[b]Бисту чоруми октябри соли 2011 сафир Кен Гросс курси «Робитахои ҷомеа ва васоити ахбори умум»- ро, кӣ барои мутахасcисони равобити ҷомеа ва васоити ахбори умуми Вазорати корҳои дохилӣ, Кумитаи давлатии амнияти миллӣ, Агентии назорати маводи мухаддир, Прокуратураи генералӣ, Суди олӣ, Вазорати корҳои хориҷӣ, Агентии назорати молиявӣ ва мубориза бо коррупсия, Хадамоти гумрук, Бонки миллӣ ва Вазорати мудофиа, кӣ аз тарафи Сафорати ИМА ташкил ва маблағгузорӣ карда шудааст, кушод. Рӯзи якуми дарсҳои интерактивӣ иштирокчиён бо намояндагони васоити ахбори умум вохурда, бо онхо мушкилоти хамкориро муҳокима намуданд. Омӯзишро се дастурдиҳандаи ботаҷрибаи ФБР, ки агентҳои калони махсуси Шӯъбаи алоқа бо ҷомеаи ФБР, ки ба Идораи матбуотии миллӣ тааллуқ дорад, гузаронданд.[/b]

Дар маросими ифтитохӣ, сафир Гросс гуфт: «Сафорати ИМА омода аст кӣ, дар нақши мухими шумо ҳамчун нотиқони давлатӣ мадад расонад, кӣ ба ҳамкасбони васоити ахбори умум дастрасии иттилооти воқеӣ ва мутаносибро таъмин кунед».

Шӯъбаи назорати байналмилалии маводи мухаддир ва тартиботи ҳуқуқии Сафорати ИМА курси як ҳафтаинаро ташкил ва маблағгузорӣ кард. Ин курс ба мутахассисони Ҳукумати Точикистон оид ба ҷомеа ва васоити ахбори умум дар инкишофи маҳорати беҳтар расондани ахбор ва иттилоотро ба чомеа ва ВАУ ёрдам кард. Давраи таълимӣ сенарийҳои амалӣ ва амалиёти нақшбозӣ, аз ҷумла, конфронсҳои иттилоӣ, истифодаи васоити ахбори умуми ҷамъиятӣ, баромади танқидӣ рӯ барӯи камера, музокироти «дар камингоҳ» ва дигар сенарийҳои «зинда»ро дар бар гирифт. Сафир Гросс ҳамчунин нақши Сафири ИМА-ро иҷро кард, кӣ ахборро ба нотиқони ҳукумат мерасонад.

Ҳукумати Иёлоти Муттаҳида ба идомадиҳии пуштибонӣ аз ҷомеаи ҳифзи ҳуқуқи Тоҷикистон ва кӯмак ба он омода аст. Аз соли 1992 инҷониб Ҳукумати ИМА барои барномаҳои ба тақвияти соҳаҳои ҳифзи ҳуқуқ ва амният, болоравии иқтисодӣ, ниҳодҳои демократӣ, тандурустӣ ва маорифи Тоҷикистон кӯмакдиҳанда беш аз 900 миллион доллари амрикоиро таъмин намудааст.

Источник: Сафорати ИМА дар Точикистон.

[b]Нашрияи мустақили «Фараж» пешниҳод дар бораи мусолиҳаи додгоҳиро рад карда ва хостори муҳокимаи қазия дар додгоҳ шудааст.[/b]

Файзиддин Азизов, муъвони раиси яке аз ҷамоъатҳои ноҳияи Рӯдакӣ ин нашрияро дар чопи матлабе «муғризона» муттаҳам дониста ва хостори пардохти 500 ҳазор сомонӣ ҷуброни молӣ шудааст.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=144]http://www.taj.nansmit.tj/analysis/?id=144[/url]

Источник:

[b]Нашрияи мустақили «Фараж» пешниҳод дар бораи мусолиҳаи додгоҳиро рад карда ва хостори муҳокимаи қазия дар додгоҳ шудааст.[/b]

Файзиддин Азизов, муъвони раиси яке аз ҷамоъатҳои ноҳияи Рӯдакӣ ин нашрияро дар чопи матлабе «муғризона» муттаҳам дониста ва хостори пардохти 500 ҳазор сомонӣ ҷуброни молӣ шудааст.

Нашрияи «Фараж» дар моҳи август матлаберо зери унвони “Даҳшат дар суди Рӯдакӣ: “Мерседес” — 22 000 ҳазор доллар” мунташир карда ва аз ҳукми додгоҳ дар қиболи ронандаи як минибасе, ки бо худрави Файзиддин Азизов бархурдааст, шадидан интиқод карда буд.

Додгоҳ ронандаи ин минибасро дар тасодуми утумубилӣ муҷрим дониста ва ӯро ба пардохти 22 ҳазор дулор ҷубронпулӣ муваззаф кардааст. Ҳарчанд, ба навиштаи муаллиф ин худрави “Мерседес”-и тавлиди даҳаи 1990 на бештара аз панҷ-шаш ҳазор дулор арзиш доштааст.

Урунбой Шерматов, вакили мудофеъи оқои Азизов ба Би-би-сӣ гуфт, ки муваккилаш ба нашрияи “Фараж” пешниҳод кард, ки дар саҳафоти худ аз ӯ пузиш бипурсад ва ба ин тартиб қазия ҳал хоҳад шуд. Вале, масъулони нашрия ин пешниҳодро напазируфтанд.

Вай афзуд: “Тибқи қавонини Тоҷикистон, нашрия ва муаллиф муваззафанд, ки қабл аз нашри матлабе дақиқ будани маводди онро бисанҷанд ва танҳо иттилоъи дуруст чоп кунанд. Муваккили ман бар ин назар аст, ки муаллифи матлаб иттилоъи носаҳеҳ мунташир кардааст.”

Вале Хуршеди Атовулло, сардабири “Фараж” мегӯяд, ки куллияи маводди мунташиршуда саҳеҳ аст ва ба ин далел онҳо пешниҳоди созишро радд кардаанд ва мехоҳанд, дар муҳокимаи додгоҳи аз нашрия ва қаҳрамони матлаб, ки ба пардохти 22 ҳазор дулор ҷуброн ба Файзиддин Азизов муваззаф шудааст, дифо кунанд.

Оқои Атовулло афзуд: “Тибқи иттилоъе, ки мо дорем, худрави “Мерседес”-и тавлиди даҳаи 1990 наметавонад 22 ҳазор дулор арзиш дошта бошад. Ҳоло нархи ин гуна мошинҳо дар бозори Душанбе панҷ-шаш ҳазор аст. Вале, оқои Азизов аз ҷумлаи афроди саршинос дар ноҳияи Рӯадкӣ аст. Ҳоло низ бо худрави “Лексус” бо шумораи 77-77 гаштугузор мекунад.”

