронӣ аз ташаббуси нави Хадамот дар мавриди ташкили Маркази мониторинги шабакаҳои АйПӣ (IP) ва ҳам пешниҳоди роҳи ҳалҳост.

Қаблан, Хадамоти алоқаи Тоҷикистон зимни як нома аз вазоратҳои молия, адлия, рушди иқтисод ва савдо, ҳамчунин кумитаҳои амният ва сармоягузории кишвар, пешниҳод карда буд, ки аз таъсиси ҳамчунин ниҳод пуштибонӣ кунанд. Зарурати таъсиси ин марказ дар ин нома ба ҳадафи таъмини амнияти иттилоотӣ, ҷилавгирӣ аз мавридҳои нақзи ҳуқуқи шахсони ҳуқуқиву воқеӣ ва муайян намудани масъулият барои пешниҳоди хадамоти пастсифат шарҳ меёбад.

Ҳамчунин дар ин нома омадааст, ки «ҳангоми бақайдгирии муштариён ва истифода аз хидматрсонии интернет амнияти иттилоотӣ халалдор гардида, ба ин васила амалҳои таҳдидкунандаи суботи миллӣ ба воситаи иттилоот сурат мегиранд ва саривақт танзим нагардидани хадамоти мазкур авзои сиёсии кишварро метавонад зери таҳдид қарор диҳад.»

Аммо Асомуддин Атоев мегӯяд, Хадамоти алоқа мақсаде гузоштааст, ки аз рӯи имконоти мавҷуда расидан ба он имконнопазир аст, аммо ба амнияти иттилоотиву иқтисодии Тоҷикистон таъсири манфӣ дорад. Ба қавли ӯ, ин вазъ рақобатро миёни ширкатҳо танг ва даромади онҳоро кам мекунад ва дар бозори хидматрасониҳои Осиёи Марказӣ маҳдудиятҳо ба миён меорад.

Ҳадаф аз ташкили Маркази мониторинги шабакаҳои АйПӣ (IP) ба таври физикӣ ба як марказ пайваст кардани ширкатҳои интернетрасон аст, ки тамоми бозорро вобастаи технологияи як ширкати мухобиротӣ мекунад.

Источник: http://www.ozodi.org/content/ip-internet-tajikistan/24769235.html

[b]Бо ибтикори донишманди тоҷик Иброҳими Усмон, фонди «Муколамаи тамаддунҳо» таъсис ёфтааст.[/b]

Фонди «Муколамаи тамаддунҳо», як созмони навбунёди иҷтимоист, ки ҳадаф дорад ҳодисаҳои муҳими рухдода дар замони истиқлолияти Тоҷикистон, аз ҷумла ҷанги шаҳрвандӣ, ҳақиқати сулҳи тоҷикон, раванди барқарории баъди ҷангӣ ва муносибати байни гурӯҳҳои гуногуни иҷтимоӣ ва аҳзоби сиёсии ин кишварро мавриди таҳқиқу пажӯҳиши илмиву холисона қарор бидиҳад.

Муассиси ин Фонд, донишманди тоҷик, Иброҳими Усмон, собиқ мушовири давлатии раиси ҷумҳурии Тоҷикистон, узви ҳайати музокиротии ҷониби давлат дар гуфтугӯи тоҷикон дар замони ҷанги дохилӣ, узви Комиссияи оштии миллии Тоҷикистон мегӯяд, ҳоло ин ҳодисаҳо ва равандҳо якҷониба инъикос меёбад ва гоҳо аз забони нафарҳое садо медиҳад, ки аз воқеиятҳо дуранд. Ва ба хотири онки ҳақиқатҳо ошкор шавад, мардум ва миллати тоҷик дар оянда маълумоти дуруст ва мӯътамад дошта бошанд, дар амри иҷрои ин ҳадафҳо бар изофаи ширкатдорони ин рухдодҳо, ҳатман мутахассисон низ ҷалб хоҳанд шуд.

Аз сӯи дигар, ба ақидаи ин донишманди тоҷик, дар ҷомеаи Тоҷикистон ҳоло ва дар оянда низ ба муколама, музокира ва гуфтугӯ байни ақшори мухталиф, нерӯҳои сиёсӣ ва гурӯҳҳои гуногун ниёз вуҷуд дорад. Қарор аст маросими муаррифии барнома ва нақшаҳои фонди «Муколамаи тамаддунҳо» ҳафтаи оянда дар шаҳри Душанбе доир шавад.

