[b]Рассом ва хабарнигори тоҷик Фаррух Аҳроров дар озмуни ҷаҳонии карикатуранигорӣ пирӯз шуд.[/b]

Ин карикатураи рассоми тоҷик моҳе қабл дар қатори 30 асари беҳтарин аз сӯи ҳайати доварони озмун интихоб гардида ва барои раъйдиҳии мардум дар шабакаи Интернет гузошта шуд.

Дар пайи раъйдиҳии корбарони интернет дар ҷаҳон асари карикатурии намояндаи Тоҷикистон дар бахши «Демократия» ҷоизаи дуюмро соҳиб гашт. Фаррух Аҳроров аз миёни намояндагони кишварҳои Шӯравии пешин, ки дар ин озмун довталабӣ мекарданд, танҳо нафарест, ки соҳиби ҷоиза шудааст.

Ин озмунро созмони «Сenter for International Рrivate Enterprise» (Маркази байнулмилалии соҳибкории хусусии Амрико) баргузор намуд, ки ба он 1000 асари рассомон аз 73 кишвари ҷаҳон ворид шуда буд.

Фаррух Аҳроров дар як суҳбати кӯтоҳ бо Радиои Озодӣ гуфт, ки «мунтазир набудам карикатураи ман миёни беҳтаринҳо ҷой мегирад. Чун овоздиҳӣ ва тасмими ниҳоӣ ба дасти корбарони интернет буд. Дар Тоҷикистон дастрасии сокинон дар муқоиса ба кишварҳои пешрафта камтар аст ва фикр мекардам, теъдоди маҳдуди сокинони мо ба саҳифаи маркази мазкур сар мезананд. Бароям муҳимтар он буд, ки бо истифода аз ин маврид асари худро ба тамошои ҳаводорони карикатура гузорам. Ҳоло шодам, ки шабакаи ҷаҳонӣ барои рушди карикатуранигорӣ, ки дар кишвари мо ва бисёр кишварҳои пасошӯравӣ аз равнақ афтодааст, майдони фарохи рушд фароҳам меорад ва ин маро ба машғул шудан ба карикатурнигорӣ дилгарм месозад.»

Ин хабарнигор ва рассоми тоҷик соли гузашта низ филми «Аз намоз то намоз» пиромуни зиндагӣ ва кори мусулмонони Амрикоро ба навор гирифта буд.

Оқои Аҳроров он вақт дар як сӯҳбаташ ба «Озодӣ» гуфта буд, ки мӯҳтаво ва сужаи филми «Аз намоз то намоз» аслан аз таъсири ҳодисаи 11 сентябр ба зиндагӣ ва ҳуқуқи мусалмонони Амрико ва ҳамзамон муносибати намояндагони динҳои дигар ба ислом ва мусулмонон иборат аст.

Фаррух Аҳроров дар маҳофили Хуҷанд бештар ҳамчун раҳбари созмони ҷамъиятии «MGM», ки дар самтҳои ислоҳоти демократӣ фаъолият мебарад, шинохта шудааст. Ӯ муддате вазифаи сардабирии нашрияи «Согдийская правда»-ро низ бар дӯш дошт. Оқои Аҳроров хатмкардаи факултаи рассомист.

Маъсуми Муҳаммадраҷаб

Источник: http://www.ozodi.org/content/article/24420040.html

[b]Имруз, 12 декабри соли 2011 ТҶ «Журналист» дар толори «Вэфа-сентр» дар мавзӯи «Мутобиқгардонии стандартҳои давлатии таҳсилоти олии касбии ихтисосҳои журналистӣ ба низоми кредитии таҳсилот” мизи мудаввар баргузор менамояд.[/b]

