[b]Иттиҳодияи журнолистони Тоҷикистон (ИЖТ) аз аъзои ин ниҳод хостааст, аз шаҳодатномаи узвият барои бароварда сохтани ғараз ё манофеъи шахсӣ истифода накунанд.[/b]

Дар баёнияи ин созмон, ки рӯзи панҷшанбеи 12 апрел мунташир гардидааст, ҳушдор дода шудааст, рӯзноманнигоре, ки ба ҳамчунин амале даст мезанад, аз суфуфи Иттиҳодияи журнолистон ихроҷ хоҳад шуд.

Акбари Саттор, раиси Иттиҳодияи журнолистони Тоҷикистон, ба Би-би-сӣ гуфт, афзоиши мавориди фаровони сӯъистифода аз шаҳодатномаи узвияти ин созмон ва шикоёти зиёди намояндагони ниҳодҳои давлатӣ ва мустақил Иттиҳодияи журнолистонро ба иттихози иқдомоти сахтгирона водор кардааст.

Ба гуфтаи оқои Саттор, дар зарфи як соли ахир 12 мавриди истифодаи бархе аз рӯзноманигорон аз шаҳодатномаи ИЖТ бо мақосиди ғаразнок дар навоҳии Ашту Файзобод, шаҳрҳои Хуҷанду Душанбе ва манотиқи дигари Тоҷикистон сабт шудааст.

Вале ӯ аз бурдани асомии ин рӯзноманигорон ва ҷузъиёти мавориди сӯъистифода аз шаҳодатномаи ИЖТ худдорӣ кард.

Раиси Иттиҳодияи журнолистони Тоҷикистон таъкид кард, тибқи Ойинномаи ин созмон рӯзноманигорон ба ҳангоми муъаррифии худ бояд ба маҳалли корашон истинод кунанд, на ба Иттиҳодияи журнолистон.

Зафари Сӯфӣ, сардабири “Озодагон”, нашрияи мустақилли чопи Душанбе, аз ин иқдоми Иттиҳодияи журнолистон пуштибонӣ карда ва гуфт, сӯъиистифода аз санади журнолистӣ ба тамоюли хатарноке мубаддал шуда ва метавонад ба эътибори тахассуси рӯзноманигорӣ латмаи ҷиддӣ ворид кунад.

Оқои Сӯфӣ ба унвони мисол аз ҳодисае дар шаҳри Хуҷанди вилояти Суғд ёдовар шуд, ки дар авоили соли ҷорӣ иттифоқ афтода ва афроде аз шаҳодатномаи Иттиҳодияи журнолистон ба ғарази тамаъҷӯйӣ истифода кардаанд.

Вақте бар асоси шикоёти кормандони ниҳоди давлатӣ ин афрод аз ҷониби кормандони Кумитаи амнияти миллии Тоҷикистон дастгир шуданд, рӯшан шудааст, ки онҳо дар ҳеч нашрия ё ниҳоди журнолистӣ фаъъолият надошта ва шаҳодатномаи журнолистиро аз роҳҳои ғайриқонунӣ ба даст овардаанд.

Ба эътиқоди Қироншоҳ Шарифзода, раҳбари созмони мустақилли “Журналист”-и Тоҷикистон, дар солҳои нобасомониҳо дар ин кишвар дар даҳаи 1990 “иддаъе аз афроди нолоиқ ва тасодуфӣ ба суфуфи Иттиҳодияи журнолистони Тоҷикистон роҳ ёфта ва аз нуфузи ин созмон барои ғаразҳои шахсии худ истифода мекунанл.”

Ҳамчунин, оқои Шарифзода бурузи чунин вазъи номатлуб дар маҳофили рӯзноманигориро ба фаъъол набудани созмонҳои аввалияи Иттиҳодияи журнолистон дар манотиқи Тоҷикистон марбут хонд.

Зимнан, дар баёнияи Иттиҳодияи журнолистон аз аъзои ин созмон даъват шудааст, дар зарфи се моҳи оянда ба ин созмон дар бораи маҳалли кори худ иттилоъ дода ва ҳақулъузвияти худро пардохт кунанд. Дар ғайри ин сурат мавзӯъи ихроҷи ин афрод аз суфуфи Иттиҳодияи журнолистон матраҳ хоҳад шуд.

То ба ҳол, Иттиҳодияи журнолистон ва созмонҳои мустақилли журнолистии Тоҷикистон аз мавориди фишору таъқиби хабарнигорон аз ҷониби ниҳодҳои давлати ин кишвар шикоят карда ва барои бори аввал мавзӯъи сӯъиистифодаи рӯзноманигорон аз шаҳодатномаҳои журнолистӣ матраҳ мешавад.

Источник: http://www.bbc.co.uk/tajik/institutional/2012/04/120412_mm_journalists_union.shtml

[b]Додситонии кулл аз масъулони «Азия-Плюс» хостааст, IP-адреси афродеро ба додситонӣ супорад, ки дар матолиби ин сомона шарҳ менависанд.[/b]

Марат Мамадшоев, муҳаррири ҳафтаномаи «Азия-плюс» ин хабарро таъйид кард ва афзуд, ҳоло бо ин мавзӯъ ҳуқуқшиносони нашрия сарукор доранд ва тафсилоти бештар дода наметавонанд. «Азия-Плюс» аз сомонаҳои пешгоми Тоҷикистон аст, ки ҳамарӯза ҳаводиси Тоҷикистонро пайгирӣ мекунад ва аз як сол ба ин сӯ дар сомонаи он хадамоти баҳс низ роҳандозӣ шудааст.

Хонандагони сомона ҳангоми баррасии матни сомона, назарҳои интиқодии худро дар бораи ҳукумати Тоҷикистон ё афроди алоҳида низ ба лаҳни шадид баён мекунанд.

IP ё Internet Protocol нишонаи махсуси ҳар як ройона ё компютер аст, ки ҳангоми васл шудан ба шабакаи ҷаҳонии Интернет муайян мешавад. Дар ҳоли зарурат аз рӯйи чунин нишона метавон дарёфт кард, ки ин ё он шарҳ аз кадом компютер навишта ва фиристода шудааст.