Вале, қаҳрамони матлаби “Фараж”, ки тибқи ҳукми додгоҳи ноҳияи Рӯдакӣ молу мулкаш бар суди оқои Азизов мусодира шудааст, ночор шудааст, ба Русия муҳоҷират карда ва талош дорад маблағи боқимондаи ҷубронро пайдо кунад.

Хуршеди Атовулло муътақид аст, ки дар ҷараёни муҳокимаи додгоҳӣ метавонад дурусти матлаби нашрияро собит созад. Ӯ мегӯяд: “Ба ин далел, мо тасмим гирифтем, ки то охир мубориза кунем.”

Зимнан, барои бори нахуст нест, ки нашрияи “Фараж” ба додгоҳ кашида мешавад. Соли гузашта се нафар қузоти Додгоҳи олӣ ва додгоҳи шаҳри Душанбе ин нашрияро дар канори нашрияҳои мустақили “ASIA-Plus” ва “Озодагон” ба додгоҳ кашида ва хостори пардохти 5,5 милюн сомонӣ ҷубронпулӣ шуда буданд.

Муҳокимаи додгоҳӣ тӯли тақрибан як сол идома дошт ва дар ниҳоят ҷонибҳо ба созиш расиданд.

Дар ҳамин ҳол, соҳибназарон аз афзоиши мавориди ба додгоҳ кашида шудани расонаҳои гурӯҳӣ ва хабарнигорон дар Тоҷикистон изҳори нигаронӣ мекунанд. Аз ҷумла, ин матлаб дар ҷараёни даври чаҳоруми “Муколамаи ҳуқуқи башар миёни Иттиҳодияи Урупо ва Тоҷикистон”, ки ҳафтаи гузашта дар Душанбе баргузор шуд, матраҳ буд.

Рина Кионк, масъули бахши ҳуқуқи башари Шӯрои Урупо дар умури равобити байналмилалӣ, гуфт, ки мавзӯъи мавриди нигаронии ин даври музокирот барои онҳо бад шудани вазъи озодии баён дар Тоҷикистон аст.

Ба гуфтаи ӯ, дар ҳоле ки Иттиҳодияи Урупо мукарраран аз мақомоти тоҷик хостааст, ки муқаррароти марбут ба тавҳин ва таҳқирро аз қонуни ҷиноӣ ҳазф ё декриминализатсия (ғайриҷиноӣ) кунанд, вале мақомоти тоҷик ин дархостро нодида гирифтаанд.

Тайи ду соли ахир аксари парвандаҳое, ки рӯзноманигорон бар асоси онҳо ба додгоҳҳо кашида шудаанд, ба «тавҳин» ва «латма задан ба шаъну шарафи» мақомҳои давлатӣ марбут будаанд. Додгоҳҳо низ бархе аз рӯзноманигорон ва нашрияҳоро ба пардохти ҷаримаҳои ҳангуфт водор кардаанд.

Масъулони нашрияҳои мустақил иддаъо мекунанд, ки онҳо ба хотири интишори матолиби интиқодӣ дар бораи фаъолияти ин ё он мақоми давлатӣ мавриди пайгарди қонунӣ қарор гирифтаанд ва додгоҳҳо дар бештари маворид ба сурати «ғайримустақил» ва «муғризона» парвандаҳоро ба нафъи мақомот ҳал мекунанд.

Источник: http://www.bbc.co.uk/tajik/institutional/2011/10/111031_if_media_faraj.shtml

[b]28 октябр, дар Донишгоҳи славянии Русия ва Тоҷикистон бахшида ба ҷашни солгарди доктори илми филология, профессор Абдусаттор Нуралиев конфронси илмию амалӣ дар мавзӯи «Саҳми профессор А.Нуралиев ба рушди журналистикаи тоҷик» баргузор гардид.[/b]

Дар конфронс ректори Донишгоҳи славянии Русия ва Тоҷикистон, узви вобастаи Академияи илмҳои Тоҷикистон, профессор Муҳаммадюсуф Имомов сарсухан мекунад. Иштирокдорони конфронс ҳамчунин гузоришҳоро дар мавзӯи «Фаъолияти илмию тадқиқотии профессор А.Нуралиев» ва «Саромади таҳсилоти журналистӣ ва илм» мешунаванд. Дар конфронс Ходими шоистаи илму техникаи Ҷумҳурии Тоҷикистон профессор Иброҳим Усмонов, дотсенти кафедраи матбуоти Донишгоҳи миллии Тоҷикистон Пайванд Гулмуродов ва худи соҳибҷашн — А.Нуралиев суханронӣ карданд.

Источник:

[b]Аз 27 то 28 октябри соли 2011 дар Вазорати фарҳанги Чумҳурии Точикистон дар мавзўи “Қонунгузории Ҷумҳурии Тоҷикистон оид ба ҳуқуқи муаллиф ва ҳуқуқҳои иҷрогарон” семинар баргузор мегардад.[/b]

Мақсад аз гузаронидани семинар пешгирии вайронкунии ҳуқуқи муаллифон, ҳамкории мақомоти дахлдор, муассисаву идораҳое, ки бевосита ба пешгирии вайрон кардани ҳуқуқ дар ин соҳа масъуланд, беҳтар намудани ҳифзи манфиатҳои муаллифон ҳангоми истифодаи асарҳои онҳо, омўзиши санадҳои ҳуқуқию меъёрие, ки муносибатҳои байни муаллифонро ба танзим медарорад, мебошад.

Масъалаи дигаре, ки дар семинар мавриди омўзиши ҷиддӣ қарор мегирад, аз мутобиқати муқаррароти қонунгузории Ҷумҳурии Тоҷикистон дар бораи ҳуқуқи муаллиф ба талаботи Конвенсияи ҷанбаъҳои ҳуқуқии моликияти зеҳнӣ, ки аз тарафи Созмони умумиҷаҳонии савдо қабул гардидааст, мебошад. Мутахассисон доир ба мутобик намудани қонунгузории Ҷумҳурии Тоҷикистон бо муқаррароти ин ҳуҷҷат пешниҳодҳои худро иброз медоранд.

АМИТ «Ховар»

Источник: http://khovar.tj/society/19301-barguzorii-seminari-1203u1179u11791251-peromuni-1203ifzi-1203u1179u11

[b]Даври чаҳоруми муколамаи Тоҷикистону Иттиҳодияи Аврупо пиромуни вазъи ҳуқуқи башар баргузор шуд.[/b]

Вазъи озодии матбуот, ҳуқуқи занон, ҳуқуқи муҳоҷирон, коҳиш додани зӯроварӣ дар хонаводаҳо алайҳи занон ва бекор кардани ҳукми қатл дар Тоҷикистон аз масоили муҳиме ба шумор меоянд, ки Иттиҳодияи Аврупо аз ҳукумати ин кишвар ҳалли сареъ ва ҳамаҷонибаи онҳоро мехоҳад.