Тибқи иттилои расида масъалаи аслии ин нишаст мусоидат ба таҳияи стандартҳои нави таҳсилоти журналистӣ ва бо ҳамин роҳ таъмини рақобатпазирии мутахассисони соҳа аст, ки дар доираи лоиҳаи “Мутобиқгардонии стандартҳои таҳсилоти олии касбӣ доир ба ихтисосҳои самти журналистӣ ба стандартҳои байналмилалӣ”, аз ҷониби Шӯъбаи ташкилоти байналмилалии Институти “Ҷамъияти Кушода”- Бунёди Мадад дар Тоҷикистон дастгирӣ ёфтааст, амалӣ мегардад. Гузариши макотиби олӣ ба низоми дузинагӣ ва таҳсилоти кредитӣ яке аз талаботи муҳим дар Созишномаи Болония (Италия с. 1999) аст. Ба хотири ҳамгунсозии низоми маорифи Ҷумҳурии Тоҷикистон бо системаи таҳсилоти кишварҳои дигар, бо мақсади воридшавии баробарҳуқуқ ба фазои таълимии байналмилалӣ ва суръат бахшидан ба ислоҳоти соҳаи маориф, Вазорати маорифи Ҷумҳурии Тоҷикистон бо Қарори №698 аз 22 сентябри с соли 2004 тасмим гирифтааст, ки донишгоҳҳои ҷумҳуриро тадриҷан ба низоми кредитии таҳсилот гузаронад.

Манбаъ афзуд, дар соли таҳсили 2008-2009 баъзе аз муассисаҳои таҳсилоти олии касбии ҷумҳурӣ, аз ҷумла Донишгоҳи миллии Тоҷикистон, Донишгоҳи давлатии Хуҷанд ба номи академик Б. Ғафуров, ки факултет ва шӯъбаҳои журналистика доранд, қисман ба низоми кредитии таҳсилот гузаштанд. Мутаассифона, муассисаҳои таҳсилоти олии касбии ҷумҳурӣ, ки ихтисосҳои журналистӣ доранд, бинобар фароҳам набудани шароиту имкониятҳои зарурӣ, дар гузариш ба ин низом ба мушкилоти зиёд рӯ ба рӯянд. Як мушкили умда то ҳанӯз мавҷуд набудани “Стандартҳои давлатии таълими ихтисосҳои журналистӣ” мувофиқи низоми кредитии таҳсилот мебошад.

Дар ҳамин ҳол, СҶ “Журналист” дар ҳамкорӣ бо роҳбарият ва устодони факултаву шӯъбаҳои журналистикаи донишгоҳҳо, Вазорати маорифи Тоҷикистон, журналистон ва коршиносони соҳа тасмим гирифтаанд, ки стандартҳои таҳсилотро дар ин соҳа омода карда, масъалаи мазкурро ҳал намоянд. Дар нишаст пас аз шунидани маърӯзаҳои мутасаддиён, коршиносон ва дастандаркорони татбиқи низоми кредитии таҳсилот, баҳсу мунозира, табодули афкор перомуни зарурати таҳияи “Стандарти давлатии таълимии ихтисосҳои журналистӣ” вобаста ба тақозои талаботи низоми кредитии таҳсилот сурат мегирад.Дар назар аст, ки барои омодасозӣ ва таҳияи Стандартҳои таълимии ихтисосҳои журналистӣ (ихтисоси “Журналистика” ва “Журналистикаи байналхалқӣ” ва тавсияҳо барои таҳияи стандартҳои дигар ихтисосҳои журналистӣ), гурӯҳҳои корӣ созмон дода шаванд. Ба мизи мудаввар ҳудуди 40 нафар коршиносон ва мутахассисони соҳа аз донишгоҳҳо, Вазорати маорифи Тоҷикистон, созмонҳои журналистӣ ва ВАО даъват гардидаанд.

Источник: Хадамоти мониторинги АМВАОМТ.

