Созмонҳои фароҳамкунандагони Интернет ва ниҳодҳои хабарнигорӣ тасмим гирифтанд, ба манзури “худтанзимкунӣ дар истифодаи интернет” “Одобномаи шаҳрванди ҷомеъаи иттилоъотӣ” таҳия шавад.
Дар як ҳамоиши намояндагони Анҷумани фароҳамкунандагони Интернет, созмонҳои хабарнигорӣ, ниҳодҳои давлатӣ ва ҷомеъаи мадании Тоҷикистон, ки рӯзи панҷшанбеи 27 декабр дар шаҳри Душанбе баргузор шуд, барои таҳияи чунин санад гурӯҳи корӣ таъсис гардид.
Асомиддин Атоев, раиси Анҷумани фароҳамкунадагони Интернет ҳадафи ин одобномаро ҳифзи фарҳанги суннатӣ, риояти меъёрҳои ахлоқӣ ва одоби муошират дар шабакаи ҷаҳонии интернет арзёбӣ кард.
Ба гуфтаи оқои Атоев, одобнома як санади тавсиявӣ буда, бо истифода аз таҷрубаи одобу ахлоқ дар шабакаи Интернет дар кишварҳои пешрафта, аз ҷумла, Бритониё таҳия хоҳад шуд.
Гуфта мешавад, феълан дар шабакаҳои Интернет калимоти дашном, алфози қабеҳ ва таҳқир ба мушоҳида расида ва иддаи зиёди сокинони Тоҷикистон, бахусус, ҷавонон аз фарҳанги истифодаи интернет бархурдор нестанд.
Дар ҳамин ҳол, Нуриддин Қаршибоев, раиси Анҷумани Миллии Расонаҳои Мустақили Тоҷикистон гуфт, то ҳол дар ин кишвар наҳваи танзими фаъолияти интернет роҳандозӣ нашуда ва сойтҳои интернетӣ бидуни мусаваббаи додгоҳ ва ба дастури ниҳодҳои давлатӣ масдуд мешаванд.
Ба эътиқоди оқои Қаршибоев, бояд ин нукта низ дар “Одобномаи шаҳрванди ҷомеъаи иттилоъотӣ” ҷой дошта бошад.
Зимнан, дар соли ҷорӣ ба дустури шифоҳӣ ё аз тариқи паёмаки (SMS) Бег Зуҳуров, раиси Идораи мухобироти Тоҷикистон бархе аз сойтҳо масдуд ё дастрасӣ ба сойтҳо маҳдуд шуда буд.
Ахиран дар мавриди таҳияи феҳристи 131 сойт, ки Идораи мухобирот бастани онҳоро дар назар гирифтааст, хабарҳо пайдо шуданд. Аммо баъдатар масъулони ин идора ин хабарро такзиб карданд.
Дар ҳамин ҳол, бархе аз ширкаткунандагони ҳамоиш гуфтанд, муфоди марбут ба танзими фаъолияти шабакаҳои Интернет дар Тоҷикистон дар Консепсиюни амнияти иттилоотии ин кишвар, ки дар моҳи ноябри соли 2003 тасвиб шуда буд, вуҷуд дошта ва барои ворид кардани ин бахш ба одобнома зарурате нест.
Дар назар аст, гурӯҳи корӣ аз ҷумлаи намояндагони созмонҳои хабарнигорӣ, фароҳамкунандаи интернет, ниҳодҳои зирабти давлатӣ ва ҷомеъаи маданӣ пешнависи “Одобномаи шаҳрванди ҷомеъаи иттилоъотӣ”-ро таҳия карда ва барои баррасӣ ва тасвиб ба Шӯрои текнулуҷии иттилоотию иртибототии Раёсати ҷумҳурии Тоҷикистон ирсол кунад.
http://www.bbc.co.uk/tajik/news/2012/12/121227_mm_internet.shtml