Ба хабарнигорон иҷоза надоданд, ки ҷараёни баҳсро сабт кунанд ва сабаби онро ҳам шарҳ надоданд. Вақте танаффус эълон карда шуд, танҳо дар ҳамин лаҳза фурсате пеш омад, ки бо намоянадгони мизи гирд суҳбат бикунем.

[b]Матни пурраи гузоришро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=143]http://www.taj.nansmit.tj/analysis/?id=143[/url]

Мирзонабии Холиқзод, Бароти Юсуфӣ

Источник:

[b]Даври чаҳоруми муколамаи Тоҷикистону Иттиҳодияи Аврупо пиромуни вазъи ҳуқуқи башар баргузор шуд.[/b]

Вазъи озодии матбуот, ҳуқуқи занон, ҳуқуқи муҳоҷирон, коҳиш додани зӯроварӣ дар хонаводаҳо алайҳи занон ва бекор кардани ҳукми қатл дар Тоҷикистон аз масоили муҳиме ба шумор меоянд, ки Иттиҳодияи Аврупо аз ҳукумати ин кишвар ҳалли сареъ ва ҳамаҷонибаи онҳоро мехоҳад.

Ба хабарнигорон иҷоза надоданд, ки ҷараёни баҳсро сабт кунанд ва сабаби онро ҳам шарҳ надоданд. Вақте танаффус эълон карда шуд, танҳо дар ҳамин лаҳза фурсате пеш омад, ки бо намоянадгони мизи гирд суҳбат бикунем.

[b]ВАЗЪИ ҲУҚУҚИ БАШАР БЕҲБУД ЁФТААСТ?[/b]

Рина Кионка, раиси Дафтари ҳуқуқи башари Иттиҳодияи Аврупо ба Радиои Озодӣ гуфт, дар муқоиса ба чанд соли пеш вазъи ҳуқуқи инсон дар Тоҷикистон ба сурати умум беҳбуд ёфтааст. Вай афзуд, баъзе масъалаҳое ҳастанд, ки мехоҳем шоҳиди пешрафти воқеии онҳо бошем, махсусан, дар масъалаи озодии баён. Ҳамчунин, хушунати занон аз масоили дигаре ҳаст, ки дар Тоҷикистон алайҳи он чораҳои қонунӣ вуҷуд надорад.

Хонум Кионка афзуд: «Масъалае, ки тайи чанд сол аст, ки бояд заминаи қонунӣ дар Тоҷикистон пайдо кунад, ин зӯроварӣ дар хонавода алайҳи занон мебошад. Баҳси тарҳи қонуни хушунат алайҳи занон дар порлумони ин кишвар идома дорад, ки мехоҳем шоҳиди ҳуқуқи қонунӣ пайдо кардани ин масъала бошем. Масъалаи дигаре ҳам, ки Иттиҳодияи Аврупо аз Тоҷикистон мехоҳад, ин лағви пурраи ҳукми қатл дар Тоҷикистон аст. Баҳсе, ки ҳоло бо намояндагони Тоҷикистон хоҳем кард, рӯи ҳамин мавзӯъ мебошад. Чанд масъалаи дигаре ҳам, ки дар Тоҷикистон ҳаст, ҳалли мантиқии зина ба зина мехоҳад, ки дар ин роҳ Иттиҳодияи Аврупо ба Тоҷикистон кӯмак хоҳад кард. Агар масоили марбут ба ҳуқуқи башар дар кишвар ҳалли худро пайдо накунад, дар масъалаҳои дигар низ пешрафт нахоҳад кард.»

[b]ҲУКМИ ҚАТЛ КОМИЛАН ЛАҒВ МЕШАВАД?[/b]

Тавре аз суҳбати намояндаи Иттиҳодияи Аврупо рӯшан мешавад, яке аз масъалаҳое, ки ин созмон аз Тоҷикистон ҳалли ниҳоиро интизор аст, лағви ҳукми қатл мебошад.

Тоҷикистон аз соли 2004 ба ин тараф дар иҷрои ҳукми қатл моратория эълон кардааст ва ба ҷои он ҳукми абад содир карда мешавад. Аммо тавре, ки намояндагони мақомоти Додситонии Тоҷикистон мегӯянд, маълум мешавад, ки ин кишвар чандон хостори лағви пурраи ҳукми қатл намебошад.

Як намояндагони аршади Додситонии кулли Тоҷикистон, ки нахост номаш оварда шавад, гуфт, Тоҷикистон ҳудуди 44 моддае, ки аз замони Шӯравӣ бозмонда буданд ва ҳукми қатлро иҷоза медоданд, ихтисор кард ва онро ба 16 модда расонд. Ба гуфтаи ӯ, тайи як даҳсолаи ахир онро низ коҳиш дод ва феълан панҷ моддаи қонуни кайфарии Тоҷикистон ба мисли ҳолатҳои куштори инсон, терроризм, одамрабоӣ ва ғайра ҳастанд, ки ба иҷрои ҳукми қатл мусоидат мекунанд. Ин ҳамсуҳбати мо мегӯяд, аслан кишварҳои ғарбӣ тақозои лағви ҳукми қатл мекунанд, вале шароити Тоҷикистон аз кишварҳои Ғарб комилан фарқ мекунад. Ба гуфтаи ин мақоми Додситонии кул, лағви ҳукми қатл дар Тоҷикистон куштору террор ва ҷиноятҳои вазнинро афзоиш хоҳад дод.

[b]ТАРҲИ ҚОНУНИ ХУШУНАТ АЛАЙҲИ ЗАНОН[/b]

Масъалаи дигари муҳиме, ки ҳуқуқи занонро дар бар мегирад, заминаи ҳуқуқӣ бахшидани хушунат дар хонаводаҳо ва махсусан зӯроварӣ ба занон мебошад.

Намояндаи Кумитаи кор бо занони Тоҷикистон Ҳилолбӣ Қурбонова мегӯяд, бо тақозои созмонҳои байнулмилалии ҳуқуқи башар, бахусус Иттиҳодияи Аврупо, тарҳи қонуни хушунат алайҳи занон таҳия карда шуд, ки дар ҳоли ҳозир дар порлумони кишвар мавриди муҳокима қарор дорад. «Айни замон тарҳи қонуни зӯроварӣ дар хонавода мавриди муҳокима қарор дорад ва ҳоло Маҷлиси миллӣ ин тарҳро ба ҳукумати Тоҷикистон пешниҳод кард, ки назари мақомоти ҳукумат ба эътибор гирифта хоҳад шуд»,-афзуд ӯ.