[b]Додгоҳи вилояти Суғд Муҳаммадюсуф Исмоиловро аз пардохти ҷарима ба маблағи 35000 сомонӣ озод кард.[/b]

Нуриддин Қаршибоев, раиси Анҷумани миллии расонаҳои мустақили Тоҷикистон бо таъйиди ин хабар бо Озодӣ гуфт, додгоҳ зимни баррасии шикояти хабарнигори «Нури зиндагӣ», ҳукми додгоҳи шаҳри Табошарро бидуни тағйир гузошт, аммо хабарнигорро аз пардохти ҷарима озод кард. Ҳамчунин ҳукми додгоҳ дар мавриди маҳрумият аз фаъолияти рӯзноманигориро низ дар нисбати Исмоилов лағв намуд.

Ин дар ҳолест, ки 14-уми октябр, додгоҳи шаҳри Табошар хабарнигори «Нури зиндагӣ» Муҳаммадюсуф Исмоиловро 35 ҳазор сомонӣ ҷарима баста ва аз толори додгоҳ озод кард. Қозии парванда ҳамчунин гуфта буд, ки Муҳаммадюсуф Исмоилов, хабарнигори «Нури зиндагӣ» наметавонад то се соли дигар ба фаъолияти рӯзноманигорияш идома бидиҳад.

Муҳаммадюсуф Исмоилов дар нахустин вокуниши худ ба ҳукми додгоҳ гуфта буд, ки аз он чандон розӣ нест ва аз болои ин ҳукм ба зинаҳои болоии додгоҳ шикоят хоҳад бурд.

Муҳаммадюсуф Исмоилов мегуфт, дар сурати бознигарӣ нашудани ҳукмаш дар додгоҳҳои кишвар, маҷбур мешавад ба додгоҳҳои байнулмилалӣ муроҷиат кунад.

Муҳаммадюсуф Исмоилов, хабарнигори «Нури зиндагӣ» тӯли ёздаҳ моҳ дар боздошт ба сар мебурд ва мақомот ӯро дар таҳқиру тавҳин, тамаъҷӯӣ ва маҳалгароӣ айбдор мекарданд.

Источник: http://www.ozodi.org/content/article/24414541.html

[b]Додгоҳи вилояти Суғд Муҳаммадюсуф Исмоиловро аз пардохти ҷарима ба маблағи 35000 сомонӣ озод кард.[/b]

Нуриддин Қаршибоев, раиси Анҷумани миллии расонаҳои мустақили Тоҷикистон бо таъйиди ин хабар бо Озодӣ гуфт, додгоҳ зимни баррасии шикояти хабарнигори «Нури зиндагӣ», ҳукми додгоҳи шаҳри Табошарро бидуни тағйир гузошт, аммо хабарнигорро аз пардохти ҷарима озод кард. Ҳамчунин ҳукми додгоҳ дар мавриди маҳрумият аз фаъолияти рӯзноманигориро низ дар нисбати Исмоилов лағв намуд.

Ин дар ҳолест, ки 14-уми октябр, додгоҳи шаҳри Табошар хабарнигори «Нури зиндагӣ» Муҳаммадюсуф Исмоиловро 35 ҳазор сомонӣ ҷарима баста ва аз толори додгоҳ озод кард. Қозии парванда ҳамчунин гуфта буд, ки Муҳаммадюсуф Исмоилов, хабарнигори «Нури зиндагӣ» наметавонад то се соли дигар ба фаъолияти рӯзноманигорияш идома бидиҳад.

Муҳаммадюсуф Исмоилов дар нахустин вокуниши худ ба ҳукми додгоҳ гуфта буд, ки аз он чандон розӣ нест ва аз болои ин ҳукм ба зинаҳои болоии додгоҳ шикоят хоҳад бурд.

Муҳаммадюсуф Исмоилов мегуфт, дар сурати бознигарӣ нашудани ҳукмаш дар додгоҳҳои кишвар, маҷбур мешавад ба додгоҳҳои байнулмилалӣ муроҷиат кунад.