Дар ҳамин ҳол масъулини васоити ахбори омма ин иқдоми додситониро хилофи Қонуни асосии Тоҷикистон хонда ва онро қадаме дар амри маҳдуд кардани озодии баён унвон карданд.

Нуриддин Қаршибоев, раиси НАНСМИТ гуфт: «Ба андешаи ман ин амали додситонӣ хилофи модаи 30-юми Қонуни асосӣ аст, зеро ҳар кас ҳуқуқ ба озодии сухан дорад. Дар сурати пайдо кардани IP-адресҳои корбарон, эҳтимоли таъқиб барои танқид аз ҷониби мақомоти ҳифзи ҳуқуқ бештар пайдо мешавад, ки ба маҳдуд шудани озодии баён ва озодии васоити ахбори омма дар Тоҷикистон оварда мерасонад».

Оқои Қаршибоев ба ин назар аст, ки корбарон бо зикри ному насаб ва суроғаи худ метавонанд андешаҳои худро баён доранд, зеро ин ҳуқуқро ба онҳо ҳам қонунгузориҳои миллӣ ва ҳам байналмилалӣ кафолат додааст.

Ин аввалин бор аст, ки додситонӣ дар Тоҷикистон барои шиносоӣ кардани назарнависон дар сайтҳои интернетӣ, муроҷиат кардааст. Аммо дар гузашта чанде аз мансабдорони давлати Тоҷикистон аз лаҳни тунди шарҳу форумҳо дар сомонаҳои интернетӣ шикоят кардаанд. Дар шаҳри баста шудани торнамоҳо дар аввали моҳи март раиси Хадамоти алоқаи Тоҷикистон Бег Зуҳуров гуфта буд, баъзеҳо Интернетро ба «бозори сиёҳ» табдил додаанд ва бе он ки зери номаҳои худ имзои ҳақиқияшонро гузоранд, чизе дилашон хоҳад менависанд.

Воқеан, дар чанд соли ахир навиштани назару шарҳҳо дар пайи матолиби сайтҳои интернетӣ маъмул шудааст. Бештари корбарони интернет аз дохил ва хориҷи Тоҷикистон бо номҳои мухталиф назари худро дар бораи фаълияти мақомоти давлатӣ ва мушкилоти ҷомеа баён медоранд. Дар ҳоле, ки онҳо имкони баёни андешаҳои худро аз тариқи расонаҳо надоранд.

Намояндагии Созмони Амният ва Ҳамкории Аврупо дар Тоҷикистон чанд моҳ пеш зимни як пажӯҳиш муайян карда буд, ки ширкати шаҳрвандони Тоҷикистон дар чунин баҳсу форумҳои интернетӣ ва одати навиштани андеша дар ҳошияи матолиб сатҳи озодии баёнро дар кишвар ба маротиб густариш додааст ва махсусан ҷавонон дар изҳори ақидаи худ ҷасуртар ва озодтар шудаанд. Ҳамзамон дар бархе аз шарҳу номаҳо зиёдаравӣ ва нақзи ҳуқуқи дигарон, таҳқиру тавҳин низ афзоиш ёфтааст.

Источник: http://www.ozodi.org/content/article/24544322.html

[b]Хабаргузории «Озодагон» дар мақомоти расмии Русияву Қазоқистон ва Қирғизистону Эрон сабти ном шудааст.[/b]

Хабаргузории «Озодагон» нахустин хабаргузории хусусии тоҷикист, ки дар ниҳодҳои давлатии бархе аз кишварҳои Шӯравии пешин ва хориҷ аз он сабти ном шуда, мақоми минтақаиро касб кардааст. Ин хабаргузорӣ, ки соли гузашта дар Тоҷикистон номнавис ва дар шабакаи ҷаҳонии Интернет торнамо (сайт)-и худро боз карда буд, акнун дар Русия, Қазоқистон, Қирғизистон ва ҳамчунин Эрон иҷозаи расмӣ барои фаъолиятро дарёфт. Ин хабаргузорӣ дар ҳоли ҳозир хабарҳоро бо забони тоҷикӣ ва русӣ нашр мекунад.»

[b]Зафари Сӯфӣ,[/b] муассиси хабаргузории «Озодагон», рӯзи 10-уми апрел дар сӯҳбати худ бо Радиои Озодӣ гуфт, «хабаргузории «Озодагон» дар хориҷ аз Тоҷикистон барои аввалин бор дар Қирғизистон сабти ном шуд ва ҳамин тавр баъд аз як соли фаъолият дар Тоҷикистон дар ҷойҳои дигар ҳам сабти ном гардид. Талош дорем, ки дар Узбакистон ҳам дафтари хабаргузорӣ сабти ном шавад. То чи ҳад муваффақ мешавем ё не, ҳоло номаълум аст, вале мунтазирем чун муроҷиат кардем.»

[b]Радиои Озодӣ: Ҳоло дар кадоме аз ин кишварҳо дафтари Шумо ба фаъолият оғоз кардааст?[/b]

[b]Зафари Сӯфӣ:[/b] «Дар Бишкек дафтари мо фаъол шудааст ва дар Маскав ҳам хабарнигори мо кор мекунад. Ҳоло дунболи он ҳастем, ки дар онҷо низ дафтари худро ифтитоҳ намоем ва дар Қазоқистон низ. Ба ҷуз аз ин дар Машҳад ҳам ду нафар намояндаи мо иҷозаи фаъолиятро дарёфт карда ва бо мо ҳамкорӣ мекунанд.»