Феълан бо кӯмаки созмонҳои байнулмилалӣ, Кумитаи занони Тоҷикистон чандин марказҳое таъсис додааст, ки тайи даҳ соли гузашта ба 118 нафар зану духтаре, ки мавриди қочоқ ё худ трофик қарор гирифтаанд, кӯмаки равонӣ кардааст. Намояндагони бахши ҳуқуқи башари Иттиҳодияи Аврупо мегӯянд, то кунун чаҳор даври муколамаро бо мақомоти зидахли Тоҷикистон баргузор кардаанд ва то замони мушоҳидаи пешрафти чашмгир дар бахши ҳуқуқи башар дар Тоҷикистон, ин гуфтшунидро идома хоҳанд дод.

Мирзонабии Холиқзод, Бароти Юсуфӣ

Источник: http://www.ozodi.org/content/article/24371006.html

[b]Гуфтугӯи хабарнигори «Озодӣ» бо Муҳаммадюсуф Исмоилов, ки тӯли ёздаҳ моҳи ахир дар боздошт буд.[/b]

[b]Муҳаммадюсуфи Исмоилов пас аз раҳоияш аз боздоштгоҳи Хуҷанд барои як дидорбинӣ бо дӯстону наздикон ба Душанбе омада буд ва мо аз фурсат истифода карда, бо эшон сӯҳбате анҷом додем.[/b]

[b]Муҳаммадюсуф Исмоилов:[/b] «Дар соли 2006 Даврон Зоҳидов, ки ҳоло дар Дастгоҳи иҷроияи президент фаъолият дорад, ба ноҳияи Ашт раис ва Хуршед Улмасов додситон таъйин шуданд. Аммо онҳо ба ободкориву пешравии ноҳия эътибор намедоданд. Кӯчаҳои Шайдон, маркази ноҳияи Ашт, пурчангу ғубор, дарахтон хушк, беморхона ва сохтмонҳои соҳаи маориф рӯ ба таназзул ниҳоданд. Роҳҳо ба дараҷае харобу валангор шуданд, ки кӯчаҳои Шайдон солҳои 1941-42-ро ба хотир меовард. Мардуми Шайдон ва меҳмонон аз чунин вазъ нороҳат шуда, мепурсиданд, ки оё як одами зинда ҳаст, ки ба боло ин вазъро бифаҳмонад. Ман ин ҳарфҳоро шунида, азият мекашидам. Зеро ман хабарнигори “Нури зиндагӣ” будам. Чандин навбат ба масъулин, аз ҷумла раиси ноҳия муроҷиат карда, гуфтам, ки чорае биҷӯянд, аммо онҳо парво намекарданд. Ҷамоати шаҳраки Шайдон ду маротиба муроҷиат кард, ки барои бартараф кардани камбудҳо ёрӣ кунанд, вале бидуни натиҷаИдораи бозрасии автомобилӣ низ панҷ маротиба дарбораи валангору тахриб шудани роҳҳои Шайдон муроҷиат кард, вале нафаре додшунав пайдо нашуд. Бо ҳамаи масъулини ин соҳаҳо сӯҳбат карда, дар заминаи гуфтаи онҳо як мақола бо номи “Вайронаҳои Шайдонро кӣ обод мекунад” дар “Нури зиндагӣ” ба нашр расонидам. Пас аз нашри ин матлаб ба кор сар карданд. Аммо боз ҳам корҳоро то ба охир нарасониданд. Боз мақолаи дигареро бо номи “Чанги Шайдон дар осмон” чоп кардам. Ин мақола аз мушкилоти беморхонаи Шайдон, ки солҳои чилум сохта шуда ва боре ҳам рӯи тармимро надида буд, ҳикоят мекард. Тирезаҳои ин беморхонаро кушода намешуд, чунки чангу хоки кӯча ба дохил медаромад ва худи касалхона ба ҳадде бӯй гирифта буд, ки кас ҳайрон мемонд. Аммо ягон маротиба раиси ноҳияро надидам, ки пиёда аз ин ҷо гузар карда, ин манзараҳоро дида бошад. Аз утоқи корӣ рост ба мошин ва аз мошин рост ба утоқи корӣ медаромад.»

[b]Матни пурраи сӯҳбатро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=142]http://www.taj.nansmit.tj/analysis/?id=142[/url]

Абдуқаюми Қаюмзод

Источник:

[b]Гуфтугӯи хабарнигори «Озодӣ» бо Муҳаммадюсуф Исмоилов, ки тӯли ёздаҳ моҳи ахир дар боздошт буд.[/b]

[b]Муҳаммадюсуфи Исмоилов пас аз раҳоияш аз боздоштгоҳи Хуҷанд барои як дидорбинӣ бо дӯстону наздикон ба Душанбе омада буд ва мо аз фурсат истифода карда, бо эшон сӯҳбате анҷом додем.[/b]

[b]Муҳаммадюсуф Исмоилов:[/b] «Дар соли 2006 Даврон Зоҳидов, ки ҳоло дар Дастгоҳи иҷроияи президент фаъолият дорад, ба ноҳияи Ашт раис ва Хуршед Улмасов додситон таъйин шуданд. Аммо онҳо ба ободкориву пешравии ноҳия эътибор намедоданд. Кӯчаҳои Шайдон, маркази ноҳияи Ашт, пурчангу ғубор, дарахтон хушк, беморхона ва сохтмонҳои соҳаи маориф рӯ ба таназзул ниҳоданд. Роҳҳо ба дараҷае харобу валангор шуданд, ки кӯчаҳои Шайдон солҳои 1941-42-ро ба хотир меовард. Мардуми Шайдон ва меҳмонон аз чунин вазъ нороҳат шуда, мепурсиданд, ки оё як одами зинда ҳаст, ки ба боло ин вазъро бифаҳмонад. Ман ин ҳарфҳоро шунида, азият мекашидам. Зеро ман хабарнигори “Нури зиндагӣ” будам. Чандин навбат ба масъулин, аз ҷумла раиси ноҳия муроҷиат карда, гуфтам, ки чорае биҷӯянд, аммо онҳо парво намекарданд. Ҷамоати шаҳраки Шайдон ду маротиба муроҷиат кард, ки барои бартараф кардани камбудҳо ёрӣ кунанд, вале бидуни натиҷаИдораи бозрасии автомобилӣ низ панҷ маротиба дарбораи валангору тахриб шудани роҳҳои Шайдон муроҷиат кард, вале нафаре додшунав пайдо нашуд. Бо ҳамаи масъулини ин соҳаҳо сӯҳбат карда, дар заминаи гуфтаи онҳо як мақола бо номи “Вайронаҳои Шайдонро кӣ обод мекунад” дар “Нури зиндагӣ” ба нашр расонидам. Пас аз нашри ин матлаб ба кор сар карданд. Аммо боз ҳам корҳоро то ба охир нарасониданд. Боз мақолаи дигареро бо номи “Чанги Шайдон дар осмон” чоп кардам. Ин мақола аз мушкилоти беморхонаи Шайдон, ки солҳои чилум сохта шуда ва боре ҳам рӯи тармимро надида буд, ҳикоят мекард. Тирезаҳои ин беморхонаро кушода намешуд, чунки чангу хоки кӯча ба дохил медаромад ва худи касалхона ба ҳадде бӯй гирифта буд, ки кас ҳайрон мемонд. Аммо ягон маротиба раиси ноҳияро надидам, ки пиёда аз ин ҷо гузар карда, ин манзараҳоро дида бошад. Аз утоқи корӣ рост ба мошин ва аз мошин рост ба утоқи корӣ медаромад.»