Муҳаммадюсуф Исмоилов, хабарнигори «Нури зиндагӣ» тӯли ёздаҳ моҳ дар боздошт ба сар мебурд ва мақомот ӯро дар таҳқиру тавҳин, тамаъҷӯӣ ва маҳалгароӣ айбдор мекарданд.

Источник: http://www.ozodi.org/content/article/24414541.html

[b]Ташкилоти ҷамъиятии «Хома» бо дастгирии Институти «Ҷомеаи кушода», Бунёди Мадад дар Тоҷикистон, Мактаби олии журналистика дар назди Мактаби олии иқтисодии Россия ва Мактаби олии журналистикаи Молдова озмун барои иштирок дар лоиҳаи «Бунёди базаи тренерони миллии ВАО» эълон мекунанд[/b]

Лоиҳа ба рушди ВАО дар Тоҷикистон равона шуда, тавассути бунёди базаи тренерони касбӣ дар самтҳои зерин амалӣ мегардад: радио, ТВ, расонаҳои чопӣ ва он-лайн журналистика.

Барои бо омӯзиши ҳамаҷониба ва мувофиқ ба стандартҳои байналмилалӣ фаро гирифтани иштирокчиёни лоиҳа муаллимони баландихтисоси мактабҳои пешқадами журналистикаи давлатҳои собиқ шӯравӣ ҷалб шудаанд.

[b]Матни пурраи эълонро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/?page=events&id=3]http://www.taj.nansmit.tj/?page=events&id=3[/url]

Ташкилоти ҷамъиятии «Хома»

Источник:

[b]Рӯзи 1 декабр дар меҳмонхонаи Тоҷикистон маҷлиси навбатии солонаи Шӯрои ВАО-и Чумҳурии Тоҷикистон барпо гашт.[/b]

Иштироккунандагони маҷлис ҳисоботи раиси Шӯрои ВАО Тоҷикистон Зинатулло Исмоилов ва раиси комиссияи тафтишоти созмон Нуриддин Қаршибоевро шунида, перомуни онҳо баҳсу мунозира карданд.

Тавре раиси Шӯрои ВАО Тоҷикистон Зинатулло Исмоилов дар ҳисоботи худ қайд кард, миқдори созмонҳо ва воситаҳои ахбори эътирофнамудаи Меъёрҳои ахлоқии фаъолияти журналистӣ дар Тоҷикистон аз 15 адад афзуда, ба 72 расидааст.

Бо вуҷуди он, як идда воситаҳои ахбор, аз ҷумла «Миллат», «Нигоҳ» ва «СССР», ки дар ҷомеаи Тоҷикистон хонандагони зиёд доранд, то ҳол Меъёрҳои ахлоқи журналистро намеписанданд.

Дар фарҷоми маҷлиси солона аъзои нав ва раиси Шӯрои ВАО интихоб карда шуданд. Зинатулло Исмоило дар вазифаи раисӣ боқӣ монда, Мухтори Боқизода ва Қироншоҳи Шарифзода узви нави Шӯрои ВАО Тоҷикистон интихоб гардиданд.

Источник: Шабакаи мониторинги нақзи ҳуқуқи журналистон ва ВАО.

[b]Додгоҳи вилояти Суғд Урунбой Усмонов, хабарнигори бахши Осиёи Миёнаи Би-би-сӣ дар Хуҷандро рӯзи 14-уми октябри соли ҷорӣ дар иртибот бо тарафдорони Ҳизби таҳрир, як созмони мазҳабии мамнуъ муҷрим шинохта ва ӯро барои се сол маҳкум ба зиндон карда ва тибқи Қонуни афв аз иҷрои ин ҷазо муъоф карда буд.[/b]

Вале Ӯрунбой Усмонов ҳукми додгоҳро «ғайриодилона» унвон кард ва вакилони мудофеъи вай бо дархости табраъа шудани комили муваккилашон ба додгоҳи олӣ муроҷеъат карданд.