Дар гуфтугӯе бо «Озодӣ», ҷаноби Иброҳими Усмон нахуст дар посух ба ин пурсиш, ки чӣ зарурат ба ташкили як чунин созмон пеш омад ва ҳадафи аслии он аз чӣ иборат аст, гуфт:

[b]Иброҳим Усмонов:[/b] Мақсади асосии ин Фонд таҳқиқ аст. Таҳқиқи ҳақиқати сулҳ ва ҷанги Тоҷикистон, таҳқиқи воқеияти он ҳодисаҳое, ки дар замони ҷанги шаҳрвандӣ ва муқовимати сиёсӣ ба амал омаданд, таҳқиқи муносибати байни гурӯҳҳои гуногуни иҷтимоии ҷомеаи имрӯзаи Тоҷикистон, таҳқиқи муносибати байни арзишҳои умумибашарӣ, арзишҳои миллӣ ва арзишҳои динӣ. Ва ончи, ки таҳқиқ шуд, дар мизи мудавварҳо, конфаронсу семинарҳо мавриди баррасӣ қарор мегирад. Нашру табъи онҳо дар шароити кунунӣ ҳоло масъалаи асосӣ нест.

[b]Озодӣ:[/b] Аммо барои иҷрои ин ҳама корҳо маблағ ва мутахассисҳо зарур аст?

[b]Иброҳим Усмонов:[/b] Ман дар ин бора фикр кардаам. Ҳоло мо як сармоягузори муайян ва ё созмону ташкилоте, ки пуштибониашро эълон карда бошад, надорем. Вале мо ба он созмонҳо ва ба он шахсиятҳое такия кардан мехоҳем, ки онҳо дар ин масъалаҳо эҳтиёҷи донистани бештарро доранд. Шояд шахсиятҳое пайдо шаванд, ки пайи ин гуна чизҳо бошанд. Ва дуруст аст, ки мутахассисонро ройгон ҷалб карда наметавонем ва ба қадри пайдо шудани имконияти моддӣ, онҳоро дар ин корҳо истифода хоҳем кард.

[b]Озодӣ:[/b] Бо таваҷҷӯҳ ба собиқаи фаъолияти шумо, ки дар ҳукумат кор кардаед, мушовири давлатии раиси ҷумҳурӣ будед, шояд ин гуна бардоштҳо бишавад, ки ин ҳама таҳқиқотҳо шояд «ҳукуматӣ» ҷамъбаст карда шаванд?

[b]Иброҳим Усмонов:[/b] Дар шароите ба таъсиси ин фонд ва анҷом додани ин кор даст задам, ки дигар корманди ҳукумат нестам. Ман ба ҳайси як нафар олим, як нафар шахсе, ки воқеаҳои солҳои навадумро дидааст ва худаш то андозае таҳқиқ кардааст, иштирок мекунам. Як чизро бояд бигӯям, ки ончи ки ҳозир пурсида ва сабт карда мешавад, шояд дар ин солҳои наздик, дар ин панҷ солу даҳ соли оянда ба шакли китоб дарҷ нашавад. Эҳтимол ин ҳама мисли маводи бойгонӣ хоҳад буд, ки ҳар касе, ки таваҷҷӯҳ кард, онро ба риштаи илм мекашад. Ин мавод маводи танҳо ҳукумати Тоҷикистон ва ё танҳо барои ин ҳукумат намешавад. Ин мавод барои миллат ва халқи Тоҷикистон мешавад. Ва гуфтаи ин бародарҳо, хоҳ он дар вақти муқовимати сиёсӣ аз ҷониби ҳукумат сухан гуфта бошанд, хоҳ онҳо дар он замон дар муқобили ҳукумат сухан гуфта бошанд, дар ҳамон шакле, ки мегӯянд, маҳфуз нигоҳ дошта мешавад, то ки барои муқоиса ва баҳо додан ба гузашта истифода карда шавад. Аз ин рӯ ман гумон намекунам, ки мавқеи собиқи ман ба коре, ки имрӯз ният дорам анҷом диҳем, таъсир гузошта тавонад.