[b]Радиои Озодӣ: Яъне масъулин барои ободӣ ва бартараф кардани мушкилҳо камтар заҳмат мекашанд?[/b]

[b]Муҳаммадюсуф Исмоилов:[/b] «Соли 2006 барои бо об таъмин намудани 6 ҳазор мардуми Ашт лоиҳаи махсуси Вазорати обу обёрӣ тасдиқ шуд. Ҳарду тарафи роҳи асосии Шайдонро барои хобонидани лӯлаҳои интиқоли об канданд. Лӯлаҳоро дар ду тарафи роҳ хобониданд, як сол сипарӣ мешавад, аммо на аз об дарак ҳасту на ҳарду шафати кандаи роҳро мепӯшонанд. Дар ҳоле ки дар ҳарду тараф ҳавлиҳои мардум ҷойгир шудааст. Мардум ҳам ба дод омад, идораи ҷамоа ҳам. Чун хиёбони марказӣ, ки буд, ҳамаи ташкилоту муассисаҳо низ ба дод омаданд. Боз шаш моҳи дигар гузашт. Ҳамаи ин ҳолатро дар мақолаҳо нишон додам.»

[b]ДАР РӮЁРӮИ БО МАҚОМОТ

Радиои Озодӣ: Чаро Шумо, масалан, мустақим ба худи роҳбари ноҳия арзу доди мардумро нарасонидед?[/b]

[b]Муҳаммадюсуф Исмоилов:[/b] «Вақте раиси ноҳия Зоҳидов ба кор шурӯъ кард, писари тағо ва холаи ман дар ҳукумати ноҳия ба сифати котиб кор мекарданд. Рости гап, намехостам ин мақолаҳо чоп шаванд, агар раис маро қабул карда, барои рафъи ин камбудҳо тадбир меҷуст. Аммо ин наздиконам маро имкони мулоқот бо раис намедоданд. Ҳамеша «раис нест» мегуфтанд. Чун дидам, ки қабул намекунад, матлаберо бо номи “Ашт дашт мешавад” навишта, чоп кардам. Дар қатори камбудҳо ҳамчунин навиштам, ки раиси ноҳия на танҳо маро, балки мардумро ҳам қабул намекунад. Пас аз он ки мақола чоп шуд, худи Даврон Зоҳидов маро даъват карду гуфт, ки «биёед, акнун ҳамкорӣ мекунем.» Махсус худаш телефон кард, ҳарчанд ки котибҳояш намехостанд.»

[b]ОЁ МУҲАММАДЮСУФ НИЗ «ТАҲРИРӢ» БУД?

Радиои Озодӣ: Шумо пештар низ бо нашрияҳо ҳамкорӣ доштед?[/b]

