Додгоҳи ноҳияи Фирдавсии шаҳри Душанбе бо қабули ду дархости намояндагони «Asia Plus» дар кори додгоҳ то рӯзи сешанбеи ҳафтаи оянда танаффус эълом кард.Яке аз дархостҳои ҷониби шокӣ муъайян кардани мақоми бахши мубориза бо чароими созмонёфтаи Вазорати умури дохилаи Тоҷикистон, ки метавонад шикоят ба додгоҳро чун ниҳоди ҳуқуқии мустақил ироа кунад, будааст.Дар ҳамин ҳол ҷониби даъво дар муҳокимаи додгоҳӣ пешниҳоди мусолиҳатомези ҳалли ин қазияро карда ва ваъда додааст, ки шарти ин пешниҳодро ба таври хаттӣ ироа хоҳад кард.

Аз сӯйи дигар Анвар Тағоймуродов, муъовини вазири умури дохилаи Тоҷикистон, мегӯяд, ки вазири корҳои дохилаи Тоҷикистон дар робита ба баёнияи ду вакили мудофеъи нашрияи “Asia Plus”, оқоён Шарифов ва Қудратов, гурӯҳи бозрасиро таъсис карда ва ин гурӯҳ машғули таҳқиқот дар мавриди баёнияи намояндагони нашрия ҳастанд.

Ҳафтаи қабл вукалои мудофеъи «Asia Plus» бо интишори як баёния эълом карданд, ки Валихон Муллоев, муъовини раиси бахши мубориза бо ҷароими созмонёфтаи вазорат, ба онҳо таҳдид карда ва гуфтааст, ки «онҳоро нобуд хоҳад кард.» Аммо женерол Тағоймуродов мегӯяд, ки ба ин гуфтаҳои оқоён Қудратов ва Шарифов бовар надорад.

Ба гуфтаи муъовини вазири дохила, Абдураҳмон Шарифов ва Шӯҳрат Қудратов ду корманди қаблии вазорати корҳои дохила ҳастанд, ки ба сабабҳои мухталиф аз ҷумла нақзи қавонину фаъолияти пулис аз симатҳояшон барканор шудаанд. Ва аз ин рӯ ба гуфтаи вай ин ду нафар «хусумати шахсӣ» ба кормандони вазорат доштаанд.

Вале вукалои мудофеъи нашрияи «Asia Plus» мегӯянд, ки бо хоҳиши худ фаъолият дар суфуфи пулиси Тоҷикистонро тарк кардаанд.

Дар ҳамин ҳол женерол Тағоймуродов мегӯяд, ки ҳафтаномаи “Asia Plus” аз қазияи додгоҳӣ барои боло бурдани “ҷалби маҳбубият” ба нашрия истифода мекунад.

Оқои Тағоймуродов ҳамчунин гуфт, ки ҳудуди як сол боз қазияи додгоҳӣ идома дорад ва намояндагони нашрияи “Asia Plus” амдан кори додгоҳро бо интишор додани ҳар гуна баёнияҳо ба дарозо мекашанд.

Оқои Тағоймуродов, рӯзи душанбеи 24 август дар сӯҳбат ба Би-би-сӣ гуфт: “Як сол боз ин нашрия дар саҳафоти хеш матолиби мухталиф дар ин маврид нашр мекунад ва бо истифода аз қазияи додгоҳӣ маҳбубияти худро дар миёни мардум афзоиш медиҳад.”

“Ниёз ба ҷалби таваҷҷӯҳ надорем”

Ҷониби дигари қазияи додгоҳӣ, зимни такзиби ин суханони женерол мегӯянд, ки нашрияи “Asia Plus” ниёз ба ҷалби таваҷҷӯҳи хонандагон надоштааст, зеро ин ҳафтанома бидуни он ҳам дар миёни сокинони Тоҷикистон яке аз нашрияҳои пурхонанда будааст.

Марат Мамадшоев, сардабири нашрияи “Asia-Plus”, ҳамчунин мегӯяд: “Вукалои мо ҷаласаи ҳафтаи гузаштаи додгоҳро ба сабаби “нобоварӣ ба қозӣ” тарк карданд, ки тибқи қонун ин амал дуруст аст. Мо то замоне, ки додгоҳ қозии ин парвандаро иваз накунад аз ширкат дар ҷаласаҳои он худдорӣ мекунем. Зеро Сайфуддин Камолов, қозии парванда, бидуни баррасии ду дархости ҷониби мо, чаласаи додгоҳро идома додааст.”

Қазияи додгоҳии ҳафтаноми “Asia Plus” ва Женерол Тағоймуродов, яке аз парвандаҳои тӯлонитарин миёни мақоми як вазорат ва як расонаи мустақил дар Тоҷикистон дар панҷ соли ахир арзёбӣ шудааст.