Аммо додгоҳи олии Тоҷикистон ин ҳукмро дуруст хонд. Абдуқаюм Юсупов, вакили мудофеъ Урунбой Усмонов гуфт, ки ҳукми додгоҳи истинофиро барои таҷдиди назар ба додгоҳи назоратии Додгоҳи олӣ ирсол хоҳад кард.

Вай гуфт: «Агар дар инҷо низ Урунбой Усмонов табраъа нашавад, мо ба Кумитаи ҳуқуқи башари Созмони миллали муттаҳид муроҷеъат хоҳем кард.»

Оқои Усмонов бидуни тағйир боқӣ гузоштани ҳукми додгоҳи вилояти Суғдро «ғайримунсифона» хонда ва бори дигар таъкид кард, ки ӯ бегуноҳ аст ва барои анҷоми фаъолияти хабарнигорӣ маҳкум шудааст.

Қаблан давлати Бритониё зимни истиқбол аз афв шудани хабарнигори Би-би-сӣ гуфта буд, дар заминаи ин, ки додгоҳ ӯро муҷрим шинохт, «тардидҳо дорад.»

Он замон Би-би-сӣ бо судури як баёния иброз дошт, ки ҳеҷ гуна шавоҳиде барои таъйиди иртикоби тахаллуфе аз сӯи оқои Усмонов дар ҷараёни додгоҳ пайдо нашудааст ва танҳо табраъаи комил ва бидуни маҳкумияти ин хабарнигор қобили қабул хоҳад буд.

Би-би-сӣ гуфта буд, ки аз ин хабарнигори худ, ки «мехоҳад ба додгоҳи таҷдиди назар барои дифоъ аз ҳайсият ва обрӯи худ шикоят бубарад» тарафдорӣ хоҳад кард.

Дар ҷаласаи додгоҳи истинофии Урунбой Усмонов сафири Бритониё дар Душанбе, раиси намояндагии Созмони Амният ва Ҳамкории Урупо дар Тоҷикистон ва раиси бахши озодии матбуъоти ин созмон ширкат доранд.

Ӯрунбой Усмонов 13 июни соли ҷорӣ аз сӯйи маъмурони амниятӣ дар шимоли Тоҷикистон боздошт шуд. Мақомоти амниятӣ ӯро дар иртибот бо Ҳизби Таҳрир муттаҳам карда буданд. Вай рӯзи 14 июл пас аз як моҳи боздошт ба дунболи дархостҳои байналмилалӣ таҳти шароити «берун нарафтан аз маҳалли зист» озод шуда буд.

Ҳизби Таҳрир, ки идаи бунёди хилофати исломиро дар минтақа дар барномаи худ ҷо додааст, аз суи ҳукуматҳои секулори кишварҳои Осиёи Миёна шомили феҳристи созмонҳои ифротӣ шуда ва мамнуъ эълом шудааст.

Дар ҷараёни муҳоқимаи додгоҳӣ оқои Усмонов ба қозии парванда гуфта буд, ки пас аз боздошташ дар рӯзи 13-уми июн дар боздоштгоҳ шиканҷа шудааст, аз ҷумла мавриди зарбу шатм қарор гирифта ва маъмурини амниятӣ ӯро маҷбур кардаанд, то эътирофотеро имзо кунад, ки барояш қироъат шуда буд.

Вакилони мудофеъи оқои Усмонов низ тамоми далоилеро, ки бозрасон ҷамъоварӣ кардаанд, «берун аз эътибори қонунӣ» хондаанд, зеро ба гуфтаи онҳо «ин далоил бо истифода аз шиканҷа ва бо нақзи муқаррароти тафтишу таҳқиқ ба даст оварда шудаанд.»