[b]Муҳаммадюсуф Исмоилов:[/b] «Бале, масалан, бо “Нерӯи сухан”. Сабаби рӯ оварданам ба ин нашрия он буд, ки боҷуръат ва нотарсона маводи танқидиро дарҷ мекард. Соли 2004 буд. Ҳамроҳ бо ҳамсарам савори қатори Душанбе-Хуҷанд шудем. 18 нафар корманди қатор, аз ҷумлаи роҳбаладҳо, ходимони гумрук, марзбонӣ ва милиса аз мусофирон ду сомонӣ ҷамъ мекарданд. Ман надодам. Гуфтам надорам. Роҳбалад ва милиса назди хонумам омада гуфтанд, ки чаро Шумо пулро намедиҳед. Вай гуфт, ки пул надорад, чун бо шавҳараш дар сафар аст. Онҳо омада мегуфтанд, ки Шумо чи хел инсон ҳастед, ки ду сомонӣ пул надоред. Ду милиса омада шиносномаҳои ману оилаамро гирифта бо худ бурданд. Яке аз онҳо ба тарафи занам гашту гуфт, ки чӣ тавр ҳамин одами бадафти безебро гирифтӣ, дигар мард набуд чӣ? Як тарафаш каҷ, як тарафаш варам, дигар шавҳар ёфт нашуд чӣ? Занам посух дод, ки хуб дар пешониам ҳамин будааст. Кормандони гумрук, милиса, сарҳадбонҳо ҳам омада ҳамин суханро такрор мекарданд. Кор ба ҷое расид, ки роҳбаладҳо моро аз истифодаи оби ҷӯш ё чойи поезд маҳрум карданд. Онҳо намегузоштанд, ки чой бигирем. Ба мо мусофирон ёрӣ мекарданд. Ба сари мо ҳамчун посбон рост истоданд, ки мабодо чой гирем. Вақте Хуҷанд расидем, ду нафар роҳбалад аз гиребонам гирифта, такон дода гуфтанд, ки “ту муттаҳам барои ду сомонӣ моро шарманда кардӣ, ту барин одамро дар умри сарамон надида будем” ва сипас аз дари қатора ба берун андохтанд. Ман як ба пушт задам, вале ҳеҷ ҷоям осеб надид. Ин моҷароро бо номи “Пулҳо барои мафия” дар “Нерӯи сухан” навишта чоп кардам. Баъди тахминан 15 рӯзи чопи мақола кормандон аз милиса, амният, додситонӣ ба манзили зисти ман омада, дар ғайби ман занамро водор мекунанд ва ӯ барояшон кабинети кориамро мекушояд ва онҳо дар он ҷо дар қаторидигар китобу коғазҳои гуногун, кутуби зиёдеро бо ҳуруфи арабӣ мебинанд. Ин китобҳо, аз ҷумла аз осори Аҳмади Дониш, “Шоҳнома”-и Фирдавсӣ, «Гулистон”-у “Бӯстон”-и Шайх Саъдӣ, ғазалиёти Хоҷа Ҳофиз “Баҳористон”-и Ҷомӣ, ”Заруриёти динӣ”, “Мухтасари виқоя” ва чанде дигар буданд, ки онҳоро рӯйхат карда, бо худ мебаранд. Вақте омадам, ҳанӯз онҳо нарафта буданд. Гуфтанд, ки Шумо узви “Ҳизбуттаҳрир” ҳастед. Гуфтам бо чӣ асос ин тавр мегӯед. Ба китобҳо ишора карданд. Гуфтам, ин китобҳо дар ҳама ҷо ҳастанд. Гуфтанд дар вилоят баъди ташхис мефаҳмем, ки инҳо чӣ китобанд. Хулоса санад тартиб дода, даъват карданд, ки имзо гузорам. Ман рад кардам. Корманди милиса як бор бо қаҳр туфангашро, ки дар пешаш гузошта буд, бардошту ба замин зад. Гуфтам, Шумо маро тарсониданиед, сипас ба коғазашон навиштам, ки ман узви Ҳизбуттаҳрир нестам, онро намешиносам, гуноҳ надорам ва сипас имзо гузоштам. Онҳо гуфтанд, ки «фардо ба Идораи амнияти вилоят оед, ҳамаашро дар он ҷо мефаҳмонанд». Рафтам. Маро аз амнияти вилоят гирифта, рост ба вокзал бурданд. Дар он ҷо маро дар ихтиёри як нафар корманди амният ва додситонии вокзал гузоштанд. Вале он корманди вилоятии амният гуфт, ки китобҳоятонро Идораи дини вилоят санҷид, китобҳои хуб будаанд, то бегоҳ мерасонанд, аз китобҳо ташвиш накашед. Аз утоқи кории корманди додситонии вокзал ба Душанбе занг заданд. Баъди чанд ҳарфе гӯширо ба ман доданд. Он нафар Имомов аз Прокуратураи генералӣ будааст. Гуфт, ки Шумо аз Ашт. Тасдиқ кардам. Шумо мақола навишта, 18 касро сиёҳ кардаед, ҳамаи онҳо ҷавоб навишта, гуфтаҳои Шуморо рад карданд. Шумо нависед, ки ин ҳамааш дурӯғу тӯҳмат аст ва имзо гузоред. Ман гап нест гуфта гӯширо гузоштам. Ба ман коғаз оварданд. Он мақоларо дубора рӯи коғаз овардам, нарезондаву начаконда. Пеш аз навиштан, хоҳиш кардам, ки як чой биёранд, ки субҳона накардаам. Вақте варақи навиштаи маро гирифта ба Имомов тавассути телефон қироат кард, ӯ боз гӯширо ба дастам дод. “Шумо аҳмақ, будед, чӣ кор карда истодаед, Шумо девона нестед?” Гуфтам, чаро Шумо маро девона мегӯед, ман воқеиятро навиштам, чаро нависам, ки дурӯғ аст. “Э, Шумо муттаҳам будаед, гӯширо пас диҳед”,-гуфт. Чойро зуд аз пешам гирифтанд. Баъди чанде маро ҷавоб доданд. Пас аз як моҳ ба нашрия ҷавоб фиристода гуфтанд, ки ба ҳамаи он кормандон ҷазо додаанд.»

[b]БОЗДОШТ БАРОИ «ХУДКУШӢ ДАР АШТ»[/b]

[b]Радиои Озодӣ: Шуморо барои кадом мақолаатон боздошт карданд? [/b]

[b]Муҳаммадюсуф Исмоилов:[/b] «Ман дар бораи куштори як нафар фурӯшанда мақола навиштам. Ин куштор чӣ тавр сурат гирифта буд? Як нафар хост дар паҳлуи чанд мағозаи фурӯши молҳои саноатӣ ва ашёи рӯзгор як дӯкон, ки ба фурӯши оби ҷав ва қаҳва машғул аст, боз кунад. Ҳуҷҷат ҳам гирифт. Аммо ӯро қасдан онҳое, ки соҳиби мағозаи дигаранд, бо мошин заданд. Ӯ ба додситонӣ муроҷиат кард. Додситонӣ баръакс тарафи муқобили ҷабрдидаро гирифт. Нафари ҷабрдида аз тариқи матбуот ба Прокурори генералӣ ва раисиҷумҳури Тоҷикистон дархости кӯмак карда, ҳодисаи рухдодаро низ ҳикоят кард. Баъди чопи мақола ҷабру ҷафо болои нависанда зиёд шуд. Тавассути кормандони додситонӣ ва милисаи ноҳия ӯро зери фишор қарор медиҳанд, ки чаро онро навиштааст. Ин шахс ба ҳамаи ин ҷафоҳо тоқат карда хост як танӯрхона сохта санбӯса бипазад ва аз ин роҳ маишати хонаводаашро таъмин кунад. Ӯ як танӯр насохта буд, ки аз ҳукумати ноҳия омада мегӯянд, ки бояд танӯрхонаро бардорӣ, ки моро прокурор маҷбур дорад. Ӯ ба чандин идора муроҷиат кард, ки омодааст бо камтарин маош кор кунад вале ҳама мегуфт, ки метарсанд аз прокурор. Ва ӯро дар ҳеҷ ҷо ба кор нагирифтанд. Ӯ дар коғазе “дод аз дасти прокурор” навишта, худро овехт. Ин мактуб ба дасти ман расид. Ман маҷбур шудам, ки мақолаеро бо номи “Худкушӣ дар Ашт” навишта, пешниҳоди мардум намоям.»

[b]ФАРҚИ СИЗО. АЗ ШАЙДОН ТО ХУҶАНД…

Радиои Озодӣ: Бо Шумо дар боздоштгоҳ чӣ тавр муносибат мекарданд?[/b]

[b]Муҳаммадюсуф Исмоилов:[/b] «Муносибаташон бо ман, махсусан дар Сизои Хуҷанд, хуб буд. Маро ҳурмат мекарданд. Вале, албатта, зиндон зиндон аст. Ба зиндонӣ мувофиқи қоидаву қонун муносибат мекунанд. Лекин баъдтар чун фаҳмиданд, ки рӯзноманигорам ва барои навиштаам зиндонӣ шудаам, хеле муносибати хуб мекарданд. Аммо чун ҳар сари ду моҳ, ки ба Сизои Шайдон мебурданд, дар он ҷо муносибат ваҳшиёна буд. Онҳо ягон нафар аз наздикони маро намегузоштанд, ки ба дидани ман оянд. Додситон чунин фармон дода будааст, зеро баъди озод шуданам ба ман инро гуфтанд. Агар иҷоза медоданд ҳам як ё ду дақиқа. Милисаҳоро ҳам зери фишор қарор дода будаанд. Ба дигарҳо чунин бархӯрд намекарданд. Мисле, ки ман ягон ҷинояткори хафвнок бошам. Ҳатто агар ягон нафар ба ман “салом” мефиристод, номи ӯро ба додситон бояд маълум мекарданд.»