[b]Радиои Озодӣ: Ба чӣ хотир хабаргузориро ба хабаргузории минтақаӣ табдил додед?[/b]

[b]Зафари Сӯфӣ:[/b] «Бубинед ҳоло ҳамаи ҷаҳон ба як самти ба ҳам наздикшавӣ ҳаракат дорад. Вале, мутаассифона, дар минтақаи мо — Осиёи Марказӣ мушоҳида мешавад, ки ҳамаи расонаҳо воқеан расонаҳои гурӯҳианд ва бештар дунболи манфиати ҳамин як гурӯҳ мераванд. Талоши мо бар ин аст, ки фаротар аз ин вазъият биравем. Яъне фаротар аз манфиати Тоҷикистон, фаротар аз манфиати Узбакистон ва дар маҷмӯъ битавонем манофеи ҳамаи кишварҳо муроот бишавад. Рисолати хабаррасонӣ бидуни пуштибонӣ аз манфиати ин ё он гурӯҳ анҷом бишавад. Манзурам, албатта, бештар ҳукуматҳост. Ҳоло ҳарчанд расонаҳои мо иддао мекунанд, ки мустақиланд, аммо бештар ҳукуматианд. Зеро аз ин ё он гурӯҳе аз ҳукумат пуштибонӣ мекунад. Гузориш ва ахборашон ба истилоҳ «думча» дорад. Мо мехоҳем, беғараз бошем.»

[b]Радиои Озодӣ: Дар шароите, ки вазъияти молиявии хеле аз расонаҳо рӯ ба вахомат ниҳодааст, тавони молиявии Шумо то ҳадде аст, ки намояндагиҳои Шумо дар ин кишварҳо ба таври собит фаъолият кунанд?[/b]
[b]Зафари Сӯфӣ:[/b] «Ҷиҳати молии ҳар лоиҳа муҳим аст, албатта, ба хотири давом овардани он. Дар ҳар сурат, мо барои ду сол барномарезӣ дорем, ки ин масоил мушкил пеш наоварад. Баъд аз онки минтақаӣ шуд, мо бо бозори рекламаи минтақа ва барномаҳое, ки хусусияти тиҷоратӣ доранд низ ҳамкорӣ хоҳем кард.»

[b]Радиои Озодӣ: Манзурам ин буд, ки сарпарастҳои Шумо вобаста аз ҳукуматҳо ва гурӯҳҳои алоҳида нестанд? [/b]

[b]Зафари Сӯфӣ:[/b] «Хушбахтона, «Озодагон» аз замоне ки ба фаъолият шурӯъ кард, ба ҳеҷ як ҳукумат ҳеҷ як гурӯҳ ва шахси дигар ба ҷуз аз муассисаш муталлиқ намебошад. Агар касе шубҳае дорад, бояд бигӯям, мо метавонем ҳар мавқеъ агар бихоҳем ба фаъолият идома бидиҳем ва дар ҳар мавқеъ қатъи фаъолият намоем. Шукри Худо тавоноие, ки ман дорам, тиҷорате, ки дорам имкон медиҳад дар ин муддати ба нақша гирифта бирасад. Аз назари маънавӣ командае, ки «Озодагон» ҷамъ кардааст, афродеанд, ки мехоҳанд бештар ба ватанашон хидмат кунанд. Афродаенд, ки идеяҳои фаромаҳалливу фарогурӯҳиву ҳатто фароқавмӣ доранд. Мардумеанд, ки мехоҳанд, дар ин минтақа озодӣ бошад, мардум дар рифоҳ ва зиндагии инсонвор дошта бошад.»

Источник: http://www.ozodi.org/content/article/24543577.html

[b]Хадамоти зиддиинҳисории Тоҷикистон ба «санҷиш»-и фаъолиятҳои рекламаваии се ширкати радио ва телевизиони мустақили Хуҷанд оғоз кардааст.[/b]

Ба қавли раҳбарони ду телевизион ва як радиои мустақил дар Хуҷанд — «Азия», «СМ-1» ва «Тироз», намояндагии Хадамоти зиддиинҳисорӣ (зиддимонополӣ)-и Тоҷикистон аз онҳо талаб кардааст, то дар бораи фаъолиятҳои рекламавии худ дар соли гузашта иттилоъ бидиҳанд. Илова бар ин, тақозо шудааст, ки бояд ширкатҳои мустақили радио ва телевизион дар Хуҷанд бояд ҳар моҳ чунин маълумотро ба мақомот пешниҳод кунанд.

Масъулони расонаҳо мегӯянд, талабҳои Хадамоти зиддиинҳисорӣ асрори соҳибкорӣ ва тиҷоратии онҳоро ошкор карда, ба фаъолияташон монеа эҷод хоҳад кард. Аъзамҷон Акбаров, мудири кулли телевизиони «Азия» гуфт, ин иқдоми навбатии мақомот ҷиҳати таҳти назорати шадид гирифтани кори васоити ахбори умуми мустақил аст. Ба бовари ӯ, чунин тафтишҳои ғайричашмдошт посухи мақомот ба фаъолтар шудани радиову телевизионҳои мустақил дар мавриди бозтоби мавзӯъҳои доғи рӯз будааст.
Аммо Тоҳир Ғафуров, раҳбари раёсати намояндагии Хадамоти зиддиинҳории Тоҷикистон дар Суғд сабаби тафтиши расонаҳоро ингуна шарҳ дод: «Ба мо супориш доданд, ки фаъолияти рекламавии телевизиону радиоҳо ва расонаҳои чопӣ, ки чӣ қадар реклама пахш кардаанду аз куҷо ва чӣ қадар маблағ ба даст овардаанд, тафтиш кунем. Ин чиз барои баромади роҳбарамон дар ҷаласаи машваратии Санкт-Петербург дар моҳи апрел лозим будааст.»

Вале коршиносон мегӯянд, ба ин «далел»-и намояндаи Хадамоти зиддиинҳисорӣ бовар кардан мушкил аст. Дар ҳоле ин ниҳод бо номаи расмӣ аз расонаҳо талаб кардааст, ки дар оянда низ маълумотнома дар бораи фаъолиятҳои рекламавии худро пешниҳод намоянд.

Ин дар ҳолест, ки дар оғози моҳи феврали соли ҷорӣ додситонии Хуҷанд бо ирсоли дархости расмӣ аз тамоми радиову телевизионхои Суғд дар бораи фаъолият ва манобеи молии онҳо низ маълумот талаб карда буд.