Ин қазия дар пайи шикояти женерол Анвар Тағоймуродов, раиси қаблии бахши ҷароими созмонёфтаи вазорати умури дохилаи Тоҷикистон алайҳи ин ҳафтанома дар авоили моҳи феврали соли 2011 оғоз шуд.

Женерол Тағоймуродов алайҳи “Asia-Plus” баъд аз чопи матлабе зери унвони «Тафтиш ё инкивизитсия (истинтоқ)?», ки дар он мавзӯъи истифода аз шиканҷа дар ниҳодҳои интизомӣ матраҳ шуда буд, шикоят бурд.

Ин масъули вазорати кишвар нашрияи “Asia-Plus” ва Рамзия Мирзобекова, муаллифи матлабро ба «тавҳину бӯҳтон» муттаҳам кардааст. Аммо Рамзия Мирзобекова мегӯяд, ки “онҳо дар навиштани матлаб ба ҳеҷ гуна иштибоҳ роҳ надодаанд.”

Ҳарчанд оқои Тағоймуродов дар сӯҳбати имрӯзи худ ба Би-би-сӣ, мавориди вуҷуд доштани шиканҷа дар миёни кормандони ниҳодҳои интизомиро комилан такзиб накард, вале ӯ изҳор кард, ки ҳолатҳое аз шиканҷа, ки ҳафтаномаи “Asia-Plus” дар матлаби мазкур дар мавриди он навиштааст, беасос будаанд. Аз ин рӯ оқои Тағоймуродов мегӯяд, ки ба пирӯзии ниҳоди худ дар қазияи додгоҳӣ бовар дорад.

Аммо вай афзуд, ки онҳо аз рӯзҳои аввали оғози муҳокимаи додгоҳӣ ба намояндагони “Asia-Plus” ба вижа ба хонум Мирзобекова, пешниҳоди ҳалли “мусолиҳатомези” ин қазияро кардаанд.

Женерол Тағоймуродов мегӯяд, ки ин пешниҳодро онҳо дар ҳоле қабул хоҳанд кард, ки агар “ҳафтанома раддияе нависад ва дар он ба иштибоҳоте, ки дар гузориши матруҳа вуҷуд дошт, иқрор шавад.”

“Озодбаёнӣ ё иштибоҳи хабарнигор”

Аммо масъулони ҳафтанома мегӯянд, ки ин шартро қабул надоранд, зеро дар матлаби онҳо ҳеҷ иштибоҳе наомадааст.

Аз сӯйи дигар бархе аз ҳуқуқдонҳо мегӯянд афзоиши мавориди ба додгоҳ кашида шудани нашрияҳои хабарии мустақил ва хабарнигорон аз сӯйи иддае аз мақомоти мухталифи Тоҷикистон дар солҳҳои ахир иқдомест барои таҳти фишор қарор додани расонаҳои гурӯҳӣ дар ин кишвар.

Иноят Иноятов, ҳуқуқдони тоҷик дар мавриди қазияи додгоҳии “Asia-Plus” ва вазорати умури дохила мегӯяд: “Аризаи даъвогӣ аз оғоз то ба охир беасос аст.»

Ба гуфтаи вай зеро даъво аз тарафи шахсе шудааст, ки ҳуқуқи пешниҳоди даъворо надорад. Дар мақола, ки характери танқидӣ дошта дар он фаъолияти як ниҳоди вазорат, мавриди интиқод қарор гирифтааст, вале даъво аз тарафи шахсе ироа шудаст, ки аз назари ҳуқуқӣ дар муҳокимаи шаҳрвандӣ нодуруст аст.”

Оқои Иноятов дар мавриди афзоиши ба додгоҳ кашида шудани расонаҳо мегӯяд, ки ду сабаби аслӣ дар ин маврид мавҷуд будааст.

Вай дар мавриди аввали он афзуд: “Дар ҷомеъа, ки гуногунандешӣ ба миён омад мутаносибан интиқоди фаъоляти бархе аз мақомот ба миён меояд ва бархе аз мансабдорон ба ҷои он, ки ба ин танқид бо далелҳои ҳуқуқӣ ҷавоби рад диҳанд, хабарнигоронро бо далелҳои беасос ба додгоҳҳо мекашанд, ки қисми зиёде аз даъвоҳо дар натиҷаи баррасии додгоҳҳо рад мешаванд.”

Ҳамчунин ба гуфтаи вай, бархе аз матолиби чоп шуда ба салиқа ва маърифати хабарнигорон бастагӣ дорад ва вай афзуд, ки дар бархе маворид хабарнигор иттилоъотро ба таври дақиқ насанҷида матолибро ба нашри мерасонанд, ки боъиси даъвоҳои додгоҳӣ мешавад.