[b]»АЗ МАТБУОТ СИПОСГУЗОРАМ»[/b]

[b]Радиои Озодӣ: Фикр мекунед, агар созмонҳои ҳомии ҳуқуқ дар дохил ва дар сатҳи байнулмилаӣ ва низ хабарнигорон дар мавриди қазияи Шумо сукут мекарданд, Шумо озод мешудед?[/b]

[b]Муҳаммадюсуф Исмоилов:[/b] «Албатта, не. Ҳазорон ташаккур ба Нуриддин Қаршибоев, раиси НАНСМИТ, ки бидуни хастагӣ бо ҳамроҳии адвокатам Ҷӯраева Муҳаббатхон барои озодии ман талош карданд. Тамоми матбуоти олам ба по хест, матлаби зиёд чоп карданд. Кормандони додситонӣ ва додгоҳи шаҳри Табошар низ ба худ омаданд. Онҳо аввал ба ман бад муомила мекарданд, вале баъди ин мақолаҳо муносибаташон иваз шуд. Ҳамчунин аз кӯмаки хабарнигорон садҳо ташаккур, ки ба ман ба маблағи 8 ҳазор сомонӣ ёрӣ расониданд. Шояд ин маблағ зиёдтар ҳам бошад, чун бо оилаам ҳоло дуруст ҳамсӯҳбат нашудаам. Рӯзи ҷумъа, вақте маро аз зиндон раҳо карданд, Нуриддин Қаршибоев як таксиро аз Хуҷанд то шаҳраки Шайдон киро кард, пулашро дод ва маро то хона овард.»

[b]МУҲАММАДЮСУФ ПУШАЙМОН НЕСТ…[/b]

[b]Радиои Озодӣ: Навиштеду зиндон шудед, пушаймон нестед?[/b]

[b]Муҳаммадюсуф Исмоилов:[/b] «Не, ман пушаймон нестам. Пушаймониам аз он, ки маҳбус шудам. Вале ман ягон тини давлатро ғайриқонунӣ нагирифтаам. Ман баҳри ободӣ навиштам. Аз ин рӯ рӯирост менавиштам. Ногуфта намонад, ки барои ман ҳоҷати таҳқиқот набуд. Ҳар як мақолае, ки менавиштам, тасвир дошт. Барои осон шудани тафтишот ман сурат мегирифтам.»

[b]Радиои Озодӣ: Шумо дар давраи наврасиатон низ менавиштед?[/b]

[b]Муҳаммадюсуф Исмоилов:[/b] «Аввалин маротиба дар нашрияи “Пионери Тоҷикистон”, ки сармуҳаррираш Гулрухсор Сафиева буданд, навиштаҳои ман чоп мешуданд. Синфи 7 мехондам, ки қариб ҳар ҳафта шеърҳо ва кроссвордҳои маро чоп мекард. Баъдтар бо маҷаллаи “Занони Тоҷикистон”, ки шоираи шодравон Мавҷуда Ҳакимова сардабириашро бар дӯш дошт, ҳамкорӣ мекардам. Қариб як корманди доимии ин маҷалла будам ва ҳаққи қалами хуб ҳам мегирифтам. Чун ман донишҷӯ будам, бароям пули хуб медоданд. Мегуфтанд, ки кроссвордҳои ту хонандаҳои худро дорад. Баъди вафоти ин шоира ҳам ҳамкориро бо ин маҷалла идома медодам. Сипас, бо нашрияҳои “Нерӯи сухан”, “Рӯзи нав” ва дигарҳо ҳам ҳамкорӣ мекардам. Кроссворд, ҳар гуна мақола омода карда мефиристодам. Ҳамчунин дар нашрияи “Миллат” ҳам навиштаҳои ман мунташир мешуданд ва Адолати Мирзо дастмузди хуб ҳам медод. Вале чун Ҷумъаи Мирзо — сармуҳаррири “Нури зиндагӣ”-ро аз давраи кор дар “Пионери Тоҷикистон” мешинохтам, бо даъвати ӯ дар нашрияаш ба сифати хабарнигор ба кор пардохтам.»

[b]Радиои Озодӣ: Шуморо додгоҳ се сол аз фаъолияти хабарнигорӣ маҳрум кард ва 35 ҳазор ҷарима. Минбаъд чӣ кор хоҳед кард?[/b]

[b]Муҳаммадюсуф Исмоилов:[/b] «Ману адвокатам машварат кардем ва тасмим гирифтем, ки аз болои ин ҳукм шикоят бубарем.»

Абдуқаюми Қаюмзод

Источник: http://www.ozodi.org/content/article/24370857.html

[b]Дар Душанбе даври чаҳоруми “Муколамаи ҳуқуқи башар миёни Иттиҳодияи Урупо ва Тоҷикистон” оғоз шуд.[/b]

Ҳоло ҳайъате аз намояндагони Иттиҳодияи Урупо барои анҷоми гутфугӯ бо мақомоти тоҷик дар ин бора дар Душанбе ба сар мебарад. Ин ҳайъат рӯзи 25 октябр бо намояндагони давлати Тоҷикистон ҷаласае барпо кард.

Дар ин ҷаласа ҷониби Тоҷикистон ба намояндагони Иттиҳодияи Урупо дар бораи вазъи зиндонҳо ва фаъолияти омбудсмен ё кумисери ҳуқуқи башар, раванди ислоҳоти системи қазоӣ ва вазъи озодии баён дар ин кишвар гузориш доданд.

Рина Кионк, масъули бахши ҳуқуқи башари Шӯрои Урупо дар умури равобити байналмилалӣ, ки дар ин музокира раёсати ҳайъати Иттиҳодияи Урупоро бар ӯҳда дорад, гуфт, ки мавзӯъи мавриди нигаронии ин даври музокирот барои онҳо бад шудани вазъи озодии баён дар Тоҷикистон аст.

Вай дар ин бора ба Би-би-сӣ гуфт: “Мо чандин мушкили ҳуқуқи башарро бо давлати Тоҷикистон матраҳ кардем ва дунбол мекунем. Яке аз масоили хосси мавриди назари мо вазъи озодии баён аст. Мо ҳоло дар бораи Урунбой Усмонов сӯҳбат доштем. Мо мехоҳем, давлати Тоҷикистон дар бораи мавзеъгирӣ ва иқдомоти баъдии худ дар заминаи ин масъалаи бӯҳронӣ ба мо тавзеҳ бидиҳад.”