Муҳаббат Ҷӯраева, ҳуқуқшиноси созмони НАНСМИТ (Анҷумани миллии расонаҳои мустақили Тоҷикистон) дар Хуҷанд гуфт, дар ҳоли ҳозир тақозои расмии Хадамоти зиддиинҳисориро мавриди омӯзиш қарор додаанд. Аз назари Ҷӯраева, агарчӣ назорати иҷрои «Қонун дар бораи реклама» аз ҷониби ҳукумат бар дӯши Хадамоти зиддиинҳисорӣ аст, аммо дар ҳоле ки фаъолияти телевизион ва радиоҳои Суғд хусусияти монополӣ надорад, тақозои расмӣ аз онҳо дар бораи ҳар моҳ пешниҳод кардани маълумот дар бораи фаъолияти рекламавӣ мутобиқи Қонуни матбуоти Тоҷикистон «эҷоди монеа ба фаъолияти қонунии касбии журналистӣ»-и онҳо будааст. Дар ҳамин ҳол, раҳбарони бархе расонаҳо мегӯянд, тасмими ниҳоиро дар мавриди иҷрои дархости Хадамоти зиддиинҳисорӣ танҳо баъд аз анҷоми таҳқиқи НАНСМИТ хоҳанд гирифт.

Источник: http://www.ozodi.org/content/article/24533084.html

[b]Майкл Макфаул, сафири Амрико дар Маскав, изҳори тааҷҷуб кардааст, ки чӣ гуна матбуоти Русия аз ҳама барномаҳои ӯ огаҳ мешаванд.[/b]

Дипломати амрикоӣ дар саҳифаи худ дар «Твиттер» навиштааст, ҳар ҷое, ки наравад, хабарнигорони телевизиони НТВ-ро мебинад. Майк Макфаул бо тааҷҷуб навиштааст, ба ин хабарнигорон, кӣ барномаи кории ӯро медиҳад ва чӣ қонуне ба онҳо чунин корро иҷоза додааст. Лев Пономарёв, як фаъоли ҳуқуқи башари Русия гуфт, вақте сафири Амрико рӯзи панҷшанбе ба созмони онҳо омад, дар назди дар як гурӯҳ, ки либоси казакҳоро ба бар доштанд, худро хабарнигор муаррифӣ намуда ва сафирро 20 дақиқа суолпеч карданд. Майкл Макфаул аз хабарнигорон пурсид, ки чӣ гуна аз омадани ӯ ба инҷо хабардор шуданд, вале ҳеҷ посухе нагирифт.

Источник: http://www.ozodi.org/archive/news/20120330/538/538.html?id=24531911

[b]Ҳукумати Эрон кормандони хабаргузории “Ройтерз” дар Теҳронро аз ҳаққи фаъолият дар кишвар муваққатан маҳрум кардааст, зеро онҳо дар нашри як видео дар бораи духтарони варзишгари эронӣ ба хато роҳ додаанд.[/b]

“Ройтерз” аввал ба видео дар бораи духтароне, ки ба усули муҳорибаи нинзя машғуланд чунин ном гузоштааст, ки дар Эрон садҳо зани нинзяро ба ҳайси қотил омода мекунанд. Баъдан унвони видеоро тағйир доданд, ки дар Эрон се ҳазор зан нинзя машқ мекунанд. Вазорати фарҳанг ва иршоди исломии Эрон бо раҳбари дафтари “Ройтерз” дар Теҳрон дар тамос шуда ва баъдан аз 11 корманди он хостааст, то иҷозаномаҳояшонро пас бидиҳанд. “Ройтерз” мегӯяд, сардабири хабаргузорӣ масъаларо бо мақомоти Эрон баррасӣ мекунад ва умедвор аст, ин мушкил ҳал хоҳад шуд.

Источник: http://www.ozodi.org/archive/news/20120330/538/538.html?id=24531929

[b]Дар шаҳри Панҷакент, нахустин шабакаи радиоӣ бо номи «Садои Панҷакент» рӯи мавҷи 101, 5 ФМ ба фаъолият оғоз кардааст.[/b]

Ин шабака ғайридавлатӣ буда, аммо ташабускорони он раҳбарияти садо ва симои шаҳри Панҷакент ва ҳукумати иҷроии ин шаҳр ҳастанд.

Аббос Ҳамроҳзода, яке аз масъулони шабакаи «Садои Панҷакент» дар сӯҳбат бо РО гуфт, ҳадафи аслии таъсиси ин шабакаи радиоӣ, таъмини фазои иттилоотии минтақа ва аз ин тариқ ҷилавгирӣ аз пахши барномаҳои шабакаҳои радиоии кишварҳои ҳамсоя, ба хусус Узбакистон аст, ки мардуми Панҷакент ба роҳатӣ бархе аз ин шабакаҳоро мешунавад.

Ин дар ҳолест, ки ба таъкиди Ҳамроҳзода, доираи пахши ин шабакаи радиоӣ то 100 км-ро дар бар гирифта ва ҳатто бархе аз деҳаҳои наздимарзии Узбакистон низ имкони қобили дастрасӣ ба барномаҳои ин шабакаҳоро хоҳанд дошт. Ҳамроҳзода мегӯяд, «садои Панҷакент» ҳамарӯза аз соати 8 субҳ то 18 -и шом барномаҳои хабарӣ, мусиқӣ- тафреҳӣ ва ташвиқотиро пахш мекунад.»

Ин ҳам дар ҳолест, ки бархе аз сокинони шаҳри Панҷакент аз фаъол шудани нахустин шабакаи радиоӣ дар ин минтақа истиқбол карданд.

Искандари Раҳмон, сокини Панҷакент ба РО гуфт, «таъсиси ин шабакаи радиоӣ аз ду ҷиҳат муфид аст. Аввалан, то имрӯз ба сабаби набудани радиои худӣ, сокинони Панҷакент ба осонӣ аз шабакаҳои радиоии кишвари ҳамсояи Узбакистон, назири радиои марказии Узбакистон ва шабакаи «Ёшлар» истифода мекарданд. Дуввум, пас аз он ки шабакаҳои телевизионии Тоҷикистон дар ҳудуди яку ним моҳи пеш ба пахши рақамӣ гузаштанд, мардум дастрасӣ ба расонаҳои худиро аз даст дод ва ин ба истилоҳ «болои сӯхта намакоб»-ро монд. Чун мардуми ташнаи хабару рӯйдодҳои Тоҷикистон аз ин ғизои маънавӣ маҳрум шуданд.»