Аз сӯйи дигар бисёре аз хабарнигорон бар ин ақидаанд, ки афзоиши мавориди ба додгоҳҳо кашида шудани расонаҳо ва хабарнигорон, ба афзоиши худсонсурӣ дар фаъолияти хабарнигорон дар Тоҷикистон мунҷар шудааст.

Источник: http://www.bbc.co.uk/tajik/institutional/2011/08/110822_zkh_court_massmedia.shtml

[b]Созмонҳои мудофеъи озодии баён ва Идораи ҳуқуқи башари Тоҷикистон бо интишори баёнияе муштарак латукӯби рӯзноманигор Хуршеди Атовуллоро маҳкум кардаанд.[/b]

Дар ин баёния, ки рӯзи панҷшанбеи 1 сентябр мунташир шуд, аз ҳамлаи афроди номаълум ба Хуршеди Атовулло, сардабири ҳафтаномаи «Фараж», башиддат интиқод шудааст.

Намояндагони созмонҳои мудофеъи ҳуқуқи башар ва озодии баён аз нерӯҳои интизомии Тоҷикистон дархост кардаанд, ки афроди мазнун дар ин ҳодисаро боздошт ва муҷозот кунанд.

Иттиҳодияи рӯзноманигорон, Анҷумани миллии расонаҳои мустақил ва Идораи ҳуқуқи башари Тоҷикистон навиштаанд, ки ин дувумин ҳодисаи латукӯби рӯзноманигорон дар Тоҷикистон дар соли ҷорӣ аст.

Дар ин баёния омадааст, ки дар моҳи феврали соли ҷорӣ Ҳикматулло Сайфуллозода, сардабири ҳафтаномаи «Наҷот», вобаста ба Ҳизби наҳзати исломии Тоҷикистон, низ аз сӯйи ду фарди номаълум латукӯб шуда ва дар бемористон муддате бистарӣ буд.

Масъулони ин созмонҳо мегӯянд дар ҳоле ки Тоҷикистон дар остонаи таҷлил аз 20-умин солгарди истиқлоли худ қарор дорад, латукӯби рӯзноманигорон ва ҳар фарди дигаре мояи нигаронӣ аст.

Ин созмонҳо хостори ҳалли ҳама гуна муноқишаҳо дар чорчӯби қонун шуда ва аз ниҳодҳои марбута тақозо кардаанд, ки амнияти мардумро тибқи Қонуни асосии Тоҷикистон таъмин кунанд.

Хуршеди Атовулло, сардабири нашрияи “Фараж” ва раҳбари созмони «Медиа-алянси Тоҷикистон», пештар ба Би-би-сӣ гуфта буд, ки афроди ношинос дар худраве онҳоро дунболагирӣ карда ва дар маҳаллаи “Зарафшон-2”-и шаҳри Душанбе бо чӯбдастҳо ба онҳо ҳамла кардаанд.

Дар натиҷа, дасту пойи оқои Атовулло ва ду ҳамроҳаш аз зарбаҳои чӯб маҷрӯҳ шудаанд.

Ин ҳодиса соъати 12 зӯҳр рух дода ва дар он замон хиёбонҳои шаҳр пур аз мардум буд. Аз сӯйи дигар, Ҳикматулло Сайфуллозода низ дар маҳалле наздик ба «Зарафшон» ва дар рӯзи равшан лату кӯб шуда буд.

Соҳибназарон бо ишора ба такрори ин ҳаводис сабаби ҳамла ба хабарнигоронро бемуҷозот мондани ин афрод медонанд. То ҳол афроде, ки оқои Сайфуллозодаро низ лату кӯб карда буданд, боздошт ва муҷозот нашудаанд.

Би-Би-Си

Источник: http://www.bbc.co.uk/tajik/institutional/2011/09/110901_zkh_statement_mass_media.shtml

[b]Сомонаи ширкати телевизон ва радиошунавонии БиБиСи дар Иди Фитр барои мусулмонон таҳия ва истеъмоли ғизоеро аз гӯшти хук дар қатори дигар номгӯи хӯрокҳои дар ин рӯз таҳияшаванда пешниҳод кардааст.[/b]

Масъулини ширкати мазкур аллакай барои ин корашон ба таври расмӣ аз мусулмонон узр хоста, гуфтаанд, ки онҳо ҷурми худро ба дӯш мегиранд ва аммо ғизое аз гӯшти хук тасодуфан дар қатори ғизоҳои барои ин рӯз таҳияшаванда омадааст.