Намояндагони Иттиҳодияи Урупо дар ҷаласаи рӯзи 25 октябр гуфтанд аз ин ки оқои Усмонов равонаи зиндон нашуда, истиқбол мекунанд, вале дар мавриди мунсифона будани ҳукми додгоҳ алайҳи ӯ тардид доранд.

Аммо Сайфулло Қодиров, масъули раёсати табъу нашри Вазорати фарҳанги Тоҷикистон, ки дар ҷаласаи Муколамаи ҳуқуқи башари миёни Иттиҳодияи Урупо ва Тоҷикистон дар бораи озодии баён гузориш медод, нигаронии диплумотҳои урупоиро бепоя хонд.

Вай гуфт дар ҳамаи мавориде, ки рӯзноманигорон, аз ҷумла ва Урунбой Усмонов, хабарнигори Би-би-сӣ ва Маҳмадюсуф Исмоъилов, хабарнигори нашрияи «Нури Зиндагӣ», ба додгоҳ кашида шудаанд, онҳо на ба унвони рӯзноманигор, балки ҳамчун шаҳрвандони ин кишвар дар пеши қонун ҷавоб медиҳанд.

Оқои Қодиров гуфт, ки парвандаҳои онҳо ба фаъолияти рӯзноманигорияшон марбут набуда ва рафтор ва амалҳои онҳо ба унвони рафтор ва амалҳои шаҳрвандони Тоҷикистон дар додгоҳ арзёбӣ мешавад.

Аммо ҳайъати Иттиҳодияи Урупо дар даври чаҳоруми муколамаи ҳуқуқи башари худ бо Тоҷикистон аз мақомоти ин кишвар хост, ки мавориди эҳтимолии шиканҷаи Ӯрунбой Усмонов дар боздоштгоҳи шаҳри Хуҷандро ҷиддан таҳқиқ кунад.

Аз сӯйи дигар, хонуми Кионк таъкид кард, ки вазъи озодии баён дар Тоҷикистон, ки дар даври чаҳоруми муколама бо давлати ин кишвар матраҳ мешавад, хеле нигаронкунанда аст.

Ба гуфтаи ӯ, дар ҳоле ки Иттиҳодияи Урупо мукарраран аз мақомоти тоҷик хостааст, ки муқаррароти марбут ба тавҳин ва таҳқирро аз қонуни ҷиноӣ ҳазф ё декриминализатсия (ғайриҷиноӣ) кунанд, вале мақомоти тоҷик ин дархостро нодида гирифтаанд.

Вай афзуд: «Мо қаблан ин мавзӯъро, ки “тавҳин” набояд дар чорчӯби қонуни кайфарӣ (кодекси ҷиноӣ) баррасӣ шавад, бо мақомоти тоҷик матраҳ карда будем, аммо сӯҳбатҳои мо натиҷае надод. Мо мебинем, ки вазъият баръакс бӯҳронитар шудааст.»

Тайи ду соли ахир аксари парвандаҳое, ки рӯзноманигорон бар асоси онҳо ба додгоҳҳо кашида шудаанд, ба «тавҳин» ва «латма задан ба шаъну шарафи» мақомҳои давлатӣ марбут будаанд. Додгоҳҳо низ бархе аз рӯзноманигорон ва нашрияҳоро ба пардохти ҷаримаҳои ҳангуфт водор кардаанд.

Масъулони нашрияҳои мустақил иддаъо мекунанд, ки онҳо ба хотири интишори матолиби интиқодӣ дар бораи фаъолияти ин ё он мақоми давлатӣ мавриди пайгарди қонунӣ қарор гирифтаанд ва додгоҳҳо дар бештари маворид ба сурати «ғайримустақил» ва «муғризона» парвандаҳоро ба нафъи мақомот ҳал мекунанд.

Дар ҳамин ҳол, Сайфулло Қодиров гуфт, бо ин ки вазорати фарҳанг ва додситонии Тоҷикистон — ду ниҳоде, ки салоҳият доранд ба додгоҳ шикоят бурда ва фаъолияти ин ё он нашрия ё расонаро қатъ кунанд, аммо ин вазорат «дар тӯли ду даҳсолаи ахир ҳеҷ гоҳ аз ин салоҳияти худ истифода набурда ва ба додгоҳ шикоят набурдааст.»

Аммо ҳар сол дар Тоҷикистон фаъъолияти нашрияҳои мустақил ва вебсойтҳои хабарӣ ба далоили мухталиф мутаваққиф ва ё қатъ мешаванд, ки дар бештари маворид масъулони расонаҳо фишори мақомотро сабаби ин амр арзёбӣ мекунанд.

Аз ҷумла, дар соли ҷорӣ нашрияҳои мустақилли «Фараж», «Озодагон», «Азия-Plus» ва «Миллат» дар мавориди мухталиф бо муҳокимаҳои додгоҳии тӯлонӣ рӯбарӯ буданд. Созмонҳои байналмилалалӣ ин равандро талоше барои маҳдудсозии озодии баён дар Тоҷикистон хонда буданд.

Вале боздошт ва муҳокимаи Ӯрунбой Усмонов, хабарнигори Би-би-сӣ дар вилояти Суғд, яке аз пурсарусадотарин қазоёии марбут ба озодии баён дар Тоҷикистон дар соли ҷорӣ будааст.

Вай дар моҳи июни соли ҷорӣ тавассути маъмурони амниятӣ дар Суғд боздошт шуда ва ба доштани иртибот бо тарафдорони Ҳизби Таҳрир муттаҳам шуд.

Оқои Усмонов пас аз фишорҳои ҷомеъаи ҷаҳонӣ бар давлати Тоҷикистон пас аз як моҳи боздошт озод шуд, вале дар моҳи октябри соли ҷорӣ додгоҳи вилояти Суғд ӯро ба се сол зиндон маҳкум ва сипас афв кард.

Оқои Усмонов ва Би-би-сӣ пайваста бар бегуноҳии ӯ таъкид карда ва гуфтаанд, ки вай ба хотири фаъъолиятҳои хабарнигорияш ҳадаф қарор гирифтааст.

Ахиран оқои Усмонов аз ҳукми додгоҳи вилояти Суғд ба додгоҳи истинофӣ шикоят бурдааст. Би-би-сӣ низ аз ин тасмими хабарнигори худ пуштибонӣ карда ва гуфтааст, ки то охир аз хабарнигораш ҳимоят хоҳад кард.

Источник: http://www.bbc.co.uk/tajik/institutional/2011/10/111025_sq_humanrights_eu_urunboy.shtml