Сармуҳаррири нашрияи Кумитаи ҷавонон ва варзиш — “Ҷавонони Тоҷикистон” Бахтовар Каримов овозаҳоро, ки гӯё “дар пайи баҳс бо раиси Кумита Аҳтам Абдуллозода пиромуни сиёсати эҷодии ҳафтанома” истеъфо додааст, рад кард.
Ӯ дар суҳбат бо Faraj.tj рӯзи 5 апрел гуфт: “Инҳо ҳама овоза ва «гапи занакҳои лаби об» ҳастанд. Касе, ки овозаҳоро паҳн кардааст, дурӯғ мегӯяд”.
— Ман дар мавзӯи “Жанрҳои журналистикаи радио, таҳаввулоти жанрӣ дар “Радиои Тоҷикистон” кори илмӣ дорам ва аз пушти он мешавам. Аз донишгоҳ талаб доранд, бояд онро тезтар ба охир расонам, — гуфт Каримов.
Ин дар ҳолест, ки бинобар хабарҳои паҳншуда, истеъфои сардабир пайи як баҳс бо раиси Кумитаи ҷавонон Аҳтам Абдуллозода, дар рӯзе сурат гирифтааст, ки «Ҷавонони Тоҷикистон” 88-солагии таъсисёбияшро таҷлил мекунад.
Каримов Бахтовар Абдураҳимович рӯзи 6-уми июли соли 2015 дар пайи тағйироти кадрии раёсати Васоити ахбори оммаи давлатӣ дар мувофиқаи президент Эмомалӣ Раҳмон сармуҳаррири рӯзномаи “Ҷавонони Тоҷикистон” таъйин шудааст. Ӯ то ба «Ҷавонони Тоҷикистон» омаданаш сармуҳаррири радиои «Садои Душанбе» буд.