Источник: http://www.bbc.co.uk/tajik/institutional/2011/11/111128_mm_usmanov.shtml

[b]Имрӯз дар шаҳри Душанбе ҷаласаи Ассотсиатсияи истеҳсолкунандагон ва паҳнкунандагони маводи радиотелевизионӣ доир гардид. Тавре раиси Ассотсиатсия Зинатулло Исмоилов хабар дод, роҳбарони ВАО-и электронии мустақили кишвар аз шаҳри Душанбе, вилоёти Суғду Хатлон ва навоҳии тобеи марказ масоили вобаста ба рушди телевизион ва радиоҳои мустақилро баррасӣ намуданд.[/b]

Қайд гардид, ки муттаҳид намудани иқдомот бобати табодули ахбор, беҳтар намудани сифати барномаҳо, мушаххас намудани имконот ва зарфияти телевизион ва радиоҳои мустақил ҷиҳати гузариш ба пахши рақамӣ аз ҳадафҳои асосии Ассотсиатсия маҳсуб мегардад.

Дар ҷаласа роҳбарони ширкатҳои телевизиониву радиоии «Азия» ва «СМ-1»-и шаҳри Хуҷанд ва «Азия-плюс»-и шаҳри Душанбе изҳор доштанд, ки ба Ассотсиатсия ҳамроҳ мегарданд.

Ёдовар мешавем, ки Ассотсиатсияи истеҳсолкунандагон ва паҳнкунандагони маводи радиотелевизионӣ моҳи августи соли 2011 таъсис ёфта, муассисони он — ТВ «СМТ», ТВ «Регар», ТВ «Қӯрғонтеппа», ТВ «Мавҷи озод»-и Восеъ, ТВ 5 -и Конибодом, ТВ «Симо»-и Панҷакент ва ҶДММ «Ориёномедиа» мебошанд.

Нилуфари КАРИМ

Источник: http://tojnews.org/taj/index.php?option=com_content&task=view&id=20696&Itemid=30

[b]Додгоҳи олии Тоҷикистон шикояти Урунбой Усмонов, хабарнигори Би-би-сӣ дар Тоҷикистонро сарфи назар кард ва онро бетағйир гузошт.[/b]

Додгоҳи вилояти Суғд рӯзи 14 октябри соли ҷорӣ Урунбой Усмоновро ба се соли зиндон маҳкум кард, вале бо таваҷҷӯҳ ба иҷрои Қонуни афв ӯро аз толори додгоҳ озод намуда буд. Аммо хабарнигори Би-би-сӣ ин ҳукми додгоҳи вилояти Суғдро “ғайриодилона” хонда ва аз Додгоҳи олӣ хост, ки ӯро “сафед” намояд.

Ҳамзамон вакили мудофеи Урунбой Усмонов ба ин ҳукми Додгоҳи Олии Тоҷикистон эътироз намуда, гуфтааст, ки ба Раёсати додгоҳи олии Тоҷикистон- охирин марҳилаи баррасии парвандаҳо шикоят хоҳанд бурд.

Худи Урунбой Усмонов низ ҳар гуна ҳамкорӣ бо гурӯҳи мамнӯи “Ҳизби Таҳрир”-ро рад карда ва мегӯяд, ки барои «сафед» шудани худ то охир мубориза хоҳад бурд. Вай мегӯянд, сӯҳбату дидорҳояш бо аъзои “Ҳизби Таҳрир”, на ба маънои ҳамкорӣ ва ё таблиғи ин гурӯҳ, балки дар пайи адои кори хабарнигорияш будааст.

Пас аз ҳукми додгоҳи вилояти Суғд ҳарчанд Би-би-сӣ низ аз раҳоии хабарнигораш истиқбол кард, вале гуфта буд, ки ҳамчунон барои барқарории номи неки Урунбой Усмонов ба унвони хабарнигор ва нависанда талош хоҳад кард.

Дар ин робита Питер Ҳорокс, раиси барномаҳои ҷаҳонии хабарии Би-би-сӣ, пас аз судури ҳукми додгоҳи вилояти Суғд гуфта буд, ки «мо ба дифои худ аз Урунбой идома хоҳем дод ва умедворем, ки таҷдиди назар дар бораи ҳукми додгоҳ номи неки ӯро ба унвони як нависанда ва рӯзноманигори шинохта барқарор хоҳад кард.»