[b]Озодӣ:[/b] Чун фонди шумо «Муколамаи тамаддунҳо» ном гирифтааст, фикр мекунед дар шароити имрӯз низ миёни гурӯҳҳо созмонҳо, аҳзоб ва дигар неруҳои сиёсӣ зарурати муколама ва музокира боқист?

[b]Иброҳим Усмонов:[/b] Бале. Касе ки гумон дорад ҳама чиз ҳаллу фасл шудаасту дигар зарурияти музокира кардан нест, зарурияти фикри дигарҳоро шунидан нест, ҳадди ақал саҳв мекунад. Зеро бо таъсири муҳити иттилоотии имрӯза, ки он ҷаҳонро идора мекунад, ҳамеша афкори мардум дар ҳоли тағйирёбист. Воқеаҳои дар дунё ба амалмеомада ба руҳияи онҳо таъсир мекунад. Аз онҳо ибрат гирифтан мехоҳанд, ба онҳо аксуламал нишон додан мехоҳанд, ки ҳама дар фаъолиятҳои дохилии онҳо ҳам зоҳир мешавад. Аз ин рӯ андеша кардан, ки зарурияти муколама кардан дар ҷомеаи мо боқӣ намондааст, чи хеле гуфтам саҳв аст. Зеро эҳтиёҷ ба муҳокима ҳамеша буд ва ҳаст ва гуфтаи Саъдӣ, ки «Илм бе баҳс пойдор намонад», аслан маънои муколамаро дорад.

Источник: http://www.ozodi.org/content/article/24767522.html

[b]Хадамоти алоқаи назди ҳукумати Тоҷикистон талош дорад, “Маркази мониторинги шабакаҳои АйПӣ (IP)”-ро таъсис диҳад.[/b]

Дар гузашта низ раҳбарони собиқи Вазорати нақлиёт ва мухобирот барои эҷоди Маркази ягонаи комутаторӣ кӯшиш карда буданд, аммо дар ин росто муваффақ нашуданд. Вале Бег Зуҳуров, собиқ муовини вазири нақлиёт ва мухобироти вақт ва раиси феълии Хадамоти алоқа, дар чанд соли охир бо ҳар роҳ мехоҳад, то ниҳодеро ба ин манзур роҳандозӣ кунад.

Ин аст, ки ахиран тавассути Хадамоти алоқаи Тоҷикистон ба вазоратҳои молия, адлия, рушди иқтисод ва савдо, ҳамчунин кумитаҳои амният ва сармоягузории кишвар, тарҳи Маркази мониторинги шабакаи АйПӣ (IP) пешниҳод шудааст. Масъулони Вазорати рушди иқтисод ва савдои Тоҷикистон тасдиқ карданд, ки лоиҳаи мазкур ба онҳо расида буд. Ҷамшед Ҳалимов, як масъули ин вазорат дар сӯҳбат бо Радиои Озодӣ гуфт, зимни таҳлили ин нома онҳо ба хулосае омадаанд, ки дар доираи ваколатҳои худ Хадамоти алоқа дар ҳамкорӣ бо коршиносони соҳа масъалаи таъсиси маркази мазкурро бори дигар баррасӣ намоянд.

Ӯ гуфт, «дар ин мактуб маълумотнома замима шуда буд, ки дар он ҷиҳати молиявӣ ва иқтисодии вобаста ба таъсиси марказ, ягон чиз маълум набуд. Зарурати таъсиси марказ дар ҳолате қобили дастгирист, ки ҷиҳати техникӣ, асосноккунии иқтисодиву молиявӣ дар он пурра таҳлил карда шуда, бо ҷалби мутахассисони баландихтисос манзур карда шавад. Дар ин ҳолат, ягон монеа мавҷуд нахоҳад буд.»

Тибқи номае, ки Бег Зуҳуров, раиси Хадамоти алоқаи Тоҷикистон, ба вазоратхонаҳои кишвар ирсол шудааст, зарурати таъсиси ин марказ ба ҳадафи таъмини амнияти иттилоотӣ, ҷилавгирӣ аз мавориди нақзи ҳуқуқи шахсони ҳуқуқиву воқеӣ ва муайян намудани масъулият барои пешниҳоди хадамоти пастсифат шарҳ ёфтааст.

Дар ин нома ҳамчунин омадааст, «ҳангоми пешниҳоди хидматрасонӣ дар соҳаи алоқаи барқӣ як қатор қонун ва санадҳои меъёриву ҳуқуқӣ ба ҳангоми бақайдгирии муштариён ва истифода аз хидматрсонии интернет риоя нагашта, амнияти иттилоотӣ халалдор гардида, ба ин васила амалҳои таҳдидкунандаи суботи миллӣ ба воситаи иттилоот сурат мегиранд. Саривақт танзим нагардидани хадамоти мазкур авзои сиёсии кишварро метавонад зери таҳдид қарор диҳад.»

Аммо дар ин зимн худи Бег Зуҳуров ирсоли чунин мактуб ва ҳам талоши ташкили маркази мазкурро рад мекунад. Ӯ мегӯяд, «ин ҳарфҳо ягон ҳақиқат надоранд ва чунин гап ҳам нест.»

Асомиддин Атоев, раиси Академияи иттилоот ва коммуникатсияи Тоҷикистон, ки аз талошҳои Хадамоти алоқа дар мавриди таъсиси ин марказ огоҳ аст, онро аз иқдоме унвон мекунад, ки баръакс амнияти иттилоотиро ба ҳам мезанад. Ба таъкиди вай, «вақте ҳама шабакаҳо ҳатман ба таври физикӣ бояд ба як марказ пайваст шаванд, ин маънои онро дорад, ки тамоми бозор вобастаи технологияҳои як ширкати истеҳсолкунанди таҷҳизоти мухобиротӣ мегардад. Дар ин ҳолат мо як луқмаи хубе мешавем, барои бадхоҳоне, ки дар шабакаҳои интернет чунин заифиро барои ҳамла овардан ва шикастани шабакаҳо дар лаҳзаҳои ҳассос, масалан, дар вақти интихобот истифода мебаранд. Чун яке аз ташаббусҳои Тоҷикистон ҳам татбиқи ҳукумати электронист ва шояд дар оянда низ интихобот тариқи электронӣ сурат бигиранд. Агар мо ин марказро таъсис диҳем, дар ин ҳолат чунин заифиҳо пайдо мешаванд.»

Ҷаноби Атоев ташаббуси Хадамоти алоқаро ҳам дар соҳаи мухобирот ва рақобатпазирӣ дар бозор ғайриқонунӣ арзёбӣ кард. Соҳибназарон мегӯянд, иқдоми ахири Хадамоти алоқа бештар дар ростои интихоботи раёсати ҷумҳурӣ ва ба хотири маҳдуд кардани озодиҳои дастрасӣ ба хадамоти интернет ва рушди шабакаҳои иҷтимоӣ, ки хеле фаъол шудааст, рӯи даст гирифта шудааст.

Источник: http://www.ozodi.org/content/article/24761298.html

[b]Созмонҳои хабарнигории Тоҷикистон аз маҳдуд шудани пахши расонаҳои Эрон дар кишварҳои аврупоӣ нигаронӣ карданд.[/b]

Рӯзи ҷумъа, 2-юми ноябр, зимни як нишаст дар Душанбе, созмонҳои рӯзноманигории Тоҷикистон аз масдуд шудани 19 расонаи хабарии Эрон, ки дар Аврупо ва дигар кишварҳои ғарбӣ пахш мешуданд, изҳори нигаронӣ намуданд.

Созмонҳои хабарнигории Тоҷикистон, аз қабили Шӯрои ВАО, Анҷумани миллии расонаҳои мустақил, созмони «Индем» аз Иттиҳодияи Аврупо ҳалли ин қазияро дархост кардаанд.

Ба гуфтаи иштирокдорони нишаст, ахиран ширкати ЮТЕЛСЕТ, ки бояд то соли 2021 пахши расонаҳои хабарии Эронро дар Аврупо таъмин мекард, ба тариқи яктарафа созишномаро бекор кардааст.

Расонаҳо ва созмонҳои рӯзноманигории Тоҷикистон ният доранд, ба расонаҳои масдудшудаи Эрон бо ирсоли нома ҳамраъйии худро баён созанд.

Источник: http://www.ozodi.org/content/article/24758397.html