Дар ҳамин ҳол Хоқон Комуз — сарвари Ассотсиатсияи истеҳсолкунандагон ва соҳибкорони мустақили Бритониё — «Мусоид», нафаре, ки нахустин шуда ин хаторо ошкор намуд, гуфтааст, ин ширкат бо ин ҳама собиқааш наметавонист надонад, ки мусулмонон умуман гӯшти хук истемол намекунанд.

Абӯбакри ФАЙЗАЛӢ, TojNews

Источник: http://tojnews.org/taj/index.php?option=com_content&task=view&id=17579&Itemid=30

[b]Пас аз зӯҳри 31-уми август вақте дар саросари Тоҷикистон аз иди саиди Фитр таҷлил мекарданд, дар маҳаллаи Зарафшони пойтахт Хуршеди Атовулло, сардабири нашрияи «Фараж» ва ҳамроҳони ӯ мавриди лату кӯб қарор гирифтанд.[/b]

Тавре худи журналист ба хабаргузории «Озодагон» зимни як сӯҳбати телефонӣ иброз дошт: «Мо чанд нафар ба табрики рафиқону пайвандон мерафтем. Ин буд, ки як худрави сафедранги тамғаи ВАЗ-2106 бо рақами давлатии У 21 37 РТ аз маҳаллаи 102 то ин ҷо, яъне маҳаллаи «Зарафшон-2» ман ва ду тан аз ҳамроҳонамро таъқиб карданд ва ниҳоят пеши мошини моро гирифтанд ва вақте ки аз мошин фаромада пурсон шудем, ки чаро чунин мекунем, бе ягон сабаб бо калтакҳо моро лату кӯб карданд».

Дар ҳамин ҳол, масъулини шӯъбаи корҳои дохилии ноҳияи Сино, ки ҳодисаи ҳамла ба журналист ва ёрони ӯ дар қаламрави ин минтақа сурат гирифтааст, мегӯянд, албатта лату кӯби шаҳрванд новобаста аз он ки ӯ чӣ кора аст ва ба кадом хотир ин ҳодиса рух додааст, пайгирӣ хоҳад шуд. Аммо то ин замон дар қиболи муҳоҷимин парвандаи ҷиноӣ бо далели дар даст надоштани санади ташхиси тиббӣ боз нашудааст.

Зимнан, Хуршеди Атовулло гуфт, ӯ аллакай дар маркази миллии табобат ва тандурустӣ аз ташхиси тиббӣ гузаштааст ва натоиҷи он имрӯз ба мақомоти марбута пешниҳод мешавад.

Маврид ба тазаккур аст, ки кулли ҷомеъаи журналистӣ ва созмонҳои дифоъ аз рӯзноманигорони кишвар аз ин қазия изҳори нигаронӣ карда, ҳар чӣ зудтар пайдо кардани муҷриминро аз масъулини ҳифзи ҳуқуқ тақозо доранд.

Ёдрас менамоем, як ҳодисаи ба ин монанд ҳанӯз чанд моҳ қабл дар қиболи Ҳикматулло Сайфуллозода, муҳаррири ҳафтаномаи «Наҷот» (нашрияи ҲНИТ) сурат гирифта буд, аммо бо гузашти 7 моҳ дастандаркорон ва иҷрочиёни сӯйиқасд ҳанӯз боздошт нашуда, шахсияташон муайян нагаштааст.

Источник: http://www.ozodagon.com/khabarho/tojikiston/2016-2011-09-01-04-16-00

Хуршеди Атовулло аз хабарнигорони шинохта ва сардабири ҳафтаномаи “Фараж” мегӯяд, имрӯз афроди ношиносе ӯро башиддат латукӯб кардаанд. Ӯ ба Радиои Озодӣ гуфт, зимни ҳаракати мошинаш дар як маҳаллаи ғарбии Душанбе, як худрави дорои шумораи давлатӣ онҳоро таъқиб карда ва ӯву ҳамроҳонашро башиддат калтаккӯб кардаанд: “Бе ягон сабаб фуромаданд ва заданд, ҳеҷ чиз нагуфтанд. Як дастам дар хун оғушта аст, кафи ҳарду дастам хунолуд аст ва зарб хӯрдаст.” Хуршеди Атовулло ба мақомоти интизомӣ шикоят бурдааст ва мақомоти мазкур ҳанӯз ин қазияро шарҳ надодаанд.