Урунбой Усмонов, хабарнигори бахши узбакии Би-би-сӣ моҳи июни соли ҷорӣ аз сӯи маъмурони амниятии ин вилоят боздошт шуда, тӯл як моҳ дар боздоштгоҳ ба сар бурд. Баъдан, таҳти фишори созмонҳои маҳалливу байнулмилалии ҳомии хабарнигорон раҳо шуд.

Оқои Усмонов дар ҷараёни баҳси парвандааш дар додгоҳи вилояти Суғд гуфт, ки ҳангоми боздошташ аз сӯи маъмурони амниятии вилоят таҳти фишор ва шиканҷаву бадрафторӣ қарор гирифтааст.

Источник: http://www.ozodi.org/content/article/24405235.html

[b]Додгоҳи олии Тоҷикистон ба баррасии шикояти Урунбой Усмонов, хабарнигори бахши узбакии Би-би-сӣ оғоз намуд.[/b]

Урунбой Усмонов ва вакилони дифои ӯ ба Додгоҳи олии Тоҷикистон шикоят бурда, хостори бознигарии ҳукми додгоҳи вилояти Суғд шудаанд, ки оқои Усмоновро ба ҳамкорӣ бо гурӯҳи мамнӯи “Ҳизби Таҳрир” муҷрим шинохт.

Додгоҳи вилояти Суғд рӯзи 14 октябри соли ҷорӣ Урунбой Усмоновро ба се соли зиндон маҳкум кард, вале бо таваҷҷӯҳ ба иҷрои Қонуни афв ӯро аз толори додгоҳ озод намуд. Аммо хабарнигори Би-би-сӣ ин ҳукми додгоҳи вилояти Суғдро “ғайриодилона” медонад ва аз Додгоҳи олӣ хостааст, ки ӯро “сафед” намояд.

Ӯ ҳамкорӣ бо гурӯҳи мамнӯи “Ҳизби Таҳрир”-ро рад карда ва мегӯяд, ки сӯҳбату дидорҳояш бо аъзои “Ҳизби Таҳрир”, на ба маънои ҳамкорӣ ва ё таблиғи ин гурӯҳ, балки дар пайи адои кори хабарнигорияш будааст. Ҳарчанд Би-би-сӣ низ аз раҳоии хабарнигораш истиқбол кард, вале гуфта буд, ки ҳамчунон барои барқарории номи неки Урунбой Усмонов ба унвони хабарнигор ва нависанда талош хоҳад кард.

Дар ин робита Питер Ҳорокс, раиси барномаҳои ҷаҳонии хабарии Би-би-сӣ, пас аз судури ҳукми додгоҳи вилояти Суғд гуфта буд, ки «мо ба дифои худ аз Урунбой идома хоҳем дод ва умедворем, ки таҷдиди назар дар бораи ҳукми додгоҳ номи неки ӯро ба унвони як нависанда ва рӯзноманигори шинохта барқарор хоҳад кард.»

Урунбой Усмонов, хабарнигори бахши узбакии Би-би-сӣ моҳи июни соли ҷорӣ аз сӯи маъмурони амниятии ин вилоят боздошт шуда, тӯл як моҳ дар боздоштгоҳ ба сар бурд. Баъдан, таҳти фишори созмонҳои маҳалливу байнулмилалии ҳомии хабарнигорон раҳо шуд.

Оқои Усмонов дар ҷараёни баҳси парвандааш дар додгоҳи вилояти Суғд гуфт, ки ҳангоми боздошташ аз сӯи маъмурони амниятии вилоят таҳти фишор ва шиканҷаву бадрафторӣ қарор гирифтааст.

Источник: http://www.ozodi.org/content/article/24405235.html