Бо таваҷҷӯҳ ба ин вазъ Искандари Раҳмон мегӯяд, «Садои Панҷакент» дар канори барномаҳои хабарӣ ва мусиқиву тафреҳӣ, ҳамчунин мукотибае бо шунаванда доир кардааст, ки сокинон метавонанд дархостҳои худро ироа кунанд.

Ҳарчанд «Садои Панҷакент» як шабакаи ғайридавлатӣ маҳсуб меёбад, иддае бар ин боваранд, ки ин радио вобастаи ҳукумати иҷроияи шаҳри Панҷакент аст ва наметавонад тамоми назару андешаи озоди мардумро пахш кунад.

Аммо Аббос Ҳамроҳзода, яке аз масъулони ин шабакаи радиоӣ мегӯяд, фаъолияти «Садои Панҷакент» дар чорчӯби қонуни асосӣ ва дигар қонунҳои вобаста ба ВАО сурат хоҳад гирифт ва талош хоҳад шуд, то он «пуле байни мардум ва ҳукумати иҷроия» бошад.

Зимнан, шаҳри Панҷакент дорои беш аз 160 ҳазор ҷамъият аст ва бо вилояти Самарқанди Узбакистон марзи муштарак дорад.

Аммо таъсиси шабакаи радиоии «Садои Панҷакент» дар водии Зарафшон дар ҳолест, ки дар чанд моҳи ахир чанд шабакаи дигари радиоӣ дар қисмати ноҳияҳои Ашту Исфара ва Конибодом, ки бо Узбакистон ва Қирғизистон ҳамсояанд, роҳандозӣ шуд.

Ин дар ҳолест, ки дар чанд соли пеш бархе аз хабарнигорон талош кардаанд, то бо кӯмаки фаннии созмонҳои байналмилалӣ шабакаҳои мустақили радиоиро дар манотиқи марзии Тоҷикистон бо кишварҳои ҳамсоя роҳандозӣ кунанд. Аммо ниҳодҳои давлатӣ барои фаъол шудани ин гуна шабакаҳо мухолифат карданд.

Ҳамакнун соҳибназарон мегӯянд, шояд маҳз хатароти пахши барномаҳои радио ва телевизиони кишварҳои ҳамсоя Тоҷикистонро водор кардааст, то дар заминаи таъмини амнияти иттилоотии хеш ба таври ҷиддӣ биандешад ва иқдомотеро, назири роҳандозии шабакаҳои ба истилоҳ «ғайридавлатӣ» дар манотиқи марзӣ мавриди иҷро бигузорад.

Масрур Абдуллоев.

Источник:

Хуршеди Атовуллоҳ, сардабири «Фараж» ба РО гуфт, ин даъват идомаи даъвои Файзиддин Азизов, сокини ноҳияи Рӯдакӣ, муовини раисии маҳаллаи ҷамоати Чоряккорон аст, ки қаблан ба додгоҳи ноҳияи Рудакӣ ва ноҳияи Фирдавсӣ муроҷиат карда ва посухи рад гирифта буд.

Хуршеди Атовуллоҳ мегӯяд, рӯзномаи «Фараж» ба сифати шахси юридикӣ дар мақоме сабт нашудааст ва он нашрияи Маркази тақиқоти журналистии Тоҷикистон буда ва даъвоҳо бояд дар баробари ин марказ бошад.

Даъвои Файзиддин Азизов алайҳи нашрияи «Фараж», марбут ба матлабе бо унвони «Даҳшат. Дар Рӯдакӣ «Мерседес» 22 000 доллар» будааст, ки моҳи августи соли 2011 нашр шуда ва мегӯяд ин матлаб обрӯ ва шаъну шарафи ӯро поин карда, ба ӯ зарари маънавӣ расондааст.
Ҷониби даъвогар барои ҷуброни зарари маънавӣ, аз нашрияи «Фараж» 500 000 сомонӣ хостааст.

Ҳодиса ба ин тартиб ҳаст, ки бар асари бархӯрди мошини Файзиддин Азизов бо худрави фарзанди муаллифи мақола Зевар Шарипова, қазияи онҳо ба додгоҳ кашонида мешавад. Оқои Азизов дар додгоҳ қимати мошини худро 13 ҳазор доллар нархгузорӣ мекунад ва ҷониби ҷавобгар ҳам омода будааст, ки 12 ҳазор доллар ҷубронпулӣ пардохт намояд. Аммо додгоҳ бар изофаи ҷубронпулӣ, инчунин беқурбшавии пул ва зарарӣ маънавиро «дастак» карда дар маҷмӯъ аз ҷавобгар пардохти 22 ҳазор долларро тақозо мекунад.

Хуршеди Атовуллоҳ, сардабири нашрияи «Фараж» гуфт, ба баррасӣ гирифтани ин парвандаи даъвоии шаҳрванд Азизов дар муқобили рӯзномааш аз ҷониби додгоҳи ноҳияи Исмоили Сомонӣ ғайриқонунӣ аст. Зеро ба гуфтаи ӯ, нашрияи «Фараж» дар ҳудуди ин ноҳия низ ба сифати шахси юридикӣ сабти ном нашудааст.

Аммо меафзояд оқои Атовуллоҳ, мо даъвати додгоҳи ноҳияи Исмоили Сомониро рад накардем ва имрӯз ба додгоҳ рафта, бо аризаи даъвогӣ шинос шудем. Аммо ҷониби даъвогар бо сабаби беморӣ дар ин ҷаласаи шиносоӣ ширкат надоштааст.

Интизор меравад баррасии парвандаи даъвогӣ дар баробари нашрияи «Фараж» рӯзи 28-уми март дар додгоҳ шурӯъ шавад.

Дар зарфи ду ё се соли охир аксари нашрияҳои муҳими Тоҷикистон баҳсҳои додгоҳиро таҷриба карданд Даъвои Вазорати кишоварзӣ алайҳи нашрияи «Миллат» ва тақозои 1 миллион сомонӣ, даъвои 5 миллион сомонӣ товони се қозии додгоҳ алйҳи «Азия-Плюс», «Фараж» ва «Озодагон» ва даъвои «Тоҷикстандарт» алайҳи «Пайкон» аз пуровозатарини ин баҳсҳо дар ду соли охир аст.