Источник: http://www.ozodi.org/archive/news/20110831/538/538.html?id=24313485

Душанбе. 1-уми сентябр. TojNews — Хуршеди Атовулло — сардабири хафтаномаи «Фараж» дирӯз аз ҷониби як гурӯҳи иборат аз ҳафт тан афроди ношинос дар маҳаллаи Зарафшон мавриди латукӯб қарор гирифт. Худи Хуршеди Атовуло дар ин бора ба TojNews хабар дод.Мавсуф гуфт: «Мошине, ки пеш-пеши мо мерафт, пеши роҳи моро гирифт ва якбора ба мо ҳуҷум карданд. Дар натиҷа ду нафар аз ҳамроҳони ман ҷароҳати ҷисмонӣ бардоштанд ва ангушти як нафари дигарро шикастанд. Айни замон ҳеҷ баҳогузорӣ карда наметавонам, ки ба чи сабаб ба мо ҳамла карданд, зеро он нафарон ба мо чизе нагуфтанд. Ҳоло тафтишот идома дорад ва ман фикр мекунам, ки ин қазия ошкор мешавад, зеро саривақтӣ ин масъаларо аз ҷониби ШКД-и Сино-2 пайгирӣ карданд. Аз ин хотир, бо умед натиҷаи тафтишотро интизор мешавам».

Қазияи латукӯби рӯзноманигор Хуршеди Атовулло, ки дар ин шабу рӯзи иди Фитр ва 20-солагии Истиқлолияти Тоҷикистон ба амал омад, метавонад гумонҳоеро ба бор орад, ки озодии сухан ва ВАО дар Тоҷикистон зери суол қарор дорад. Зеро чанд моҳ пеш чунин як ҳодиса нисбати сардабири нашрияи «Наҷот» Ҳикматулло Сайфуллозода низ ба амал омада буд, ҳарчанд то имрӯз гунаҳкорон ва ашхоси ба ин ҳодиса дастдошта таҳқиқ нашудаанд.

Нуриддин Қаршибоев — раиси АМВАОМТ мегӯяд, ки мавриди латукӯб қарор гирифтани на танҳо як журналист, балки як шаҳрванд дар рӯзи равшан боиси нигаронӣ аст. «Мо аз ҷониби созмони худ ва дигар шариконамон хостори онем, ки ин ҳодисаҳо аз ҷониби мақомоти ҳифзи ҳуқуқ ҳамаҷониба ва фавран мавриди тафтишот қарор гиранд ва гунаҳкорон бояд ҷазои худро бинанд. Худи ҳамин рӯз тасмим дорем якҷоя бо Иттифоки журналистони Тоҷикистон ва дигар созмонҳои журналистӣ як изҳороте пахш кунем ва аз ВКД тафтиши ҳамаҷонибаи ин қазияро талаб намоем. Ҳамчунин дар сурати зарурат Анҷумани мо барои Хуршеди Атовулло хизмати ҳукқуқӣ ва адвокат пешниҳод карда метавонад. Ман таъкид мекунам, ки бояд на фақат журналист, балки хама гуна шаҳрванд амнияташ таъмин бошад. Дар ҳоле, ки имрӯзҳо 20-солагии Истиқлолият аст, дар рӯзи равшан мавриди латукӯб қарор гирифтани як шаҳрванд оқибатҳои ногувор дорад».

Қайд кардан бамаврид аст, ки ҳодисаи латукӯб нисбати Хуршеди Атовулло якум бор нест. Худи ӯ дар ин маврид мегӯяд: «Намедонам дар 20 соли фаъолият чанд ҳолат бошад. Ҳисобашро ҳам гум кардаам. Бисёр мехостам донам, ки ба кадом хотир буд. Ҳамлаи пештар соли 1998 тавассути туфангча сурат гирифта буд. Соли 1993 низ чунин ҳамла ба ман рӯй дода буд».

Ба ҳамин сурат, озодии ВАО-ро дар Тоҷикистон имрӯзҳо бо далели ин ҳодисот наметавон мусбат арзёбӣ намуд. Ба назар мерасад, ки агар ин ҳодисаҳо ба як анъана табдил ёбанд, барои озодии сухан ва озодии ВАО хатари ҷиддӣ таҳдид мекунад.

Источник: http://tojnews.org/taj/index.php?option=com_content&task=view&id=17545&Itemid=30

Иттиҳоди журналистони Тоҷикистон, Анҷумани миллии расонаҳои мустақили Тоҷикистон ва Дафтари ҳуқуқи башар ва мурооти қонуни Тоҷикистон дар як изҳороти муштарак латукӯб шудани сардабири ҳафтаномаи “Фараж”, раиси эътилофи “Медиа Алянс”, Хуршеди Атовуллоро маҳкум карданд ва онро мояи нигаронии маҳфилҳои журналистӣ номиданд. Ҳар се созмон аз мақомоти ҳифзи ҳуқуқ ва қонуни Тоҷикистон хостанд, қазия ба зудтарин фурсат ва шакли комил таҳқиқ ва гунаҳкорон муҷозот шаванд. Ҷаноби Атовулло рӯзи 31-уми август дар маҳаллаи Зарафшони шаҳри Душанбе ҳадафи ҳамлаи чанд нафари номаълум қарор гирифт. Ду ҳамсафари ӯ низ латукӯб шудаанд. Масъулони шӯъбаи умури дохилии ноҳияи Синои Душанбе гуфтаанд, дар ҳол омӯзиши қазияанд, аммо парвандаи ҷиноӣ дар ин бора боз нашудааст.

Источник: http://www.ozodi.org/archive/news/latest/538/538.html?id=24314573

[b]Иттифоқи журналистони Тоҷикистон, Анҷумани миллии воситаҳои ахбори оммаи мустақили Тоҷикистон ва Бюрои оид ба ҳуқуқҳои инсон ва риояи қонуният[/b]

Иттифоқи журналистони Тоҷикистон, Анҷумани миллии воситаҳои ахбори оммаи мустақили Тоҷикистон (АМВАОТ) ва Бюрои оид ба ҳуқуқҳои инсон ва риояи қонуният (BHR) факти аз тарафи шахсони номаълум лату кўб шудани сармуҳаррири ҳафтаномаи «Фараж» Хуршед Ниёзов (Хуршеди Атовулло)-ро сахт маҳкум мекунанд. Воқеаи мазкур дар соли ҷорӣ ҳодисаи дуюми ҳамла ба журналист аст, ки боиси ташвиши журналистон гаштааст. Моҳи феврали соли 2011 сармуҳаррири ҳафтаномаи «Наҷот» Ҳикматулло Сайфуллозода низ мавриди лату кўб қарор гирифта буд.

Рўзи 31 август, тахминан соати 12:30 дар ҳудуди маҳаллаи Зарафшони шаҳри Душанбе сармуҳаррири ҳафтаномаи «Фараж», Котиби генералии Медиа Алянси Тоҷикистон Хуршед Ниёзов аз тарафи шахсони номаълум мавриди лату кўб қарор гирифт. Дар натиҷаи ҳодисаи мазкур ду нафар ҳамсафарони журналист ҳам зарар дидаанд. Зарардидагон бо ариза ба ШКД-2 ноҳияи Синои шаҳри Душанбе муроҷиат намуданд.

То ҳол аниқ гуфтан мумкин нест, ки ҳодисаи мазкур ҳамла ба журналист буда, ба фаъолияти касбии сармуҳаррири ҳафтаномаи «Фараж» Хуршед Ниёзов вобаста мебошад, вале дар рўзҳои таҷлили 20-солагии истиқлолияти ҷумҳурӣ ба амал омадани ҳамла ба ҳар шаҳрванди Тоҷикистон боиси ташвиш мегардад ва дар пасманзари баҳсҳои серсару садои вақтҳои охир нисбат ба ВАО баамаломада ҳодисаи мазкур дар муҳити журналистон боиси ташвиши ҷиддӣ гаштааст.

Иттифоқи журналистони Тоҷикистон, АМВАОТ ва BHR аз мақомоти ҳомии қонунҳои ҷумҳурӣ таҳқиқи фаврии ҳамла ба яке аз журналистони шинохтаи ҷумҳурӣ Хуршед Ниёзов (Хуршеди Атовулло) ва ба ҷавобгарӣ кашидани айбдорони ҳамлаи мазкурро талаб менамоянд. Мо ҷонибдори дар чорчўбаи меъёрҳои байналмилалӣ ва миллии ҳуқуқ ҳал намудани ҳар гуна баҳс буда, инчунин зарурати аз тарафи мақомоти босалоҳияти Ҷумҳурии Тоҷикистон ба таври фаврӣ, бечуну чаро риоя намудани амнияти шаҳрвандон, аз ҷумла ҳуқуқ ба озодии суханро қайд менамоем.

[b]Акбаралӣ Сатторов,
Раиси Иттифоқи журналистони Тоҷикистон

Наргис ЗОКИРОВА,
Директори Бюрои оид ба ҳуқуқҳои инсон ва риояи қонуният

Нуриддин ҚАРШИБОЕВ,
Раиси АМВАОМТ

ш. Душанбе, 1 сентябри соли 2011[/b]

Источник:

[b]Аммо, ба гуфтаи намояндаи шӯъбаи умури дохилӣ, парвандаи ҷиноӣ ҳанӯз боз нашудааст.[/b]

Масъулони шӯъбаи корҳои дохилии ноҳияи Синои шаҳри Душанбе мегӯянд, ҳодисаи лату кӯби Хуршеди Атовулло, сардабири нашрияи мустақили «Фараж» таҳқиқ хоҳад шуд. Вале афзуданд, ҳанӯз парвандаи ҷиноӣ боз нашудааст.

