Бо як тамоси телефонӣ ба faraj.tj Давлатбекова Гулнора аз рафтори ношоиста ва дағалонаи як нозири минтақавӣ дар ноҳияи Фирдавсӣ, ки барои фурӯши рӯзномаҳо монеагузорӣ кардааст, шикоят намуд.

Номбурда гуфт, се сол боз ба ин намуди фаъолият машғул аст, аммо маротибаи якум аст, ки шоҳиди чунин муносибати дағалона мегардад. Хонум Гулнора мегӯяд, ки дар пойтахт, назди мағозаи «Гарант»-и бозори Саховат ба фурӯши рӯзномаҳои гуногун машғул аст ва аз рӯи мушоҳидаҳояш эҳсос кардааст, ки муносибати нозирони ин минтақа тӯли ҳафтаи охир дигар шудааст ва акнун онҳо бо рафтори ношоиста ва қабеҳгуфторӣ кор мегиранд: «Гарчанде ман ба нозир муроҷиат кардам, ки муддатҳои тӯлонӣ дар ин нуқта ба фурӯши рӯзномаву маҷаллаҳо машғул ҳастам, вале ӯ намехост ба суханҳоям гӯш диҳад ва таҳдидомез гуфт, ки «дигар дар назарам натобӣ, набинамат дар ин ҷо»».

Давлатбекова Гулнора гуфт, ки илова бар ин, сабаби қатъ кардани савдояшро низ аз нозир пурсон шудааст, вале дар ин бора ҳам посухе нагирифтааст.

Дар хусуси шахсияти нозир ва ному насабаш ин фурӯшанда изҳори бехабарӣ кард ва гуфт, ки онҳоро ғоибона мешиносад, ки дар ҳамин минтақа нозир ҳастанд.

Ёдрас мешавем, ки чанде қабл ба фурӯши рӯзномаҳо дар назди «Автовокзал» ва аз он қабл дар марказ низ нозирони ин минтақаҳо монеагузорӣ карда, то ҳол сабаби ин амалашонро шарҳ надодаанд.

Абдукарим РАҶАБОВ

http://faraj.tj/news/5348-shikoyati-r1263znomafur1263sh-az-moneaguzorii-nozir.html