Radio Ozodi

Источник: http://www.ozodi.org/content/article/24521320.html

Чанде аз хабарнигорони дохилӣ ва хориҷии ҷумҳурӣ аз шеваи баргузории ҷашни 100-солагии матбуоти тоҷик, изҳори нигаронӣ карда, онро як навъ ҷудоиандозии журналистон, ба «худиҳо» ва «бегонаҳо» донистаанд. Нуриддин Қаршибоев, роҳбари Анҷумани миллии васоити ахбори оммаи Тоҷикистон(АМВАОТ) низ бо пахши як изҳорот, чунин «тақсимкарданҳоро» ғайри қобили қабул дониста, аз чунин шеваи бархӯрд бо журналистон изҳори нигаронӣ кард.

Ин ҳам дар ҳоле, ки зимни мулоқот президент Эмомалӣ Раҳмон таъкид дошт, ки миёни расонаҳои гурӯҳии давлатӣ ва хусусӣ фарқе гузошта намешавад. Пас, чӣ боиси ин нигарониҳо шудааст? Боди ҷудоиандозиҳо аз куҷо мевазад? Кӣ аз ин манфиатбардор аст?

Барои ҷавоб ёфтан ба ин ва дигар суолҳо ОИ TojNews тасмим гирифт бо ҷаноби Нуриддин Қаршибоев як сӯҳбати виртулаӣ доир намояд.

[b]Матни пурраи сӯҳбати мачозииро бо пахш кардани нишонии зерин дар торномаи мо мутолиа кунед:[/b] [url=http://www.taj.nansmit.tj/analysis/?id=188]http://www.taj.nansmit.tj/analysis/?id=188[/url]

TojNews.org

Источник:

[b]Чанде аз хабарнигорони дохилӣ ва хориҷии ҷумҳурӣ аз шеваи баргузории ҷашни 100-солагии матбуоти тоҷик, изҳори нигаронӣ карда, онро як навъ ҷудоиандозии журналистон, ба «худиҳо» ва «бегонаҳо» донистаанд. Нуриддин Қаршибоев, роҳбари Анҷумани миллии васоити ахбори оммаи Тоҷикистон(АМВАОТ) низ бо пахши як изҳорот, чунин «тақсимкарданҳоро» ғайри қобили қабул дониста, аз чунин шеваи бархӯрд бо журналистон изҳори нигаронӣ кард.

Ин ҳам дар ҳоле, ки зимни мулоқот президент Эмомалӣ Раҳмон таъкид дошт, ки миёни расонаҳои гурӯҳии давлатӣ ва хусусӣ фарқе гузошта намешавад. Пас, чӣ боиси ин нигарониҳо шудааст? Боди ҷудоиандозиҳо аз куҷо мевазад? Кӣ аз ин манфиатбардор аст?

Барои ҷавоб ёфтан ба ин ва дигар суолҳо ОИ TojNews тасмим гирифт бо ҷаноби Нуриддин Қаршибоев як сӯҳбати виртулаӣ доир намояд.[/b]

[b]Масрури Асадуллоҳ[/b]

[b]1. Оё боре шудааст ки Саймурод Фаттоев ба ҳимояи ВАО-и мустақил як ҷумла гуфта бошад ё коре карда бошад?

2. Оё ин дуруст аст, ки гӯё Саидали Сиддиков-мудири шӯъбаи иттилооти Дастгоҳи президент дар гузашта корманди ҶММ «Чархи гардун» будаасту бо Акбари Саттор муносибати хуб надорад?

3. Чаро Фаттоев «Озодагон», «Фараж», «Миллат»-ро аз «Нигоҳ»-у «СССР» ҷудо кард? Бо ин кораш чӣ мехоҳад?

4. Баҳои Шумо ба Саймиддин Дӯстов- чун менеҷер ва роҳбари ВАО чӣ гуна аст?[/b]
Дуруд ба муштариёни TojNews! Барои фароҳам овардани боз як имконияти ибрози назари банда ба дастандаркорони ин сомона ташаккур мегӯям.

Қабл аз ҳама, аз ин қаноатманд ҳастам, ки мавзӯи матраҳшуда миёни муштариён суолҳои зиёд пайдо накардааст. Мутмаинам, ки аксари ҳамкасбони мо аз ҷомеаи журналистӣ дуруст дарк кардаанд, ки боди ҷудоиандозиҳо аз куҷо мевазад. Дарки ин маънӣ, қадами устуворе дар таҳкими ҳамраъйии журналистони Тоҷикистон аст

Ман мавқеи худро дар ин бора дар маводи интишорнамудаи «Азия плюс» «Не вбивайте клин в солидарность журналистов Таджикистана!» ([url=http://www.news.tj/ru/news/ne-vbivaite-klin-v-solidarnost-zhurnalistov-tadzhikistana]http://www.news.tj/ru/news/ne-vbivaite-klin-v-solidarnost-zhurnalistov-tadzhikistana[/url]) возеҳ шарҳ додам. Ин маводро беш аз 3100 муштарӣ нохун зада ба мазмунаш ошно шуда, 18 нафари онҳо шарҳи худро гузоштаанд, ки сарфи назар аз мавқеашон ман ба назари онҳо эҳтиром мегузорам.

Масрури азиз,

Хуб мешуд, ки суолатонро ба Саймурод Фаттоев мефиристодед ва ҷавобашро талаб мекардед. Шояд вай барои ҳимояи ВАО-и мустақил кореро анҷом дода бошад?

Фаттоев дӯсти ман аст, вале ҳақиқат болотар аз ӯст. Мо як донишгоҳро хатм кардаем, дар як нашрия солҳо кор кардаем, аз як дастурхон нон хӯрдаем.

Соли 2010, вақте вазъи матбуоти мустақил бинобар ҳодисаҳои водии Рашт муташанниҷ буд, муроҷиати дастачамъона ҳам кардем, ки як мулоқоти рӯ ба рӯ дошта бошем. Ҷавобе нагирифтем. Дар дигар маҳфилу конфронсу ҷаласахои журналистон ширкат намеварзад. Мушовирони давлатии пешин дар робита бо ҷомеа ва журналистон фаъолтар буданд.