Қайсиддин Алиев, як масъули шӯъбаи навбатдорӣ дар идораи пулиси ноҳияи Сино ба Радиои Озодӣ гуфт, «дар ҳақиқат вай (Хуршеди Атовулло) ба мо муроҷиат кард ва мо ӯро ба корманди шӯъбаи кофтукоб вобаста кардем. Аризаи ҷабрдида низ гирифта шуд ва ин ҳодиса тавассути корманди мо таҳқиқ мешавад ва ҳатман афроде, ки ҳамла кардаанд, аз рӯи шумораи мошинашон ёфт хоҳанд шуд.»

Ҷаноби Алиев дар посухи ин суол, ки оё нисбати ин қазия парвандаи ҷиноӣ боз хоҳад шуд ё хайр, гуфт, «ҳоло ҷабрдида бояд ташхиси тиббӣ-судӣ биёрад ва албатта, чун лату кӯб шудааст, парванда боз хоҳад шуд».

Итминони масъулони идораи пулиси ноҳияи Синои шаҳри Душанбе дар мавриди пайдо кардани ҳодисаи лату кӯби Хуршеди Атовулло дар ҳолест, ки чанд моҳе пеш Ҳикматулло Сайфуллозода, сардабири нашрияи «Наҷот» низ аз сӯи афроди ношинос мавриди ҳамла қарор гирифта буд, аммо бо гузашти моҳҳо то ҳол омилони ин ҳодиса пайдо нашудаанд.

Хуршеди Атовулло, қабл аз зӯҳри рӯзи чаҳоршанбе тавассути ҳафт тан аз афроди ношинос дар яке аз маҳаллаҳои шаҳри Душанбе мавриди лату кӯб қарор гирифт.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=124]http://www.taj.nansmit.tj/analysis/?id=124[/url]

Хуршеди Ҳамдам

Источник:

[b]Аммо, ба гуфтаи намояндаи шӯъбаи умури дохилӣ, парвандаи ҷиноӣ ҳанӯз боз нашудааст.[/b]

Масъулони шӯъбаи корҳои дохилии ноҳияи Синои шаҳри Душанбе мегӯянд, ҳодисаи лату кӯби Хуршеди Атовулло, сардабири нашрияи мустақили «Фараж» таҳқиқ хоҳад шуд. Вале афзуданд, ҳанӯз парвандаи ҷиноӣ боз нашудааст.

Қайсиддин Алиев, як масъули шӯъбаи навбатдорӣ дар идораи пулиси ноҳияи Сино ба Радиои Озодӣ гуфт, «дар ҳақиқат вай (Хуршеди Атовулло) ба мо муроҷиат кард ва мо ӯро ба корманди шӯъбаи кофтукоб вобаста кардем. Аризаи ҷабрдида низ гирифта шуд ва ин ҳодиса тавассути корманди мо таҳқиқ мешавад ва ҳатман афроде, ки ҳамла кардаанд, аз рӯи шумораи мошинашон ёфт хоҳанд шуд.»

Ҷаноби Алиев дар посухи ин суол, ки оё нисбати ин қазия парвандаи ҷиноӣ боз хоҳад шуд ё хайр, гуфт, «ҳоло ҷабрдида бояд ташхиси тиббӣ-судӣ биёрад ва албатта, чун лату кӯб шудааст, парванда боз хоҳад шуд».

Итминони масъулони идораи пулиси ноҳияи Синои шаҳри Душанбе дар мавриди пайдо кардани ҳодисаи лату кӯби Хуршеди Атовулло дар ҳолест, ки чанд моҳе пеш Ҳикматулло Сайфуллозода, сардабири нашрияи «Наҷот» низ аз сӯи афроди ношинос мавриди ҳамла қарор гирифта буд, аммо бо гузашти моҳҳо то ҳол омилони ин ҳодиса пайдо нашудаанд.

Хуршеди Атовулло, қабл аз зӯҳри рӯзи чаҳоршанбе тавассути ҳафт тан аз афроди ношинос дар яке аз маҳаллаҳои шаҳри Душанбе мавриди лату кӯб қарор гирифт.

[b]ҲАМЛА ДАР РӮЗИ ИД[/b]

Раёсати Медиа Алянс ва ё Эътилофи Расонаҳои Тоҷикистон ҳодисаи лату куби Хуршеди Атовулло, раҳбари ин созмонро маҳкум кард.

Зафари Абдулло, аз аъзои аршади созмони Медиа Алянс гуфт, «албатта, ҳоло мушкил аст, ин қазияро шарҳ додан, аммо мо пас аз маслиҳату машварат иқдоме хоҳем гирифт. Яъне агар ҳодисаи лату куб ба фаъолияти Хуршед рабт дошта бошад, ҳатман нишасти матбуотӣ доир хоҳем кард ва изҳороти расмӣ пахш мекунем. Дар ҳар сурат ҳар навъ ҳамла ба журналист, ба хусус дар рӯзи ид ба фазои сиёсӣ ва расонаӣ халал ворид мекунад. То кунун мавориди ҳамла ба журналистон буда ва умедворам, ин идомаи чунин таҳаввуле набошад».

Зафари Абдулло гуфт, бо таваҷҷӯҳ ба ин ки Хуршеди Атовулло на танҳо журналисти оддист, балки раҳбарии чанд созмони муҳими дифоъ аз рӯзноманигорон дар Тоҷикистонро бар дӯш дорад, мақомот ва ниҳодҳои ҳифзи ҳуқуқро лозим аст, то дар навбати аввал бар иловаи таҳқиқи сареъву мунсифона, ҳамчунин шароити таъмини амнияти ӯро низ фароҳам созанд.

[b]НАНСМИТ МАҲКУМ МЕКУНАД[/b]

Ин дар ҳолест, ки Нуриддин Қаршибоев, раиси НАНСМИТ ва ё Анҷумани миллии расонаҳои мустақили Тоҷикистон низ мавриди лату кӯб қарор гирифтани Хуршеди Атовуллоро дар партави қазияҳои додгоҳии нашрияҳо як ҳодисаи нигаронкунанда арзёбӣ кард ва гуфт, «дар ин авохир мавзӯи таъмини амнияти тамоми шаҳрвандон, аз ҷумла як тан журналистон дар рӯзҳои ҷашни 20 солагии истиқлолияти Тоҷикистон ҳодисаи нигаронкунанда аст. Зеро вақте бо сари баланд дар бораи истиқлолият сӯҳбат мекунем, бояд амнияти рӯзноманигорон ва шаҳрвандон таъмин бошад».

Ҳарчанд ба таъкиди ҷаноби Қаршибоев, ҳанӯз қазовати ҳодиса зуд аст, «дар сурати ба фаъолияти журналистии вай дахл доштани ин қазия, НАНСМИТ ҳатман ҳамроҳ бо шарикони худ барои дифоъ аз ҳуқуқи Хуршеди Атовулло ҷадал хоҳад кард».

Бино ба гуфтаи худаш ва шоҳидон, Хуршеди Атовулло, сардабири ҳафтаномаи мустақили «Фараж» ҳаволии соати 13-и имрӯз дар маҳаллаи Зарафшон тавассути афроди ношинос мавриди лату куб қарор гирифтааст.

[b]ИЗҲОРОТИ ХУДИ ХУРШЕДИ АТОВУЛЛО[/b]

Ҷаноби Атовулло ҳанӯз аз маҳалли ҳодиса дар сӯҳбати телефонӣ бо Радиои Озодӣ гуфт, «имрӯз, ки ид аст мо ба табрики рафиқону пайвандон мерафтем. Ин буд, ки як худрави сафедранги тамғаи ВАЗ-06 бо рақами давлатии У 21 37 РТ аз маҳаллаи 102 то ин ҷо маҳаллаи 104 ман ва ду тан аз ҳамроҳонамро таъқиб карданд ва ниҳоят пеши мошини моро гирифтанд ва вақте, ки аз мошин фаромада пурсон шудем, ки чаро чунин мекунем, бе ягон сабаб бо калтакҳо моро лату куб карданд».

Ба гуфтаи ҷаноби Атовулло афроди ношинос се нафар буданд, аммо вақте худрав манъ кард боз чор тани дигар бо ин афрод ҳамроҳ шуданд дар маҷмӯъ ҳафт нафар шуданд ва ӯ ва ҳатто ҳамроҳонашро низ лату кӯб карданд.

Хуршеди Атовулло гуфт, ки аз дасти рост ва пойҳояш зарб хурда ва ҳанӯз ҳам дард азияташ медиҳад.

Ҳамакнун барои Хуршеди Атовулло, сабаби ин лату куб, ки ба гуфтаи вай афроди мулкӣ буданд, рушан нест, вай ба шӯъбаи корҳои дохилии ноҳияи Сино шикоят бардааст.

Зимнан, Хуршеди Атовулло соли 1996 факултаи журналистикаи Донишгоҳи Миллии Тоҷикистонро хатм кардааст.

Фаъолияти эҷодии вай аз барномаҳои ҷавонии Радиои Тоҷикистон шурӯъ карда, баъдан дар нашрияҳои «Ҷавонони Тоҷикистон», «Рӯзи нав», «Зиндагӣ» идома додааст. Чанд соли ахир бо таъсиси нашрияи мустақили «Фараж» сардабирии онро бар дӯш дорад. Ҳамчунин раҳбари Созмони рӯзноманигории «Медиа Алянси Тоҷикистон» мебошад.

Хуршеди Ҳамдам

Источник: http://www.ozodi.org/content/article/24313584.html