Дар ҳақиқат Саидалӣ Сиддиқов солҳои тӯлони ҳамчун муҳаррири «Вечерный Душанбе» корманди ҶДММ «Чархи гардун» буд. Ман дар бораи муносибати миёни Саидалӣ Сидиқов ва Акбари Саттор чизе намедонам. Биёед, фазои иттилоотиро ба ғайбат пур нанамоем. Суоли дигаратонро низ бо ҳамин сабаб беҷавоб мегузорам, зеро дар бораи ҷудоиандозии дӯстам далелу бурҳони қотеъ пешниҳод накардед. Ман омода хастам, ки масоили марбут ба рушди матбуоти мустақил ва озодии ВАО-ро дар маҳфили рӯ ба рӯ бо масъулини Дастгоҳи иҷроияи Президенти ҶТ баррасӣ намоям.

Дар зимн, ба фаъолияти Саймуддин Дӯстов — ҳамчун молик, роҳбар ва менеҷери ВАО баҳои баланд медиҳам, зеро ӯ тавонист дар панҷ соли охир мавқеи худ ва расонаҳояшро дар фазои иттилоотии Тоҷикистон пайдо ва устувор намояд.

[b]Наботов Сиёвуш

1. Ҷаноби Нуриддин Қаршибоев Шумо аз фармони Президент дар хусуси таъғирот ба кодекси ҷиноятии Ҷумҳурии Тоҷикстон, ки ҷавобгарии жураналистонро нисбатан сабук пешбинӣ мекунад, чӣ таасуроте бардоштед?[/b]

Мӯҳтарам, Сиёвуш,

Президенти Тоҷикистон дар хусуси таъғирот ба Кодекси ҷиноятии Ҷумҳурии Тоҷикстон, ки ҷавобгарии журналистонро нисбатан сабук пешбинӣ мекунад, фармоне имзо накардаанд. Фақат дар ҷаласаи идона бахшида ба рӯзи Иди матбуот, аз ваколатҳои конститутсионии худ истифода бурда ба Вазорати адлия супориш доданд, ки масъалаи ғайриҷиноӣ намудани (декриминализатсияи) моддаҳои 135 ва 136 Кодекси ҷиноятии Тоҷикистон, ки ба тӯҳмат ва таҳқир марбут аст, баррасӣ намояд. Ин иқдом қобили дастгирист, зеро созмонҳои рӯзноманигорию ҳимояи ҳуқуқи инсон солҳост, ки амалро тақозо доранд.

[b]2.Баъд аз содир шудан ва қуваи қонунӣ пайдо кардани фармони нави Президент, ки дар боло зикр кардам, муносибати мансабдорон ва журналистон нисбати Фармони №622- ро чигуна арзёбӣ хоҳед кард?[/b]

-Ба андешаи ман, ғайриҷиноӣ намудани васоили тӯҳмат ва таҳқир бо баланд гаштани масъулияти мансабдорони давлатӣ мусоидат мекунад, зеро онҳо аз истифодаи фишангҳои маъмурӣ маҳрум мегарданд. Вале чизи дигар боиси изтироб аст, ки дар Тоҷикистон маъмулан зерсанадҳои ҳуқуқиро аз қонун боло мегузоранд, ки ин волоияти қонунро дар кишвар зери шубҳа мебарад. Агар мансабдорони давлатӣ, ҳамзамон журналистон дар чаҳорчӯбаи қонун амал карданро биомӯзанд, ҳоҷат ба қабули қарору фармонҳои иловагӣ намемонад, зеро бузурге фармудааст: «Агар озод будан хоҳӣ, ғуломи қонун бош!».

[b]Шахриёр[/b]

[b]Салом. Ба шумо ду савол дорам:

а) Фикр намекунед, ки агар нафарҳое ҳам нияти ҷудоиандозӣ доштанд, ранҷиши шумо ва чанд рӯзноманигори дигар онҳоро ба мақсад наздиктар кард?

б) Ба зиёфати Акбари Саттор меравед?[/b]

Бино бар гуфтаҳои боло, дар ҷавоби суоли аввали Шаҳриёри азиз ҳаминро зикр карданиам, ки нияти тафриқаандозон, ки холис набуд, ба мақсад нахоҳанд расид! Баръакс, мо бояд алорағми аъмоли онҳо ҳамраъйю муттаҳид бошем, бино бар ин аз ҳамкасбонамон тақозо дорем, ки манфиати ҷомеаро аз манофеи шахсию гурӯҳӣ боло гузорем! Созмоне, ки ман раҳбараш ҳастам бо давлати Тоҷикистон, роҳбарияти волои он мушкиле надорад, зеро дар чаҳорчӯбаи қонунгузории кишвар ва меъёрҳои ҳуқуқи байналмилалӣ фаъолият дорем. Агар кори мо ба чанд мансабдораке маъқул набошад, ин мушкили онҳост, зеро онҳо воқеияти имрӯзаро дуруст дарк карда наметавонанд. Ва барои ошкор намудани мавқею бозиҳои пасипардагии эшон, таҳкими озодии баён ва плюрализми воқеи дар ҷомеа, ки ҳуқуқи конститутсионии шаҳрвандони Тоҷикистон аст, журналистон бояд дар сафи пеш бошанд, зеро ин рисолати аслию касбиии мост.

Дар зиёфати Акбари Саттор будам, зеро ин як зиёфат не, чорабинии муштараки Иттифоқи журналистони Тоҷикистон ва идораи нашрияю созмонҳои журналистии кишвар буд. Хотиррасон мекунам, ки имсол бори аввал кӯшиши муттаҳид кардани воситаҳои ахбори оммаи давлатию мустақил ба назар мерасид. Вазорати фарҳанг бо Иттифоқи журналистон бо иштироки роҳбароини ВАО ва созмонҳои журналистӣ як комиссиюни муштараки тадорукот таъсис дода, нақшаи чорабиниҳои идона бахшида ба 100-солагии «Бухорои шариф» тартиб дода буданд. Вале дар марҳилаи охир бо супориши «боло» ҷашн ба таври дигар сурат гирифт, ки пайомадаш вокуниши дигар шуд.

Чорабинии 17 марти соли 2012, яке аз иқдоми тарҳрезишуда аз ҷониби комиссиюни муштараки тадорукот буд, ки пас аз як ҳафтаи ҷашни расмии садсолагии матбуоти тоҷикӣ алорағми ҷудоиандозон сурат гирифт.

[b]Уктами Чумазода

Салом Устод! Барраси ва таҳлил нишон дод, ки Фармони 622 -президенти кишварро ҳар мақомот ба таври худ ва бо фоизи муайян иҷро мекунад. Вобаста ба мушоҳида банда мақомотро дар иҷрои ин фармон ба 3 гурӯҳ тақсим кардам.

Гурӯҳи аввал фаъол буда, 80-100 фоиз иҷро мекунанд. Ба ин рӯйхат Вазорати адлия ва Шӯрои адлияро ворид намудан мумкин аст.

Гурӯҳи дуввум фармони 622-ро қисман иҷро мекунанд, аз ҷумла Кумитаи андоз

Ба гурӯҳи сеюм онҳое дохил мешаванд, ки Фармони мазкурро умуман иҷро намешавад. Ба ин гурӯҳ пеш аз ҳама Хадамоти алоқаи назди Ҳукумати ҷумҳурии Тоҷикистон ва Дастгоҳи президенти кишварро ворид намудан мукин аст. Аз рӯзи ба имзо расидани фармони 622 то ба имрӯз ягон маротиба надидаам, ки раиси хадамоти алоқа ақалан ба як маводи танқиди посух гуфта бошад.

Таҷрибаи чанд соли фаъолияти рӯзноманигори нишон дод, ки мардум танҳо дар ҳолате тариқи матбуот ба раиси ҷумҳурӣ муроҷиат мекунанд, ки агар ба доди онҳо дар дигар ҷо нарасида бошанд.

Чун охирин ва ягона умед эшон ба президент муроҷиат мекунанд. Вале ба як яке аз ин мактубҳо аз тарафи дастгоҳ посух дода намешавад. Шумо сабаби инро дар чӣ мебинед? Чаро ба мактубҳое, ки ба номи президент навишта мешаванд, дастгоҳи раиси чумҳур посух намегӯяд? Кӣ бояд аз болои фармони мазкур назорат барад?

Саволи дигар он аст, ки дар вохӯрии Президенти кишвар бо журналистон ному насаби аксар рӯзноманигорони ҳафтаномаҳои хусусӣ хат зада шудаанд. Сабаби инро Шумо дар чӣ мебинед?[/b]

Мӯҳтарам Ҷумъазода

Албатта, таҳлилҳои Шумо асосе доранд, зеро иҷро нагардидани талаботи Фармони Президенти Тоҷикистон дар бораи вокунишҳо ба маводи таҳлилию танқидии ВАО на фақат журналистонро ба ташвиш овардааст. Сардори давлат Эмомалӣ Раҳмон дар суханрониаш дар маҷлиси тантанавӣ бахшида ба 100-солагии матбуоти тоҷик таъкид намуд: «Ҷараёни иҷрои Фармони Президенти мамлакат «Дар бораи вокуниши шахсони мансабдор ба маводи танқидию таҳлилии воситаҳои ахбори омма» нишон медиҳад, ки на ҳамаи мансабдорон танқиди воситаҳои ахбори оммаро дуруст қабул мекунанд ва на ҳамеша аз он хулоса бароварда, ҷиҳати ислоҳи камбудиву мушкилоти ҷойдошта тадбирҳои зарурӣ меандешанд, — гуфт ӯ. — Баъзеҳо ҳатто ифшои камбудиҳои ин ё он соҳа ё ҳолатҳои ҷудогонаи ҳаёти ҷомеаро танқиди шахсияти худ пиндошта, изҳори норизоият ва ранҷиш мекунанд.

Илова бар ин, вокуниши баъзе шахсони мансабдор ба маводи танқидиву таҳлилии воситаҳои ахбори омма ба ҷузъ худсафедкунӣ ва бо чанд ҷумла аз сар соқит кардани масъала чизи бештаре нест».

Ба андешаи ман, масъулини Дастгоҳи иҷроияи Президенти Тоҷикистон дар вокуниши аслӣ ва вокеӣ ба маводи таҳлилию танқидии ВАО ибрати дигарон бошанд, зеро дар назди талаботи қонун ҳама баробар аст. Зиёда аз ин, назорати иҷрои ин фармон қисман ба ӯҳдаи онҳост. Ҳамзамон, ба риояи қонуният дар ҷумҳурӣ мақомоти прокуратура назорат мебарад. Ҳатто, мутобиқи талаботи меъёрҳои қонунгузории Тоҷикистон, гузоришҳои ВАО метавонанд барои оғоз намудани парвандаҳои ҷиноӣ нисбати масъулин асос бошанд. Дар сурати риоя нагардидани талаботи қонун, шаҳрванд ё ВАО метавонанд ба мақомоти марбута барои ҳимояиҳуқуқу манфиатҳои қонуниашон муроҷиат намоянд. Барои ин, пеш аз ҳама донистани қонун ва роҳҳои татбиқи он дар зиндагии ҳамарӯза лозим меояд, ки дар ин самт журналистон бояд боҷуръату собитқадам бошанд.

Дар масъалаи хат задании ному насаби журналистони ҳафтаномаҳои хусусӣ, беҳтар мебуд ба масъулини Дастгоҳи иҷроияи Президенти ҶТ суол медодед. Ман фақат фарзия худро мегӯям, ин ҳама аз эҳтиёткории беасоси онҳо сарчашма мегирад. Ҳамзамон барои онҳо «Тафриқа андозу ҳукмфармои намо!»- шиори мақбул аст. Ин мушкилоти онҳост!

Ба ҳамаи онҳое, ки аз пайи журналистӣ — ин касби душвор ва боифтихор нон мехӯранд, бурдборию комёбиҳо таманно дорам!

Источник: